សង្គម​ស៊ីវិល​ថា ការ​បន្ត​ធ្លាក់​ចុះ​ស្ថានភាព​សិទ្ធិមនុស្ស​ និង​ជះឥទ្ធិពល​អាក្រក់​ដល់​បញ្ហា EBA

ដោយ សេក បណ្ឌិត
2019-07-14
Share
Federica_Mogherini អ្នកស្រី ហ្វេដេរ៊ីកា មូហ្ការ៊ីនី (Federica Mogherini) តំណាង​ជាន់ខ្ពស់​នៃ​សហភាព​អឺរ៉ុប ផ្នែកកិច្ចការ​បរទេស និង គោលនយោបាយ​សន្តិសុខ និង ជា​អនុប្រធានស្នងការអឺរ៉ុប ជួបជាមួយ​លោក ហ៊ុន សែន (រូបឃើញតែខ្នង)នៅទីក្រុង​ ប្រ៊ុចស្សែល ប្រទេស​ ប៊ែលហ្ស៊ិក កាលពីថ្ងៃទី ១៨ ខែ តុលា ឆ្នាំ ២០១៨។
Photo Courtesy of the EU Audio Visual Services

សង្គម​ស៊ីវិល​សម្ដែង​ការ​ព្រួយបារម្ភ​យ៉ាង​ខ្លាំង​អំពី​ការ​បន្ត​ធ្លាក់​ចុះ​ការ​គោរព​សិទ្ធិមនុស្ស​នៅ​កម្ពុជា បន្ទាប់ពី​របប​លោក ហ៊ុន សែន បាន​ចាប់ខ្លួន​យុវជន ២​នាក់ និង​រឹតត្បិត​ការ​ប្រារព្ធ​ខួប​៣ ឆ្នាំ​នៃ​ឃាតកម្ម​បណ្ឌិត កែម ឡី ។ ពួកគេ​យល់ថា ចំណាត់ការ​នេះ បូក​រួម​ទាំង​ការ​កោះហៅ​មន្ត្រី​បក្ស​ប្រឆាំង​ជាង​១០០ នាក់​កាល​ពី​ពេល​ថ្មីៗ​នោះ​ផង នឹង​ជះឥទ្ធិពល​អាក្រក់​ដល់​បញ្ហា EBA ។ មន្ត្រី​របប​ភ្នំពេញ​ថា រដ្ឋាភិបាល​កំពុង​ចរចា​ជាមួយ​សហភាព​អឺរ៉ុប​រឿង EBA នេះ ហើយ​ចំណាត់​ការ​លើ​អ្នក​កែម ឡី និយម និង​សកម្មជន​បក្ស​ប្រឆាំង​ទាំងនោះ គឺជា​ការអនុវត្ត​ច្បាប់ ។

អង្គការ​មិនមែន​រដ្ឋាភិបាល និង​សហជីព យល់ឃើញ​ស្របគ្នា​ថា ចំណាត់ការ​របស់​អាជ្ញាធរ​កម្ពុជា​ទៅ​លើ​អ្នក​កែម ឡី និយម និង​ការ​រឹតត្បិត​សិទ្ធិ​សេរីភាព​បញ្ចេញមតិ និង​ការ​ជួប​ប្រជុំ​របស់​ប្រជាពលរដ្ឋ​នា​ពេល​កន្លងមក នឹង​ធ្វើ​ឱ្យ​សហភាព​អឺរ៉ុប​មើល​ឃើញ​កាន់តែ​ច្បាស់​ថា របប​ក្រុងភ្នំពេញ​គ្មាន​ការ​ប្តេជ្ញា​ចិត្ត​រឿង​គោរព​សិទ្ធិមនុស្ស និង​ស្តារ​ស្ថានការណ៍​នយោបាយ​ដែល​កំពុង​ធ្លាក់​ចុះ​ដុនដាប​នោះ​ឡើយ។

ប្រធាន​ផ្នែក​សិទ្ធិមនុស្ស​នៃ​សមាគម ​អាដហុក (Adhoc) លោក នី សុខា ជឿជាក់​ថា សហភាព​អឺរ៉ុប​កំពុង​តាមដាន​យ៉ាង​យកចិត្តទុកដាក់​ចំពោះ​សកម្មភាព​របស់​រដ្ឋាភិបាល​កម្ពុជា​អំពី​ការ​គោរព​សិទ្ធិមនុស្ស និង​ប្រជាធិបតេយ្យ ដើម្បី​សម្រេច​ចិត្ត​ថា តើ​ត្រូវ​ដកហូត ឬ​រក្សាទុក​ប្រព័ន្ធ​អនុគ្រោះ​ពន្ធ​ដល់​កម្ពុជា​បន្ត​ទៀ។ លោក​ថា ក្នុង​ស្ថានភាព​បែបនេះ រដ្ឋាភិបាល​មិន​ត្រឹមតែ​មិនបាន​អនុវត្ត​តាម​លក្ខខណ្ឌ​របស់​សហភាព​អឺរ៉ុប​ទេ ប៉ុន្តែ​បែរជា​បន្ថែម​ការ​រឹតត្បិត​លើ​សិទ្ធិ​សេរីភាព​ជា​មូលដ្ឋាន​របស់​ប្រជាពលរដ្ឋ​ទៅវិញ​។ លោក​យល់ថា ប្រសិនបើ​ស្ថានភាព​បែបនេះ​នៅតែ​បន្ត កម្ពុជា​ចៀស​មិន​ផុត​ពី​ការបាត់បង់​ប្រព័ន្ធ​អនុគ្រោះ​ពន្ធ​ឡើយ​។ លោក​ស្នើ​ឱ្យ​រដ្ឋាភិបាល​ពិចារណា និង​កែប្រែ​ឡើងវិញ ចំពោះ​ទង្វើ​ទាំងឡាយ​របស់​ខ្លួន​ក្នុង​រយៈពេល​ចុងក្រោយ​នេះ៖ «រដ្ឋាភិបាល ចុង​ក្រោយនេះ​មិនបាន​បង្ហាញ​ពី​ជំហរ​នៃ​ការ​លើកស្ទួយ​ឡើងវិញ​នូវ​សិទ្ធិ​សេរីភាព​ទាក់ទង​ទៅ​នឹង​បញ្ហា​សិទ្ធិមនុស្ស​ពិសេស​សេរី​ភាពជា​មូលដ្ឋាន​ទាំងអស់​ហ្នឹង ថែមទាំង​បន្ត​រឹតត្បិត​កាន់តែ​ខ្លាំង​ឡើង​ៗ។ ហើយ​យើង​ពិនិត្យ​ឃើញ​ថា នេះ​ជា​ចំណុច​មួយ​ដែល​មាន​ការពិបាក ហើយក៏​ជា​ការ​ព្រួយបារម្ភ​ចំពោះ​ស្ថានភាព EBA ទៅ​ថ្ងៃ​អនាគត​ថា តើ​សហភាព​អឺរ៉ុប​នឹង​យល់​យ៉ាងម៉េច​ចំពោះ​បញ្ហា​ហ្នឹង បើ​រដ្ឋាភិបាល​យើង​អត់​បាន​ធ្វើ​ការ​កែប្រែ​ឥរិយាបថ​ដើម្បី​ឈាន​ទៅ​គោរព​ឱ្យ​បាន​នូវ​លក្ខខណ្ឌ​ដែល​មាន​ជាមួយ​នឹង EU»

សហភាព​អឺរ៉ុប​បាន​បញ្ជាក់​ជំហរ​របស់​ខ្លួន​យ៉ាង​ច្បាស់ និង​បាន​ដាស់តឿន​របប​ក្រុងភ្នំពេញ​ម្ដង​ហើយ​ម្ដង​ទៀត​ថា ប្រសិនបើ​របប​នេះ​នៅ​ចង់​ទទួល​បាន​ការ​អនុគ្រោះ​ពន្ធ EBA បន្ត​ទៅ​ទៀត របប​នេះ​ត្រូវតែ​កែ​លម្អ​កង្វល់​ទាំងឡាយ​អំពី​បញ្ហា​សិទ្ធិមនុស្ស និង​ប្រជាធិបតេយ្យ ឱ្យ​បាន​ពិតប្រាកដ និង​គួរ​ឱ្យ​ទុក​ចិត្ត​បាន​។

ទោះជា​យ៉ាងណា របប​លោក ហ៊ុន សែន មិន​ទាន់​បាន​អនុវត្ត​តាម​លក្ខខណ្ឌ​របស់​សហភាព​អឺរ៉ុប​នៅឡើយ​ទេ តែ​ផ្ទុយទៅវិញ​របប​នេះ​បាន​បង្កើន​ការ​ធ្វើទុក្ខបុកម្នេញ និង​រឹតត្បិត​កាន់តែ​ខ្លាំង​លើ​ពលរដ្ឋ និង​សកម្មជន​បក្ស​ប្រឆាំង​នៅ​តាម​មូលដ្ឋាន។

អាជ្ញាធរ​របប​ក្រុងភ្នំពេញ​បាន​ចាប់ខ្លួន​សកម្មជន​សង្គម​ពីរ​នាក់ គឺ​យុវជន គង់ រ៉ៃយ៉ាង និង សួង នាគព័ន្ធ នៅ​អំឡុង​ខួប​៣ ឆ្នាំ​នៃ​ការ​បាញ់​សម្លាប់​បណ្ឌិត កែម ឡី បន្ទាប់ពី​ពួកគេ​បាន​រំឭក​ពី​ពាក្យ​បណ្ដាំ​របស់​បណ្ឌិត កែម ឡី និង​បង្ហាញ​ការ​គោរព​ដល់​វិញ្ញាណក្ខន្ធ​អ្នក​វិភាគ​នយោបាយ​ដ៏​មាន​ប្រជាប្រិយភាព​រូប​នេះ។ តុលាការ​ក្រុង​ភ្នំពេញ​បាន​ចោទប្រកាន់​អ្នក​ទាំងពីរ​ពី​បទ “​ញុះញង់​ឱ្យ​ប្រព្រឹត្តិ​បទឧក្រិដ្ឋ​ជាអាទិ៍​” ដែល​ប្រឈម​នឹង​ការ​ជាប់​ពន្ធនាគារ​រយៈ​ពេល ២​ឆ្នាំ​។ ទន្ទឹម​នឹង​នេះ អាជ្ញាធរ​បាន​ឃ្លាំ មើល និង​រឹត​បន្តឹង​គ្រប់​ទីកន្លែង ដែល​មានការ​ប្រារព្ធ​ខួប​៣ ឆ្នាំ​បណ្ឌិត កែម ឡី ក្រោម​លេស​ថា ដើម្បី​ការពារ​សន្តិសុខ និង​សណ្ដាប់ធ្នាប់​សាធារណៈ​នៅ​តាម​ទីតាំង​ទាំងនោះ។

នៅមុន​ព្រឹត្តិការណ៍​នេះ​បន្តិច ពោល​គឺ​នៅ​អំឡុង​ខែ​ឧសភា កន្លង​ទៅ អាជ្ញាធរ​បាន​កោះហៅ​សកម្មជន​បក្ស​ប្រឆាំង​ជិត​១៥០ នាក់ ឱ្យ​ចូល​ខ្លួន​ឆ្លើយ​បំភ្លឺ​រឿង​បំពាន​សាលដីកា​តុលាការ​កំពូល បន្ទាប់ពី​ពួកគេ​បាន​ជួបជុំគ្នា​ហូប​នំ​បញ្ចុក និង​ថ្លែង​សារ​គាំទ្រ​គម្រោង​វិល​ត្រឡប់​មក​កម្ពុជា​វិញ​របស់​​លោក សម រង្ស៊ី។ ក្នុងចំណោម​សកម្មជន​បក្ស​សង្គ្រោះ​ជាតិ​ដែល​ត្រូវ​បាន​កោះហៅ​នោះ មាន​មួយ​ចំនួន​ត្រូវ​បាន​ចោទប្រកាន់​ដោយ​តុលាការ និង​កំពុង​ជាប់ឃុំ​ក្នុង​ពន្ធនាគារ​នៅឡើយ។

ទោះជា​យ៉ាងណា អនុប្រធាន​គណៈកម្មាធិការ​សិទ្ធិមនុស្ស​កម្ពុជា និង​ជា​អ្នកនាំពាក្យ​ក្រសួងយុត្តិធម៌ លោក ជិន ម៉ាលីន ឆ្លើយ​ការពារ​រដ្ឋាភិបាល​ថា ចំណាត់ការ​ទៅលើ​អ្នក កែម ឡី និយម និង​សកម្មជន​បក្ស​ប្រឆាំង​នៅ​មូលដ្ឋាន​នោះ គឺជា​ការអនុវត្ត​ច្បាប់ មិន​ពាក់ព័ន្ធ​នឹង​រឿង EBA ឡើយ​។ លោក​បញ្ជាក់​ថា រដ្ឋាភិបាល​កំពុង​ដោះស្រាយ​បញ្ហា​ប្រព័ន្ធ​អនុគ្រោះ​ពន្ធ​នេះ​ជាមួយ​ភាគី​សហភាព​អឺរ៉ុប ហើយ​រដ្ឋាភិបាល​ប្រកាន់​ជំហរ​ច្បាស់លាស់ គឺ​មិន​យក​អធិបតេយ្យ​ជាតិ​ទៅ​ប្ដូរ​នឹង​ជំនួយ​បរទេស​ឡើយ៖ «រដ្ឋាភិបាល​កំពុង​ធ្វើការ​ចរចា ធ្វើ​ម៉េច​កុំ​ឱ្យ​មានការ​កាត់ផ្ដាច់ EBA ចំណែក​រឿង​យន្តការ​អនុវត្ត​ច្បាប់ គឺជា​អ្វី​ដែល​រដ្ឋ​ត្រូវតែ​ធ្វើ​ដើម្បី​ធានា​បាន​នូវ​សន្តិសុខ​សណ្ដាប់ធ្នាប់​សង្គម​។ ហើយ​រដ្ឋាភិបាល​ប្រកាន់​ខ្ជាប់​ជានិច្ច​នូវ​គោលការណ៍​ប្រជាធិបតេយ្យ នីតិរដ្ឋ តាមរយៈ​ការអនុវត្ត​ច្បាប់​ទប់ស្កាត់​ភាព​ចលាចល​ក្នុង​សង្គម។ ម្យ៉ាងទៀត យន្តការ EBA ក៏​គេ​មិន​បានដាក់​លក្ខខណ្ឌ​ឱ្យ​យើង​ត្រូវតែ​បោះបង់ចោល​នូវ​​យន្តការ​អនុវត្ត​ច្បាប់​របស់​រដ្ឋ​អធិបតេយ្យ ដើម្បី​ធានា​នូវ​គោលការណ៍​នីតិរដ្ឋ និង​ប្រជាធិបតេយ្យ​នោះ​ដែរ»

របប​លោក ហ៊ុន សែន កំពុង​ប្រើ​មធ្យោបាយ​ចរចា​ផង លួងលោម​ផង និង​គំរាមកំហែង​ផង ដាក់​សហភាព​អឺរ៉ុប អំពី​រឿង​ប្រព័ន្ធ​អនុគ្រោះ​ពន្ធ EBA នេះ។ មធ្យោបាយ​ចរចា គឺ​ធ្វើ​ឡើង​តាមរយៈ​ជំនួប​ជា​បន្តបន្ទាប់​រវាង​ក្រសួងការបរទេស​កម្ពុជា​ជាមួយ​ប្រតិភូ និង​គណៈកម្មការ​អឺរ៉ុប ហើយ​នៅ​ក្នុង​ជំនួប​ទាំងនោះ របប​ក្រុងភ្នំពេញ​បកស្រាយ​ដដែល​ជា​ដដែល​ថា ចំណាត់ការ​ទាំង​អម្បាល​ម៉ាន​លើ​សំឡេង​ប្រឆាំង និង​សំឡេង​ឯករាជ្យ​នាពេល​កន្លង​​ទៅ​នោះ គឺជា​ការអនុវត្ត​ច្បាប់​របស់​កម្ពុជា។ ចំពោះ​មធ្យោបាយ​លួងលោម​វិញ គឺ​ថ្នាក់ដឹកនាំ​របប​នេះ បាន​ថ្លែង​នៅ​ក្នុង​វេទិកា​អន្តរជាតិ​អំពី​សារៈសំខាន់​នៃ​ទំនាក់ទំនង​ពាណិជ្ជកម្ម​ជាមួយ​ក្រុម​ប្រទេស​អភិវឌ្ឍ ដូចជា សហភាព​អឺរ៉ុប ជាដើម ហើយ​ស្នើ​ឱ្យ​ក្រុម​ប្រទេស​ទាំងនោះ បន្ត​ការ​អនុគ្រោះ​ពន្ធ​ដល់​ប្រទេស​ដែល​មាន​សេដ្ឋកិច្ច​រីកចម្រើន​តិចតួច ដូចជា កម្ពុជា​បន្ត​ទៅ​ទៀត។ របប​ក្រុងភ្នំពេញ​ក៏បាន​ព្យាយាម​បញ្ចុះបញ្ចូល​ប្រទេស​សមាជិក​សហភាព​អឺរ៉ុប​មួយ​ចំនួន​ដែរ ដូចជា ហុងគ្រី ជាដើម ដើម្បី​ឱ្យ​ជួយ​និយាយ​ជាមួយ​គណៈកម្មការ​អឺរ៉ុប និង​ឈរ​នៅ​ខាង​របប​នេះ​ជុំវិញ​វិបត្តិ EBA​។ ក្រៅពី​មធ្យោបាយ​ត្រជាក់​ទាំងនេះ ថ្នាក់ដឹកនាំ​របប​ក្រុងភ្នំពេញ​ក៏បាន​តបត​ទៅ​សហភាព​អឺរ៉ុប​ដោយ​ឥរិយាបថ​ច្រឡោងខាម​ខ្លះ​ដែរ តួយ៉ាង ការប្រមាថ​មន្ត្រី​អឺរ៉ុប​ថា មិន​បើកភ្នែក​មើល​ស្ថានការណ៍​ជាក់ស្ដែង​នៅ​កម្ពុជា និង​ការព្រមាន​សហភាព​អឺរ៉ុប​ថា សមិទ្ធផល​របស់​ពួកគេ​នៅ​កម្ពុជា​នឹង​ត្រូវ​រលាយ​ដូច​អំបិល​ត្រូវ​ទឹក បើ​ហ៊ាន​ដក​ប្រព័ន្ធ​អនុគ្រោះ​ពន្ធ EBA ជា​ដើម​នោះ។

ប្រធាន​សហភាព​សហជីព​កម្ពុជា លោក រ៉ុង ឈុន ថ្លែង​ថា ចំណាត់ការ​ចុងក្រោយ​របស់​របប​ក្រុង​ភ្នំពេញ​ទៅលើ​សកម្មជន​សង្គម និង​មន្ត្រី​បក្ស​ប្រឆាំង​តាម​មូលដ្ឋាន បូករួម​ទាំង​ការ​រឹតត្បិត​សិទ្ធិ​សេរីភាព​កាន់តែ​ខ្លាំង​ថែមទៀត​នេះ គឺជា​ការ​គំរាមកំហែង​ធ្ងន់ធ្ងរ​ទៅលើ​ការ​រក្សា​ប្រព័ន្ធ​អនុគ្រោះ​ពន្ធ EBA។ លោក​បន្ត​ថា រដ្ឋាភិបាល​កម្ពុជា​កំពុងតែ​សន្សំ​បញ្ហា​កាន់តែ​ច្រើន ដែល​ជា​ការ​ដាក់​បន្ទុក​ឱ្យ​សហភាព​អឺរ៉ុប ដក​ប្រព័ន្ធ​អនុគ្រោះ​ពន្ធ​ពី​កម្ពុជា ខុស​ផ្ទុយ​ពី​ការ​អះអាង​ប្រាប់​សហគមន៍​អន្តរជាតិ​ដែល​ថា រដ្ឋាភិបាល​មានការ​ប្ដេជ្ញា​ចិត្ត​ខ្ពស់​ចំពោះ​ការ​គោរព​សិទ្ធិមនុស្ស និង​លទ្ធិប្រជាធិបតេយ្យ​។ លោក​បន្ថែម​ថា សហភាព​អឺរ៉ុប​នឹង​មិន​ជឿ​លើ​ការ​បកស្រាយ​របស់​រដ្ឋាភិបាល​កម្ពុជា​ឡើយ ដោយសារតែ​ការ​និយាយ​ផ្សេង ធ្វើ​ផ្សិង​បែបនេះ​។ ម្យ៉ាងវិញទៀត លោក​​ថា ទាំង​សហគមន៍​ជាតិ និង​អន្តរជាតិ សុទ្ធតែ​អាច​យល់​បាន​ថា រាល់​ចំណាត់​ការ​បង្ក្រាប​សំឡេង​ឯករាជ្យ និង​សំឡេង​ប្រឆាំង​នា​ពេល​កន្លងមក​នោះ មិនមែន​ជា​ការអនុវត្ត​ច្បាប់​ពិតប្រាកដ​ឡើយ៖ «​ភាព​ជាក់ស្ដែង យើង​មិន​ឃើញ​មាន​ដំណោះ​ស្រាយ​ដុំកំភួន​ណា​ទេ ប៉ុន្តែ​រឹតតែ​បង្កើន​បន្ទុក​ទៅវិញ​ទេ ពីព្រោះ​មិនបាន​ដោះស្រាយ​បញ្ហា​ដែល​កើត​កន្លងមក​ផង បែរជា​បង្កើត​បញ្ហា​កាន់តែ​ច្រើន​ទៅ ដូចជា​ករណី​កោះហៅ​សកម្មជន​ក្រុមប្រឹក្សា​គណបក្ស​សង្គ្រោះជាតិ ហើយ​ថ្មីៗ​នេះ ថ្ងៃ​០៩-១០ នេះ មាន​ចាប់ គង់ រ៉ៃយ៉ា ចាប់ សួង នាគព័ន្ធ អី​ជា​ហូរហែ​ទៀត​។ អាហ្នឹង វា​កាន់តែ​ធ្វើ​ឱ្យ​បញ្ហា​ប្រឈម​កាន់តែ​ខ្លាំង​ទាក់ទង​ទៅ​នឹង EBA សម្រាប់​សហភាព​អឺរ៉ុប​បន្ត​ឱ្យ​យើង»

សហភាព​អឺរ៉ុប​បាន​បញ្ជូន​បេសកកម្ម​ស្វែងរក​ការពិត​មក​កម្ពុជា​ចំនួន​ពីរ​ដង​រួច​មក​ហើយ ដោយ​លើកទីមួយ​កាលពី​ខែ​មីនា និង​លើក​ទី​ពីរ​កាលពីដើម​ខែ​មិថុនា​កន្លងទៅ​។ សហភាព​អឺរ៉ុប​នឹង​បិទ​បញ្ចប់​ដំណើរការ​តាមដាន និង​វាយតម្លៃ​ស្ថានការណ៍​កម្ពុជា នៅ​ពាក់​កណ្ដាល​ខែក្រោយ​នេះ បន្ទាប់​មក​នឹង​ចេញ​របាយការណ៍​ស្ដីពី​របកគំហើញ ព្រមទាំង​ធ្វើ​សេចក្ដី​សន្និដ្ឋាន​នៅ​ខែ​វិច្ឆិកា​ខាងមុខ​។ ពេល​នោះ សហភាព​អឺរ៉ុប​នឹង​ទុក​ពេល ១​ខែ ឱ្យ​របប​លោក ហ៊ុន សែន ដើម្បី​ឆ្លើយតប​នឹង​របាយការណ៍​នេះ ហើយ​នៅ​ខែ​កុម្ភៈ ឆ្នាំ​២០២០ សហភាព​អឺរ៉ុប​នឹង​សម្រេច​ចិត្តជា​ចុងក្រោយ​ថា ត្រូវ​ដក ឬ​រក្សាទុក​ប្រព័ន្ធ​អនុគ្រោះ​ពន្ធ​នេះ​។ បើ​សហភាព​អឺរ៉ុប​សម្រេច​ចិត្ត​ថា ត្រូវ​ដកហូត​មែន នោះ​អឺរ៉ុប​នឹង​យកពន្ធ​លើ​ទំនិញ​កម្ពុជា នៅ​ខែ សីហា ឆ្នាំ​២០២០ ខាង​មុខ ហើយ​ពេលនេះ​កម្ពុជា​នឹង​ខាតបង់​ទឹកប្រាក់​ជិត ​៧០០លាន​​ដុល្លារ​អាមេរិក​ក្នុង​មួយ​ឆ្នាំ។

ក្រៅពី​ខាតបង់​ចំពោះ​ការ​បង់​ពន្ធ​ហើយ ក្រុមហ៊ុន​ម៉ាក​យីហោ​អន្តរជាតិ​ល្បីៗ ក៏​អាច​នឹង​បញ្ឈប់ ឬ​កាត់បន្ថយ​ការ​បញ្ជាទិញ​ផលិតផល​ពី​កម្ពុជា​ដែរ ពីព្រោះ​ពួកគេ​មិន​ចង់​រកស៊ី​ជាមួយ​ប្រទេស​ណា ដែល​មាន​ការរំលោភ​សិទ្ធិ​មនុស្ស​ឡើយ​។ ពេលនោះ រោងចក្រ​សហគ្រាស​មួយ​ចំនួន​ធំ ដែល​មាន​ទំនិញ​នាំ​ចេញទៅ​ទីផ្សារ​អឺរ៉ុប អាច​នឹង​បង្វែរ​ការ​រកស៊ី​របស់​ពួកគេ​ទៅ​ប្រទេស​ណា ដែល​មាន​បរិយាកាស​អំណោយ​ផល​ជាង និង​មានការ​អនុគ្រោះ​ពន្ធ​វិញ តួយ៉ាង​ដូចជា ប្រទេស​វៀតណាម ជាដើម ដែល​ទើប​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​សហភាព​អឺរ៉ុប។

ប្រឈមមុខ​នឹង​វិបត្តិ​បែបនេះ អង្គការ​សង្គម​ស៊ីវិល និង​សហជីព អំពាវនាវ​យ៉ាង​ទទូច​ដល់​របប​ក្រុងភ្នំពេញ ឱ្យ​បញ្ឈប់​ការ​ធ្វើទុក្ខបុកម្នេញ​លើ​សំឡេង​ឯករាជ្យ និង​សំឡេង​ប្រឆាំង​តទៅទៀត ព្រមទាំង​ងាក​មក​ស្ដារ​ស្ថានការណ៍​ធ្លាក់​ចុះ​ដុនដាប​នៃ​ការ​គោរព​សិទ្ធិមនុស្ស និង​លទ្ធិប្រជាធិបតេយ្យ​ឡើងវិញ ដើម្បី​បញ្ចៀស​គ្រោះកាច​របស់​ប្រជាពលរដ្ឋ​ខ្មែរ និង​ប្រទេសជាតិ​ទាំងមូល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល