រូប៖ ពលរដ្ឋ
តំណាងសហគមន៍ឡពាង ១០នាក់ មិនបាននាំគ្នាធ្វើដំណើរទៅក្រុងភ្នំពេញ ដើម្បីឆ្លើយបំភ្លឺតុលាការក្រុងភ្នំពេញ តាមដីកាកោះហៅរបស់ចៅក្រមទេ នៅថ្ងៃទី៣០ ខែមីនា ព្រោះពួកគេដែលភាគច្រើនជាមនុស្សចាស់ បារម្ភខ្លាចឆ្លងជំងឺកូវីដ១៩ ខណៈជំងឺនេះ ឆ្លងរាលដាលមនុស្ស១០៧នាក់ នៅទូទាំងប្រទេស។
តំណាងសហគមន៍ឡពាង អ្នកស្រី អ៊ុំ សុភី ស្នើដល់ចៅក្រម លោក សំ ប៊ុនពៅ លើកពេលសាកសួរអ្នកភូមិឡពាង ទៅពេលណាមួយ ដែលស្ថានភាពជំងឺកូវីដ១៩ ថយចុះវិញ ព្រោះពួកគាត់អ្នកស្រែចម្ការ មិនដឹងថា ជួបអ្នកណាខ្លះ ហើយមិនដឹងថា អ្នកណាមានមានផ្ទុកជំងឺនេះទេ នៅពេលធ្វើដំណើរពីខេត្តកំពង់ឆ្នាំង ទៅរាជធានីភ្នំពេញ។ ក្នុងកាលៈទេសៈបែបនេះ អ្នកស្រីសង្ឃឹមថា តុលាការនឹងអនុគ្រោះដល់ពួកគាត់ ដែលជាពលរដ្ឋក្រីក្រ។
អាស៊ីសេរី មិនអាចសុំការឆ្លើយតបរឿងនេះ ពីប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ លោក អ៊ី រិន្ទ បានទេ ដោយលោកមិនទទួលទូរស័ព្ទ។
កាលពីថ្ងៃទី១៣ ខែកុម្ភៈ សាលាដំបូងរាជធានីភ្នំពេញ ចេញដីកោះហៅពលរដ្ឋ ១០នាក់ នៅភូមិឡពាង ឃុំតាជេស ដែលមានជម្លោះដីធ្លីជាមួយអ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ឲ្យចូលខ្លួនបំភ្លឺនៅរសៀលថ្ងៃទី៣០ ខែមីនា ដើម្បីចូលរួមនីតិវិធីទាញហេតុផលផ្ទាល់មាត់ ក្នុងសំណុំរឿងប្ដឹងមោឃភាពកិច្ចព្រមព្រៀងជាមួយក្រុមហ៊ុន ខេ.ឌី.ស៊ី (KDC) កាលពីឆ្នាំ២០១៤។
ពលរដ្ឋឲ្យដឹងថា តុលាការអូសបន្លាយរឿងក្ដីនេះ អស់រយៈពេលជាង ១ឆ្នាំមកហើយ ដោយត្រូវឲ្យអ្នកភូមិទៅឆ្លើយបំភ្លឺជាច្រើនដង ប៉ុន្តែមិនអាចបើកសវនាការជំនុំជម្រះរឿងក្ដីរដ្ឋប្បវេណីបាននោះទេ។
ជម្លោះដីធ្លីរវាងក្រុមហ៊ុន ខេ.ឌី.ស៊ី របស់អ្នកស្រី ជា ខេង ជាមួយអ្នកភូមិឡពាង បានអូសបន្លាយអស់រយៈពេលជាង ១៣ឆ្នាំមកហើយ។ ពលរដ្ឋថា ភាគីក្រុមហ៊ុន បានប្រើគ្រប់វិធីសាស្ត្រក្នុងការដោះស្រាយបញ្ហា គឺប្រើទាំងទិដ្ឋភាពច្បាប់ ការសម្របសម្រួលក្រៅប្រព័ន្ធតុលាការ និងពេលខ្លះក៏មានប្រើអំពើហិង្សាផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
