ពលរដ្ឋ​បឹង​តាមោក សោកស្ដាយ​ចំពោះ​មន្ត្រី​ប្រចាំ​ព្រះខុទ្ទកាល័យ​ព្រះមហាក្សត្រ ដែល​មិន​ចេញ​មក​ទទួល​ញត្តិ​របស់​ពួក​គាត់

ដោយ សុជីវី
2024.03.18
ពលរដ្ឋ​បឹង​តាមោក សោកស្ដាយ​ចំពោះ​មន្ត្រី​ប្រចាំ​ព្រះខុទ្ទកាល័យ​ព្រះមហាក្សត្រ ដែល​មិន​ចេញ​មក​ទទួល​ញត្តិ​របស់​ពួក​គាត់
រូបពីពលរដ្ឋ

ពលរដ្ឋ​បឹង​តាមោក សោកស្ដាយ​ចំពោះ​មន្ត្រី​ប្រចាំ​ព្រះខុទ្ទកាល័យ​ព្រះមហាក្សត្រ ដែល​មិន​ចេញ​មក​ទទួល​ញត្តិ​របស់​ពួក​គាត់។

ការ​លើក​ឡើង​នេះ ក្រោយ​ពី​ពលរដ្ឋ យុវជន និងព្រះសង្ឃជិត១រយនាក់ នៅរសៀលថ្ងៃទី១៨ មីនា ហែ​ញត្តិ​ទៅ​ថ្វាយ​អង្គ​ព្រះមហាក្សត្រ ដើម្បី​ស្នើសុំ​ព្រះអង្គ ធ្វើ​អន្តរាគមន៍​កុំ​ឲ្យ​អាជ្ញាធរ​បណ្ដេញ​ពលរដ្ឋ​បឹង​តាមោក ចេញ​ពី​លំនៅឋាន​ដោយ​បង្ខំ។

មន្ត្រី​អង្គការ​សង្គម​ស៊ីវិល​ថា ដើម្បី​បង្ហាញ​អំពី​សីលធម៌ ក្នុង​នាម​ជា​មន្ត្រី​ទទួល​បន្ទុក​ប្រចាំការ​នៅ​ព្រះ​ខុទ្ទកាល័យ​ព្រះមហាក្សត្រ គួរតែ​ទទួល​ញត្តិ​ពី​ពលរដ្ឋ ។

តំណាង​ពលរដ្ឋ​បឹង​តាមោក លោកស្រី ស៊ា ដាវី ប្រាប់​វិទ្យុ​អាស៊ី​សេរី នៅ​ថ្ងៃ​ទី១៨ មីនា​ថា ការ​ដាក់​ញត្តិ​នៅ​ព្រះខុទ្ទកាល័យ​ព្រះមហាក្សត្រ​នេះ គឺ​ដោយសារ​តែ កាល​ពី​ពេល​កន្លង​ទៅ សហគមន៍​សំរោង​ត្បូង ធ្លាប់​ដើរ​ដាក់​ញត្តិ​តាម​ស្ថាប័ន​នានា ដូចជា ខុទ្ទកាល័យ​នាយក​រដ្ឋមន្ត្រី ក្រសួង​ដែនដី និង​សាលា​រាជធានី​ភ្នំពេញ​ជា​ដើម ប៉ុន្តែ គ្មាន​ដំណោះស្រាយ​ណា​មួយ ដែល​អាច​ទទួល​យក​បាន​នោះ​ទេ។

លោកស្រី ស៊ា ដាវី៖ «ពួក​បង​ជា​ប្រជាពលរដ្ឋ​ទាំង​អស់​គ្នា ពួក​បង​សោកស្ដាយ ក៏​ដូច​ជា ឈឺចាប់​មែនទែន ដែល​មន្ត្រី​ប្រចាំការ​នៅ​ក្នុង​ព្រះបរម​រាជវាំង​នេះ មិន​ព្រម​ទទួល​ញត្តិ​របស់​ពួក​បង ទោះ​បី​ជា​ទទួល​ហើយ ទៅ​ថ្វាយ​ព្រះមហាក្សត្រ​ទ្រង់​ដោះ​ស្រាយ ឬ​មិន​ដោះ​ស្រាយ ប៉ុន្តែ សុំ​ឲ្យ​ទទួល​នូវ​ទុក្ខ​កង្វល់​របស់​ពួក​បង​ទៅ​ឲ្យ​ព្រះអង្គ​បាន​ឃើញ​ផង។ ប៉ុន្តែ នេះ អត់​ទទួល​ទាល់​តែ​សោះ។ អ៊ីចឹង ពួក​បង​សោកស្ដាយ ខក​ចិត្ត​នឹង​មន្ត្រី​ទាំង​អស់​ហ្នឹង​មែនទែន»

កាល​លើក​ឡើង​នេះ នៅ​ពេល ដែល​ពលរដ្ឋ​នៅ​តំបន់​បឹង​តាមោក យុវជន សកម្មជន​ចលនា​មាតា​ធម្មជាតិ កូដករ​ណាហ្គាវើលដ៍ និង​ព្រះសង្ឃ​ជិត ១រយ​អង្គ/នាក់ បាន​ជួបជុំ​គ្នា នៅ​មាត់​ទន្លេ​ចតុមុខ ដែល​ស្ថិត​នៅ​ខណ្ឌដូនពេញ រាជធានី​ភ្នំពេញ ហើយ​បាន​ធ្វើ​ដំណើរ​ដោយ​ថ្មើរ​ជើង​ឆ្លង​កាត់​ផ្សារ​ធំៗ ចំនួន២ គឺ​ផ្សារ​ចាស់ និង​ផ្សារ​កណ្ដាល ដើម្បី​ហែ​ញត្តិ​តាម​ដង​ផ្លូវ​ទៅ​កាន់​ព្រះខុទ្ទកាល័យ​ព្រះមហាក្សត្រ។

ចំណែក​ឯ​ខ្លឹមសារ នៃញត្តិ​វិញ សហគមន៍​សំរោងត្បូង​ឲ្យ​ដឹង​ថា ពួក​គាត់​បាន​រៀបរាប់​អំពី​ពលរដ្ឋ​ចំនួន១១២ គ្រួសារ ដែល​រស់នៅ​តំបន់​បឹង​តាមោក តាំង​ពី​ឆ្នាំ១៩៩០ មុន​ពេល​ច្បាប់​ភូមិបាល​ចូល​ជា​ធរមាន​ទៅ​ទៀត។ ប៉ុន្តែ នៅ​ពេល​នេះ ពួក​គាត់​ត្រូវ​បាន​អ្នក​កាន់​អំណាច បណ្ដេញ​ពួក​គាត់​ចេញ​ដោយ​បង្ខំ ហើយ​យក​ដី​បឹង​នោះ ទៅ​ចែក​បក្ស​ពួក​គេ​ទៅ​វិញ។ សហគមន៍​ឲ្យ​ដឹង​ទៀត​ថា ពួក​គាត់​នៅ​ចាំ​ព្រះរាជ​បន្ទូល​របស់​អង្គ​ព្រះមហាក្សត្រ កាលពីឆ្នាំ២០០៥ នៅ​ពេល​ព្រះអង្គ​យាង​ទត​ការ​រស់នៅ​របស់​ពលរដ្ឋ​នៅ​តំបន់​បឹង​តាមោក ថា «រស់នៅ​ចុះ​កូន ឪ​មិន​ដេញ​កូន​ទេ»

ប្រភព​ដដែល​ឲ្យ​ដឹង​ថា ក្រោយ​អស់​សង្ឃឹម​ក្នុង​ការ​រង់ចាំ​ដំណោះស្រាយ​ពី​ស្ថាប័ន​រដ្ឋ រួមមាន សាលាខណ្ឌ សាលាក្រុង រដ្ឋសភា និង​ពី​នាយក​រដ្ឋមន្ត្រី ប្រជា​សហគមន៍​សំរោងត្បូង គ្មាន​ជម្រើស​អ្វី​ក្រៅ​ពី​ក្រាប​ទូល​ព្រះមហាក្សត្រ ដើម្បី​ឲ្យ​ទ្រង់​ជួយ​ធ្វើ​អន្តរាគមន៍ ដោយ​អនុញ្ញាត​ឲ្យ​ប្រជា​សហគមន៍​សំរោងត្បូង បាន​រស់នៅ​លើ​ដី និង​ផ្ទះ​របស់​ពួក​គាត់​បន្ត​ទៀត។

ការ​ហែ​ញត្តិ​នេះ ពលរដ្ឋ និង​យុវជន បាន​កាន់​រូបថត​ព្រះមហាក្សត្រ ព្រះបាទ​សម្ដេច​ព្រះបរមនាថ នរោត្ដម សីហមុនី និង​សម្ដេច​ព្រះមហាក្សត្រី ព្រមទាំង​ស្រែក​ទាមទារ​ឲ្យ​រដ្ឋាភិបាល​អាណត្តិ​ថ្មី កុំ​បន្ត​អភិវឌ្ឍន៍​នៅ​លើ​ទឹកភ្នែក​របស់​រាស្រ្ត។

ការហែ​ញត្តិ​នេះ​ដែរ ត្រូវ​បាន​ឃ្លាំមើល​ដោយ​មន្ត្រី​អង្គការ​សិទ្ធិមនុស្ស និង​អាជ្ញាធរ ដែល​មាន​ស្លៀកពាក់​ឯកសណ្ឋាន និង​ស៊ីវិល តាម​ថតរូប​អ្នក ដែល​បាន​ចូលរួម។

ក្រោយ​ពី​មន្ត្រី​ព្រះខុទ្ទកាល័យ​ព្រះមហាក្សត្រ​មិន​ចេញ​មក​ទទួល​ញត្តិ ពលរដ្ឋ បាន​រៀបចំ​សែនព្រេន នៅ​ខាង​មុខ​ខុទ្ទកាល័យ ដើម្បី​ថ្វាយ​ញត្តិ​ដល់​អតីត​ព្រះមហាក្សត្រ​អង្គ​មុនៗ ដើម្បី​ទ្រង់​ទត​ឃើញ​អំពី​ទុក្ខ​វេទនា​របស់​ប្រជា​សហគមន៍​សំរោងត្បូង ដែល​ត្រូវ​បណ្ដេញ​ចេញ​ដោយ​បង្ខំ ក្រោម​លេស​អភិវឌ្ឍ។

ជុំវិញ​រឿង​នេះ ប្រធាន​សមាគម​និស្សិត​បញ្ញវន្ត​ខ្មែរ លោក កើត សារ៉ាយ មានប្រសាសន៍ថា មន្ត្រី​ប្រចាំការ​នៅ​ព្រះ​ខុទ្ទកាល័យ​ព្រះមហាក្សត្រ គួរតែ​ទទួល​យក​ញត្តិ​ពី​ពលរដ្ឋ ដើម្បី​បង្ហាញ​អំពី​សីលធម៌ ក្នុង​នាម​ជា​មន្ត្រី។

លោក កើត សារ៉ាយ៖ «ការ​ដាក់​លិខិត​ទៅ​នោះ វា​គ្រាន់តែ​ជា​បែបបទ​រដ្ឋបាល តាម​បែប​សីលធម៌​រដ្ឋបាល​នោះ​គឺ ខុទ្ទកាល័យ​គួរតែ​ទទួល ឯ​រឿង​ដោះស្រាយ ឬ​មិន​ដោះស្រាយ រឿង​យក​ចិត្ត​ទុក​ដាក់ ឬ​មិន​យក​ចិត្ត​ទុក​ដាក់ វា​ជា​ឆន្ទានុសិទ្ធិ​របស់​ព្រះមហាក្សត្រ​ថា តើ​ទ្រង់​ក្រោយ​ពី​បាន​ពិនិត្យ​សុខ​ទុក្ខ​របស់​ប្រជាពលរដ្ឋ​ហ្នឹង តើ​ទ្រង់​ចង់​ដោះ​ស្រាយ​ទេ ឬ​មិន​ចង់​ដោះ​ស្រាយ​ទេ? ដូច្នេះ ការ​បដិសេធ​មិន​ទទួល​យក​តែ​ម្ដង​នេះ វា​ជា​ការ​បង្ហាញ​ពី​ការ​មិន​ទទួល​ខុស​ត្រូវ​ក្នុង​នាម​ជា​អ្នក​ទទួល​ខុស​ត្រូវ​ផ្នែក​រដ្ឋបាល​ក្នុង​ខុទ្ទកាល័យ»

ជម្លោះ​ដីធ្លី​រ៉ាំរ៉ៃ របស់​ពលរដ្ឋ​រស់នៅ​តំបន់​បឹង​តាមោក កើត​ឡើង​ក្រោយ​ពី​អតីត​នាយករដ្ឋមន្ត្រី លោក ហ៊ុន សែន ប្រគល់​ដី​នៅ​តំបន់​នោះ ឱ្យ​ទៅ​អ្នក​មាន​លុយ​មាន​អំណាច​ជា​បន្ត​បន្ទាប់ សម្រាប់​ប្រើប្រាស់​ក្នុង​គោលដៅ​ផ្សេងៗ គ្នា។ ចំណែក​ពលរដ្ឋ​ត្រូវ​បាន​បណ្ដេញ​ដោយ​បង្ខំ។ បើ​ទោះ​ជា​ពលរដ្ឋ​ទាំង​នោះ ព្យាយាម​តវ៉ា និង​ដើរ​ដាក់​ញត្តិ​រាប់​មិន​អស់ នៅ​តាម​ក្រសួង​ស្ថាប័ន​ថ្នាក់​ជាតិ  ដើម្បី​ស្វែងរក​កិច្ច​អន្តរាគមន៍​ក្ដី ប៉ុន្តែ មិន​ទទួល​បាន​ដំណោះស្រាយ​ឡើយ និង​ថែម​ទាំង​ទទួល​រង​ការ​ធ្វើ​ទុក្ខ​បុក​ម្នេញ យាយី និង​អំពើ​ហិង្សា​ពី​សំណាក់​អាជ្ញាធរ រួម​ទាំង ការ​ចោទ​ប្រកាន់​ពី​តុលាការ រហូត​ដល់​ពលរដ្ឋ​មួយ​ចំនួន​ត្រូវ​បង្ខំ​ចិត្ត​ចាកចេញ​ពី​ប្រទេស ដើម្បី​ទៅ​រក​ទី​កន្លែង​សុវត្ថិភាព​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។