មន្ត្រីសហជីព ព្រួយបារម្ភអំពីសុវត្ថិភាពរបស់កម្មការិនីមានផ្ទៃពោះ ដែលចូលរួមពិធីឃោសនានយោបាយរបស់លោកនាយករដ្ឋមន្ត្រី ហ៊ុន សែន។ ការព្រួយបារម្ភនេះ គឺបន្ទាប់ពីលោក ហ៊ុន សែន ប្រកាសថា មានកម្មការិនីមួយចំនួនបានសម្រាលកូននៅពេលចូលរួមពិធីសំណេះសំណាលរបស់លោក។
កម្មការិនីរោងចក្រដែលមានផ្ទៃពោះជិតគ្រប់ខែមួយចំនួន អាចប្រឈមគ្រោះថ្នាក់ ទាំងម្ដាយ និងកូនដោយសារតែពួកគាត់ទទួលរងសម្ពាធពីមន្ត្រី និងថៅកែរោងចក្រឲ្យទៅចូលរួមអង្គុយស្ដាប់រយៈពេលយូរនូវការឃោសនានយោបាយរបស់លោកនាយករដ្ឋមន្ត្រី។ ជាក់ស្ដែង មានកម្មការិនីម្នាក់នៅខេត្តស្វាយរៀង សម្រាលកូនបានជោគជ័យ ប៉ុន្តែកម្មការិនីផ្សេងទៀតនៅខេត្តកំពង់ឆ្នាំងសម្រាលកូនមិនបានជោគជ័យឡើយ ដោយមានទារកពីរនាក់បានស្លាប់ក្នុងពេលចូលរួមពិធីជួបសំណេះសំណាលជាមួយលោក ហ៊ុន សែន។
ប្រធានសហភាពការងារកម្ពុជា (CLC) លោក អាត់ ធន់ មានប្រសាសន៍ថា ជារឿងមិនត្រឹមត្រូវ និងជារឿងរំលោភសិទ្ធិកម្មករ ប្រសិនបើពួកគាត់មានផ្ទៃពោះជិតឆ្លងទន្លេតាមខែកំណត់ ប៉ុន្តែក្រុមហ៊ុន នៅតែតម្រូវឲ្យគាត់ទៅធ្វើការ ឬទៅចូលរួមពិធីសំណេះសំណាលរបស់លោកនាយករដ្ឋមន្ត្រី។ លោកបន្តថា តាមច្បាប់ កម្មការិនី ដែលមានផ្ទៃពោះ អាចសុំច្បាប់សម្រាកមុនពេលសម្រាលកូនយ៉ាងហោចណាស់មួយខែ ហើយពួកគាត់ ក៏មានសិទ្ធិទទួលបានការសម្រាកលំហែមាតុភាពរយៈពេល ៣ខែ ឬ ៩០ថ្ងៃដែរ។ មេដឹកនាំសហជីពរូបនេះ បញ្ជាក់ទៀតថា ក្នុងកំឡុងពេល ២ខែដំបូង ដែលកម្មការិនីត្រឡប់ទៅធ្វើការវិញ គាត់ត្រូវធ្វើការងារណា ដែលស្រាលៗ តែប៉ុណ្ណោះ ហើយថៅកែក្រុមហ៊ុន មិនអាចបញ្ឈប់ពួកគាត់មុនពេល ឬក្នុងពេលកំពុងសម្រាកលំហែមាតុភាពឡើយ។
លោក អាត់ ធន់៖«កន្លងមកយើងដឹងថា មានបញ្ហាច្រើនអំពីស្ត្រី។ ស្ត្រីខ្លះ ត្រូវបានគេបញ្ឈប់ពីការងារនៅពេលគេដឹងថា មានផ្ទៃពោះ។ ស្ត្រីខ្លះទៀត ធ្វើការ ទោះបីដឹងថា គាត់មានផ្ទៃពោះហើយមិនឲ្យការងារកន្លែងរាងស្រួល ឬធូរទេ គឺគេឲ្យធ្វើកន្លែងធ្ងន់ ឬកន្លែងការងារដដែល។ ស្ត្រីខ្លះត្រូវបានអនុញ្ញាតឲ្យធ្វើការរហូតដល់ឆ្លងទន្លេ អាហ្នឹងហើយដែលប៉ះពាល់ ដែលគេគួរតែមើល។ ក្នុងករណីដែលគាត់ដល់កម្រិតហ្នឹងហើយគាត់ត្រូវមកទទួលសម្ដេចទៀត ហើយគាត់ពិបាកអង្គុយ ហើយយើងដឹងហើយ ត្រៀមចាំមុនមួយម៉ោងពីរម៉ោង រហូតដល់និយាយចប់យូរដែរ។ ដូច្នេះខ្ញុំគិតថា កាន់តែធ្វើឲ្យគាត់លំបាកទៀត ព្រោះបើគាត់នៅក្រៅ គាត់អាចសម្រាកដើរលិចកើត បត់ជើងបត់អីបាន។ ដូច្នេះ ខ្ញុំគិតថា អ្នកមានផ្ទៃពោះជិតដល់ឆ្លងទន្លេ មិនគួរឲ្យគាត់មកចូលរួមស្ដាប់ទេ»។
សម្រាប់ការបោះឆ្នោតអាណត្តិទី៧ នេះ លោក ហ៊ុន សែន បានចុះជួបកម្មករស្ទើររាល់ថ្ងៃដូចអាណត្តិមុនដែរ ដើម្បីស្វែងរកការគាំទ្រពីកម្មករ។ គិតត្រឹមថ្ងៃទី២៧ មិថុនា លោកបានជួបកម្មករជិត ២០ដងហើយដោយម្ដងៗ លោកចំណាយពេលនិយាយឲ្យកម្មករស្ដាប់ប្រហែល ១ម៉ោងកន្លះ។ មេដឹកនាំដែលជាប់ឈ្មោះជាជនពុករលួយរូបនេះ តែងផ្តល់ថវិកាចំនួន ២ម៉ឺនរៀលសម្រាប់កម្មករម្នាក់ៗ ដែលអង្គុយស្ដាប់លោក ហើយក្នុងពិធីជួបជុំម្ដងៗ មានកម្មករខ្ទង់ម៉ឺននាក់រួមទាំងស្ត្រីមានផ្ទៃពោះផង។
ដើម្បីតែកេងចំណេញនយោបាយផ្ទាល់ខ្លួន លោក ហ៊ុន សែន ហាក់មិនខ្វល់អំពីសុវត្ថិភាពរបស់កម្មការិនីដែលមានផ្ទៃពោះទាំងនោះឡើយ។ ថ្លែងក្នុងពិធីជួបជាមួយកម្មករ-កម្មការិនីជិត ២ម៉ឺននាក់ (១៩.០៨៥) ក្នុងនោះមានទាំងកម្មការិនីមានផ្ទៃពោះ ៥៩៣នាក់ នៅខេត្តកំពង់ស្ពឺ នៅថ្ងៃទី២៧ មិថុនា លោក ហ៊ុន សែន ប្រកាសថា មានកម្មការិនីមួយចំនួនបានសម្រាលកូនក្នុងពេលមកចូលរួមពិធីសំណេះសំណាលជាមួយលោក។ ក្នុងនោះមានកម្មការិនីម្នាក់នៅខេត្តស្វាយរៀងសម្រាលកូនបានជោគជ័យ ប៉ុន្តែមានកម្មការិនីផ្សេងទៀតនៅខេត្តកំពង់ឆ្នាំងសម្រាលកូនមិនបានជោគជ័យនោះទេ។
លោក ហ៊ុន សែន៖«ប្រហែលជាខ្ញុំត្រូវមើលថែក្មេងៗ ដែលវាកើតចំថ្ងៃដែលយើងទៅដល់។ ខំសួរឪពុក ដែលទើបទាក់ទងបានតាមទូរស័ព្ទ ម៉េចបានកូនឯងអត់ដឹងខ្លួនអីទេ?ថា អត់ដឹងផង។ ប្ដីទៅធ្វើការផ្សេងទៅ ប្រពន្ធជិះឡានទៅដើម្បីជួប ស្រាប់តែម៉ោង ៦ព្រឹក បានកូនមួយ ហើយឪពុកមិនទាំងដឹងផង។ អ៊ីចឹងទេ យើងក៏ត្រូវទទួល ប៉ុន្តែសោកស្ដាយរឿងកំពង់ឆ្នាំង ដោយសារក្មេងអត់គ្រប់គីឡូ អ៊ីចឹងក៏ស្លាប់ ទាំងពីរទៅ ជាអកុសល ហើយថ្ងៃនេះ សង្ឃឹមថា អត់មានអ្នកណាកើតថ្ងៃនេះទេ ប៉ុន្តែបើមានអ្នកកើតចំថ្ងៃនេះទៀត គឺយកទៅជួយចិញ្ចឹមទៀត យើងដោះស្រាយ»។
កម្មករមួយចំនួន ឲ្យវិទ្យុអាស៊ីសេរីដឹងថា មន្ត្រីរបស់លោក ហ៊ុន សែន បានដាក់សម្ពាធថៅកែរោងចក្រឲ្យប្រមូលកម្មករទៅចូលរួមពិធីឃោសនានយោបាយរបស់លោក ហ៊ុន សែន។ ពួកគាត់ បញ្ជាក់ថា រដ្ឋបាលរោងចក្រកម្រិតឲ្យកម្មករទាំងអស់ថា ត្រូវតែទៅចូលរួម បើពុំនោះទេ នឹងកាត់ប្រាក់ខែ ឬឈានដល់ការបណ្ដេញចេញពីការងារ។ បើទោះបីជាកម្មករឈឺ ឬមានផ្ទៃពោះ ក៏រដ្ឋបាលរោងចក្រតម្រូវឲ្យមានលិខិតបញ្ជាក់ពីគ្រូពេទ្យដែរ។
កម្មការិនីម្នាក់ សុំមិនបញ្ចេញឈ្មោះលើកឡើងថា កម្មករដែលមានផ្ទៃពោះ អាចប្រឈមគ្រោះថ្នាក់ទាំងម្ដាយ និងកូនក្នុងផ្ទៃ ដោយសារពួកគាត់ ត្រូវងើបទៅទទួលលោក ហ៊ុន សែន តាំងពីព្រឹកព្រលឹមនិងអង្គុយជាច្រើនម៉ោងក្រោមអាកាសធាតុក្ដៅស្អុះស្អាប់ និងមិនអាចដើរចុះឡើង ឬទៅបន្ទប់ទឹកដោយងាយឡើយ។ លើសពីនេះ ប្រសិនបើពួកគាត់មានគ្រោះថ្នាក់ ឬកើតកូននៅទីនោះ អាចពិបាកនិងយឺតយ៉ាវក្នុងការបញ្ជូនទៅសង្គ្រោះនៅមន្ទីរពេទ្យ។ ទោះជាយ៉ាងណាក្ដី កម្មការិនីរូបនេះ យល់ថា ស្ត្រីមានផ្ទៃពោះខ្លះ អាចពួកគាត់ចង់ទៅដោយខ្លួនឯង ដោយសារលោក ហ៊ុន សែន ផ្តល់លុយ ២០០ដុល្លារ ជាការលើកទឹកចិត្ត។
«ពេលខ្លះមនុស្សច្រើនទៅវាហប់រងសម្ពាធដូចថា អត់សូវស្រួលខ្លួនវិលមុខ សម្រាប់អ្នកពោះធំ ហើយឲ្យអង្គុយរងចាំយូរ ព្រោះមានគ្រោះថ្នាក់ដែរសម្រាប់គាត់អ្នកពោះធំ។ ដូច្នេះមិនគួរឲ្យអ្នកពោះធំទៅទេ។ បើសិនជាសម្រាលដោយសម្រួល សម្រាលដោយអីមិនថាទេ ព្រោះ ២០០ដុល្លារវាគួរសម ដែរ ប៉ុន្តែបើសម្រាលអ៊ីចឹង វាដូចជាអភ័ព្វពេក ហើយប្រឈមមុខនឹងគ្រោះថ្នាក់»។
មន្ត្រីសហជីព និងកម្មករយល់ថា ប្រសិនបើលោក ហ៊ុន សែន មានចិត្តចង់ជួយកម្មករពិតប្រាកដនោះ មិនបាច់ចំណាយពេលទៅជួបកម្មករស្ទើររាល់ថ្ងៃក៏បានដែរ ព្រោះលោក និងក្រសួងការងារ បានដឹងអំពីបញ្ហាប្រឈមរបស់កម្មកររួចទៅហើយ។ បញ្ហាដែលកម្មករចង់ឲ្យដោះស្រាយនោះ គឺការដំឡើងប្រាក់ឈ្នួលឲ្យបានខ្ពស់ជាងបច្ចុប្បន្ន គោរពសិទ្ធិកម្មករនិងសហជីពនៅកន្លែងការងារ លក្ខខណ្ឌការងារល្អ បញ្ឈប់ការបណ្ដេញកម្មករដែលចងក្រងសហជីព និងស្ត្រីមានផ្ទៃពោះ គោរពម៉ោងការងារទៅតាមច្បាប់ មានពេលសម្រាកថ្ងៃបុណ្យទាន រៀបចំឲ្យកម្មករទទួលបានសេវាថែទាំសុខភាព និងប្រព័ន្ធសន្តិសុខសង្គមឲ្យបានល្អត្រឹមត្រូវជាដើម។ លើសពីនេះ រដ្ឋាភិបាលត្រូវដោះស្រាយបញ្ហារំលោភសិទ្ធិមនុស្ស និងបញ្ហាប្រជាធិបតេយ្យ ដើម្បីរក្សាប្រព័ន្ធអនុគ្រោះពាណិជ្ជកម្ម EBA របស់សហភាពអឺរ៉ុបដែលមានប្រយោជន៍ធំធេងសម្រាប់កម្មករ។ ប្រសិនបើលោក ហ៊ុន សែន មិនដោះស្រាយបញ្ហាទាំងនេះទេ មន្ត្រីសហជីព និងកម្មករ យល់ថា ជំនួបរបស់លោក ហ៊ុន សែន ជាមួយកម្មករនេះ គ្រាន់តែធ្វើឲ្យល្អមើល តែមិនល្អស៊ីឡើយ ឬគ្មានប្រយោជន៍ដុំកំភួនសម្រាប់កម្មករឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។