កូនប្រុសលោកមេឃុំស្រក ស្រុកកំពង់សៀម ខេត្តកំពង់ចាម ដែលកំពុងជាប់ឃុំដោយសាររឿងរ៉ាវក្តីក្ដាំរបស់នាង ស្រីមុំ មិនសូវមានសង្ឃឹមថា ខ្លួននឹងបានរៀនបន្តឲ្យបានខ្ពង់ខ្ពស់នោះទេ។ យុវជនរូបនោះលើកឡើងថា អាចត្រូវបោះបង់ចោលការសិក្សា ប្រសិនបើស្ថានភាពក្រុមគ្រួសារនៅតែស្ថិតក្នុងភាពលំបាក ពោលគឺឪពុកនៅតែបន្តជាប់ឃុំនៅពន្ធនាគារទៀតនោះ។
ក្រោយពេលឪពុកត្រូវជាប់ឃុំនៅពន្ធនាគារជិត ២ខែមក កូនប្រុសលោកមេឃុំ ស៊ាង ចែត ម្នាក់ក្នុងចំណោមកូនប្រុស ៥នាក់របស់លោក ហាក់អស់សង្ឃឹម។ អស់សង្ឃឹមព្រោះតែគិតថា នឹងមិនបានរៀនសូត្រទៅថ្នាក់ខ្ពស់ៗបន្តទៀតឡើយ ប្រសិនស្ថានភាពគ្រួសារមិនបានវិលត្រឡប់មកស្ថានភាពប្រសើរដូចដើមវិញទេនោះ។
និយាយមួយៗទាំងទឹកមុខស្រងូតស្រងាត់ និងទឹកភ្នែករលីងរលោងផងនោះ យុវជន ចែត ម៉េងឡុង រៀបរាប់ថា ក្រោយពេលក្រុមគ្រួសារជួបប្រទះបញ្ហានេះមក គ្រាដំបូងនៅពេលទទួលដំណឹងភ្លាម គាត់ចេះតែគិតច្រើនអំពីស្ថានភាពឪពុករហូត ហើយពេលខ្លះគេងមិនសូវលក់ឡើយ។ លើសពីនេះ ក្រោយពេលឪពុកត្រូវជាប់ឃុំ គាត់ហាក់គ្មានវិញ្ញាណនៅក្នុងខ្លួន ព្រោះបាត់សំឡេងឪពុកដែលតែងតែទូន្មានប្រៀនប្រដៅខ្លួនរហូត៖ « រាល់ថ្ងៃហ្នឹង យើងលក្ខណៈដូចជាបាត់បង់មេគ្រួសារមួយ ធ្វើឲ្យសេដ្ឋកិច្ចវាធ្លាក់ចុះអី។ អ៊ីចឹងវាខ្វះមុខខ្វះក្រោយ ឲ្យខ្ញុំរៀនរាល់ថ្ងៃអ៊ីចឹង »។
យុវជន ចែត ម៉េងឡុង បច្ចុប្បន្នមានអាយុ ១៧ឆ្នាំកំពុងរៀនថ្នាក់ទី១២ នៅសាលាឯកជនមួយក្នុងខេត្តកំពង់ចាម។ យុវជនរូបនេះរៀនបានចំណាត់ថ្នាក់ល្អបង្គួរនៅក្នុងថ្នាក់។ យុវជនដដែលបន្តថា ការប្រឡងនៅថ្ងៃខាងមុខនៅតែមានសង្ឃឹម បើទោះបីជាពេលនេះមានបញ្ហាចំពោះក្រុមគ្រួសារខ្លះក៏ដោយ។ លោកថា ក្រោយពេលឪពុកត្រូវបានគេឃុំខ្លួន ដំបូងគិតចង់ឈប់រៀនតែម្តង ប៉ុន្តែបន្ទាប់មកគិតឡើងវិញថា នឹងត្រូវរៀនឲ្យចប់ថ្នាក់ទី១២ ហើយបើសិនស្ថានភាពក្រុមគ្រួសារកាន់តែជួបការលំបាក ម៉េងឡុង នឹងសម្រេចចិត្តឈប់រៀនទៅជួយដឹកដំឡូង ដើម្បីរកចំណូលផ្គត់ផ្គង់ក្រុមគ្រួសារវិញ៖ « ចំពោះបញ្ហាហ្នឹង ខ្ញុំគ្រាន់តែស្នើសុំឲ្យរកយុត្តិធម៌ឲ្យគាត់ ដោះលែងឲ្យគាត់បានជួយរកស៊ីនៅផ្ទះ ដើម្បីជួយផ្គត់ផ្គង់គ្រួសារដើម្បីឲ្យរូបខ្ញុំឲ្យបានរៀនតបានខ្ពង់ខ្ពស់ដូចកូនគេដទៃទៀត »។
យុវជន ម៉េងឡុង ជាកូនប្រុសទី៣ ក្នុងចំណោមកូនប្រុសទាំង ៥នាក់ ហើយស្ទើររៀងរាល់ចុងសប្ដាហ៍ យុវជនរូបនេះតែងតែមកលេងស្រុកកំណើត ដើម្បីទៅលេងម្តាយ ឬបងប្អូន ព្រមទាំងដើម្បីបានថវិកាខ្លះមករៀន ជាដើម។
មេឃុំស្រក លោក ស៊ាង ចែត ត្រូវបានអង្គភាពប្រឆាំងអំពើពុករលួយ នាំខ្លួនកាលពីថ្ងៃទី២៤ មេសា ដើម្បីសាកសួរបន្តជុំវិញរឿងទឹកប្រាក់ ២លានរៀល ឬស្មើប្រមាណ ៥០០ដុល្លារ បម្រុងនឹងប្រគល់ឲ្យក្រុមគ្រួសារអ្នកនាង ខុម ចាន់តារាទី ហៅ ស្រីមុំ។ នៅថ្ងៃទី២៧ ខែមេសា សាលាដំបូងរាជធានីភ្នំពេញ បានសម្រេចបញ្ជូនមេឃុំ ស៊ាង ចែត ទៅឃុំខ្លួនបណ្ដោះអាសន្ននៅពន្ធនាគារព្រៃស ពាក់ព័ន្ធនឹងបទចោទសូកប៉ាន់សាក្សីតាមមាត្រា៥៤៨ នៃក្រមព្រហ្មទណ្ឌ ស្របពេលក្រុមគ្រួសារអ្នកនាង ខុម ចាន់តារាទី បដិសេធថា ប្រាក់នោះមិនមែនជាប្រាក់ដើម្បីសូកប៉ាន់គ្រួសារគាត់ដើម្បីឲ្យនាង ស្រីមុំ និយាយរឿងផ្សេងឡើយ ប៉ុន្តែជាប្រាក់មនុស្សធម៌ប៉ុណ្ណោះ ហើយក្រុមគ្រួសារនាង ស្រីមុំ ក៏មិនបានទទួលយកប្រាក់ទាំងនោះដែរ។
មិត្តរួមថ្នាក់ និងរួមបន្ទប់របស់ ម៉េងឡុង យុវជន ព្រុំ រស្មីសោភ័ណ សង្កេតឃើញថា តាំងពីឪពុកជាប់ឃុំមក ម៉េងឡុង ចាប់ផ្តើមខុសប្លែកពីធម្មតា។ មិត្តរួមថ្នាក់រូបនេះបន្តថា កាលពីមុន ម៉េងឡុង ជាមនុស្សរួសរាយ ចេះនិយាយលេងជាមួយមិត្តរួមថ្នាក់ ហើយតែងចេញទៅហូបចំណីចំណុកនៅខាងក្រៅនៅពេលម៉ោងសម្រាក ប៉ុន្តែក្រោយពេលគ្រួសារជួបបញ្ហា គឺសកម្មភាពទាំងនេះត្រូវបានកាត់បន្ថយ ហើយក្លាយជាមនុស្សឯកា៖ « តាំងពីប៉ារបស់គាត់ត្រូវបានគេចាប់ខ្លួន ការសិក្សារបស់គាត់ត្រូវធ្លាក់ចុះ រួចទៅគាត់ដូចជាគ្មានអារម្មណ៍នៅក្នុងខ្លួន ញ៉ាំបាយអីមិនសូវបាន។ ពេលទៅរៀនអី មើលទៅគាត់ដូចជាយ៉ាប់យ៉ឺនមែនទែនម៉ាហ៊ឹកហ្នឹង »។
មិត្តរួមថ្នាក់ដដែលបន្ថែមទៀតថា ក្រៅពីឥរិយាបថប្រែប្រួល ចំណែកការសិក្សាវិញ គឺមានចិត្តមិនស្ងប់ឡើយ ហើយមួយរយៈពេលខ្លីនេះ ការសិក្សាធ្លាក់ចុះទៀតផង។ សោភ័ណ និយាយថា ជារឿងគួរឲ្យស្ដាយនៅពេលដឹងថា មិត្តរួមថ្នាក់របស់ខ្លួនគ្រោងនឹងឈប់រៀន ក្រោយពេលប្រឡងចប់ថ្នាក់ទី១២ ដើម្បីជួយការងារគ្រួសារនោះ ពីព្រោះវាជាការបាត់បង់នូវធនធានមនុស្ស ស្របពេលគាត់បានប្រឹងប្រែងអស់រយៈពេលជាង ១០ឆ្នាំរួចមកហើយ។
លោក ស៊ាង ចែត ជាមេឃុំស្រក មកពីគណបក្ស សម រង្ស៊ី ជាប់ឆ្នោតកាលពីឆ្នាំ២០១២។ ក្រុមគ្រួសារមេឃុំរូបនេះ មានកម្រិតជីវភាពសមរម្យនៅក្នុងឃុំមានរថយន្តសម្រាប់ដឹកទំនិញពីរគ្រឿង។ ប៉ុន្តែក្រោយពេលលោក ស៊ាង ចែត ជាប់ឃុំ ក្រុមគ្រួសាររបស់លោកត្រូវរងផលប៉ះពាល់ដល់ជីវភាពរស់នៅ ពីព្រោះត្រូវបាត់បង់ប្រាក់ចំណូលប្រចាំថ្ងៃ ម្យ៉ាងត្រូវចំណាយប្រាក់ច្រើនដើម្បីផ្គត់ផ្គង់ការរៀនសូត្ររបស់កូនៗ ព្រមទាំងប្រាក់ចំណាយទៅលើលោក ស៊ាង ចែត ដែលកំពុងជាប់ឃុំនៅពន្ធនាគារ។
ប្រពន្ធលោក ស៊ាង ចែត អ្នកស្រី ស្រេង សុខឃឿន មានប្រសាសន៍ថា ដ្បិតតែឃើញមានឡានសម្រាប់ដឹកទំនិញពីរគ្រឿងក៏ដោយ ប៉ុន្តែជាប្រាក់ដែលអ្នកស្រីខ្ចីបុលពីធនាគារ ដើម្បីយកមករកស៊ីប៉ុណ្ណោះ ហើយនៅមិនទាន់ទូទាត់សងគេគ្រប់ចំនួននៅឡើយទេ។ អ្នកស្រីបន្តថា ស្របពេលការរកស៊ីលែងបានដូចពេលមុន ពីព្រោះកូនៗមិនដឹងពីរបៀបរកស៊ី និងបាត់ម៉ូយអស់ជាច្រើន បន្ទាប់ពីប្ដីត្រូវបានគេចាប់ខ្លួន។ ជាងនេះទៀត ការចំណាយកាន់តែច្រើន ចំណែកប្រាក់បៀវត្សរ៍ស្វាមីជាមេឃុំពីមុនមកនោះ គឺត្រូវបានគេកាត់ផ្តាច់ទៀតផង៖ « មិនដឹងជាធ្វើអីបន្តទៀតខែហ្នឹង ខ្ញុំពិបាកធ្វើចម្ការ អត់លុយអត់អីផង។ ជួលចម្ការគេខកហើយអត់លុយ ដាំដំឡូងដាំអីមិនទាន់បានដាំគេផង សព្វថ្ងៃ ហើយមិនដឹងដោះស្រាយរបៀបម៉េច ? ទៅយកលុយអង្គការ ក៏គេអត់ឲ្យទេ ព្រោះប្ដីអត់នៅ »។
នៅពេលលោក ស៊ាង ចែត ជាប់ឆ្នោតជាមេឃុំកាលពីឆ្នាំ២០១២ កូនប្រុសទី២ របស់លោកម្នាក់ បានសម្រេចចិត្តបោះបង់ចោលការសិក្សាក្រោយពេលបញ្ចប់ថ្នាក់ទី១២ ពីព្រោះតែឪពុកជាប់រវល់បម្រើការងាររដ្ឋ ហើយត្រូវការកម្លាំងដើម្បីជួយរកស៊ីផ្គត់ផ្គង់គ្រួសារ។
អ្នកស្រី សុខឃឿន បញ្ជាក់ថា បើទោះបីជាគ្រួសារជួបការលំបាកចំពោះមុខយ៉ាងណាក៏ដោយ ប៉ុន្តែអ្នកស្រីតាំងចិត្តថា នឹងឲ្យកូនប្រុសទី៣ រៀនបន្តនៅថ្នាក់មហាវិទ្យាល័យ ឬសាកលវិទ្យាល័យចប់ចុងចប់ដើម ជៀសវាងប៉ះពាល់អនាគតរបស់ក្មេង ម្យ៉ាងមិនចង់ឲ្យកូនប្រុសទីបី ត្រូវខកខានបន្តការសិក្សាដូចកូនប្រុសទីពីរទៀត។
សំណុំរឿងលោក ស៊ាង ចែត កំពុងដំណើរការតាមនីតិវិធី ស្របពេលក្រុមគ្រួសាររបស់លោកមេឃុំ និងប្រជាពលរដ្ឋនៅក្នុងឃុំជាច្រើន ព្រមទាំងម្តាយរបស់នាង ស្រីមុំ ផង បានអំពាវនាវឲ្យតុលាការដោះលែងលោក ស៊ាង ចែត ឲ្យបាននៅក្រៅឃុំ ដើម្បីមានពេលវេលាមកបម្រើក្រុមគ្រួសារ និងប្រជាពលរដ្ឋនៅឃុំរបស់ខ្លួនដូចដើមវិញ។
ទោះបីយ៉ាងណា មេធាវីការពារក្តីឲ្យលោក ស៊ាង ចែត គឺលោក សំ សុគង់ មានប្រសាសន៍នៅថ្ងៃទី១៣ មិថុនា ថា ខាងក្រុមមេធាវីលោកបានដាក់លិខិតទៅតុលាការ កាលពីថ្ងៃទី១ មិថុនា ដើម្បីស្នើសុំឲ្យដោះលែងកូនក្តីរបស់ខ្លួនបាននៅក្រៅឃុំ ប៉ុន្តែខាងលោកនៅមិនទាន់ទទួលបានការឆ្លើយតបពីតុលាការឡើយ។ លោកបញ្ជាក់ថា ប្រសិនបើតុលាការនៅតែមិនព្រមឆ្លើយតប ឬបដិសេធជុំវិញការស្នើសុំនេះ ខាងក្រុមមេធាវីលោក នឹងដាក់ពាក្យបណ្ដឹងទៅសភាស៊ើបសួរនៃសាលាឧទ្ធរណ៍ ដើម្បីសម្រេចជំនួសជុំវិញបញ្ហានេះ។
ក្ដីសុបិនរបស់ ម៉េងឡុង ចង់ធ្វើជាវិស្វករមួយរូបនៅថ្ងៃអនាគត ក្រោយពេលបញ្ចប់ការសិក្សា ប៉ុន្តែដោយសារឪពុកជាប់គុក ម៉េងឡុង ចង់បោះបង់ក្ដីសុបិននេះចោល ព្រោះខ្វះខាតជីវភាពគ្រួសារ និងដើម្បីយកពេលធ្វើការរកប្រាក់ផ្គត់ផ្គង់គ្រួសារវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។