តុលាការ​ឃុំខ្លួន​យុវជន​ម្នាក់​រឿង​បង្ហោះ​សារ​ប៉ះពាល់​បម្រាម​ធ្វើ​ដំណើរ​ពេល​ចូលឆ្នាំ

ដោយ វ៉ែន សុមេធ
2020-04-16
អ៊ីម៉ែល
មតិ
Share
បោះពុម្ព
យុវជន លេខ សៀងលី (រូបកណ្ដាល) ដែល​ត្រូវ​សមត្ថកិច្ច​ខេត្ត​កំពង់ធំ​ចាប់​ខ្លួន មាន​មុខ​របរ​ជា​កម្មករ​ចាក់​សាំង នៅ​ស្ថានីយ​ប្រេង​ឥន្ធនៈ​មួយ​កន្លែង ស្ថិតនៅ​ឃុំ​កំពង់ថ្ម ស្រុក​សន្ទុក ខេត្ត​កំពង់ធំ​។
យុវជន លេខ សៀងលី (រូបកណ្ដាល) ដែល​ត្រូវ​សមត្ថកិច្ច​ខេត្ត​កំពង់ធំ​ចាប់​ខ្លួន មាន​មុខ​របរ​ជា​កម្មករ​ចាក់​សាំង នៅ​ស្ថានីយ​ប្រេង​ឥន្ធនៈ​មួយ​កន្លែង ស្ថិតនៅ​ឃុំ​កំពង់ថ្ម ស្រុក​សន្ទុក ខេត្ត​កំពង់ធំ​។
រូប​ហ្វេសប៊ុក​ស្នងការខេត្ត​កំពង់ធំ

អាជ្ញាធរ​ខេត្ត​កំពង់ធំ បាន​ចាប់ខ្លួន​យុវជន​ម្នាក់ ក្រោយ​យុវជន​រូប​នោះ​បាន​បញ្ចេញ​មតិ​លើ​ហ្វេសប៊ុក​ជុំវិញ​បម្រាម​ធ្វើដំណើរ​របស់​រដ្ឋាភិបាល​។ មន្ត្រី​សិទ្ធិមនុស្ស​យល់​ថា អាជ្ញាធរ​គួរតែ​ប្រើ​វិធាន​ការអប់រំ​ណែនាំ ល្អ​ជាជាង​ការ​ឃុំខ្លួន​យុវជន​រូប​នោះ​ក្នុង​ពន្ធនាគារ។

តុលាការ ខេត្ត​កំពង់ធំ​បាន​ចោទប្រកាន់​យុវជន​ម្នាក់​ឈ្មោះ លេខ សៀងលី អាយុ​២១​ឆ្នាំ ពី​បទ “​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍​” ក្រោយ​រូបគេ​បង្ហោះ​វីដេអូ​លើ​ហ្វេសប៊ុក ប៉ះពាល់​ដល់​បទបញ្ជា​ហាមឃាត់​ការ​ធ្វើ​ដំណើរ​ដែល​ដាក់​ចេញ​ដោយ​រដ្ឋាភិបាល​នៅ​អំឡុង​ពិធីបុណ្យ​ចូល​ឆ្នាំថ្មី​។ តុលាការ​បាន​សម្រេច​ឃុំខ្លួន​យុវជន​រូប​នោះ ដាក់​ពន្ធនាគារ​បណ្ដោះអាសន្ន បន្ទាប់ពី​ចាប់ខ្លួន​រូបគេ កាលពី​ថ្ងៃ​ទី​១៣ មេសា។

អាស៊ីសេរី​បាន​ព្យាយាម​ទាក់ទង​ស្នងការ​នគរបាល​ខេត្ត​កំពង់ធំ លោក អ៊ុក កុសល ដែល​ជា​អ្នកដឹកនាំ​កម្លាំង ហើយ​និង​ព្រះរាជអាជ្ញា​ខេត្ត​កំពង់ធំ លោក ស៊ិន វិរៈ ដែល​ជា​អ្នក​សម្របសម្រួល​នីតិវិធី​ឱ្យ​ចាប់ខ្លួន​យុវជន លេខ សៀងលី ដែរ ប៉ុន្តែ​ពួក​លោក​មិន​លើក​ទូរស័ព្ទ​ទេ នៅ​ថ្ងៃ​ទី​១៥ មេសា។

ទោះជា​យ៉ាងណា គេហទំព័រ​អគ្គស្នងការដ្ឋាន​នគរបាល​ជាតិ និង​ទំព័រ​ហ្វេសប៊ុក​ស្នងការដ្ឋាន​នគរបាល​ខេត្ត​កំពង់ធំ ឱ្យ​ដឹង​ថា ការ​ចាប់ខ្លួន​យុវជន លេខ សៀងលី នេះ គឺ​ដោយសារ​រូបគេ​បាន​ឡាយ​វីដេអូ​ញុះញង់​ប្រឆាំង​បទបញ្ជា​លេខ​០២ របស់​រដ្ឋាភិបាល​ស្ដីពី​បម្រាម​ធ្វើដំណើរ​ឆ្លងកាត់​ខេត្ត នៅ​អំឡុង​ពិធីបុណ្យ​ចូល​ឆ្នាំថ្មី។

យុវជន លេខ សៀងលី មាន​មុខ​របរ​ជា​កម្មករ​ចាក់​សាំង នៅ​ស្ថានីយ​ប្រេង​ឥន្ធនៈ​មួយ​កន្លែង ស្ថិតនៅ​ឃុំ​កំពង់ថ្ម ស្រុក​សន្ទុក ខេត្ត​កំពង់ធំ​។ យុវជន​រូប​នេះ​បាន​បង្ហោះ​វីដេអូ ដោយ​រៀបរាប់​ថា ការ​ដើរ​កម្សាន្ត​នៅ​ថ្ងៃ​ចូលឆ្នាំ​អាច​ធ្វើ​បាន ព្រោះ​មិន​មាន​ជំងឺ​កូវីដ-១៩ នោះ​ទេ៖ «ចង់​និយាយ​ថា អា​កូវីដ-១៩ និង​កូរ៉ូណា​ហ្នឹង គ្មាន​ទេ​។ ចូលឆ្នាំ ដើរ​លេង​បាន និយាយ​មែន​នេះ។ ឥលូវ​សាំង​ចុះថោក​ទៀត ស្តាយ​។ និយាយ​មែន សាំង​សល់​តែមួយ​លីត្រ ៣ពាន់(រៀល)។ សប្បាយ​ជិះ​តែម្ដង សប្បាយ​ដើរលេង​តែម្ដង ដើរ​អត់​មាន​ជំងឺ​អ្វី​ទេ​នេះ»

ប្រធាន​ផ្នែក​សិទ្ធិមនុស្ស​នៃ​សមាគម​អាដហុក (ADHOC) លោក នី សុខា ទទួលស្គាល់​ថា សារ​របស់​យុវជន​រូប​នេះ​ផ្ទុយ​ពី​បទ​បញ្ជា​របស់​រដ្ឋាភិបាល ប៉ុន្តែ​លោក​យល់​ថា អាជ្ញាធរ​គួរតែ​ណែនាំ និង​ធ្វើ​កិច្ចសន្យា​បាន​ហើយ មិន​គួរ​ដល់​ថ្នាក់​ចោទ​ប្រកាន់ និង​ឃុំខ្លួន​រូបគេ​ក្នុង​ពន្ធនាគារ​បែបនេះ​ទេ។ លោក​ជឿ​ថា យុវជន​រូប​នេះ​គ្មាន​ចេតនា​ប្រឆាំង​នឹង​បម្រាម​របស់​រដ្ឋាភិបាល​ឡើយ ហើយ​បើ​ពិនិត្យមើល​ការខូចខាត​ដែល​ចេញពី​អំពើ​របស់​គេ​វិញ ក៏​មិនទាន់​លេចចេញ​ជា​រូបរាង​ដែរ៖ «គាត់​ជា​យុវជន គាត់​ក្មេង គាត់​ឃើញ​ទិដ្ឋភាព​យ៉ាងម៉េច គាត់​និយាយ​ក្នុង​ន័យ​មួយ​គាត់​អត់​បាន​ចាប់អារម្មណ៍​ថា អ្វី​ដែល​គាត់​និយាយ​ទៅ​ហ្នឹង​ជា​កំហុស​ផង​ទេ បើ​តាម​ស្តាប់​ភាសា​របស់​គាត់​ហ្នឹង​ទៅ​។ អ៊ីចឹង​យើង​គួរតែ​អប់រំ​គាត់ យើង​គួរតែ​ហៅ​គាត់​មក​ណែនាំ ហៅ​គាត់​មក​ធ្វើ​កិច្ចសន្យា​អ្វីមួយ ដើម្បី​ឱ្យ​គាត់​កែ កុំ​ឱ្យ​គាត់​និយាយ​អ៊ីចឹង​ទៀត​ទៅ អា​ហ្នឹង​ខ្ញុំ​គិត​ថា វា​ប្រសើរ​ជាជាង​យក​គាត់​ទៅ​ឃុំខ្លួន​។ វា​មិន​ជា​មាន​ផល​ចំណេញ​អ្វី​ទៅដល់​សង្គម​យើង​ដែរ​ទេ»

អង្គការ​សិទ្ធិមនុស្ស​ក្នុងស្រុក​រក​ឃើញ​ថា ចាប់​តាំង​ពី​ការ​ផ្ទុះ​រាលដាល​ជំងឺ​កូវីដ​-១៩ មក អាជ្ញា​ធរមាន​សមត្ថកិច្ច​បាន​ចាប់ខ្លួន​មនុស្ស​ចំនួន​២៨ នាក់​ហើយ ដោយ​ក្នុង​នោះ​១២ នាក់ ត្រូវ​បាន​ឃុំខ្លួន​ក្នុង​ពន្ធនាគារ និង​១៦ នាក់​ទៀត ត្រូវ​បាន​ដោះលែង​វិញ​ក្រោយ​ធ្វើ​កិច្ចសន្យា​។ ក្នុងចំណោម​អ្នក​ជាប់ឃុំ​ទាំងអស់​នោះ មាន​មួយ​ចំនួន​ធំ​គឺជា​អ្នកគាំទ្រ ឬ​ជា​សកម្មជន​គណបក្ស​សង្គ្រោះជាតិ ដែល​ត្រូវ​របប​លោក ហ៊ុន សែន រំលាយ​ចោល។

អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ពិនិត្យ​ឃើញ​ថា រដ្ឋាភិបាល​លោក ហ៊ុន សែន កំពុង​ប្រើប្រាស់​ការ​រាតត្បាត​ជំងឺ​កូវីដ​-១៩ ដោយ​មិន​ត្រឹមត្រូវ ដើម្បី​បំបិទមាត់​សកម្មជន​បក្ស​ប្រឆាំង អ្នក​បញ្ចេញ​ទុក្ខ​កង្វល់​អំពី​មេរោគ​ថ្មី​នេះ និង​អ្នក​ហ៊ាន​រិះគន់​វិធានការ​របស់​រដ្ឋាភិបាល​។ អង្គការ​ដដែល​នេះ អំពាវនាវ​ដល់​រដ្ឋាភិបាល​កម្ពុជា​ឱ្យ​បញ្ឈប់​ទង្វើ​រំលោភបំពាន​លើ​សិទ្ធិ​និយាយ​ស្តី​ដោយ​សេរី​របស់​ពលរដ្ឋ​តទៅទៀត ហើយ​ជំនួស​មកវិញ រដ្ឋាភិបាល​ត្រូវ​ផ្ដោត​អាទិភាព​លើ​ការ​ផ្ដល់​ព័ត៌មាន​អំពី​ជំងឺ​កូវីដ​-១៩ ជូន​សាធារណជន​ឱ្យ​បាន​ត្រឹមត្រូវ និង​ទាន់​ពេល​វេលា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល