ក្រុម​អ្នក​ជំនាញ​សិទ្ធិមនុស្ស អ.ស.ប អំពាវនាវ​ដល់​រដ្ឋាភិបាល​ឲ្យ​ផ្តល់​សិទ្ធិ​ធ្វើ​នយោបាយ​ដល់​មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​ឡើង​វិញ

ក្រុម​អ្នក​ជំនាញ​សិទ្ធិមនុស្ស​អង្គការ​សហប្រជាជាតិ ៤រូប សោក​ស្ដាយ​ចំពោះ​ការ​សម្រេច​របស់​តុលាការ ដែល​បាន​កាត់​ទោស​មេ​ដឹក​នាំ​ជាន់​ខ្ពស់​នៃ​គណបក្ស​សង្គ្រោះ​ជាតិ​ឲ្យ​ជាប់​គុក​រយៈ​ពេល​ច្រើន​ឆ្នាំ។ ពួក​គេ​ហៅ​ការ​កាត់​ទោស​មេ​ដឹក​នាំ​ជាន់ខ្ពស់​នៃ​គណបក្ស​សង្គ្រោះ​ជាតិ​ទាំង ៩រូប ដែល​រួម​មាន​ទាំង​លោក សម រង្ស៊ី ផង ឲ្យ​ជាប់​គុក​រហូត​ដល់ ២៥ឆ្នាំ ថា ជា​ការ​កាត់​ទោស​ដាក់​គុក​ក្នុង​រយៈ​ពេល​មិន​សមាមាត្រ និង​ខ្វះ​មូលដ្ឋាន​ច្បាប់​ច្បាស់លាស់។ ពួក​គេ​សង្កត់​ធ្ងន់​ថា ដំណើរ​ការ​ជំនុំ​ជម្រះ​ក្តី​ទាំង​មូល មិន​មាន​ភាព​ប្រក្រតី និង​បំពាន​យ៉ាង​ជាក់​ច្បាស់​ទៅ​នឹង​ច្បាប់​អន្តរជាតិ រួម​ទាំង​ការ​ជំនុំ​ជម្រះ​មិន​បាន​ប្រព្រឹត្តិ​ទៅ​ជា​សាធារណៈ។

ក្រុម​អ្នក​ជំនាញ​សិទ្ធិមនុស្ស​អង្គការ​សហប្រជាជាតិ ដែល​ក្នុង​នោះ​ក៏​រួម​មាន អ្នក​រាយការណ៍​ពិសេស​នៃ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​នៅ​កម្ពុជា អ្នកស្រី រ៉ូណា ស្មីត (Rohna Smith) ផង បាន​អំពាវនាវ​ដល់​រដ្ឋាភិបាល​ឲ្យ​ផ្តល់​សិទ្ធិ​ធ្វើ​នយោបាយ​ដល់​មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​ទាំង​នោះ​ឡើង​វិញ និង​ធានា​ឲ្យ​គណបក្ស​នយោបាយ​ទាំង​អស់​មាន​ឱកាស​ស្មើគ្នា ដើម្បី​ចូលរួម​ក្នុង​ជីវភាព​នយោបាយ។

កាលពី​ថ្ងៃ​ទី១ មីនា តុលាការ​នៃ​របប​លោក ហ៊ុន សែន បាន​កាត់​ទោស​កំបាំង​មុខ​មេ​ដឹក​នាំ​ជាន់ខ្ពស់​នៃ​គណបក្ស​សង្គ្រោះ​ជាតិ ៩រូប ក្នុង​នោះ​រួមមាន លោក សម រង្ស៊ី អ្នកស្រី មូរ សុខហួរ និង​លោក អេង ឆៃអ៊ាង អ្នកស្រី ជូឡុង សូមូរ៉ា លោក ម៉ែន សុថាវរិន្ទ្រ លោក អ៊ូ ច័ន្ទរិទ្ធ លោក ហូ វ៉ាន់ លោក ឡុង រី និង​លោក នុត រំដួល ឲ្យ​ជាប់​គុក​ពី ២០ឆ្នាំ ដល់ ២៥ឆ្នាំ និង​ពិន័យ​ជា​ប្រាក់​សរុប​ជិត​កន្លះ​លាន​ដុល្លារ ពី​បទ​ប៉ុនប៉ង​ផ្តួល​រំលំ​រដ្ឋាភិបាល ឬ ឧបឃាត និង​បទ​ប៉ុនប៉ង​ប្រព្រឹត្តិ​បទ​ឧក្រិដ្ឋ។

"មានការរន្ធត់ចិត្តចំពោះការកាត់ទោសឱ្យជាប់ពន្ធនាគាររយៈពេលវែងនិងមិនសមាមាត្រលើជនជាប់ចោទ ដែលខ្វះមូលដ្ឋានច្បាប់ច្បាស់លាស់។" អ្នកជំនាញ |

ក្រុម​អ្នក​ជំនាញ​សិទ្ធិ​មនុស្ស​អង្គការ​សហប្រជាជាតិ ក៏​អំពាវនាវ​ដល់​រដ្ឋាភិបាល​ឲ្យ​ការពារ​សេរីភាព​ចងក្រង​សមាគម និង​សេរីភាព​ក្នុង​ការ​បញ្ចេញ​មតិ ដើម្បី​ធានា​ដល់​ដំណើរ​ការ​ប្រជាធិបតេយ្យ និង​សកម្មភាព​នយោបាយ។

កន្លង​ទៅ​ ក្រុម​អ្នក​ជំនាញ​សិទ្ធិ​មនុស្ស​អង្គការ​សហប្រជាជាតិ តែង​លើក​ឡើង​ពី​កង្វល់​របស់​ពួកគេ​ជា​ខ្លាំង​ជុំវិញ​ការ​ធ្លាក់​ចុះ​លំហ​ប្រជាធិបតេយ្យ និង​របៀប​នៃ​ការ​ជំនុំជម្រះ​មនុស្ស​ក្នុង​ទ្រង់ទ្រាយ​ធំ ដែល​ពាក់ព័ន្ធ​នឹង​គណបក្ស​សង្គ្រោះ​ជាតិ ទំនង​ដោយសារ​ហេតុផល​នយោបាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។