អាជ្ញាធរក្រុងបាត់ដំបងរារាំងមិនឱ្យក្រុមព្រះសង្ឃជាង ១០អង្គសូត្រព្រះធម៌សម្ដែងមតិ ទាមទារមន្ត្រីសង្ឃខេត្តបាត់ដំបង ឱ្យផ្ដល់សិទ្ធិសេរីភាពពេញលេញដល់ព្រះសង្ឃ ដើម្បីបានចូលរួមធ្វើការងារនៅក្នុងសង្គម នៅរសៀលថ្ងៃទី២២ មិថុនា។ មន្ត្រីអង្គការសង្គមស៊ីវិល យល់ថា ការជួបប្រជុំគ្នានេះ ជាសិទ្ធិសេរីភាពរបស់ប្រជាពលរដ្ឋដោយស្របច្បាប់។
ការសូត្រព្រះធម៌របស់ក្រុមព្រះសង្ឃនេះ មានដាក់បដាផង ដែលមានខ្លឹមសារទាមទារឱ្យមន្ត្រីសង្ឃខេត្តបាត់ដំបងឈប់ធ្វើទុក្ខបុកម្នេញដល់ព្រះសង្ឃបន្តទៀត។ ក្រុមព្រះសង្ឃអង្គុយសមាធិសូត្រព្រះធម៌ព្រះពុទ្ធសាសនានៅបរិវេណវត្តពោធិ៍វាល ក្រុងបាត់ដំបង។
តំណាងក្រុមព្រះសង្ឃជួយព្រះសង្ឃខេត្តបាត់ដំបង ព្រះតេជព្រះគុណ ជិន សុចាន់ មានថេរដីកា ថា ការសូត្រព្រះធម៌នេះ ដើម្បីដាក់សម្ពាធដល់ព្រះមេគណខេត្តបាត់ដំបង ឱ្យផ្ដល់សិទ្ធិសេរីភាពជូនដល់ព្រះសង្ឃ ដើម្បីឱ្យបានចូលរួមធ្វើការងារនៅក្នុងសង្គមដូចដើមឡើងវិញ៖ «ការធ្វើទុក្ខបុកម្នេញមកលើព្រះសង្ឃនេះ អាត្មាមើលឃើញថា វាជាសកម្មភាពមួយរឹតត្បិតសិទ្ធិ សេរីភាពព្រះសង្ឃក្នុងការចូលរួមសង្គម។ អាត្មាធ្លាប់អានសៀវភៅរបស់អាចារ្យ ហែម ចៀវ លោកថា ញាតិញោម គឺជាឆ្នាំបាយរបស់ព្រះសង្ឃ អ៊ីចឹងបើសិនញាតិញោមអត់មានអីហូបគ្រប់គ្រាន់ព្រះសង្ឃក៏លំបាកដែរ។ អ៊ីចឹងហើយដោយមើលឃើញទុក្ខលំបាករបស់ញាតិញោមខ្លះ សង្ឃក៏ចូលរួមសកម្មភាពហ្នឹងខ្លះ ដើម្បីចូលរួមចំណែកនៅក្នុងសង្គមជាតិផងដែរ » ។
ព្រះអង្គបន្តថា អាជ្ញាធរក្រុងបាត់ដំបងប្រមាណ ៣០នាក់ស្លៀកពាក់ស៊ីវិលចុះទៅយាយីរំខាន និងដកយកបដាចេញពីដៃរបស់ព្រះសង្ឃ ខណៈដែលព្រះអង្គកំពុងអង្គុយសមាធិសូត្រព្រះធម៌សម្ដែងមតិ។
អាស៊ីសេរីមិនអាចទាក់ទងអភិបាលក្រុងបាត់ដំបង លោក ផេង សុទ្ធី ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២២ មិថុនា ដោយទូរស័ព្ទចូលជាច្រើនដងត្រូវបានចុចផ្ដាច់វិញ។
ប៉ុន្តែតំណាងមន្ត្រីសង្ឃខេត្តបាត់ដំបង ព្រះតេជព្រះគុណ សួន ឈឿន មានថេរដីកាថា មូលហេតុ ដែលអាជ្ញាធរដកយកបដាចេញពីព្រះសង្ឃ ដោយសារក្រុមព្រះសង្ឃទាំងនោះធ្វើសកម្មភាពបែបបង្ហាញនៅក្នុងទីវត្តធ្វើឱ្យប៉ះពាល់ដល់សណ្ដាប់ធ្នាប់ក្នុងសង្គម។ ព្រះអង្គបញ្ជាក់ទៀតថា ការតម្រូវឱ្យព្រះសង្ឃធ្វើកិច្ចសន្យាកន្លងទៅ ពុំមែនជាការបិទសិទ្ធិសេរីភាពរបស់ព្រះសង្ឃនោះទេ ក៏ប៉ុន្តែជាការរក្សារបៀបរៀបរយនៅក្នុងវត្ត៖ «អ៊ីចឹងបានថា នៅក្នុងគោលបំណងរបស់មន្ត្រីសង្ឃក៏ដូចជារដ្ឋាភិបាល អត់ចង់ឱ្យមានពិធីអី ដែលប៉ះពាល់ដល់សាសនាអ៊ីចឹងទេ។ថ្ងៃក្រោយ បើចង់បានអីចង់សំណូមពរអី ដាក់លិខិតមកដល់សាលាគណចូលផ្ទាល់មក ស្រួលនិយាយពិភាក្សាគ្នាអត់ឱ្យដាក់ជាបដារូបភាពអី មើលទៅដូចជាធំធេងណាស់វាប៉ះពាល់ធ្ងន់ណាស់ » ។
ទោះជាយ៉ាងណាមន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា ការទាមទាររបស់ព្រះសង្ឃនេះកើតឡើងដោយសារមន្ត្រីសង្ឃខេត្តបាត់ដំបងមិនព្រមដោះស្រាយតាមការស្នើរបស់ព្រះសង្ឃ។ លោកបន្តថា ក្រុមព្រះសង្ឃធ្វើកូដកម្មពិតជារងការរឹតត្បិតសិទ្ធិសេរីភាពពីមន្ត្រីសង្ឃខេត្តនេះប្រាកដមែន៖ «អ៊ីចឹងការខិតខំប្រឹងប្រែងស្វែងរកសិទ្ធិសេរីភាពរបស់ព្រះសង្ឃដោយអហិង្សានេះ គឺពុំមានអ្វីខុសច្បាប់ទេ ហើយយន្តការដែលល្អនោះមេគណខេត្តគួរតែ អនុញ្ញាតឱ្យព្រះអង្គជួប ដើម្បីលើកឡើងនូវទុក្ខកង្វល់ ដែលព្រះអង្គមាន ហើយរួមគ្នាស្វែងរកដំណោះស្រាយថា តើឥឡូវយើងបានអី ហើយយើងធ្វើយ៉ាងម៉េច ដើម្បីឱ្យអាចដំណើរការទៅបាន ទាំងព្រះសង្ឃទទួលបាននូវសិទ្ធិសេរីភាព ហើយមិនមានប៉ះពាល់ដល់សង្គមក៏ដូចជាសាសនាដែរ » ។
កាលពីថ្ងៃទី១០ឧសភាព្រះចៅអធិការវត្តទួលតាឯក និងវត្តមួយចំនួនទៀតនៅក្រុងបាត់ដំបង បាននិមន្តព្រះសង្ឃចំនួន ៥អង្គ ក្នុងនោះព្រះសង្ឃ ៣អង្គហៅទៅព្រមាន និង ២អង្គទៀតបង្ខំឱ្យព្រះអង្គធ្វើកិច្ចសន្យាឱ្យឈប់ចូលរួមការងារសង្គមបន្តទៀត។ កាលពីថ្ងៃទី៩ ឧសភាក្រុមព្រះសង្ឃទាំងនោះបានចូលរួមការងារសង្គមជាមួយក្រុមយុវជន ថាវរៈ ចំនួន ៩នាក់ធ្វើកូដកម្មបង្អត់អាហារ និងធម្មយាត្រានៅក្រុងបាត់ដំបង ដើម្បីទាមទារឱ្យរដ្ឋាភិបាលជួយអន្តរាគមន៍ដល់ស្ថាប័នមីក្រូហិរញ្ញវត្ថុ និងធនាគារ ឱ្យពន្យារពេលសងបំណុលរបស់ពលរដ្ឋទៅស្ថាប័នទាំងនោះ ដោយសារពួកគាត់អត់ការងារធ្វើបណ្ដាលមកពីវិបត្តិជំងឺកូវីដ១៩ ហើយគ្រឹះស្ថានទាំងនោះនៅតែបន្តទារប្រាក់ពីពលរដ្ឋ។
ក្រុមព្រះសង្ឃតវ៉ាបានរំសាយការជួបជុំវិញនៅល្ងាចថ្ងៃដដែល បន្ទាប់ពីមន្ត្រីសង្ឃ និងអាជ្ញាធរពាក់ព័ន្ធនៅក្នុងខេត្តនេះ បានសន្យាថា មន្ត្រីសង្ឃខេត្តនឹងប្រជុំដោះស្រាយរឿងនេះនៅពេល ដែលព្រះមេគណខេត្តនិមន្តត្រឡប់មកពីរាជធានីភ្នំពេញនៅចុងសប្ដាហ៍នេះ។ ទោះជាយ៉ាងណាក្រុមព្រះសង្ឃតវ៉ា គ្រោងប្រមូលព្រះសង្ឃតវ៉ាជាថ្មីទៀតនៅពេលខាងមុខ ប្រសិនបើមន្ត្រីសង្ឃខេត្តមិនបានផ្ដល់សិទ្ធិសេរីភាពពេញលេញដល់ព្រះសង្ឃនោះ៕