សហព័ន្ធខ្មែរកម្ពុជាក្រោមនិងអង្គការសិទ្ធិមនុស្សអន្តរជាតិមួយចំនួនបានអំពាវនាវឲ្យឯកអគ្គរដ្ឋទូតនិងតំណាងប្រទេសជាសមាជិកអង្គការសហប្រជាជាតិកុំបោះឆ្នោតគាំទ្របេក្ខភាពប្រទេសវៀតណាមឲ្យធ្វើជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ។អង្គការសិទ្ធិទាំងនោះលើកឡើងថាប្រទេសវៀតណាមបន្តរំលោភសិទ្ធិមនុស្សធ្ងន់ធ្ងរលើពលរដ្ឋខ្លួនឯងនិងជនជាតិដើមដែលជាម្ចាស់ស្រុករួមមាន ពលរដ្ឋខ្មែរក្រោមជាដើម។
អង្គការអន្តរជាតិចំនួន៧ បានចុះហត្ថលេខាលើសេចក្តីថ្លែងការណ៍រួមមួយបង្ហាញក្តីកង្វល់ដល់ឯកអគ្គរដ្ឋទូត និងតំណាងប្រទេសជាសមាជិកអង្គការសហប្រជាជាតិជុំវិញប្រទេសវៀតណាមដែលចង់ក្លាយជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិសម្រាប់អាណត្តិថ្មីពីឆ្នាំ២០២៣ដល់ឆ្នាំ២០២៥។ អង្គការទាំងនោះលើកឡើងថាវៀតណាមមានកំណត់ត្រារំលោភសិទ្ធិមនុស្សយ៉ាងធ្ងន់ធ្ងរដូច្នោះប្រសិនបើប្រទេសនេះជាប់ជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិមែននោះកិត្តិយសរបស់ក្រុមប្រឹក្សាសិទ្ធិមនុស្សកំពូលពិភពលោកមួយនេះនឹងត្រូវប៉ះពាល់យ៉ាងធ្ងន់ធ្ងរ។
ញាតិ្តរបស់អង្គការអន្តរជាតិនេះធ្វើឡើងក្រោយពេលក្រសួងការបរទេសវៀតណាមប្រកាសថាវៀតណាមចង់ក្លាយជាសមាជិកក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។ វៀតណាមអះអាងថា រដ្ឋាភិបាលកុម្មុយនិស្តមួយនេះនឹងប្តេជ្ញាការពារជនងាយរងគ្រោះបំបាត់អំពើហិង្សាលើកតម្កើងសមភាពយេនឌ័រ និងដោះស្រាយបញ្ហាប្រឈមរបស់ពិភពលោក។ វៀតណាមធ្លាប់ក្លាយជាសមាជិកក្រុមប្រឹក្សានេះម្តងរួចហើយកាលពីចន្លោះឆ្នាំ២០១៤ និងឆ្នាំ២០១៦។ទោះបីជាយ៉ាងណាកាលពីពេលថ្មីៗ នេះអ្នករាយការណ៍ពិសេសផ្នែកសិទ្ធិមនុស្សអង្គការសហប្រជាជាតិសម្រាប់ប្រទេសវៀតណាមសំដែងក្តីបារម្ភជុំវិញការឃាត់ខ្លួនយុវជនខ្មែរក្រោមលោក ដួង ខាយ ដោយចោទប្រកាន់លោករឿងចែកចាយឯកសារសេចក្តីប្រកាសអង្គការសហប្រជាជាតិស្តីពីសិទ្ធិជនជាតិដើម។ វៀតណាមបានសារភាពថាអាជ្ញាធរវៀតណាមពិតជាបានចាប់ខ្លួនលោក ដួង ខាយ ដោយសារតែការចែកចាយឯកសារស្តីពីសិទ្ធិជនជាតិដើមមែន។
វៀតណាមក៏បានចាប់ផ្តើមកាត់ទោសកំរិតធ្ងន់ប្រឆាំងនឹងសកម្មជនសិទ្ធិមនុស្ស និងដីធ្លីពីបទប្រឆាំងនឹងរដ្ឋវៀតណាមដែលអង្គការសហប្រជាជាតិចាត់ទុកទង្វើនេះថាជាការរំលោភសិទ្ធិមនុស្សធ្ងន់ធ្ងរ។ វៀតណាមបន្តប្រើប្រាស់មធ្យោបាយធ្វើទារុណកម្ម ដើម្បីបង្ខំសកម្មជនសិទ្ធិមនុស្ស ឱ្យសារភាពទទួលយកទោសកំហុស ដែលពួកគេមិនបានប្រព្រឹត្ត។
សហព័ន្ធខ្មែរកម្ពុជាក្រោមដែលបានចុះហត្ថលេខាលើញាតិ្តស្នើដល់ប្រទេសជាសមាជិកអង្គការប្រជាជាតិកុំឱ្យបោះឆ្នោតគាំទ្របេក្ខភាពវៀតណាម កាលពីសប្តាហ៍មុនបានដឹកនាំប្រតិភូមួយក្រុមទៅអង្គការសហប្រជាជាតិនៅបុរី ញូវយ៉ក (New York) ដើម្បីតស៊ូមតិប្រឆាំងនឹងសមាជិកភាពរបស់វៀតណាម។ សហព័ន្ធបានដាក់ញាតិ្តឲ្យតំណាងប្រទេសលោកសេរីនៅអង្គការសហប្រជាជាតិដើម្បីឲ្យស្វែងយល់ពីស្ថានភាពសិទ្ធិមនុស្សនៅប្រទេសវៀតណាមនិងបើកកិច្ចប្រជុំផ្សព្ធផ្សាយព័ត៌មានជុំវិញការរំលោភបំពានសិទ្ធិជនជាតិដើមខ្មែរកម្ពុជាក្រោម។
ប្រធានសហព័ន្ធខ្មែរកម្ពុជាក្រោមលោក ប្រាក់ សេរីវុឌ្ឍ មានប្រសាសន៍ប្រាប់វិទ្យុអាស៊ីសេរីថាប្រទេសសេរីជាច្រើនប្រទេសបានស្វែងយល់អំពីការរំលោភសិទ្ធិមនុស្សនៅវៀតណាមហើយលោកសង្ឃឹមថាប្រទេសប្រកាន់លទ្ធិប្រជាធិបតេយ្យនឹងមិនបោះឆ្នោតគាំទ្រវៀតណាមនោះទេ៖ « ខ្ញុំស ង្ឃឹមថា គេនឹងបោះឆ្នោតប្រឆាំងកុំឲ្យចូលជាអង្គការសិទ្ធិមនុស្សហ្អឹង…ប៉ុន្តែបើវៀតណាមនៅតែបានជាប់ដដែល សហព័ន្ធខ្មែរកម្ពុជាក្រោម គ្មានអ្វីខាតទេ។ ពាក្យចាស់ថា កុំយកពងមាន់ទៅជល់ហ្នឹងថ្ម វាមិនឈ្នះទេ ប៉ុន្តែពងមាន់គប់ច្រើនទៅ វានឹងធ្វើឲ្យប្រឡាក់ថ្មហ្នឹង»។
ក្រុមប្រឹក្សាសិទ្ធិមនុស្សអង្គការសហប្រជាជាតិជាស្ថាប័នអន្តររដ្ឋាភិបាលក្នុងប្រព័ន្ធអង្គការសហប្រជាជាតិ ដែលមានតួនាទីដើម្បីពង្រឹងលើកតម្កើងនិងការពារសិទ្ធិមនុស្សជុំវិញពិភពលោកដោះស្រាយការរំលោភសិទ្ធិមនុស្សនិងផ្តល់អនុសាសន៍ស្តីពីបញ្ហាសិទិ្ធមនុស្ស។ ក្រុមប្រឹក្សានេះមានសមាជិក៤៧ មកពីប្រទេសជាសមាជិកអង្គការសហប្រជាជាតិហើយតែងជួបប្រជុំគ្នាមួយឆ្នាំម្តងដើម្បីជជែកបញ្ហាសិទ្ធិមនុស្សពិភពលោកនៅការិយាល័យអង្គការសហប្រជាជាតិនៅទីក្រុង ហ្សឺណែវ ( Geneva) ប្រទេស ស្វីស (Switzerland)។
ប្រទេសជាសមាជិកក្រុមប្រឹក្សាអង្គការសហប្រជាជាតិជាង ១៩០ប្រទេសនឹងបោះឆ្នោតជ្រើសរើសសមាជិកក្រុមប្រឹក្សាសិទ្ធិមនុស្សសម្រាប់អាណត្តិបីឆ្នាំពីឆ្នាំ២០២៣ ដល់ឆ្នាំ២០២៥ នៅថ្ងៃទី១១ ខែតុលានេះ។ សម្រាប់អាណត្តិនេះមានប្រទេស១៧ រួមទាំងវៀតណាមផងប្រកួតដណ្តើមយកអាសនៈនៅសេសសល់ចំនួន១៤ ក្នុងចំណោមសមាជិកសរុប៤៧ប្រទេស ដើម្បីធ្វើជាសមាជិកក្រុមប្រឹក្សាសិទ្ធិមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។