ពលករខ្មែរនៅថៃប្រមាណ ៥០នាក់ប្រារព្ធទិវាពលកម្មអន្តរជាតិនៅទីក្រុងបាងកក
2019.05.01
ទិដ្ឋភាពពលករខ្មែរប្រារព្ធទិវាពលកម្មអន្តរជាតិ នៅក្រុងបាងកក ប្រទេសថៃ នៅថ្ងៃទី១ ខែឧសភា ឆ្នាំ២០១៩។
រូប៖ ពលករ
ពលករខ្មែរធ្វើការងារនៅប្រទេសថៃប្រមាណ ៥០នាក់នៅព្រឹកថ្ងៃទី១ ឧសភា បាននាំគ្នាចូលរួមប្រារព្ធទិវាពលកម្មអន្តរជាតិជាមួយពលករមកពីប្រទេសដទៃទៀត នៅទីក្រុងបាងកក។
តំណាងពលករខ្មែរម្នាក់ដែលបានចូលរួមក្នុងពិធីនេះ លោក វិន មករា ប្រាប់អាស៊ីសេរីនៅក្រោយបញ្ចប់កម្មវិធីថា ពិធីនេះបានផ្ដល់ចំណេះដឹងផ្នែកការសិទ្ធិពលករ ដែលធ្វើឱ្យអ្នកចូលមានភាពក្លាហាន និងហ៊ានតវ៉ាទាមទារសិទ្ធិសេរីភាពរបស់ខ្លួន ប្រសិនបើមានការរំលោភសិទ្ធិក្នុងពេលបំពេញការងារមកលើពួកគេ ពីសំណាក់ថៅកែថៃបាន និងដោយមិនមានការភ័យខ្លាច៖ «គឺធ្វើឱ្យពលករខ្មែរនៅប្រទេសថៃមានសិទ្ធិស្មើភាពគ្នាដូចជនជាតិថៃដែរ ពេលមានបញ្ហា ដូចជា ការរំលោភបំពានពេលថៅកែមិនបើកលុយប្រាក់ខែ និងបញ្ហាគ្រោះថ្នាក់ផ្សេងៗ ពេលបំពេញការងារជាដើម គឺខាងអង្គការសង្គមស៊ីវិលគេចុះមកជួយ ព្រោះធ្លាប់មានជាច្រើនករណីហើយដែលមានបញ្ហា ហើយអង្គការមកជួយពលករខ្មែររហូត»។
លោកបន្តថា ពិធីផ្ដួចផ្ដើមដោយអង្គការសង្គមស៊ីវិលផ្នែកការងារសិទ្ធិពលកររបស់ថៃ ដោយមានអ្នកចូលរួមប្រមាណ ៣ពាន់នាក់ រួមមានពលករខ្មែរ ភូមា ថៃ និងលាវ ដែលធ្វើការងារនៅប្រទេសថៃ។ លោកបន្ថែមថា ពលករខ្លះបានឡើងសម្ដែងមតិនៅលើវេទិកាអំពីសិទ្ធិសេរីភាពរបស់ខ្លួនដែលបានជួបប្រទះ ដោយមានកាន់ទង់ជាតិតំណាងឱ្យប្រទេសរៀងៗ ខ្លួន និងមានដើរហែជុំវិញទីកន្លែងរៀបចំពិធីនៅទីក្រុងបាងកក។ លោកថា ពិធីនេះជាលើកទី២ ហើយ ដែលពលករខ្មែរបានចូលរួមប្រារព្ធទិវាសិទ្ធិការងារអន្តរជាតិនៅប្រទេសថៃ ដែលឆ្នាំកន្លងទៅមានពលករខ្មែរប្រមាណ ២០នាក់ចូលរួម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- លោក ហ៊ុន សែន ស្នើចៅហ្វាយចាស់វៀតណាមឱ្យចាប់លោក សម រង្ស៊ី បើមេបក្សប្រឆាំងរូបនេះប្រើទឹកដីវៀតណាមចូលមកកម្ពុជា
- បទវិភាគ៖ តើចលនានយោបាយ សម រង្ស៊ីនិយម ដល់ទីបញ្ចប់ ឬនៅបន្ត?
អត្ថបទពេញនិយម
សិទ្ធិមនុស្ស
