ក្រុមហ៊ុនរាវរករ៉ែមាសបដិសេធសេចក្ដីរាយការណ៍របស់ប្រជាពលរដ្ឋ
2011.02.22
ការបដិសេធនេះ បានធ្វើឡើងបន្ទាប់ពីមានសេចក្ដីរាយការណ៍ពីប្រជាពលរដ្ឋកាលពីថ្ងៃទី២១ ខែកុម្ភៈ កន្លងមក ពីបញ្ហាដែលថា មានជនជាតិវៀតណាម មួយក្រុមបានមករុករករ៉ែមាសអនាធិបតេយ្យនៅតាមដងទន្លេសេសាន ក្នុងខេត្តរតនគិរី ជាប់ព្រំដែនប្រទេសវៀតណាម ដោយមានអ្នកតំណាងរាស្ត្រខេត្ត គឺលោក ប៊ូ ថង ជាអ្នកនៅពីក្រោយសកម្មភាពនោះ ហើយវិទ្យុអាស៊ីសេរី ក៏បានផ្សាយពីព័ត៌មាននេះដែរ ប៉ុន្តែក្រោយពីផ្សាយបានមួយថ្ងៃ វិទ្យុអាស៊ីសេរី បានទទួលប្រតិកម្មពីតំណាងក្រុមហ៊ុនរុករករ៉ែមួយរបស់ប្រទេសវៀតណាម ឈ្មោះ Nam Hai Mineral Joint Stock Company បានចេញមុខធ្វើការបដិសេធលើសេចក្ដីរាយការណ៍របស់អ្នកភូមិ និងអាជ្ញាធរស្រុកអូរយ៉ាដាវថា ការអះអាងរបស់ប្រជាពលរដ្ឋ និងអាជ្ញាធរជាការមិនពិត។
តំណាងក្រុមហ៊ុន លោក លី ឃាង នៅព្រឹកថ្ងៃអង្គារ ទី២២ ខែកុម្ភៈ ឆ្នាំ២០១១នេះ បានមកដល់បន្ទប់ធ្វើការអ្នកយកព័ត៌មានវិទ្យុអាស៊ីសេរី ខេត្តរតនគិរី ហើយធ្វើការបំភ្លឺថា លោក ប៊ូ ថង មិនជាប់ពាក់ព័ន្ធទៅនឹងការរុករករ៉ែនោះទេ ហើយការរុករករ៉ែមាសនៅតំបន់ទន្លេសេសាន ចំណុចភូមិប៉ាដល មិនមែនជាក្រុមអនាធិបតេយ្យនោះដែរ គឺជាការសិក្សាស្រាវជ្រាវរុករករ៉ែរបស់ក្រុមហ៊ុន Nam Hai Mineral Joint Stock Company ដែលមានអាជ្ញាប័ណ្ណពីក្រសួងឧស្សាហកម្ម រ៉ែ និងថាមពល ប្រទេសកម្ពុជា និងមានការឯកភាពពីអភិបាលខេត្តរតនគិរី រួចហើយ។
លោក លី ឃាង បន្តថា ៖ «ក្រុមហ៊ុនយើងដែលចូលមកមិនទាន់បានជារ៉ែ ឬធ្វើអ្វី ត្រឹមតែដឹកម៉ាស៊ីនខួងដី គ្រាន់តែសិក្សាស្រាវជ្រាវ ទើបរៀបចំម៉ាស៊ីនចូលមិនទាន់បានធ្វើអីទាំងអស់។ ដូចជាមិនមានការពាក់ព័ន្ធអីជាមួយលោកតំណាងរាស្ត្រ ប៊ូ ថង ទេ គ្រាន់តែថា ខ្ញុំធ្លាប់ស្គាល់គាត់ សម្ដែងការគួរសមចូលលេងគាត់តែប៉ុណ្ណឹង។ ប្រហែលជាមានការផ្ដាំផ្ញើឲ្យទៅលោកចៅហ្វាយស្រុក ប្រហែលជាមាន។ក្រុមហ៊ុនខ្ញុំអត់មានពាក់ព័ន្ធ អត់មានភាគហ៊ុនស្អីជាមួយគាត់ អត់មាន»។
ឯកសារមួយចំនួនដែលវិទ្យុអាស៊ីសេរី ទទួលបានពីតំណាងក្រុមហ៊ុន Nam Hai Mineral Joint Stock Company បានឲ្យដឹងថា រដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម បានចុះហត្ថលេខាកាលពីថ្ងៃទី៦ ខែតុលា ឆ្នាំ២០១០ លើអាជ្ញាប័ណ្ណអនុញ្ញាតឲ្យក្រុមហ៊ុនធ្វើការសិក្សាស្រាវជ្រាវរ៉ែលោហៈនៅតំបន់ស្រុកអូរយ៉ាដាវ ខេត្តរតនគិរី លើផ្ទៃដី ២២២គីឡូម៉ែត្រក្រឡា។ អាជ្ញាប័ណ្ណនេះមានសុពលភាពរយៈពេល ២ឆ្នាំ គិតពីថ្ងៃចុះហត្ថលេខា។
ចំណែកអភិបាលខេត្តរតនគិរី លោក ប៉ាវ ហមផាន ក៏បានចេញលិខិតកាលពីថ្ងៃទី១៧ ខែធ្នូ ឆ្នាំ២០១០ ឯកភាពឲ្យក្រុមហ៊ុនធ្វើការស្រាវជ្រាវនៅភូមិសាស្ត្រខាងលើនេះដូចគ្នា ហើយសុំឲ្យក្រុមហ៊ុនទំនាក់ទំនងជាមួយអាជ្ញាធរឃុំ ស្រុក និងផ្សព្វផ្សាយព័ត៌មានដល់ប្រជាពលរដ្ឋក្នុងពេលអនុវត្តជាក់ស្ដែង។
យ៉ាងនេះក្តី អភិបាលស្រុកអូរយ៉ាដាវ លោក ដក ស នៅព្រឹកថ្ងៃអង្គារ នេះដែរ បានបដិសេធថា លោកមិនបានទទួលលិខិតពាក់ព័ន្ធនោះពីក្រុមហ៊ុនទេ។ ចំណែកអ្នកភូមិប៉ាដល បញ្ជាក់ដែរថា អ្នកភូមិក៏មិនបានទទួលព័ត៌មានណាមួយស្ដីពីការស្រាវជ្រាវរបស់ក្រុមហ៊ុនរុករករ៉ែនោះដែរ៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
ព័ត៌មានថ្មីៗ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- បដិវត្តន៍ខ្មែរក្រហម គំរូចិនដ៏មហន្តរាយ ខួប ៤៩ឆ្នាំ នៃការឡើងកាន់អំណាចរបស់ខ្មែរក្រហម ១៧ មេសា ១៩៧៥
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់