រដ្ឋាភិបាល​ថា​អ.ស.ប​​ផ្នែក​សិទ្ធិមនុស្ស​ការពារ​អ្នក​រំលោភ​ច្បាប់​កម្ពុជា

ដោយ រាជ វិញ្ញូ
2017-09-14
អ៊ីម៉ែល
មតិ
Share
បោះពុម្ព
លោក ហ្សែត រ៉ាអេដ អាល់ហួសេន (Zeid Ra’ad Al Hussein) ឧត្ដម​ស្នងការ​អង្គការ​សហប្រជាជាតិ ទទួល​​ផ្នែក​សិទ្ធិ​មនុស្ស ថ្លែង​ក្នុង​ប្រជុំ​នៅ​អង្គការ​សហប្រជាជាតិ នា​ទីក្រុង​ហ្សឺណែវ (Geneva) ប្រទេស​ស្វីស (Switzerland) កាល​ពី​ថ្ងៃ​ទី៣០ ខែ​សីហា ឆ្នាំ២០១៧។
លោក ហ្សែត រ៉ាអេដ អាល់ហួសេន (Zeid Ra’ad Al Hussein) ឧត្ដម​ស្នងការ​អង្គការ​សហប្រជាជាតិ ទទួល​​ផ្នែក​សិទ្ធិ​មនុស្ស ថ្លែង​ក្នុង​ប្រជុំ​នៅ​អង្គការ​សហប្រជាជាតិ នា​ទីក្រុង​ហ្សឺណែវ (Geneva) ប្រទេស​ស្វីស (Switzerland) កាល​ពី​ថ្ងៃ​ទី៣០ ខែ​សីហា ឆ្នាំ២០១៧។
AFP

មន្ត្រី​នាំ​ពាក្យ​ក្រសួង​ការបរទេស​បាន​ហៅ​ការ​លើក​ឡើង​របស់​មន្ត្រី​ឧត្ដម​ស្នងការ​អង្គការ​សហប្រជាជាតិ ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ ថា​ជា​ការ​វិនិច្ឆ័យ​ដ៏​ខុសឆ្គង​មួយ និង​មិន​បាន​ផ្អែក​លើ​មូលដ្ឋាន​ឱ្យ​បាន​ជាក់លាក់។ ប្រតិកម្ម​នេះ​កើត​ឡើង​បន្ទាប់​ពី​មន្ត្រី​ជាន់​ខ្ពស់​ផ្នែក​សិទ្ធិមនុស្ស​របស់​អង្គការ​សហប្រជាជាតិ ព្រួយ​បារម្ភ​អំពី​វិធានការ​​បង្ក្រាប​នានា ទៅ​លើ​បក្ស​ប្រឆាំង និង​ប្រព័ន្ធ​ផ្សព្វផ្សាយ ក្នុង​ពេល​ចុង​ក្រោយ​នេះ​ពី​សំណាក់​រដ្ឋាភិបាល​កម្ពុជា។

សេចក្ដី​ថ្លែងការណ៍​របស់​មន្ត្រី​នាំ​ពាក្យ​ក្រសួង​ការបរទេស និង​សហប្រតិបត្តិការ​អន្តរជាតិ​កម្ពុជា ចេញ​ផ្សាយ​នៅ​ថ្ងៃ​ទី​១៤ ខែ​កញ្ញា បាន​បង្ហាញ​ការ​ខក​ចិត្ត​ចំពោះ​សេចក្ដី​ថ្លែងការណ៍​របស់​លោក ហ្សែត រ៉ាអេដ អាល់ហួសេន (Zeid Ra’ad Al Hussein)ជា​មន្ត្រី​ឧត្ដម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស ដែល​ព្រួយ​បារម្ភ​ជុំវិញ​ការ​ចាប់​ខ្លួន​ប្រធាន​គណបក្ស​ប្រឆាំង លោក កឹម សុខា ដោយ​ចោទ​ពី​បទ​ក្បត់ជាតិ និង​ការ​បិទ​ស្ថាប័ន​សារព័ត៌មាន​ឯករាជ្យ​មួយ​ចំនួន​ពី​សំណាក់​រដ្ឋាភិបាល​លោក ហ៊ុន សែន។

​ប៉ុន្តែ​នាំ​ពាក្យ​ក្រសួង​ការបរទេស លោក ជុំ សុន្ទរី ថ្លែង​តាម​រយៈ​សេចក្ដី​ថ្លែងការណ៍​របស់​ខ្លួន​ថា ជុំវិញ​ការ​លើក​ឡើង​របស់​មន្ត្រី​អង្គការ​សហប្រជាជាតិ​រូប​នេះ គឺ​រដ្ឋាភិបាល តុលាការ និង​រដ្ឋសភា​ផង ធ្លាប់​បាន​ពន្យល់​ជា​ច្រើន​លើក​រួច​មក​ហើយ និង​មិន​គួរ​ចោទ​ប្រកាន់​ដោយ​មិន​បាន​យក​ចិត្ត​ទុក​ដាក់​លើ​ទិដ្ឋភាព​ច្បាប់​ដែល​ត្រូវ​បាន​រំលោភបំពាន​ដ៏​ធ្ងន់ធ្ងរ​ពី​សំណាក់​បុគ្គល និង​ស្ថាប័ន​នានា។

​មន្ត្រី​រដ្ឋាភិបាល​ដដែល​ក៏​ចង់​ឱ្យ​មាន​ការ​បំភ្លឺ​អំពី​មូលដ្ឋាន​អ្វី​ខ្លះ​ដែល​បុគ្គល​ប្រព្រឹត្ត​ទង្វើ​ក្បត់​ជាតិ អង្គការ​ក្រៅ​រដ្ឋាភិបាល​ធ្វើ​សកម្មភាព​តាម​អំពើ​ចិត្ត​ដោយ​មិន​គោរព​ច្បាប់ និង​សារព័ត៌មាន​ដែល​មិន​បង់​ពន្ធ តែ​បែរ​អាច​គេច​ផុត​ពី​ការ​ពង្រឹង​អនុវត្ត​ច្បាប់។

​ប្រតិកម្ម​ខ្លាំងៗ​ពី​មន្ត្រី​រដ្ឋាភិបាល​នេះ បន្ទាប់​ពី​លោក ហ្សេដ រ៉ាអាដ អាល់ហ៊ូសេន មន្ត្រី​ឧត្ដម​ស្នងការ​អង្គការ​សហប្រជាជាតិ​ទទួល​បន្ទុក​​សិទ្ធិមនុស្ស​កាល​ពី​ថ្ងៃ​ទី​១១ កញ្ញា បាន​ថ្លែង​នៅ​ក្នុង​សម័យ​ប្រជុំ​លើក​ទី​៣៦ នៃ​ក្រុមប្រឹក្សា​សិទ្ធិមនុស្ស​ស្ដីពី​បញ្ហា​សិទ្ធិមនុស្ស​នៅ​ក្នុង​ប្រទេស​ចំនួន ៤០ ក្នុង​ប្រទេស​ស្វីស ថា លោក​កំពុង​ព្រួយ​បារម្ភ​យ៉ាង​ខ្លាំង​អំពី​ការ​ចាប់​ខ្លួន​ប្រធាន​គណបក្ស​សង្គ្រោះ​ជាតិ លោក កឹម សុខា ដែល​ហាក់​ធ្វើ​ឡើង​ដោយ​មិន​បាន​គោរព​ចំពោះ​ការ​ធានា​តាម​នីតិវិធី​ត្រឹមត្រូវ ព្រម​ទាំង​អភ័យឯកសិទ្ធិសភា​របស់​លោក កឹម សុខា។ លោក​ក៏​ព្រួយ​បារម្ភ​អំពី​ការ​ថ្លែង​ជា​សាធារណៈ​របស់​លោក​នាយករដ្ឋមន្ត្រី ហ៊ុន សែន និង​មន្ត្រី​ជាន់​ខ្ពស់​របស់​លោក​ជា​ច្រើន​រូប​ទៀត អំពី​ទោស​កំហុស​របស់​លោក កឹម សុខា ដែល​នេះ​គឺ​ជា​ការ​រំលោភ​លើ​ការ​សន្មត​ថា គ្មាន​ទោស និង​សិទ្ធិ​ទទួល​បាន​ការ​កាត់​ក្ដី​ដោយ​យុត្តិធម៌។

លោក​ថា ការ​រំលោភ​បំពាន​ទាំង​នេះ បាន​កើត​ឡើង បន្ទាប់ពី​រដ្ឋាភិបាល​បាន​បិទ​ស្ថាប័ន​អន្តរជាតិ​ដ៏​ល្បីល្បាញ ឬ​ហៅ​ថា វិទ្យាស្ថាន​ជាតិ​ប្រជាធិបតេយ្យ (NDI) របស់​សហរដ្ឋអាមេរិក បិទ​ស្ថានីយ​វិទ្យុ​ជា​ច្រើន និង​ការ​បង្ខំ​បិទ​ទ្វារ​របស់​ស្ថាប័ន​កាសែត​ឯករាជ្យ​ដ៏​សំខាន់​មួយ​នៅ​កម្ពុជា។

​ផ្ទុយ​ពី​ការ​លើក​ឡើង​នេះ លោក ជុំ សុន្ទរី អះអាង​ថា សិទ្ធិ​នយោបាយ និង​សិទ្ធិ​ពលរដ្ឋ សេរីភាព​សារព័ត៌មាន​សេរីភាព​នៃ​ការ​ជួប​ជុំ និង​បញ្ចេញ​មតិ ត្រូវ​បាន​គោរព​យ៉ាង​ពេញលេញ​នៅ​កម្ពុជា ដែល​មនុស្ស​គ្រប់រូប​ទទួល​បាន​សិទ្ធិ​ទាំង​អស់​នេះ លើកលែងតែ​បុគ្គល​រំលោភ​ច្បាប់​ប៉ុណ្ណោះ។ លោក​ថា ការ​ជ្រើស​យក​ករណី​ដើម្បី​ពណ៌នា​រូបភាព​ទាំង​ស្រុង​របស់​កម្ពុជា គឺ​ជា​ការ​វិនិច្ឆ័យ​ខុសឆ្គង​យ៉ាង​ធ្ងន់ធ្ងរ ហើយ​ការពារ​អ្នក​រំលោភ​ច្បាប់​ក្នុង​នាម​សិទ្ធិមនុស្ស​ដែល​ដើរ​ផ្ទុយ​ពី​បេសកកម្ម​របស់​ស្ថាប័ន​គួរ​ឱ្យ​គោរព។

​ទោះ​ជា​យ៉ាង​ណា ការ​ចាប់​ខ្លួន​លោក កឹម សុខា ការ​បិទ​ប្រព័ន្ធ​ផ្សព្វផ្សាយ​ឯករាជ្យ​ជាដើម គឺ​កំពុង​ក្លាយ​ជា​បញ្ហា​ក្ដៅ​គគុក​ធ្វើ​ឱ្យ​ពលរដ្ឋ​មិន​ពេញ​ចិត្ត​យ៉ាង​ខ្លាំង។ លើស​ពី​នេះ សហគមន៍​អន្តរជាតិ​ជា​ច្រើន ដូចជា​ប្រទេស​មហា​អំណាច​សហរដ្ឋអាមេរិក សហភាព​អឺរ៉ុប កាណាដា និង​អូស្ត្រាលី ជាដើម ក៏​កំពុង​តានតឹង​ពាក្យ​សម្ដី​ជាមួយ​រដ្ឋាភិបាល​ថែម​ទៀត​ដែរ។ ក្រុម​បរទេស​ទាំង​នេះ​ចាត់​ទុក​ទង្វើ​របស់​លោក​នាយករដ្ឋមន្ត្រី ហ៊ុន សែន ដែល​ធ្វើ​ឱ្យ​ស្ថានការណ៍​នយោបាយ​កាន់​តែ​ដុនដាប​មិន​ឈប់ឈរ​នេះ ថា​កំពុង​នាំ​ឱ្យ​ប៉ះពាល់​ដល់​ដំណើរ​ការ​លទ្ធិប្រជាធិបតេយ្យ​នៅ​កម្ពុជា ជាពិសេស​ការ​បោះឆ្នោត​មួយ​ដែល​អាច​ធ្វើ​ឡើង​ដោយ​សេរី យុត្តិធម៌ និង​ត្រឹមត្រូវ។

អាស៊ីសេរី​មិន​អាច​សុំ​បកស្រាយ​បន្ថែម​ពី​លោក ជុំ សុន្ទរី មន្ត្រី​នាំ​ពាក្យ​ក្រសួង​ការបរទេស​បាន​ទេ នៅ​ថ្ងៃ​ទី​១៤ កញ្ញា  ដោយសារ​ទូរស័ព្ទ​ចូល​តែ​លោក​មិន​ទទួល។

ប៉ុន្តែ​មន្ត្រី​នាំ​ពាក្យ​គណបក្ស​កាន់​អំណាច​ធ្លាប់​លើក​ឡើង​ថា គំនាប​ជា​ពាក្យសម្ដី​របស់​សហគមន៍​អន្តរជាតិ​ដែល​កំពុង​ធ្លាក់​មក​ជា​បន្តបន្ទាប់​ទាំង​នោះ នឹង​មិន​ប៉ះពាល់​អ្វី​ឡើយ​សម្រាប់​ប្រទេស​កម្ពុជា ព្រោះ​ថា ជា​សិទ្ធិ​បញ្ចេញមតិ​របស់​បរទេស​ទាំង​នេះ​តាម​និន្នាការ​នយោបាយ​របស់​ពួកគេ។

វិល​មក​ក្នុង​សេចក្ដី​ថ្លែង​របស់​មន្ត្រី​ឧត្ដម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​វិញ គឺ​បាន​ទទូច​ឱ្យ​រដ្ឋាភិបាល ធានា​ឱ្យ​បាន​ពេញលេញ​នូវ​សិទ្ធិ​ពលរដ្ឋ និង​សិទ្ធិ​នយោបាយ​មុន​ការ​បោះ​ឆ្នោត​ឆ្នាំ​២០១៨ មក​ដល់។ បន្ថែម​ពី​នេះ ក៏​បាន​អំពាវនាវ​ឱ្យ​មាន​ការ​ធានា​ចំពោះ​ភាព​ឯករាជ្យ​របស់​តុលាការ ការ​គោរព​សិទ្ធិ​បញ្ចេញ​មតិ និង​សិទ្ធិ​ជួបជុំ​ផង​ដែរ៕​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (5)
Share

អ្នក​អាន​អនាមិក

ចោរមិនដែលសារភាពថាវាលួចទេ។ USA and UN ត្រូវការដាក់ពេលវេលាឱ្យលោកហ៊ុនសែនអនុលោម ឬ ក៏លទ្ធផលអាក្រក់នឹងកើតឡើង។ If the USA does not put a time limit for Hun Sen to comply fast, Hun Sen is laughing at them.

Sep 23, 2017 12:13 AM

អ្នក​អាន​អនាមិក

I totally agree with the Cambodian government that the UN do not have capable people to interpret laws; only my Dach Cho Sen can interpret any laws and the Cambodian courts always listen to him 100%.

My Dach Cho should be appointed to the head of International Court of Justice (the ICJ) in the Hague after he loses in a landslide in the upcoming general election in Cambodia. And the whole world will for the first time understand the real justice that has never been experienced since the birth of human beings.

Sep 14, 2017 12:32 PM

អ្នក​អាន​អនាមិក

the government just try to hide their mistakes - showing that they are doing now is correct, but it is not. you can not hide the truth. Soon, you will lose.

Sep 14, 2017 11:19 AM

អ្នក​អាន​អនាមិក

in the pol pot regime, persons against laws were destroy about 3 million

Sep 14, 2017 09:23 AM

អ្នក​អាន​អនាមិក

kem socks win the fight automatically because hun sen can not stand in the ring.

Sep 14, 2017 07:15 AM

មើល​មតិ​ទាំង​អស់.

គេហទំព័រ​ទាំងមូល