សហជីពឯករាជ្យអះអាងថា ពួកគេនឹងមិនបោះបង់ចោលគម្រោងធ្វើបាតុកម្មដើម្បីរក្សាប្រព័ន្ធអនុគ្រោះពន្ធ EBA នោះទេ ទោះជាមានការគំរាមបង្ក្រាបពីសំណាក់មេប៉ូលិសកម្ពុជាយ៉ាងណាក៏ដោយ។ សហជីពថា ការអនុគ្រោះពន្ធ EBA ផ្តល់ប្រយោជន៍ធំធេងដល់ប្រជាពលរដ្ឋខ្មែរ ដូច្នេះការទាមទារឱ្យរដ្ឋាភិបាលខិតខំរក្សាឋានៈអនុគ្រោះពន្ធនេះ គឺជារឿងត្រឹមត្រូវ។
ប្រធានសហភាពសហជីពកម្ពុជា លោក រ៉ុង ឈុន ដែលមានគម្រោងដឹកនាំបាតុកម្មរឿង EBA នោះ អះអាងថា លោកមិនខ្លាចការគំរាមរបស់សមត្ថកិច្ចរឿងបង្ក្រាបបាតុកម្មឡើយ ពីព្រោះលោកថា ការទាមទារនេះស្របទៅតាមច្បាប់ជាតិ និងអន្តរជាតិ ហើយធ្វើឡើងដើម្បីផលប្រយោជន៍កម្មករ។ លោកបញ្ជាក់ថា ប្រសិនបើរដ្ឋាភិបាលមិនចង់ឱ្យកម្មករផ្ទុះការតវ៉ានោះទេ រដ្ឋាភិបាលត្រូវខិតខំធ្វើយ៉ាងណារក្សាបាននូវប្រព័ន្ធអនុគ្រោះពន្ធ EBA បន្តទៅទៀត។ លោកបញ្ជាក់ថា ពេលនេះសហជីពរបស់លោកកំពុងជំរុញឱ្យភាគីពាក់ព័ន្ធជួយដោះស្រាយបញ្ហា EBA ប៉ុន្តែការធ្វើបាតុកម្មក៏នឹងកើតមានដែរ ប្រសិនបើកិច្ចខិតខំប្រឹងប្រែងនេះមិនទទួលបានលទ្ធផលទេនោះ៖ «យុទ្ធនាការដើម្បីឱ្យរក្សា EBA ហ្នឹងនៅតែបន្តជារៀងរាល់ថ្ងៃ តាមរយៈបែបបទរដ្ឋបាល ប៉ុន្តែនីតិវិធីចុងក្រោយវាអាចនឹងឈានទៅដល់កូដកម្មបាតុកម្មដោយសន្តិវិធី ធ្វើយ៉ាងណាជំរុញឱ្យរដ្ឋាភិបាលកម្ពុជាទទួលយកលក្ខខណ្ឌរបស់សហភាពអឺរ៉ុបដែលបានស្នើឡើង»។
ថ្នាក់ដឹកនាំសហជីពរូបនេះថ្លែងទៀតថា ការបង្ក្រាបមិនមែនជាវិធានការសមស្របក្នុងការឆ្លើយតបនឹងកង្វល់របស់កម្មករនោះទេ ហើយជារឿងផ្ទុយនឹងច្បាប់ថែមទៀត។ លោកចាត់ទុកផែនការរបស់សមត្ថកិច្ចថា ការគំរាមកំហែង និងបំបិទសិទ្ធិសេរីភាពប្រជាពលរដ្ឋ ដែលជារឿងប្រាសចាកពីរដ្ឋធម្មនុញ្ញកម្ពុជា៖ «យើងមិនអាចឈរឱបដៃមើល គ្រាន់តែអគ្គស្នងការនគរបាលជាតិលើកឡើងបែបនេះ ហើយយើងភ័យខ្លាច យើងមិនហ៊ានធ្វើអ្វី យើងមិនហ៊ានចេញការពារផលប្រយោជន៍កម្មករ គ្រូបង្រៀន ផលប្រយោជន៍ពលរដ្ឋនោះទេ។ យើងត្រូវតែធ្វើអ្វីដែលយើងមើលឃើញថា វាមានផលប៉ះពាល់ដល់ប្រយោជន៍ជាតិ ដល់ប្រយោជន៍ប្រជាពលរដ្ឋ»។
លោក រ៉ុង ឈុន បញ្ចេញប្រតិកម្មបែបនេះ ដោយសារនៅពេលថ្មីៗនេះ អគ្គស្នងការនគរបាលជាតិ លោក នេត សាវឿន បានប្រកាសពីគម្រោងបង្ក្រាបសកម្មភាពទាំងឡាយណាដែលលោកចាត់ទុកថា ជាផែនការបដិវត្តន៍ពណ៌ចង់ផ្តួលរំលំរដ្ឋាភិបាល ក្នុងនោះក៏រួមមានទាំងការញុះញង់ពលរដ្ឋឱ្យតវ៉ាដីធ្លី និងការបំផុសឱ្យមានបាតុកម្មរឿងការអនុគ្រោះពន្ធ EBA និង GSP ផងដែរ។ មេប៉ូលិសកម្ពុជា និងត្រូវជាក្មួយប្រសារបស់លោក ហ៊ុន សែន រូបនេះ បានស្នើសុំក្រសួងមហាផ្ទៃឱ្យគាំទ្រវិធានការនេះ ហើយរដ្ឋមន្ត្រីក្រសួងមហាផ្ទៃ លោក ស ខេង ក៏បានឆ្លើយតបភ្លាមៗថា លោកត្រៀមខ្លួនជានិច្ចក្នុងការជួយជ្រោមជ្រែងផែនការនេះតាមលទ្ធភាពដែលអាចធ្វើបាន៖ «សម្រាប់ព្រះរាជាណាចក្រកម្ពុជា សភាពការណ៍សន្តិសុខផ្ទៃក្នុងអាចប្រឈមទៅនឹងការវាយប្រហារ ( ពី ) ក្រុមអមិត្តទាំងក្នុង និងក្រៅប្រទេស ជាពិសេសញុះញង់ប្រជាពលរដ្ឋនៅតាមមូលដ្ឋានឱ្យតវ៉ាពាក់ព័ន្ធទំនាស់ដីធ្លី សិទ្ធិសេរីភាព លទ្ធិប្រជាធិបតេយ្យ និងលើកយកបញ្ហា EBA និង GSP ដើម្បីញុះញង់កម្មករឱ្យធ្វើបាតុកម្មបង្កចលាចល ប៉ះពាល់ដល់សន្តិសុខ សណ្ដាប់ធ្នាប់សង្គម»។
ថ្នាក់ដឹកនាំសហជីពឯករាជ្យមួយរូបទៀត គឺប្រធានសហភាពការងារកម្ពុជា លោក អាត់ ធន់ ថ្លែងថា លោកមិនគាំទ្រវិធានការរបស់សមត្ថកិច្ចនេះឡើយ ព្រោះជារឿងមិនត្រឹមត្រូវតាមច្បាប់។ លោកថា ជារឿងមិនសមស្របទាល់តែសោះដែលសមត្ថកិច្ចកម្ពុជាចេះតែភ្ជាប់ការតវ៉ារបស់កម្មករទៅនឹងរឿងបដិវត្តន៍ ដែលលោកថា មកទល់នឹងពេលនេះ គ្មានលេចចេញសញ្ញាណណាមួយដូចការលើកឡើងនេះឡើយ៖ «កន្លងមក បើវាកើតមានការតវ៉ាហ្នឹង គឺដោយសារតែគាត់បាត់បង់ការងារ គាត់អត់មានការងារធ្វើ ស្នើឱ្យរដ្ឋាភិបាលជួយអ៊ីចឹងទេ ហើយរដ្ឋាភិបាលជួយដោះស្រាយទៅ វាចប់ហើយ។ ដូចជាមិនមានអ្វីដែលថា ទៅធ្វើបដិវត្តន៍ពណ៌ ប្ដូររដ្ឋាភិបាល ដូចជាមិនមានសញ្ញាណហ្នឹងទេ។ យើងជាសហជីពក៏មិនបានតាំងចិត្តដឹកនាំកម្មករធ្វើបាតុកម្មក្នុងរឿងហ្នឹងដែរ គ្រាន់តែថា ក្នុងនាមយើងជាសហជីព យើងជួយជាផ្លូវច្បាប់ ឬក៏សម្របសម្រួលក្នុងនីតិវិធីមួយចំនួនក្នុងនាមការងារយើងដែលច្បាប់អនុញ្ញាត»។
លោក អាត់ ធន់ យល់ឃើញថា កម្ពុជាទំនងជាមិនអាចគេចផុតពីការបាត់បង់ប្រព័ន្ធអនុគ្រោះពន្ធ EBA ឡើយ ពីព្រោះទាំងការឆ្លើយតបរបស់រដ្ឋាភិបាល និងការទាមទាររបស់សហភាពអឺរ៉ុប សុទ្ធតែមិនមានអ្វីប្រែប្រួលជាដុំកំភួនឡើយ ស្របពេលដែលការសម្រេចចិត្តជាចុងក្រោយនៅសល់ពេលតែជាងមួយសប្ដាហ៍ទៀតប៉ុណ្ណោះ៖ «ជាតំណាងសហភាពការងារកម្ពុជា ខ្ញុំស្នើយ៉ាងទទូចឱ្យរដ្ឋាភិបាលពិនិត្យឡើងវិញចំពោះការស្នើរបស់សហភាពអឺរ៉ុប ដើម្បីដោះស្រាយបញ្ហា ឬបញ្ចៀសបញ្ហានៃការដក EBA ហ្នឹង។ យើងក៏ស្នើដល់សហភាពអឺរ៉ុបដែរត្រូវពិនិត្យមើល ក្នុងករណីដែលចៀសមិនផុតត្រូវពិនិត្យមើលក្នុងលទ្ធភាពណាដែលកុំឱ្យប៉ះពាល់ទៅដល់កម្មករហ្នឹង។ ប៉ះពាល់ទៅមន្ត្រី គឺថាវាមិនជាអ្វីដូចប៉ះពាល់ដល់កម្មករទេ»។
សហភាពអឺរ៉ុបនឹងសម្រេចចិត្តថា តើត្រូវរក្សាទុក ឬព្យួរការអនុគ្រោះពន្ធ EBA ពីកម្ពុជា នៅថ្ងៃទី១២ កុម្ភៈខាងមុខ ក៏ប៉ុន្តែសហភាពអឺរ៉ុបបានបញ្ជាក់រួចហើយថា មានតែការស្តារសិទ្ធិមនុស្ស និងប្រជាធិបតេយ្យឡើងវិញទេ ទើបជាលក្ខខណ្ឌដែលកម្ពុជាបន្តទទួលបានផលប្រយោជន៍ពីការអនុគ្រោះពន្ធនេះ។ គណៈកម្មការអឺរ៉ុបដាក់ចេញនូវជំហរឥតកែប្រែនេះ ដោយសារតែរកឃើញការរំលោភសិទ្ធិមនុស្សធ្ងន់ធ្ងរ និងជាប្រព័ន្ធកំពុងកើតមាននៅកម្ពុជា ដែលផ្ទុយទៅនឹងលក្ខខណ្ឌពាណិជ្ជកម្មរបស់អឺរ៉ុប។
កម្ពុជានឹងត្រូវខាតបង់ទឹកប្រាក់ជិត ៧រយលានដុល្លារអាមេរិក ក្នុងមួយឆ្នាំ ចំពោះការនាំទំនិញទៅលក់នៅទីផ្សារអឺរ៉ុប ប្រសិនបើសហភាពអឺរ៉ុបសម្រេចព្យួរការអនុគ្រោះពន្ធ EBA មែននោះ ហើយការបង់ពន្ធនេះនឹងត្រូវចាប់គិតពីខែសីហា ឆ្នាំ២០២០ តទៅ។
សមាគមថៅកែរោងចក្របានព្រមានថា ការដកហូតប្រព័ន្ធអនុគ្រោះពន្ធ EBA នឹងធ្វើឱ្យបាត់បង់ការងារទ្រង់ទ្រាយធំ ក្នុងវិស័យកាត់ដេរ ដែលនឹងប៉ះពាល់ដល់កម្មករប្រមាណ ៧៥ម៉ឺននាក់ និងគ្រួសាររបស់ពួកគាត់ប្រមាណ ៣លាននាក់ទៀត។ ជាមួយគ្នានេះ សហព័ន្ធស្រូវអង្ករកម្ពុជាក៏បានប្រកាសដែរថា ការដកហូតប្រព័ន្ធអនុគ្រោះពន្ធ EBA នឹងបណ្ដាលឱ្យឧស្សាហកម្មស្រូវអង្ករកម្ពុជាត្រូវបំផ្លាញខ្ទេចខ្ទី និងប៉ះពាល់ដល់កសិករខ្មែរជាងកន្លះលានគ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។