កម្មកររោងចក្រកាត់ដេរ វ៉ាយ អេន ដាប់បែលយូ (Y&W) នៅព្រឹកថ្ងៃទី២១ មីនា តវ៉ាបិទផ្លូវជាថ្មីទៀត ក្រោយពីក្រសួងការងារ មិនបានបញ្ជាក់ឲ្យច្បាស់លាស់ នូវអត្ថប្រយោជន៍ផ្សេងទៀត ដែលពួកគាត់នឹងទទួលបាន។ ការចេញតវ៉ារបស់កម្មករជាថ្មីនេះ គឺផ្ទុយពីអ្វី ដែលក្រសួងការងារ បានឃោសនាតាមប្រព័ន្ធផ្សព្វផ្សាយថា ក្រុមកម្មករត្រេកអរ ចំពោះដំណោះស្រាយរបស់ក្រសួង។
កម្មកររោងចក្រ វ៉ាយ អេន ដាប់បែលយូ (Y&W Garment) ៥រយនាក់ ជួបជុំគ្នាបិទផ្លូវ ត្រង់ចំណុចស្តុបបាគូ ដែលស្ថិតនៅសង្កាត់ដង្កោ ខណ្ឌដង្កោ រាជធានីភ្នំពេញ ដើម្បីទាមទារឲ្យក្រសួងការងារផ្ដល់គោលការណ៍ ៥ចំណុចរួមមាន ប្រាក់ឈ្នួលចុងក្រោយ ប្រាក់ជួសការសម្រាកប្រចាំឆ្នាំ ប្រាក់បំណាច់អតីតភាពការងារ ប្រាក់ជូនដំណឹងមុនកុងត្រា និងប្រាក់សោហ៊ុយជំងឺចិត្ត។
កម្មកររោងចក្រ វ៉ាយ អេន ដាប់បែលយូ ម្នាក់ គឺលោកស្រី យ៉ា រតនា ដែលទើបសំរាលកូនចំនួន៥ខែ ប្រាប់វិទ្យុអាស៊ីសេរី នៅថ្ងៃទី២១ មីនាថា មូលហេតុ ដែលកម្មករនៅតែបន្តការធ្វើកូដកម្មបិទផ្លូវនៅពេលនេះ គឺដោយសារតែក្រសួងការងារបញ្ជាក់ថា នឹងមិនផ្ដល់នូវប្រាក់សោហ៊ុយជំងឺចិត្តដល់កម្មករ។ លោកស្រីថា ការមិនផ្ដល់ប្រាក់សោហ៊ុយជំងឺចិត្តនេះ គឺបានប៉ះពាល់ខ្លាំងដល់ជីវភាពរបស់លោកស្រី ដែលត្រូវរ៉ាប់រងលើការចំណាយរបស់គ្រួសារ ថ្លៃទឹកដោះគោកូន និងប្រាក់សងបំណុលធនាគារជាដើម។
លោកស្រី យ៉ា រតនា៖
ស្រដៀងគ្នានេះ កម្មកររោងចក្រ វ៉ាយ អេនដាប់បែលយូ ម្នាក់ទៀត គឺលោកស្រី សេង ចាន់ណារ៉ា ដែលធ្វើការនៅរោងចក្រនេះចំនួន ១០ឆ្នាំ ថ្លែងថា ការផ្ដល់ប្រាក់អត្ថប្រយោជន៍ផ្សេងទៀតចំនួន ៤ចំណុច ដោយមិនផ្ដល់ប្រាក់សោហ៊ុយជំងឺចិត្ត គឺកំពុងធ្វើឲ្យគ្រួសារលោកស្រីជួបការលំបាក ស្របពេលវ័យលោកស្រីកាន់តែចាស់មិនអាចរកការងារនៅកន្លែងផ្សេងទៀតបាន។
លោកស្រី សេង ចាន់ណារ៉ា៖
ទាក់ទងនឹងប្រាក់សោហ៊ុយជំងឺចិត្តនេះ ករណីកម្មករ ដែលធ្វើការក្នុងវិស័យកាត់ដេរ ១០ឆ្នាំ ពួកគាត់អាចទទួលបានទឹកប្រាក់សោហ៊ុយជំងឺចិត្តប្រមាណ ១.៥០០ដុល្លារ។
ការផ្ទុះការតវ៉ាជាថ្មីនេះ ក្រោយពីក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី២០ មីនា បានកំណត់ថ្ងៃបើកប្រាក់ឈ្នួល និងអត្ថប្រយោជន៍ផ្សេងទៀត ដល់កម្មករ ប៉ុន្តែក្រសួងមិនបានបញ្ជាក់ឲ្យច្បាស់ នូវអត្ថប្រយោជន៍ផ្សេងទៀតទាំងនោះថា មានអ្វីខ្លះនោះទេ។
ក្រោយពីកម្មករផ្ទុះការតវ៉ា នៅថ្ងៃទី២១ មីនា ក្រសួងការងារ បានចេញសេចក្ដីជូនដំណឹងមួយថ្មីទៀត ស្ដីពីអត្ថប្រយោជន៍ ដែលទទួលបាន ក្រោយពីរំលាយកិច្ចសន្យាការងារ។
ក្រសួងការងារបានបញ្ជាក់ពីប្រាក់ឈ្នួល និងប្រាក់បំណាច់ផ្សេងៗ ក្រោយកិច្ចសន្យាការងារត្រូវបានរំលាយដោយថៅកែ ឬនិយោជក និងករណីសហគ្រាសក្ស័យធន។
ក្រសួងឲ្យដឹងថា ចំពោះការរំលាយកិច្ចសន្យាការងារដោយមិនកំណត់ថេរវេលា (UDC) ក្នុងករណីសហគ្រាសក្ស័យធន កម្មករអាចទទួលបានគោលការណ៍ចំនួន៤ចំណុច រួមមាន ប្រាក់ឈ្នួល ដែលមិនទាន់បើកប្រាក់បំណាច់ជួសការជូនដំណឹង ប្រាក់បំណាច់ជួសការឈប់សម្រាកប្រចាំឆ្នាំ ដែលនៅសល់ និងប្រាក់បំណាច់អតីតភាពការងារក្នុងឆមាសណាមួយ ដែលកម្មករត្រូវបានបញ្ឈប់ និងប្រាក់អតីតភាពការងារសរុប ដែលថៅកែមិនទាន់បើក។
ក្រសួងការងារអះអាងថា ករណីក្ស័យធន មិនមានសោហ៊ុយជំងឺចិត្តជូនកម្មករ ព្រោះថា ករណីកម្មករបញ្ឈប់ពីការងារដោយសារករណីក្ស័យធន គឺមិនប៉ះពាល់ដល់កិត្តិយស និងសេចក្ដីថ្លៃថ្នូរ ឬបង្កឲ្យមានការសង្ស័យលើកម្មករថា គ្មានសមត្ថភាពក្នុងការបំពេញការងារឡើយ។ ក្រសួងការងារ អះអាងទៀតថា ការបាត់បង់ការងារទាំងអស់គ្នា គឺមិនមានធាតុផ្សំ ដែលនាំឲ្យមានសំណងសោហ៊ុយជំងឺចិត្តនោះទេ។
ជុំវិញរឿងនេះ ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ករណីរោងចក្របិទទ្វារ ដោយសារបញ្ហាអ្វីមួយ នោះជាកំហុសរបស់ក្រុមហ៊ុន ហើយកម្មករត្រូវទទួលបានប្រាក់តាមច្បាប់ស្ដីពីការងារ និងមានសិទ្ធិទាមទារប្រាក់ឈ្នួល និងអត្ថប្រយោជន៍ទាំង ៥ចំណុច។
លោក អាត់ ធន់៖
មាត្រា ៩១ថ្មី នៃច្បាប់ស្ដីពីការងារ ចែងថា ការរំលាយកិច្ចសន្យាការងារតាមឆន្ទៈផ្ទាល់ នៃភាគីណាមួយ ដោយគ្មានហេតុផលត្រឹមត្រូវ នោះអាចបើកសិទ្ធិឲ្យភាគីម្ខាងទៀត ទារសងសោហ៊ុយជំងឺចិត្តបាន។ សោហ៊ុយជំងឺចិត្តនេះ មិនត្រូវលាយឡំគ្នា ជាមួយនឹងប្រាក់បំណាច់ទូទាត់ជួសការជូនដំណឹង ឬជាប្រាក់បំណាច់អតីតភាពការងារទេ។ កម្មករអាចទាមទារប្រាក់បំណាច់បើកផ្ដាច់មួយ ដែលមានចំនួនស្នើនឹងប្រាក់បំណាច់អតីតភាពការងារ និងត្រូវទទួលក្នុងកំលុងពេល នៃកិច្ចសន្យាការងារ។ ករណីនេះ កម្មករនិយោជិត ត្រូវបានរួចពីកាតព្វកិច្ច ដែលត្រូវផ្ដល់ភស្តុតាងបញ្ជាក់ពីការខូចខាតរបស់ខ្លួន។
រោងចក្រ វ៉ាយ អែន ដាប់បែលយូ (Y&W Garment) មានទីតាំងនៅផ្លូវ ២១៧ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ហើយមានកម្មករនិយោជិតជិត ៥ពាន់នាក់ (៤.៨៤៩ នាក់) ក្នុងនោះស្ត្រីមានផ្ទៃពោះមានជិត ៥រយនាក់។
កម្មកររោងចក្រ វ៉ាយ អែនដាប់បែលយូ ធ្លាប់ជួបជុំគ្នាធ្វើកូដកម្មនៅមុខរោងចក្រ ដើម្បីទាមទារឲ្យរដ្ឋមន្ត្រីក្រសួងការងារ លោក ហេង សួរ ដោះស្រាយវិវាទការងារនេះ ចំនួន ៤លើករួចមកហើយ។ កម្មករ លើកឡើងថា ពួកគាត់នឹងបន្តធ្វើកូដកម្មបិទផ្លូវតវ៉ា រហូតទាល់តែទទួលបានគោលការណ៍ទាំង ៥ចំណុច។
ការតវ៉ាទាំងនោះ ក្រោយពីថៅកែរោងចក្រ ដែលជាជនជាតិចិនឈ្មោះ យិន ប៉ូ ហ្វាយ (Yeun Po Fai) (អានថា យិន បូ ហ្វៃ) បានរត់ចោលរោងចក្រ ដោយមិនទូទាត់ប្រាក់ឈ្នួល និងអត្ថប្រយោជន៍ផ្សេងៗ ទៀតដល់កម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។