តុលាការ​ក្រុង​ភ្នំពេញ​បដិសេធ​សំណើសុំ​លិខិត​ឆ្លង​ដែន និង​អត្ត​សញ្ញាណបណ្ណ​របស់​អតីត​អ្នក​យក​ព័ត៌មាន​អាស៊ី​សេរី

ដោយ សុជីវី
2020-02-03
អ៊ីម៉ែល
មតិ
Share
បោះពុម្ព
លោក យាង សុធារិន្ទ (ឆ្វេង) និង​លោក អ៊ួន ឈិន អតីត​អ្នក​យក​ព័ត៌មាន​អាស៊ី​សេរី នៅ​ខាង​មុខ​សាលា​ឧទ្ធរណ៍ នៅ​ព្រឹក​ថ្ងៃ​ទី២៨ ខែ​មករា ឆ្នាំ២០២០។
លោក យាង សុធារិន្ទ (ឆ្វេង) និង​លោក អ៊ួន ឈិន អតីត​អ្នក​យក​ព័ត៌មាន​អាស៊ី​សេរី នៅ​ខាង​មុខ​សាលា​ឧទ្ធរណ៍ នៅ​ព្រឹក​ថ្ងៃ​ទី២៨ ខែ​មករា ឆ្នាំ២០២០។
រូប៖ គេ​ផ្ដល់​ឱ្យ

ចៅក្រម​ស៊ើប​សួរ​​សាលាដំបូង​រាជធានី​ភ្នំពេញ លោក​ ពេជ្រ វិជ្ជាធរ បាន​សម្រេច​បដិសេធ​សំណើសុំ​លិខិត​ឆ្លងដែន និង​អត្ត​សញ្ញាណប័ណ្ណ​របស់​អតីត​អ្នក​យក​ព័ត៌មាន​អាស៊ី​សេរី លោក យាង សុធារិន្ទ និង​លោក អ៊ួន ឈិន ក្រោម​ហេតុ​ផល​ថា វត្ថុ​ចាប់​យក​ទាំងនេះ​នៅ​តែ​មាន​ភាព​ចាំបាច់​ក្នុង​ដំណាក់​កាល​ស៊ើបសួរ។ មេធាវី និង​មន្ត្រី​សិទ្ធិមនុស្ស​រិះគន់​ថា ហេតុផល​នេះ​មិន​សម​ទំនង​ទាល់​តែ​សោះ ព្រោះ​ទាំង​លិខិត​ឆ្លងដែន និង​អត្តសញ្ញាណប័ណ្ណ​ ត្រឹម​តែ​ជា​គ្រឿង​សម្គាល់​ខ្លួន មិន​មែន​​ជា​ភស្តុតាង​នោះ​ឡើយ។

មេធាវី​ការពារ​ក្តី​ឱ្យ​អតីត​អ្នក​រាយការណ៍​​ព័ត៌មាន​អាស៊ី​សេរី លោក សំ ចំរើន ឱ្យ​ដឹង​ថា លោក​មិន​យល់​ស្រប​ចំពោះ​ការ​លើក​​ឡើង​របស់​ចៅក្រម​ស៊ើបសួរ​នោះ​ឡើយ ព្រោះ​រាល់​វត្ថុ​ចាប់​យក​ទាំង​ឡាយ​ ប្រសិន​បើ​​មិន​មែន​ជា​ភស្តុតាង ឬ​មិន​មាន​វត្ថុ​តាង​ក្នុង​ការ​ស្វែង​រក​​ការពិត​នោះ​ទេ តុលាការ​ត្រូវ​តែ​ប្រគល់​ឱ្យ​​ម្ចាស់​ដើម​វិញ។ លោក​អះអាង​ថា ការ​បន្ត​រក្សា​ទុក​លិខិត​ឆ្លង​ដែន និង​អត្ត​សញ្ញាណ​ប័ណ្ណ​នេះ ប៉ះពាល់​យ៉ាង​ធ្ងន់ធ្ងរ​ដល់​ប្រយោជន៍​យុត្តិធម៌​​នៃ​រឿង​ក្ដី​សម្រាប់​កូន​ក្ដី​លោក​ទាំងពីរ ហើយ​ហេតុផល​របស់​ចៅក្រម​ស៊ើប​សួរ​នេះ គឺជា​រឿង​គួរ​ឱ្យ​ខក​ចិត្ត​បំផុត។ លោក​បញ្ជាក់​ថា ក្នុង​អាជីព​ជា​មេធាវី​ជាង ១៥ឆ្នាំ និង​ធ្លាប់​កាន់​សំណុំ​រឿង​ជាច្រើន​នោះ នេះ​ជា​លើក​​ទី​មួយ​ហើយ ​ដែល​លោក​ជួប​ប្រទះ​ករណី​​ចៅក្រម​រក្សា​ទុក​​វត្ថុ​ចាប់​យក ​ដែល​មិន​ពាក់ព័ន្ធ​នឹង​ដំណើរ​រឿង​ក្តី ជា​ពិសេស ​ក្នុង​ពេល​ដែល​ជន​ជាប់​ចោទ​លែង​ស្ថិត​ក្រោម​នីតិវិធី​ត្រួត​ពិនិត្យ​​តាម​ផ្លូវ​តុលាការ​​ជា​យូរ​មក​ហើយ​នោះ៖ «រហូត​មក​ដល់​​សព្វ​ថ្ងៃ​នេះ មិន​មាន​ដីកា​ដោយ​ឡែក​​ណា​មួយ​សម្រេច​ដក​ហូត​​សិទ្ធិ​សេរីភាព​របស់​គាត់​ ដូច​មាន​នៅ​ក្នុង​ដីកា​ដាក់​ឱ្យ​ស្ថិត​ក្រោម​ការ​ត្រួតពិនិត្យ​កន្លងមក​នោះ​ទេ។ បើ​មិន​មាន​ជាប់​កាតព្វកិច្ច​តុលាការ​ផង តុលាការ​បែរ​ជា​មិន​ប្រគល់​វត្ថុ​ចាប់​យក​ដែល​មិន​ពាក់​ព័ន្ធ​នឹង​រឿង​ក្ដី ​ដែល​មិន​មែន​ជា​ភស្តុតាង​ដូច​ជា​អត្តសញ្ញាណ​ប័ណ្ណ ដូចជា​លិខិត​ឆ្លងដែន​ហ្នឹង​មក​ឱ្យ​គាត់​ប្រើប្រាស់ នេះ​គឺ​ជា​សេចក្ដី​សម្រេច​មួយ​ដែល​ប៉ះពាល់​ដល់​យុត្តិធម៌​នៃ​រឿង​ក្ដី​ និង​ប៉ះពាល់​ដល់​សិទ្ធិ​សេរីភាព​របស់​កូន​ក្ដី​មួយ​ដោយ​មិន​អាច​ប្រកែក​បាន»

ហេតុ​ផល​សំខាន់​ដែល​ចៅក្រម​ស៊ើបសួរ​​សាលាដំបូង​រាជធានី​ភ្នំពេញ លោក​ ពេជ្រ វិជ្ជាធរ លើក​ឡើង​នៅ​ក្នុង​​ដីកាសម្រេច​មិន​​ប្រគល់​វត្ថុ​ចាប់​យក ចុះ​ថ្ងៃទី២៨ មករា ហើយ​ដែល​​អាស៊ី​សេរី​ទទួល​បាន​នៅ​ថ្ងៃ​ទី៣ កុម្ភៈ នោះ​គឺ​ថា ការ​រក្សា​វត្ថុ​ចាប់​យក​មាន​ភាព​ចាំបាច់​ក្នុង​ដំណាក់​កាល​​ស៊ើបសួរ និង​​ទីពីរ​​គឺ​ស្រប​តាម​យោបល់​របស់​តំណាង​អយ្យការ ដែល​ក៏​មិន​ឯកភាព​តាម​​សំណើ​នេះ​ដែរ។

អតីត​អ្នក​យក​ព័ត៌មាន​អាស៊ី​សេរី​​លោក យាង សុធារិន្ទ ប្រតិកម្ម​​ថា ទាំង​លិខិត​ឆ្លង​ដែន និង​អត្ត​សញ្ញាណប័ណ្ណ​មិន​មែន​ជា​របស់​​ចាំបាច់​ក្នុង​នីតិវិធី​ស៊ើបអង្កេត​នោះ​ទេ ពីព្រោះ​មិន​មែន​ជា​ភស្តុតាង ហើយ​ម្យ៉ាង​ទៀត​តុលាការ​បាន​ដក​ហូត​យក​របស់​ទាំងនេះ​ពី​ពួក​លោក​ជាង២ ឆ្នាំ​មក​ហើយ។ ជាង​នេះ​ទៅទៀត លោក​ថា សាលា​ឧទ្ធរណ៍​បាន​បញ្ជាក់​រួច​ហើយ​ថា ពួក​លោក​លែង​ស្ថិត​ក្រោម​​ការ​ត្រួត​ពិនិត្យ​របស់​តុលាការ​ជា​យូរ​មក​ហើយ ដូច្នេះ​លោក​ថា គ្មាន​ហេតុ​ផល​អ្វី​ដែល​ចៅក្រម​ស៊ើបសួរ​លោក ពេជ្រ វិជ្ជាធរ ត្រូវ​រក្សា​ទុក​ឯកសារ​សម្គាល់​ខ្លួន​ទាំង​នេះ​របស់​ពួក​លោក​ទេ។ លោក​បញ្ជាក់​ថា លោក​នឹង​ប្ដឹង​​ទាស់​ការ​សម្រេច​នេះ​ទៅ​តុលាការ​ជាន់ខ្ពស់​បន្ត​ទៅ​ទៀត៖ «ចៅក្រម​ហាក់​ដូច​ជា​មិន​ចង់​ផ្ដល់​យុត្តិធម៌​សេរីភាព​ដល់​យើង​ខ្ញុំ​ ហាក់​បីដូច​ជា​ខាំ​ពួក​ខ្ញុំ​មិន​លែង​ មិន​ដឹង​ខឹង​យើង​ខ្ញុំ​នឹង​រឿង​អ្វី​តាំង​ពី​ណា​មក។ ករណី​យើង​ខ្ញុំ​ហ្នឹង វា​គួរ​ណាស់​តែ​ចៅក្រម​បន្ធូរ​បន្ថយ ផ្ដល់​សេរីភាព​ឱ្យ​យើង​ខ្ញុំ​កាន់​តែ​ទូលំទូលាយ​ជាង​នេះ។ ការ​ស៊ើបអង្កេត វា​អត់​មាន​ដំណើរ​ការ​ទៅមុខ​ផង ហើយ​សេរីភាព​គួរ​តែ​បើក​ចំហ​ឱ្យ​យើង​ខ្ញុំ​ខ្លះ ដើម្បី​ពួក​ខ្ញុំ​បាន​ទទួល​នូវ​សិទ្ធិ​ដែល​ពួក​ខ្ញុំ​ជា​ពលរដ្ឋ»

ស្រដៀង​គ្នា​នេះ លោក អ៊ួន ឈិន ថ្លែង​ថា លោក​ខក​ចិត្ត​ចំពោះ​ការ​សម្រេច​របស់​ចៅក្រម​ស៊ើបសួរ ព្រោះ​លោក​ថា លោក​ត្រូវ​ការ​អត្តសញ្ញាណប័ណ្ណ​ជា​ចាំបាច់ ដើម្បី​ការ​រស់នៅ​ប្រចាំ​ថ្ងៃ ហើយនិង​​លិខិត​ឆ្លងដែន​ដើម្បី​មាន​សេរីភាព​ដើរ​ហើរ​ពេញលេញ​ដូច​ប្រជាពលរដ្ឋ​ទូទៅ​ដែរ។ លោក​ថា ការ​សម្រេច​នេះ មាន​ន័យ​ថា តុលាការ​នៅ​គាប​សង្កត់​លើ​សិទ្ធិ​សេរីភាព​របស់​លោក​ដដែល បើ​ទោះបី​​ជា​លោក​នៅ​ក្រៅ​ឃុំ​ក៏ដោយ។ លោក​បញ្ជាក់​ថា លោក​ក៏​ដូច​ជា លោក យាង សុធារិន្ទ ដែរ គឺ​នឹង​ប្ដឹង​ទាស់​សេចក្ដី​សម្រេច​របស់​ចៅក្រម​ស៊ើបសួរ​នេះ៖ «ខ្ញុំ​ខក​ចិត្ត​ណាស់ ចំពោះ​ការ​សម្រេច​នេះ។ យើង​គិត​ថា  បើ​ធ្វើ​អ៊ីចឹង​ វា​ដូច​តែ​ពួក​យើង​នៅ​ក្រោម​ការ​ត្រួត​ពិនិត្យ​របស់​តុលាការ​ដដែល​ហ្នឹង។ ការ​ដែល​ថា ឈប់​ឱ្យ​នៅ​ក្រោម​ការ​ត្រួត​ពិនិត្យ​របស់​​តុលាការ​ហ្នឹង មាន​អ្វី​ប្លែក ប្រសិន​បើ​លិខិត​ឆ្លងដែន ហើយ​និង​អត្តសញ្ញាណ​ប័ណ្ណ​ពួក​ខ្ញុំ​មិន​ត្រូវ​បាន​ប្រគល់​ឱ្យ​វិញ​ផង​ហ្នឹង​។ សំខាន់​គឺ​ការ​រស់​នៅ ការ​ប្រកប​ការងារ គឺ​យើង​ត្រូវ​ការ​ណាស់​ឯកសារ​អស់​ហ្នឹង»

អ្នក​នាំ​ពាក្យ​សមាគម​ការពារ​សិទ្ធិមនុស្ស អាដហុក (ADHOC) លោក ស៊ឹង សែនករុណា រិះគន់​ថា តុលាការ​ហាក់​មាន​ចេតនា​រឹតត្បិត​សិទ្ធិ​សេរីភាព​របស់​អតីត​អ្នក​យក​ព័ត៌មាន​អាស៊ី​សេរី​ទាំង​ពីរ​រូប ហើយ​នេះ​ជា​រូបភាព​នៃ​អនុវត្ត​ច្បាប់​ដោយ​រើស​អើង។ លោក​ថា តុលាការ​មិន​គួរ​បន្ត​រក្សា​ទុក​អត្តសញ្ញាណប័ណ្ណ និង​លិខិត​ឆ្លងដែន​របស់​អ្នក​ទាំង​ពីរ​នោះ​ទេ ព្រោះ​ពួក​គេ​បាន​សហការ​យ៉ាង​ពេញលេញ​គ្រប់​ដំណាក់​​កាល​​នីតិវិធី​តុលាការ៖ «ពាក់ព័ន្ធ​ទៅ​នឹង​លិខិត​ឆ្លង​ដែន ហើយ​និង​អត្តសញ្ញាណប័ណ្ណ​ទាំង​អស់​នេះ វា​មិន​ឆ្លុះ​បញ្ចាំង​ជាមួយ​​ដំណើរការ​នីតិវិធី​នេះ​ទៀត​ទេ លុះ​​ត្រា​ថា​អ្នក​ទាំង​ពីរ​ហ្នឹង​មាន​ចេតនា​គេច​វេះ​មិន​ចូល​ខ្លួន​ទៅ​តាម​ការ​កោះ​ហៅ​របស់​អាជ្ញាធរ​មាន​សមត្ថកិច្ច ឬក៏​តុលាការ​ជា​ដើម​ហ្នឹង ប៉ុន្តែ​យើង​មើល​ទៅ​ផ្ទុយ​ស្រឡះ។ ចេតនា​អ្នក​ទាំង​ពីរ​ហ្នឹង គឺ​មាន​កិច្ច​សហការ​ល្អ​ជាមួយ​អាជ្ញាធរ​មាន​សមត្ថកិច្ច ជាមួយ​នឹង​តុលាការ​រួច​ទៅ​ហើយ»

អ្នក​ការពារ​​សិទ្ធិមនុស្ស​រូប​នេះ​អំពាវនាវ​ដល់​តុលាការ​ក្រុង​ភ្នំពេញ​ឱ្យ​ពន្លឿន​នីតិវិធី​លើ​អង្គ​សេចក្ដី ហើយ​បើ​គ្មាន​​ភស្តុតាង​គ្រប់​​គ្រាន់​នោះ​ទេ តុលាការ​ត្រូវ​ទម្លាក់​ចោល​បទ​ចោទ​ប្រកាន់​ប្រឆាំង​នឹង​អ្នក​ទាំងពីរ និង​ផ្ដល់​សេរីភាព​ពេញលេញ​ដល់​ពួក​​គេ​វិញ​ដោយ​ឥត​លក្ខខណ្ឌ។

សហគមន៍​ជាតិ និង​អន្តរជាតិ​បាន​ថ្កោល​ទោស​អាជ្ញាធរ​កម្ពុជា ដែល​ចាប់​ខ្លួន និង​ចោទ​ប្រកាន់​អតីត​អ្នក​យក​​ព័ត៌មាន​អាស៊ី​សេរី​ទាំងពីរ​រូប​ដោយ​គ្មាន​មូលដ្ឋាន​ទាក់​ទង​នឹង​បទ​ចោទ​ធ្វើ​ចារកម្ម និង​ផលិត​វីដេអូ​អាសអាភាស។ ជា​ពិសេស​ពួក​គេ​រិះគន់​ថា ការ​បន្ត​សំណុំ​​រឿង​នេះ​មក​ទល់​ពេល​បច្ចុប្បន្ន​​​មានន័យ​ស្មើនឹង​ការ​ធ្វើ​​ទុក្ខបុកម្នេញ​លើ​អ្នក​សារ​ព័ត៌មាន​ឯករាជ្យ និង​ជា​ការ​ជាន់​ឈ្លី​ប្រព័ន្ធ​​យុត្តិធម៌​របស់​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល