ក្រុមអ្នកជំនាញសិទ្ធិមនុស្សអង្គការសហប្រជាជាតិថ្កោលទោសអាជ្ញាធរកម្ពុជាដែលបានបំបែកកូដកម្ម និងចាប់ខ្លួនមេដឹកនាំសហជីពនៃក្រុមហ៊ុនណាហ្គាវើលដ៍(Naga World) ដាក់ពន្ធនាគារជាបន្តបន្ទាប់មកនេះ។
អ្នកជំនាញសិទ្ធិមនុស្សថានេះជាករណីរំលោភបំពានលើច្បាប់សិទ្ធិមនុស្សដែលបានធ្វើឡើងតាំងពីលើកដំបូងនៅយប់មុនឆ្លងចូលឆ្នាំថ្មីឆ្នាំសាកល២០២២និងនៅពេលមានព្រឹត្តិការណ៍ជាច្រើនផ្សេងទៀតដែលគេបានបង្វែរចំណាប់អារម្មណ៍របស់សាធារណជន។ ករណីទាំងនេះត្រូវបានគេមើលឃើញថា ជាមធ្យោបាយមិនសមរម្យមួយក្នុងការរឹតត្បិតសិទ្ធិមនុស្ស។
ក្រុមអ្នកជំនាញសិទ្ធិមនុស្សនៃអង្គការសហប្រជាជាតិទាំងនោះរួមមាន លោកសាស្ត្រាចារ្យ វិទិត មុនតាប៊ន (Vitit Muntarbhorn) អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជាលោកស្រី អាយរីន ខាន់ (Irene Khan) អ្នករាយការណ៍ពិសេសស្តីពីការលើកកម្ពស់និងការការពារសិទ្ធិសេរីភាពនៃការបញ្ចេញគំនិតនិងមតិយោបល់ លោកស្រី ម៉ារី ឡល័រ (Mary Lawlor)អ្នករាយការណ៍ពិសេសស្តីពីស្ថានភាពរបស់អ្នកការពារសិទ្ធិមនុស្ស និងលោក ក្លេម៉ង់ នីយ៉ាឡេតសូស៊ី វូល (Clément Nyaletsossi Voule) អ្នករាយការណ៍ពិសេសស្តីពីសិទ្ធិខាងការប្រមូលផ្តុំដោយសន្តិវិធីនិងខាងសមាគម។
ក្រុមអ្នកជំនាញអង្គការសហប្រជាជាតិទាំងនេះមានប្រសាសន៍តាមរយៈ សេចក្តីថ្លែការណ៍ ពីទីក្រុងហ្សឺណែវ (GENEVA) ប្រទេសស្វីស (Switzerland) កាលពីថ្ងៃទី៥ ខែមករា ថា៖ « ការចាប់ខ្លួនកូដករដែលភាគច្រើនជាស្រ្តីជាច្រើនលើកមកនេះត្រូវបានធ្វើឡើងដោយហិង្សានិងមើលទៅជាការបំពានលើសេរីភាពក្នុងការបង្កើតសមាគមការប្រមូលផ្តុំ និងការបញ្ចេញមតិ»។
ក្រុមអ្នកជំនាញបានលើកឡើងទៀតថា គំរូនិងរបៀបនៃការចាប់ខ្លួនទាំងនេះកើតឡើងបន្ទាប់ពីសកម្មភាពធ្វើកូដកម្មស្វែងរកដំណោះស្រាយការងារមិនអាចដោះស្រាយបានតាមពេលវេលាសមរម្យបង្ហាញអំពីការបង្កើនកំដៅនៃការប្រើប្រាស់មធ្យោបាយដដែលៗ ដែលបានប្រើក្នុងករណីមុនៗនៅក្នុងប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះហើយដែលបណ្តាលឲ្យមានការចាប់អ្នកការពារសិទ្ធិមនុស្សមួយចំនួនដាក់ពន្ធនាគារដោយមិនសមហេតុផល។
សកម្មភាពភាពទាំងនេះក៏ជាការអនុវត្តផ្ទុយពីរដ្ឋធម្មនុញ្ញកម្ពុជាដែលបានចែងច្បាស់អំពីសិទ្ធិធ្វើកូដកម្មនិងសិទ្ធិសេរីភាពក្នុងការបង្កើតសមាគមការបញ្ចេញមតិការប្រមូលផ្តុំដោយសន្តិវិធីសេរីភាពសារព័ត៌មាននិងបោះពុម្ពផ្សាយព្រមទាំងផ្ទុយពីមាត្រា៣១៩នៃច្បាប់ស្តីពីការងារកម្ពុជាដែលបានធានានូវសិទ្ធិធ្វើកូដកម្មផងដែរ។
អ្នករាយការណ៍ពិសេសទទួលបន្ទុកស្ថានការណ៍សិទ្ធិមនុស្សនៅកម្ពុជារបស់អង្គការសហប្រជាជាតិលោកសាស្ត្រាចារ្យ វិទិត មុនតាប៊ន ក៏ធ្លាប់បានលើកឡើងអំពីការរួមតូចនៃលំហសិទ្ធិជាមូលដ្ឋានរបស់ពលរដ្ឋនិងនយោបាយនៅក្នុងប្រទេសនេះនាពេលកន្លងមកដែរ។
ក្រុមអ្នកជំនាញសិទ្ធិមនុស្សបានលើកឡើងទៀតថា៖«ការចោទប្រកាន់ និងការចាប់ខ្លួនថ្មីៗនេះបង្កឲ្យមានការព្រួយបារម្ភជាពិសេសនៅពេលដែលប្រទេសកម្ពុជាកំពុងត្រៀមរៀបចំការបោះឆ្នោតឃុំ-សង្កាត់នៅឆ្នាំ២០២២នេះនិងការបោះឆ្នោតជាតិនៅឆ្នាំក្រោយ»។
ការធ្វើបែបនេះ គឺជាការបញ្ចូនសារដ៏គួរឲ្យភ័យខ្លាចដល់ប្រជាជនខ្មែរអំពីលំហក្នុងការប្រមូលផ្តុំដោយសេរី។
ក្រុមអ្នកជំនាញ អំពាវនាវឲ្យរដ្ឋាភិបាលលោក ហ៊ុន សែន ពន្យល់នូវសកម្មភាពឆ្លើយតបរបស់មន្រ្តីនគរបាល ហើយក៏ជាការបញ្ជាក់ថា ពួកគាត់កំពុងតាមដានការវិវត្តន៍នេះយ៉ាងដិតដល់។
លើសពីនេះទៀត ក្រុមអ្នកជំនាញក៏បានអំពាវនាវជាថ្មីម្តងទៀតឲ្យរដ្ឋាភិបាលអនុវត្តនូវអនុសាសន៍ដែលខ្លួនបានទទួលយកក្នុងអំឡុងពេលនៃការត្រួតពិនិត្យឡើងវិញជាសកលតាមកាលកំណត់ នាឆ្នាំ២០១៩ ដែលរួមបញ្ចូលទាំងការសន្យាដើម្បីបង្កើតលក្ខខណ្ឌដែល «សង្គមស៊ីវិលរួមទាំងអ្នកការពារសិទ្ធិមនុស្សអាចបំពេញការងាររបស់ពួកគេដោយសេរីដោយគ្មានការជ្រៀតជ្រែកឬរារាំង»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។