អាជ្ញាធរ​មិន​ទាន់​អាច​ធ្វើ​អន្តរាគមន៍​បើក​ផ្លូវ​ឲ្យ​អ្នក​ភូមិ​​វិញ​ដូច​ការ​សន្យា​បាន​ទេ នៅ​ថ្ងៃ​ទី២៩ សីហា

2018-08-29
អ៊ីម៉ែល
មតិ
Share
បោះពុម្ព
ពលរដ្ឋ​ដែល​អះអាង​ថា​រង​ការ​គំរាម​កំហែង​ពី​ឈ្មួញ​ដី​មិន​ឲ្យ​ដាំ​ដំណាំ​លើ​ដី​ពួក​គាត់​ធ្លាប់​កាន់​កាប់ នៅ​ភូមិ​ព្រៃពាយ ឃុំ​ត្រពាំងភ្លាំង ស្រុក​ឈូក ខេត្ត​កំពត ប្រមូល​ផ្តុំ​គ្នា​ស្នើសុំ​អន្តរាគមន៍​ពី​អាជ្ញាធរ នៅ​សាលា​ខេត្ត​កំពត ថ្ងៃ​ទី​១៧ ខែ​ឧសភា ឆ្នាំ​២០១៧។ Photo ADHOC
ពលរដ្ឋ​ដែល​អះអាង​ថា​រង​ការ​គំរាម​កំហែង​ពី​ឈ្មួញ​ដី​មិន​ឲ្យ​ដាំ​ដំណាំ​លើ​ដី​ពួក​គាត់​ធ្លាប់​កាន់​កាប់ នៅ​ភូមិ​ព្រៃពាយ ឃុំ​ត្រពាំងភ្លាំង ស្រុក​ឈូក ខេត្ត​កំពត ប្រមូល​ផ្តុំ​គ្នា​ស្នើសុំ​អន្តរាគមន៍​ពី​អាជ្ញាធរ នៅ​សាលា​ខេត្ត​កំពត ថ្ងៃ​ទី​១៧ ខែ​ឧសភា ឆ្នាំ​២០១៧។ Photo ADHOC
Photo ADHOC

អតីត​យុទ្ធជន​ម្នាក់ ដែល​ពិការ​ជើង​ម្ខាង លោក ហេង សឿន រស់​នៅ​ដី​សម្បទាន​សង្គមកិច្ច​មួយ​កន្លែង នៅ​ភូមិ​ព្រៃពាយ ឃុំត្រពាំង​ភ្លាំង​ ស្រុក​ឈូក ខេត្ត​កំពត ថ្លែង​ថា ផ្លូវ​ចូល​ភូមិ​ដែល​ដាច់ និង​ចាក់​ដី​រាំង នៅ​មិន​ទាន់​បាន​បើក​ទេ ព្រោះ​អាជ្ញាធរ​រវល់។

លោក ហេង សឿន ​ឲ្យ​ដឹង​ថា ពលរដ្ឋមាន​ជម្លោះ​ដីធ្លី​នៅ​ស្រុក​ឈូក ខេត្ត​កំពត ជិត ២០០គ្រួសារ កាល​ពី​ថ្ងៃ​ទី២៨ សីហា ​បាន​នាំ​គ្នា​រំសាយ​ការ​តវ៉ា​នៅ​មុខ​សាលា​ឃុំ​ត្រពាំង​ភ្លាំង ហើយ​ត្រលប់​ទៅ​ផ្ទះ​វិញ​រៀងៗ ខ្លួន កាល​ពី​​ថ្ងៃ​ទី២៨ សីហា ក្រោយ​ពេល​អាជ្ញាធរ​ឃុំ និង​អភិបាល​ស្រុក​ឈូក បាន​សន្យា​ថា នឹង​នាំ​ពលរដ្ឋ​ទៅ​បើក​ផ្លូវ​ចូល​ភូមិ​វិញ នៅ​ម៉ោង ១រសៀល​ថ្ងៃ​ទី២៩ សីហា។ មេឃុំ និង​អភិបាល​ស្រុក​ឈូក ប្រាប់​អ្នក​ភូមិ​ថា អភិបាល​ខេត្ត​កំពត លោក ជាវ តាយ បាន​ដឹង​ពី​ព័ត៌មាន​ឈ្មួញ​​ដី​យក​គ្រឿង​ចាក់ ជីក​ដី​កាត់​ផ្លូវ​អ្នក​ភូមិ និង​បិទ​ផ្លូវ​ខ្លះ​ទៀត មិន​ឲ្យ​អ្នក​ភូមិ​ព្រៃពាយ អាច​ធ្វើ​ដំណើរ​ចេញ​ចូល​ភូមិ​បាន​ហើយ កាល​ពី​ថ្ងៃ​ទី២៧ សីហា។

កាលថ្ងៃទី២៧ សីហា ពលរដ្ឋចំនួន ១៨៩គ្រួសារ ក្នុង​ចំណោម ១៩៩​គ្រួសារ ដែល​រស់នៅ​ក្នុង​តំបន់​ដី​សម្បទាន​សង្គមកិច្ច ស្រុក​ឈូក ​បាន​មក​រង់ចាំ លោក​មេឃុំ​ត្រពាំង​ភ្លាំង និង​អភិបាល​ស្រុក​ឈូក ដើម្បី​សុំ​អន្តរាគមន៍​លើ​ករណី បក្ខ​ពួក​របស់​ឈ្មួញ​ដី​ចម្ការ​ម្រេច របស់​អ្នកស្រី ហ៊ាង គន្ធី និង​លោក អាំ ផល្លីន ជា​អតីត​ទីប្រឹក្សា​របស់​លោក ហេង សំរិន បាន​បិទ​ផ្លូវ និង​កាយ​ផ្ដាច់​ផ្លូវ​សំខាន់ៗ បី​ចំណុច​បណ្ដាល​ឲ្យ​ពលរដ្ឋ មិន​អាច​ដឹក​ជញ្ជួន​ផល​ដំណាំ និង​ចូល​ទៅ​ចំការ​របស់​ពួក​គាត់​បាន។

ទំនាស់​ដីធ្លី ​រវាង​ពលរដ្ឋ​ភូមិ​ព្រៃ​ពាយ ជាមួយ​អតីត​ទីប្រឹក្សា លោក ហេង សំរិន គឺ​ប្ដី​ប្រពន្ធ​ឈ្មោះ អាំ ផល្លីន និង ហ៊ាង គន្ធី ជា​ទំនាស់​ដ៏​រ៉ាំរ៉ៃ​ ដែល​អូស​បន្លាយ​ពេល​ជា​ច្រើន​ឆ្នាំ​មក​ហើយ ទោះ​ជា​ប្ដូរ​អភិបាល​ខេត្ត​កំពត ជា​ច្រើន​នាក់ ក៏​ទំនាស់​មិន​ទាន់​បាន​បញ្ចប់​ទៀត។ ពលរដ្ឋ​រស់​នៅ​ភូមិ​ព្រៃ​ពាយ អះ​អាង​ថា ជា​ញឹក​ញាប់ ក្រុម​លោក អាំ ផល្លីន តែង​តែ​ប្រើ​អំពើ​ហិង្សា ដុត​បំផ្លាញ​ផ្ទះ​សម្បែង និង​កាប់​បំផ្លាញ​ផល​ដំ​ណាំ​​ពលរដ្ឋ​ដោយ​គ្មាន​ញញើត​ដៃ។ លោក ហេង សឿន ធ្លាប់​អះអាង​ថា កាល​ពី​ប៉ុន្មាន​ឆ្នាំ​មុន ក្រុម​កង​កម្លាំង​របស់​អ្នកស្រី ហ៊ាង គន្ធី បាន​ចាប់​ចង​លោក វាយ​ឲ្យ​សន្លប់​ជា​ច្រើន​ដង នៅ​ក្នុង​ផ្ទះ​លោក ក្នុង​ភូមិ​ព្រៃ​ពាយ។ កាល​ណោះ អ្នក​ភូមិ​ឲ្យ​ដឹង​ថា ប្ដី​ប្រពន្ធ​ពីរ​នាក់​នេះ បាន​ប្រើ​ងារ​ជា​ទីប្រឹក្សា​ របស់ លោក ហេង សំរិន ដើរ​សំឡុត វាយ​ធ្វើ​បាប​អ្នក​ភូមិ​បង្ខំ​ឲ្យ​ចាក​ចេញ​ពី​លំនៅឋាន ដើម្បី​យក​ដី​ទៅ​ជួល​ឲ្យ​ក្រុមហ៊ុន​ជប៉ុន ដាំ​ដំណាំ​ម្រេច។

លោក ហេង សឿន រៀបរាប់​ថា កាល​ពី​ឆ្នាំ២០១១ ពលរដ្ឋចំនួន ១៩៩គ្រួសារ ទទួល​បាន​ដី​សម្បទាន​សង្គមកិច្ច ហើយ​អាជ្ញាធរ​បាន​រៀបចំ​ធ្វើ​ផ្លូវ​ចេញ​ចូល​ភូមិ​ព្រៃពាយ​ជា​ធម្មតា ប៉ុន្ដែ​នៅ​ឆ្នាំ​២០១៦ បក្ខ​ពួក​របស់​ឈ្មួញ​ដី លោក អាំ ផល្លីន និង​អ្នកស្រី ហ៊ាង គន្ធី បាន​យក​គ្រឿងចក្រ​ផ្ដាច់​ផ្លូវ​អ្នកភូមិ​មិន​ឲ្យ​ចេញ​ចូល​ភូមិ​បាន។ យុទ្ធជន​ពិការ​ជើង​ម្ខាង​រូប​នេះ បន្ដ​ថា អ្នក​ភូមិ​បាន​នាំ​គ្នា​កាប់​ឆ្ការ​ព្រៃ ដើម្បី​ធ្វើ​ជា​ផ្លូវ​ចេញ​ចូល​ពី​ភូមិ ប៉ុន្ដែ​ប៉ុន្មាន​ថ្ងៃ​មុន​នេះ ឈ្មួញ​ដី​បាន​យក​គ្រឿង​ចក្រ ទៅ​កាយ​ផ្លូវ​ទាំង​នោះ និង​បាន​ធ្វើ​ទ្វារ​ដែក​លើ​ផ្លូវ ហើយ​ចាក់​សោរ ឈប់​ឲ្យ​អ្នក​ភូមិ​ធ្វើ​ដំណើរ​ឆ្លង​កាត់​ទៀត។

អ្នកភូមិព្រៃពាយ​ម្នាក់​ទៀត គឺ​លោក ស៊ឹម ឌឹម ប្រាប់​ថា បច្ចុប្បន្ន​ពួក​គេ​មិន​មាន​ផ្លូវ​ចេញ​ចូល​ភូមិ​ទេ កុំ​ថា​ឡើយ​ ផ្លូវ​សម្រាប់​ជិះ​ម៉ូតូ សូម្បី​ផ្លូវ​ដើរ​ចូល​ភូមិ​ព្រៃពាយ ក៏​គ្មាន​ដែរ៖ «»

អាស៊ី​សេរី មិន​អាច​រក​ប្រភព​សុំ​ការ​ឆ្លើយ​តប​ពី​ប្ដី​ប្រពន្ធ​ឈ្មួញ​ដី លោក អាំ ផល្លីន និង​លោកស្រី ​ហ៊ាង​ គន្ធី បាន​ទេ នៅ​ថ្ងៃ​ទី២៨ សីហា។ ប៉ុន្ដែ លោក អាំ ផល្លីន ធ្លាប់​ប្រាប់​អាស៊ី​សេរី កាល​ពី​ថ្ងៃ​ទី១៦ ខែ​ឧសភា ឆ្នាំ២០១៧ ថា លោក​មិន​ដែល​បាន​គំរាម​កំហែង ឬ​រំលោភ​យក​ដី​ពលរដ្ឋ​ទេ គឺ​មេ​ក្លោង​នៃ​ក្រុម​ជន​អនាធិបតេយ្យ​បាន​មួល​បង្កាច់​កិត្តិយស​លោក។

មន្ត្រី​កម្មវិធី​ពង្រឹង​សិទ្ធិ​អំណាច​សហគមន៍​មូលដ្ឋាន ​នៃ​សមាគម​សិទ្ធិមនុស្ស អាដហុក (ADHOC)​ ​លោក ប៉ែន បុណ្ណារ៍ យល់​ថា អាជ្ញាធរ​មូលដ្ឋាន និង​នគរបាល​យុត្តិធម៌ មិន​គួរ​បណ្ដោយ​ឲ្យ​បក្ខពួក​របស់​ឈ្មួញ​ដី បិទ​ផ្លូវ​សាធារណៈ​របស់​រដ្ឋ ចេញ​ចូល​ភូមិ តាំង​ពី​ដំបូង​មក​ម្ល៉េះ។ ទោះ​ជា​យ៉ាង​ណា​ក្ដី លោក ប៉ែន ប៊ុណ្ណារ៍ សង្គេត​ឃើញ​ថា អភិបាល​ខេត្ត​កំពត​ថ្មី ហាក់​បាន​កែទម្រង់​ករណី​នេះ មាន​ប្រសិទ្ធិ​ភាព​ជាង​មុខ​ខ្លះ។ ដូច្នេះ​ពលរដ្ឋ​គួរ​ប្រើ​សិទ្ធិ​ដាក់​ញ្ញត្តិ​ទៅ​សាលាខេត្ត​កំពត ឬ​អាច​បន្ថែម​ការ ដាក់​ពាក្យ​បណ្ដឹង​បរិហារ​ទៅ​ស្ថាប័ន​អយ្យការ​អម​សាលាដំបូង​ខេត្ត​កំពត​បន្ថែម​ទៀត៖ «»

អ្នកភូមិព្រៃពាយ លោក ស៊ឹម ឌឹម និង​អតីត​យុទ្ធជន​ពិការ​ជើង លោក ហេង សឿន ថា អ្នក​ភូមិ​ចង់​ឲ្យ​អាជ្ញាធរ​អន្ដរាគមន៍​ឲ្យ​មាន​ការ​បើក​ផ្លូវ​ទាំង​អស់​រួម​ទាំង​ផ្លូវ​សាធារណៈ ចេញ​ចូល​ភូមិ​ព្រៃពាយ​ ដែល​ឈ្មួញ​ដី​បាន​បិទ​កាល​ពី​ឆ្នាំ២០១៦​ឡើង​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល