តើ​វិវាទ​ការងារ​នៅណាហ្គាវើលដ៍​ឆ្លុះបញ្ចាំង​បែប​ណា​ពី​ប្រសិទ្ធភាព​ការងារ​រដ្ឋាភិបាល?

ដោយ យ៉ង ចាន់តារា
2022.11.18
Share on WhatsApp
Share on WhatsApp
តើ​វិវាទ​ការងារ​នៅណាហ្គាវើលដ៍​ឆ្លុះបញ្ចាំង​បែប​ណា​ពី​ប្រសិទ្ធភាព​ការងារ​រដ្ឋាភិបាល? កូដករណាហ្គាវើលដ៍ (Naga World) តវ៉ានៅ​មុខ​ក្រុមហ៊ុន កាល​ពីថ្ងៃទី១៤ ខែ​តុលា ឆ្នាំ​២០២២។
រូប៖ ពលរដ្ឋផ្ដល់ឱ្យ

វិវាទ​ការងារ​រវាង​ថៅកែ និង​បុគ្គលិក​ណាហ្គាវើលដ៍ (Naga World) បាន​អូសបន្លាយ​ពេល​ជិត​មួយឆ្នាំ​ហើយ ដោយ​នៅតែ​គ្មាន​ដំណោះស្រាយ​ពី​ភាគី​ក្រុមហ៊ុន និង​រដ្ឋាភិបាល​ឡើយ​។ លើស​ពី​នេះ ក្រុម​បុគ្គលិក​ណាហ្គាវើលដ៍ កំពុង​រងគ្រោះ​គ្រប់បែបយ៉ាង​ពី​ក្រុមហ៊ុន និង​អាជ្ញាធរ​រដ្ឋាភិបាល​ដូចជា​ទទួលរង​នូវ​អំពើ​ហិង្សា​លើ​រាងកាយ ការ​គំរាមកំហែង និង​ការ​ជាប់​បណ្តឹង​ក្នុង​តុលាការ​ជាដើម​ដោយសារតែ​ការ​តវ៉ា​រក​ដំណោះស្រាយ​ដោយ​សន្តិវិធី​របស់​ពួកគាត់។

វិវាទ​ការងារ​រវាង​បុគ្គលិក និង​ថៅកែ​ណាហ្គាវើលដ៍​ដែល​អូស​បន្លាយ​អស់​រយៈពេល​ជិត ១​ឆ្នាំ​មកនេះ ផ្ដើម​ចេញ​ពី​ការ​កាត់បន្ថយ​បុគ្គលិក​ជាង ១​ពាន់​នាក់ (,៣២៩​នាក់​) ដែល​ក្រុម​បុគ្គលិក​យល់ថា ជា​ចេតនា​របស់​ក្រុមហ៊ុន ចង់​លុបបំបាត់​សហជីព​។ ក្រុម​កូដ​ករ​ណាហ្គាវើលដ៍​ដែល​ភាគច្រើន​ជា​ស្ត្រី បាន​នាំគ្នា​ចុះ​ផ្លូវ​ធ្វើ​កូដកម្ម​អហិង្សា​ជា​បន្តបន្ទាប់ ក្រោយពី​ព្យាយាម​រក​ដំណោះស្រាយ​ផ្ទៃក្នុង​ជាមួយ​ក្រុមហ៊ុន​ជាច្រើនលើក​ច្រើន​សារ តែ​ពុំ​មាន​ដំណោះស្រាយ។

ទោះជា​យ៉ាងណា កូដកម្ម​ជិត​១​ឆ្នាំ​មកនេះ ពួកគាត់​នៅតែ​មិនទាន់​ទទួល​បាន​ដំណោះស្រាយ​នៅ​ឡើយ​។ ក្រសួង​ការងារ​ដែល​មាន​តួនាទី​ដោះស្រាយ​វិវាទ​ការងារ​ដោយ​ឯករាជ្យ​នោះ ត្រូវ​បាន​ក្រុម​កូដករ​ណាហ្គាវើលដ៍​មើលឃើញ​ថា បាន​លម្អៀង​ទៅ​រក​ក្រុមហ៊ុន ដោយ​ពុំបាន​ជំរុញ​ឱ្យ​ថៅកែ​កាស៊ីណូ​ដ៏​ធំ​កណ្ដាល​ទីក្រុង​ភ្នំពេញ​មួយ​នេះ​គោរព​ច្បាប់​ការងារ និង​ចូលរួម​ដោះស្រាយ​វិវាទ​ការងារ​ជាមួយ​បុគ្គលិក​នោះ​ទេ​។ ជារឿយៗ ក្រសួង​ការងារ សាលា​រាជធានី​ភ្នំពេញ ស្ថាប័ន​ពាក់ព័ន្ធ រួម​ទាំង​តំណាងរាស្ត្រ​គណបក្សកាន់អំណាច បាន​ចេញ​មុខការ​ពារ​ក្រុមហ៊ុន និង​តែងតែ​ចោទប្រកាន់​ក្រុម​កូដ​ករ​ថា​ស៊ីឈ្នួល​ធ្វើបាតុកម្ម។

កូដករ​ណាហ្គាវើលដ៍ កញ្ញា ច័ន្ទ ស្រីរ័ត្ន ប្រាប់​វិទ្យុ​អាស៊ីសេរី​ថា កញ្ញា​ខកចិត្ត​ចំពោះ​ទង្វើ​របស់​ក្រុម​អាជ្ញាធរ និង​រដ្ឋាភិបាល ដោយ​មិន​ត្រឹមតែ​មិន​ជួយ​រក​ដោះស្រាយ​វិវាទ​ការងារ​តែប៉ុណ្ណោះ​ទេ ប៉ុន្តែ​ថែមទាំង​លំអៀង​គាំទ្រ​ថៅកែ​ណាហ្គាវើលដ៍ ហើយ​គំរាមកំហែង​មក​លើ​ក្រុម​បុគ្គលិក​ដែល​ជា​ជនរងគ្រោះ​ទៅវិញ​។ កញ្ញា​យល់​ឃើញ​ថា មូលហេតុ​ដែល​បណ្ដាល​ឱ្យ​អាជ្ញាធរ​មិន​ចាត់វិធានការ​តាមផ្លូវ​ច្បាប់​ទៅលើ​ថៅកែ​កាស៊ីណូ​ណាហ្គាវើលដ៍​នោះ គឺ​មកពី​ថៅកែ​រូប​នេះ​បាន​ប្រើប្រាស់​លុយ ដើម្បី​ទិញ​ទឹកចិត្ត​ឱ្យ​ក្រុម​អាជ្ញាធរ​ឱ្យ​មក​ធ្វើ​ការ​គំរាមកំហែង​ទៅលើ​ក្រុម​កូដករ។

កញ្ញា ច័ន្ទ ស្រីរ័ត្ន៖ «ពួក​ខ្ញុំ​អត់​បាន​ធ្វើ​បដិវត្ត​ពណ៌​ដូចជា​ការ​ចោទ​ប្រកាន់​របស់​គាត់​ទេ ហើយ​រឿង​នេះ​គឺជា​វិវាទ​ការងារ ហើយ​ពួក​ខ្ញុំ​ក៏​អត់​មាន​ចង់ទៅ​ផ្ដួលរំលំ​រាជរដ្ឋាភិបាល​អី​ដែរ គឺ​អត់​មាន​ទេ គឺ​វិវាទ​ការងារ រឿង​ឆ្នាំងបាយ រឿង​ក្រពះ»

បុគ្គលិក​កាស៊ីណូ​ណាហ្គាវើលដ៍​ដែល​ចេញ​ធ្វើ​កូដកម្ម​តែង​រង​ការ​បៀតបៀន​កេរ​ខ្មាស និង​រង​នូវ​អំពើ​ហិង្សា​ជា​បន្ត​បន្ទាប់ពី​ក្រុម​អាជ្ញាធរ នៅ​ក្នុង​នោះ​បុគ្គលិក​ជា​ស្ត្រី​ដែល​កំពុង​ពរ​ពោះ​ម្នាក់ ត្រូវ​បាន​ក្រុម​អាជ្ញាធរ​រុញ​ផ្ទប់​ទៅ​នឹង​រថយន្តក្រុង រហូតដល់​រលូត​កូន។ លើស​ពី​នេះ​ទៅ​ទៀត តុលាការ​បាន​ចាប់​ថ្នាក់​ដឹកនាំ និង​សកម្មជន​សហជីព​សរុប​១១​នាក់ ដាក់​ពន្ធនាគារ​ជា​បន្តបន្ទាប់​កាល​ពី​ដើម​ឆ្នាំ​២០២២ ដោយ​ចោទប្រកាន់​ពី​បទ​ញុះញង់ និង​ល្មើសច្បាប់​កូវីដ១៩ នៅពេល​ពួកគេ​ប្រើប្រាស់​សិទ្ធិ​ស្របច្បាប់​ធ្វើ​កូដកម្ម​អហិង្សា​ទាមទារ​ដំណោះស្រាយ​។ ក្រោយពី​មានការ​រិះគន់​ធ្ងន់ៗ ពី​សហគមន៍​ជាតិ និង​អន្តរជាតិ ទើប​តុលាការ​សម្រេច​ដោះលែង​អ្នក​ទាំង ១១​នាក់ ឲ្យ​នៅ​ក្រៅ​ឃុំ​បណ្ដោះអាសន្ន កាលពី​ពាក់កណ្ដាល​ខែមីនា​កន្លង​ទៅ ក៏ប៉ុន្តែ​ត្រូវ​សន្យា​មិន​ចូលរួម​ដឹកនាំ​ការ​តវ៉ា និង​ប្រាប់​ឲ្យ​កូដករ រក្សា​ភាព​ស្ងប់ស្ងាត់ ដើម្បី​ជួប​ចរចា​រក​ដំណោះស្រាយ​។​ទោះជា​យ៉ាងណាក្ដី ការ​ជួប​ចរចា ១៤​លើក​កន្លង​ទៅ​នេះ នៅតែ​គ្មាន​លទ្ធផល​វិជ្ជមាន ដោយសារ​ខាង​ក្រសួង​ការងារ និង​ក្រុមហ៊ុន តែងតែ​បង្ខំ​ឲ្យ​បុគ្គលិក ទូទាត់​ប្រាក់​ឈ្នួល​ហើយ​រក​ការងារ​ថ្មី។

ការប្រើប្រាស់​ប្រព័ន្ធ​តុលាការ​ដើម្បី​គំរាមកំហែង​សហជីព​ឯករាជ្យ​អិល..អេស.យូ (LRSU) មិន​ត្រូវ​បាន​បញ្ចប់​នោះ​ឡើយ​។ បច្ចុប្បន្ន​នេះ ក្រុម​កូដករ​ណាហ្គាវើលដ៍ ៨​នាក់​ផ្សេងទៀត​ដែល​សកម្ម និង​លេចធ្លោ​ក្នុង​តវ៉ា​នោះ ត្រូវ​បាន​ព្រះរាជ​អាជ្ញា​រង​នៃ​អយ្យការ​អម​សាលាដំបូង​រាជធានី​ភ្នំពេញ លោក ឆាយ ហុង កោះហៅ​ឱ្យ​ចូល​បំភ្លឺ​តាម​បណ្ដឹង​របស់​ក្រុមហ៊ុន​ពី​បទ​ចោទ រំលោភ​លើ​លំនៅឋាន ធ្វើ​ឱ្យ​ខូចខាត​ដោយ​ចេតនា​មាន​ស្ថាន​ទម្ងន់ទោស ព្រមទាំង​ចាប់​ឃុំឃាំង និង​បង្ខាំង​ដោយ​ខុសច្បាប់​។​

បុគ្គលិក​ណាហ្គាវើលដ៍​ម្នាក់​ដែល​កំពុង​ជាប់​បណ្ដឹង​នៅក្នុង​សំណុំ​រឿង​នេះ​គឺ​លោកស្រី ឆាន បូរ៉ា ថ្លែង​ថា លោកស្រី​ហួសចិត្ត​ដែល​តុលាការ​មិន​កោះហៅ​ថៅកែ​ណាហ្គាវើលដ៍ បែរ​ជា​កោះហៅ​លោកស្រី​ដែល​ជា​ជនរងគ្រោះ ឱ្យ​ចូល​បំភ្លឺ​នៅក្នុង​តុលាការ​ទៅវិញ​។ លោកស្រី​បន្ថែម​ថា ការ​កោះហៅ​លោកស្រី និង​សមាជិក​សហជីព​ផ្សេងៗ គឺជា​ការ​គំរាមកំហែង​យ៉ាងធ្ងន់ធ្ងរ​ដល់​សេរីភាព​ក្នុង​ការ​ធ្វើ​កូដកម្ម ដែល​ស្រប​ទៅ​តាម​ច្បាប់រដ្ឋធម្មនុញ្ញ និង​សិទ្ធិមនុស្ស​ជា​សកល។

លោកស្រី ឆាន បូរ៉ា៖ «ការកោះហៅ​នេះ​ជា​ការ​គំរាម ជា​ការ​បន្លាច ឱ្យ​ពួក​ខ្ញុំ​ភ័យ​ព្រួយ ឱ្យ​ឈប់​ធ្វើ​កូដកម្ម ឈប់​អី​អ៊ីចឹង បានជា​គាត់​ដល់​ថ្នាក់​ប្ដឹង​ដល់​តុលាការ ដល់​អី​អញ្ចឹង ពេល​ខ្លះទៅ​រវល់​តែ​ជាមួយ​តុលាការ​ផង ហើយ​រឿង​កូដកម្ម​ផង បើ​និយាយ​ទៅ​រឿង​ក្រុមហ៊ុន​ណាហ្គា​ហ្នឹង គាត់​ចង់បាន​តែមួយ​ទេ​គឺ​គាត់​ចង់​រំលាយ​សហជីព​ឯករាជ្យ​តែម្ដង។

ជុំវិញ​រឿង​នេះ អ្នកនាំពាក្យ​គណបក្ស​កាន់អំណាច លោក សុខ ឥសាន អះអាង​ថា រដ្ឋាភិបាល​បាន​ព្យាយាម​រក​ដំណោះស្រាយ​វិវាទ​ការងារ​កាស៊ីណូ​ណាហ្គាវើលដ៍​នេះ​រួចហើយ​។ លោក​ថា វិវាទ​ការងារ​នេះ​នៅតែ​បន្ត​ដោយសារតែ​ក្រុម​បុគ្គលិក​មិន​ព្រម​ទទួល​យក​ដំណោះស្រាយ​ដែល​ក្រុម​អាជ្ញាកណ្ដាល​ដោះស្រាយ​វិវាទ​ការងារ នៃ​ក្រសួង​ការងារ​បាន​ដាក់​ចេញ​។ លោក​បន្ថែម​ថា រដ្ឋាភិបាល​មិនអាច​បង្ខំ​ឱ្យ​ក្រុមហ៊ុន​ទទួលយក​បុគ្គលិក​ធ្វើការ​វិញ​នោះ​ឡើយ។

លោក សុខ ឥសាន៖ «ការ​ដោះស្រាយ​តាម​គោលការណ៍​ច្បាប់​ហ្នឹង​មាន​យន្តការ ជា​អាជ្ញាកណ្ដាល​ដែល​ជា​សមត្ថកិច្ច​ចេញពី​ក្រសួង​ការងារ​មក ក៏ប៉ុន្តែ​បងប្អូន​បាតុករ កម្មករ​ដែល​ពាក់ព័ន្ធ​ហ្នឹង​មិន​សុខចិត្ត មិន​សុខចិត្ត​នៅ​ទៅ​ធ្វើ​បាតុកម្ម​តទៅទៀត​។ ដូច្នេះហើយ​បាតុកម្ម​ដែល​មិន​ព្រម​ទទួល​ដំណោះស្រាយ​តាមច្បាប់​ការងារ ហើយ​យន្តការ​ក្រសួង​ការងារ​ទេ ខ្ញុំ​យល់ថា​វា​ជា​អ្នក​ខុសច្បាប់​ហើយ»

ទោះជា​យ៉ាងណា កូដករ​ណាហ្គាវើលដ៍ កញ្ញា សៀក បញ្ញា ចាត់ទុក​ការ​លើកឡើង​នេះ​ថា គ្រាន់តែ​ជា​ការ​បំភ្លៃ​ព័ត៌មាន​តែប៉ុណ្ណោះ។ កញ្ញា​បញ្ជាក់​ថា ការ​ចេញ​តវ៉ា​របស់​ក្រុម​បុគ្គលិក​ណាហ្គាវើលដ៍​រហូត​មក​នោះ គឺជា​ការ​ធ្វើ​កូដកម្ម​ដោយ​អហិង្សា និង​ស្របតាម​ច្បាប់​ហើយ​កន្លងទៅ តំណាង​ក្រសួង​ការងារ​មិនបាន​ជំរុញ​ឱ្យ​ថៅកែ​ណាហ្គាវើលដ៍​គោរព​ច្បាប់​ការងារ​ឡើយ។

កញ្ញា សៀក បញ្ញា៖ «គាត់​មានតែ​ដាក់បន្ទុក ហៅ​តែ​កម្មករ​ខ្មែរ​ឱ្យទៅ​ទទួលយក​កញ្ចប់​សំណង​ដែល​ថៅកែ​ណាហ្គាវើលដ៍​បញ្ឈប់​ទាំង​ខុសច្បាប់ ហើយ​និង​គុណ​លុយ​អត់​ត្រូវ​តាមច្បាប់​ការងារ​នេះ សួរ​ថា​ហ្នឹង​មែន​ដែល​ជា​ដំណោះស្រាយ​របស់​គាត់ ដែល​គាត់​ព្យាយាម​ប្រាប់​ប្រជាពលរដ្ឋ​ខ្មែរ កម្មករ​ខ្មែរ​ដែល​គាត់​ប្រឹង​ណាស់ ប្រឹង​ណាស់​។ គាត់​ប្រឹង​មែន ក្រសួង​ការងារ និង​ស្ថាប័ន​ពាក់ព័ន្ធ​របស់​រដ្ឋ​ទាំងអស់ គាត់​ប្រឹង​មែន​រាល់ថ្ងៃ គឺ​ប្រឹង​លាប​ពណ៌ ចេញ​សារលិខិត​គំរាមកំហែង ចាប់ចង​ចាប់​ចោទ​ពួក​យើង​ដាក់គុក​ហ្នឹង»

វិទ្យុ​អាស៊ីសេរី​មិន​អាច​ទាក់ទង​តំណាង​កាស៊ីណូ​ណាហ្គាវើលដ៍ កញ្ញា ឌី សីហា ដើម្បី​បកស្រាយ​បាន​ទេ កាលពី​ថ្ងៃទី​១៨ ខែ​វិច្ឆិកា ដោយ​ទូរស័ព្ទ​ចូល​តែ​ពុំ​មាន​អ្នក​ទទួល។

ជុំវិញ​រឿង​នេះ ប្រធាន​សហព័ន្ធ​សហជីព​ចំណីអាហារ និង​សេវាកម្ម​កម្ពុជា អ្នកស្រី អ៊ូ ទេពផល្លីន មាន​ប្រសាសន៍​ថា ការ​មិន​មាន​អន្តរាគមន៍​ពី​រដ្ឋាភិបាល​ក្នុង​ការ​ជួយ​ដោះស្រាយ​វិវាទ​ការងារ​ណាហ្គាវើលដ៍​នេះ មិន​ត្រឹមតែ​ឆ្លុះបញ្ចាំង​ពី​ភាព​ទន់ខ្សោយ​របស់​រដ្ឋាភិបាល​នៅក្នុង​ការ​លើក​កម្ពស់​សិទ្ធិ​ការងារ​តែប៉ុណ្ណោះ​ទេ ក៏ប៉ុន្តែ​ក៏​ឆ្លុះបញ្ចាំង​ថា​រដ្ឋាភិបាល​បាន​គាំទ្រ​ដល់​ការរំលោភ​សិទ្ធិ​ការងារ របស់​ថៅកែ​ទៅលើ​និយោជិក​ផង​ដែរ។

អ្នកស្រី អ៊ូ ទេពផល្លីន៖ «តាំង​ពី​ដើម​មិន​ត្រឹមតែ​ចោទ​ប្រកាន់​ថា បាតុកម្ម​ទៀត គាត់​ចោទ​ថា បដិវត្ត​ពណ៌​ផង បើ​យើង​មើល​ថា ព្យាយាម​បំបាក់ស្មារតី​របស់​កម្មករ​និយោជិក ហើយក៏​ព្យាយាម​បំបាក់ស្មារតី​កម្មករ​នៅក្នុង​វិស័យ​ផ្សេងទៀត​ហ្នឹង អត់​ហ៊ាន​ឱ្យ​ប្រើ​ប្រាស់​សិទ្ធិ​ខ្លួនឯង​ទេ គេ​ចង់​ប្រាប់​ថា ឃើញ​ទេ​តែ​អ្នកឯង ងើបឈរ​ឡើង ទាមទារ​សិទ្ធិ​អីហ្នឹង ឃើញ​ទេ​លទ្ធផល​គឺ​ជាប់គុក​អញ្ចឹង គេ​ចង់ឱ្យ​កម្មករ​និយោជិក​ហ្នឹង បាក់ស្បាត ហើយ​អត់​ហ៊ាន​ធ្វើការ​ទាមទារ​អី​ទេ ព្រោះ​គេ​យក​គុក​យក​ច្រវាក់ យក​មក​គំរាម»

ចំណែក​អ្នកវិភាគ​ផ្នែក​ច្បាប់ លោក វន ចាន់ឡូត វិញ លោក​យល់ថា វិវាទ​ការងារ​ដ៏​រ៉ាំរ៉ៃ​រវាង​បុគ្គលិក និង​ថៅកែ​កាស៊ីណូ​ណាហ្គាវើលដ៍​នេះ ធ្វើ​ឱ្យ​រដ្ឋាភិបាល​កម្ពុជា​បាក់មុខ​មាត់​មិន​ត្រឹមតែ​នៅក្នុង​ប្រទេស​នោះ​ទេ ប៉ុន្តែ​ក៏​ប៉ះពាល់​ដល់​កិត្តិយស​ប្រទេសជាតិ​នៅ​កម្រិត​អន្តរជាតិ​ផង​ដែរ ពី​ព្រោះតែ​បញ្ហា​នេះ​បាន​បង្ហាញ​ពី​ភាព​ទន់ខ្សោយ​របស់​រដ្ឋាភិបាល​ក្នុង​ការ​ជំរុញ​ឱ្យ​មាន​ការ​គោរព​ច្បាប់ ជាពិសេស​គឺ​ច្បាប់​ការងារ​នេះ​តែម្ដង​។ លោក​យល់ថា បញ្ហា​ចម្បង​ដែល​ធ្វើ​ឱ្យ​ថៅកែ​ក្រុមហ៊ុន​ណាហ្គាវើលដ៍ មិន​ព្រម​ដោះស្រាយ​វិវាទ​ការងារ​នេះ​ជាមួយ​ក្រុម​បុគ្គលិក​នោះ គឺ​បណ្ដាលមកពី​ក្រុម​អាជ្ញាធរ បាន​ទទួល​អត្ថប្រយោជន៍​ពី​ថៅកែ​កាស៊ីណូ។

លោក វន ចាន់ឡូត៖ «ជា​អាជ្ញាធរ ហើយ​ព្យាយាម​លំអៀង​ទៅកាន់​អ្នក​ដែល​មាន​លុយ ឬក៏​ទៅកាន់​ថៅកែ ខ្ញុំ​គិតថា​មិន​ត្រឹមតែ​មិនអាច​ដោះស្រាយ​បញ្ហា ជូន​ប្រជាពលរដ្ឋ​បានទេ គឺ​រឹតតែ​ធ្វើឱ្យ​បញ្ហា​ហ្នឹង​វា​កាន់តែ​កើតមានឡើង​ពី​មួយ​កន្លែង ទៅ​មួយ​កន្លែង ហើយ​ក្នុង​នោះ​ខ្ញុំ​គិតថា​រដ្ឋាភិបាល​នឹង​ត្រូវ​ប្រឈម​សកម្មភាព​នៃ​ការ​មិន​ពេញចិត្ត​ពី​ប្រជាពលរដ្ឋ​ហ្នឹង ជា​បន្តបន្ទាប់​មិន​ចេះ​អស់​មិន​ចេះ​ហើយ​ទេ»

វិវាទ​ការងារ​រវាង​បុគ្គលិក និង​ថៅកែ​ណាហ្គាវើលដ៍​មិន​ត្រឹមតែ​បង្ហាញ​ពី​ភាព​ទន់ខ្សោយ​នីតិរដ្ឋ និង​ការ​ប្រើប្រាស់​តុលាការ​ដើម្បី​គំរាមកំហែង​ប្រជា​ពលរដ្ឋ​ប៉ុណ្ណោះ​ទេ ប៉ុន្តែ​វិវាទ​នេះ​ក៏​បង្ហាញ​ពី​ភាព​អសកម្ម​របស់​អ្នកតំណាងរាស្ត្រ​បក្ស​កាន់អំណាច​ផង​ដែរ។ ចាប់តាំងពី​មានការ​ធ្វើ​កូដកម្ម​កន្លងមក គេ​មិនដែល​ឃើញ​តំណាងរាស្ត្រ​ចុះទៅ​តាមដាន ឬមួយ​ក៏​យកចិត្តទុកដាក់​ទៅលើ​ក្រុម​កូដ​ករ​ម្ដងណា​ឡើយ ខណៈ​ក្រុម​បុគ្គលិក​ណាហ្គាវើលដ៍​តែងតែ​ធ្វើ​កូដកម្ម​នៅ​ក្បែរ​របង​រដ្ឋសភា​ស្ទើរតែ​ជា​រៀងរាល់​ថ្ងៃ។

សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គាវើលដ៍ បាន​គូសបញ្ជាក់​នៅក្នុង​សេចក្ដីថ្លែងការណ៍​កាលពី​ពេល​កន្លង​ទៅ​ថា ការ​ប្រើប្រាស់​តុលាការ មិនមែន​ជា​ដំណោះស្រាយ​ពិតប្រាកដ ដែល​ធ្វើ​ឲ្យ​កូដ​ករ​បោះបង់​ការ​ទាមទារ​សិទ្ធិ​ការងារ និង​យុត្តិធម៌​នៅ​កន្លែង​ការងារ​នោះ​ឡើយ ផ្ទុយទៅវិញ​ករណីនេះ​កាន់តែ​បង្ហាញ​ពី​ការរំលោភ​សិទ្ធិ​ការងារ​ធ្ងន់ធ្ងរ​នៅក្នុង​ប្រទេស​កម្ពុជា​គ្រប់​ទម្រង់។ សហជីព​ដដែល​នេះ អំពាវនាវ​ឲ្យ​ក្រុមហ៊ុន ងាក​មក​គោរព​សេរីភាព​សហជីព និង​សិទ្ធិ​ការងារ​របស់​បុគ្គលិក ដែល​បាន​រួម​ចំណែក​យ៉ាង​ខ្លាំង​ធ្វើ​ឲ្យ​ក្រុមហ៊ុន​រីកចម្រើន​រហូត​មក​ដល់​បច្ចុប្បន្ន​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក គា សុគន្ធ អ្នក​និពន្ធ​គំរូ​ក្នុង​ការ​ឆ្លុះ​បញ្ចាំង​ការ​ពិត និង​បណ្ដុះ​ស្មារតី​ស្នេហា​ជាតិ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។