លោក សម រង្ស៊ី ថាកត្តាប្រសិទ្ធភាពនិងសុវត្ថិភាពទើបលោកគាំទ្រឲ្យពលរដ្ឋខ្មែរនាំគ្នាចាក់វ៉ាក់សាំងចិន
2021.04.11
ប្រធានស្ដីទីគណបក្សសង្គ្រោះជាតិលោក សម រង្ស៊ី ថាកត្តាប្រសិទ្ធភាពនិងសុវត្ថិភាពទើបធ្វើឲ្យលោកហ៊ានចេញមុខគាំទ្រឲ្យពលរដ្ឋខ្មែរនាំគ្នាចាក់វ៉ាក់សាំងចិន។
ថ្លែងសារតាមរយៈទំព័របណ្តាញសង្គមហ្វេសប៊ុករបស់លោកកាលពីថ្ងៃទី១១ ខែមេសា លោក សម រង្ស៊ី ថាក្នុងស្ថានការណ៍មួយដែលយើងមិនទាន់មាន់វ៉ាក់សាំងអ្វីផ្សេងទៀតដែលល្អប្រសើរជាងវ៉ាក់សាំងចិននេះ យើងត្រូវតែទទួលយកវ៉ាក់សាំងចិន៖ «វ៉ាក់សាំងចិននេះ គឺជាវ៉ាក់សាំងដែលយើងអាចទទួលយកបានពីព្រោះបើយើងមើលកត្តាសុវត្ថិភាព អត់មានតួលេខ អត់មានព័ត៌មានអ្វី ដែលបង្ហាញថា វ៉ាក់សាំងនេះ នាំមកនូវគ្រោះថ្នាក់នោះទេ។ ដូច្នេះសូមកុំឲ្យមានពាក្យចចាមអារាម ហើយបញ្ចប់ពាក្យចចាមអារាមថា វ៉ាក់សាំងនេះគ្រោះថ្នាក់អី វរៗគេប្រើវិធីនេះមកសម្លាប់យើងអីកុំ! កុំនឹកឃើញអ៊ីចឹងឲ្យសោះ! ពីព្រោះសម័យនេះ ប្រទេសចិនជាប្រទេសដែលមានកិត្តិយស និងចេះថែរក្សាកិត្តិយសរបស់ខ្លួនមិនអាចយកវ៉ាក់សាំងនេះ មកលេងសើចហើយមកសម្លាប់គេសម្លាប់ឯងនោះទេ។ បើមានការស្លាប់ដោយវ៉ាក់សាំងចិននេះ អាហ្នឹងយើងលឺហើយ យើងលឺគេកត់ត្រាលាតត្រដាង តែនេះវាអត់ វាអត់មានចំនួនអ្នកស្លាប់ណាធ្ងន់ធ្ងរ គួរឲ្យកត់សម្គាល់ហើយគួរឲ្យព្រួយបារម្ភ ងឿងឆ្ងល់អីទេ វាអត់! ពីសុវត្ថិភាពខ្ញុំយល់ឃើញថា អាចទទួលយកបាន។ បើពីប្រសិទ្ធភាពក៏អ៊ីចឹងដែរ បើទោះជាមិនបាន ៩៩% ឬ ១០០% ដូចវ៉ាក់សាំងអាមេរិក បើវ៉ាក់សាំងចិនមានប្រសិទ្ធភាព ៧០ ឬ ៨០ % ដូចវ៉ាក់សាំងនៅអឺរ៉ុបខ្លះ វ៉ាក់សាំងនៅប្រទេសខាងលិចខ្លះ ក៏មិនខ្ពស់ជាងហ្នឹងប៉ុន្មានដែរ ហើយក៏គេប្រើឬត្រៀមប្រើ។ ដូច្នេះក្នុងលក្ខណៈដែលមានប្រសិទ្ធភាពត្រឹមតែវ៉ាក់សាំងចិនឥឡូវ ក៏យើងអាចទទួលយកបានដែរ ព្រោះបើយើងមិនទទួលយកយើងអត់ការពារអ្វីបានទាំងអស់ គឺការពារសូន្យ។ បើការពារបានសូន្យភាគរយ បើជំងឺមកដល់គឺយើងឆ្លង»។
សារអំពាវនាវរបស់លោក សម រង្ស៊ី ធ្វើឡើងស្របពេលដែលតំណាងអង្គការសុខភាពពិភពលោក (WHO) ប្រចាំកម្ពុជាអ្នកស្រី លី អៃឡែន (Li Ailan) បានសរសេរសារអបអរសារទររដ្ឋាភិបាលលោក ហ៊ុន សែន ដែលបានចាក់វ៉ាក់សាំងជូនប្រជាជនបានចំនួន ១ លាននាក់ ត្រឹមថ្ងៃទី១១ ខែមេសា។
ប៉ុន្តែសាររបស់លោក សម រង្ស៊ី ដែលអំពាវនាវឲ្យពលរដ្ឋព្រមទទួលយកវ៉ាក់សាំងចិននេះត្រូវលោក ហ៊ុន សែន វាយបកមកវិញយ៉ាងចាស់ដៃ។ លោក ហ៊ុន សែន បានចេញសារបន្ទាន់កាលពីយប់ ថ្ងៃទី១១ ខែមេសា ដោយចោទលោក សម រង្ស៊ី ថាមានបំណងអាក្រក់ទើបជំរុញប្រជាជនឱ្យទទួលវ៉ាក់សាំងចិន ក្នុងពេលនេះ។ លោក ហ៊ុន សែន ថាលោក សម រង្ស៊ី ធ្វើនេះក្នុងបំណងឲ្យប្រជាពលរដ្ឋដណ្ដើមវ៉ាក់សាំងគ្នាតែប៉ុណ្ណោះ៖ «មិនមែនបំណងល្អរបស់វាទេ។ តែទិសដៅរបស់វាមានចំណុចផ្សេង គឺត្រង់ថា ជំរុញប្រជាជនឲ្យមកទទួលវ៉ាក់សាំងក្នុងពេលតែមួយដែលជាចំណុចដ៏អាក្រក់នៃពូជក្បត់ជាតិមួយនេះ»។
កន្លងមកកម្ពុជាតាមរយៈជំនួយផងនិងទិញផងមានវ៉ាក់សាំងបង្ការជំងឺកូវីដ-១៩ ចំនួនជាង ៣លាន១សែនដូស (៣,១២៤,០០០) ដូសដែលក្នុងនោះ ជិតបីលានដូស ជាវ៉ាក់សាំងរបស់ចិន គឺវ៉ាក់សាំងស៊ីណូហ្វាម (Sinopharm) និង ស៊ីណូវ៉ាក់ (Sinovac) និងជាងបីសែនដូសជាវ៉ាក់សាំងអង់គ្លេស ដែលផលិតនៅប្រទេសឥណ្ឌា។
វ៉ាក់សាំងចិនទាំងពីរមុខនេះកំពុងរង់ចាំសេចក្តីសម្រេចរបស់អង្គការសុខភាពពិភពលោក (WHO) ដែលគ្រោងនឹងចេញនៅចុងខែមេសានេះ។ កាលពីខែមីនា តំណាងក្រុមប្រឹក្សាជំនាញរបស់អង្គការសុខភាពពិភពលោកបានបង្ហើបថា វ៉ាក់សាំងចិនមានប្រសិទ្ធភាពចាប់ពី ៥ ០ ភាគរយដល់ជិត ៧០% ដែលគ្រប់តាមលក្ខខណ្ឌសម្រាប់ការប្រើប្រាស់។
ទោះជាយ៉ាងណា រដ្ឋាភិបាលទើបតែបានចេញអនុក្រឹត្យចាប់បង្ខំឲ្យមន្រ្តីរាជការទាំងអស់ ត្រូវតែចាក់វ៉ាក់សាំង ដែលភាគច្រើនជាវ៉ាក់សាំងចិនជាកំហិត។ អនុក្រឹត្យចាប់បង្ខំនេះ ធ្វើឡើងក្រោយពីមានព័ត៌មានជាច្រើនស្ដីពីពលរដ្ឋស្ទាក់ស្ទើរចិត្តក្នុងការចាក់វ៉ាក់សាំងចិន។ ស្របពេលគ្នានេះដែរ អ្នកផ្សាយព័ត៌មាន អំពីបញ្ហាវ៉ាក់សាំងចិនត្រូវអាជ្ញាធរចាប់ខ្លួនជាបន្តបន្ទាប់ ដោយរងការចោទប្រកាន់ថា ផ្សាយព័ត៌មានញុះញង់ និងបង្កចលាចលសង្គម។
ទោះជាយ៉ាងនេះក្ដី មន្រ្តីជាន់ខ្ពស់របស់មជ្ឈមណ្ឌលត្រួតពិនិត្យជំងឺ (CDC) របស់ចិនលោក ហ្កៅ ហ្វ៊ូ (GAO Fu) ថ្លែងក្នុងសន្និសីទសារព័ត៌មាន កាលពីថ្ងៃទី១០ ខែមេសា ដោយទទួលស្គាល់ថា វ៉ាក់សាំងចិនមានប្រសិទ្ធភាពទាប ដែលរដ្ឋាភិបាលចិនកំពុងពិចារណាចាក់លាយគ្នាដើម្បីបង្កើនប្រសិទ្ធភាពនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។