កម្ពុជានឹងបើកទទួលភ្ញៀវទេសចរអន្តរជាតិឡើងវិញ នៅតំបន់មួយចំនួន នៃខេត្តព្រះសីហនុ និងខេត្តកោះកុង នៅចុងខែវិច្ឆិកា

ដោយ ម៉ៅ សុធានី
2021-10-27

កម្ពុជានឹងបើកទទួលភ្ញៀវទេសចរអន្តរជាតិឡើងវិញ នៅតំបន់មួយចំនួន នៃខេត្តព្រះសីហនុ និងខេត្តកោះកុង នៅចុងខែវិច្ឆិកា

អាជ្ញាធរខេត្តព្រះសីហនុ ឈូសសម្អាតខ្សាច់នៅឆ្នេរអូរឈើទាល កាលពីថ្ងៃទី១៨ ខែតុលា ឆ្នាំ២០២១។

រូប៖ ហ្វេសប៊ុករដ្ឋបាលខេត្តព្រះសីហនុ

កម្ពុជានឹងចាប់ផ្ដើមបើកទទួលភ្ញៀវទេសចរអន្តរជាតិឡើងវិញ នៅតំបន់ទេសចរណ៍មួយចំនួន គឺក្រុងព្រះសីហនុ កោះរ៉ុង នៃខេត្តព្រះសីហនុ និងតំបន់តារាសាគរ នៅខេត្តកោះកុង ចាប់ពីថ្ងៃទី៣០ ខែវិច្ឆិកាខាងមុខ។

ការបើកទទួលនេះ គឺអនុញ្ញាតឱ្យភ្ញៀវទេសចរអន្តរជាតិ ដែលបានចាក់វ៉ាក់សាំងគ្រប់ដូសហើយ ស្នាក់នៅ និងទស្សនាក្នុងតំបន់ ឬគោលដៅទេសចរណ៍សុវត្ថិភាពរយៈពេល ៥ថ្ងៃ ដោយមិនតម្រូវឱ្យធ្វើចត្តាឡីស័កក្នុងសណ្ឋាគារឡើយ។ ប៉ុន្តែភ្ញៀវទេសចរដែលមកក្នុងកម្មវិធីទេសចរណ៍វ៉ាក់សាំង តម្រូវឱ្យធ្វើតេស្តរហ័សរកអង់ទីហ្ស៊ែនកូវីដ១៩ នៅពេលមកដល់អាកាសយានដ្ឋាន។ ប្រសិនបើលទ្ធផលតេស្តអវិជ្ជមាន ភ្ញៀវទេសចរអាចដើរកម្សាន្ត ដោយសេរីនៅក្នុងតំបន់ ឬគោលដៅទេសចរណ៍សុវត្ថិភាព ដោយអនុវត្តតាមនីតិវិធីប្រតិបត្តិស្តង់ដារ និងវិធានសុវត្ថិភាពទេសចរណ៍។
ភ្ញៀវទេសចរត្រូវមានវិញ្ញាបនបត្របញ្ជាក់ថា គ្មានជំងឺកូវីដ១៩ ចេញក្នុងរយៈពេល ៧២ម៉ោងនៃជើងហោះហើរ និងព័ត៌មានអំពីប្រវត្តិធ្វើដំណើរ ១៤ថ្ងៃ មុនពេលចេញមកកម្ពុជា។ បន្ថែមពីនេះ ភ្ញៀវទេសចរទាំងនោះត្រូវកក់កន្លែងស្នាក់នៅ មានលិខិតធានារ៉ាប់រងសុខភាពសម្រាប់ការធ្វើដំណើរនិងការព្យាបាលជំងឺកូវីដ១៩ ជាដើម។

ពាក់ព័ន្ធនឹងចំនួនអ្នកស្លាប់ដោយសារជំងឺកូវីដ១៩ វិញ គឺបានកើនឡើងដល់ ២ពាន់ ៧៥៨នាក់ហើយ (២.៧៥៨) បន្ទាប់ពីមានអ្នកជំងឺ ៧នាក់ទៀតបានស្លាប់ កាលពីថ្ងៃទី២៧ ខែតុលា។
គិតត្រឹមព្រឹកថ្ងៃទី២៧ តុលា កម្ពុជាមានអ្នកកើតជំងឺកូវីដ១៩ ជាង ១១ម៉ឺន ៨ពាន់នាក់ (១១៨.១១១) ក្នុងនោះអ្នកជាសះស្បើយមានជិត ១១ម៉ឺន ៤ពាន់នាក់ (១១៣.៧៩១)។ ចំពោះការការចាក់វ៉ាក់សាំងបង្ការជំងឺកូវីដ១៩ វិញ ក្រសួងសុខាភិបាលប្រកាសថា គិតត្រឹមថ្ងៃទី២៦តុលា រដ្ឋាភិបាលចាក់ជូនពលរដ្ឋ ដែលមានអាយុ ៦ឆ្នាំឡើងទៅបានកាន់តែជិតសម្រេចផែនការ ១០០ភាគរយហើយ ក្នុងចំណោមអ្នកដែលត្រូវចាក់សរុបជិត ១៤លាននាក់៕