ពលរដ្ឋមានវិវាទដីធ្លីជាមួយក្រុមហ៊ុន រ៉ែធ្យូង ហ្គ្រីន វូត ឌីវេឡុបមេន (Green Wood Development Company) នៅស្រុកសេសាន ខេត្តស្ទឹងត្រែង ទាមទារឲ្យអាជ្ញាធររកដំណោះស្រាយជូនពួកគាត់ ប្រសើរជាងរុញពលរដ្ឋឲ្យទៅស្នើសុំដីសម្បទានសង្គមកិច្ចពីរដ្ឋាភិបាល។
ពលរដ្ឋរស់នៅឃុំតាឡាត់ ស្រុកសេសាន ខេត្តស្ទឹងត្រែង លើកឡើងថា ថ្មីៗនេះអាជ្ញាធរមូលដ្ឋានបានប្រកាសឲ្យពលរដ្ឋទៅដាក់ពាក្យស្នើសុំដីសម្បទានសង្គមកិច្ចពីរដ្ឋាភិបាលដើម្បីបានដីសម្រាប់ទុកបង្កបង្កើនផលចិញ្ចឹមជីវភាពគ្រួសារ។ ប៉ុន្តែពលរដ្ឋ ដែលមានវិវាទដីធ្លីជាមួយក្រុមហ៊ុនរ៉ែធ្យូង ហ្គ្រីន វូត ជាង១០០គ្រួសារ បានបដិសេធមិនទៅស្នើសុំដីសម្បទានសង្គមកិច្ចពីរដ្ឋាភិបាលនោះទេ ដោយពួកគាត់ទាមទារឲ្យអាជ្ញាធររកដំណោះស្រាយរវាងពលរដ្ឋនិងក្រុមហ៊ុនជំនួសវិញ។
តំណាងឲ្យពលរដ្ឋនៅឃុំតាឡាត់ សុំមិនបញ្ចេញឈ្មោះ ដោយបារម្ភពីសុវត្ថិភាព ប្រាប់វិទ្យុអាស៊ីសេរី នៅថ្ងៃទី០៨ ខែកុម្ភៈថា អាជ្ញាធរមូលដ្ឋានបានប្រកាសឲ្យពលរដ្ឋដែលគ្មានដីធ្លី ទៅដាក់ពាក្យស្នើសុំដីសម្បទានសង្គមកិច្ចពីរដ្ឋាភិបាល ដើម្បីទុកសម្រាប់អាស្រ័យផល ប៉ុន្តែពលរដ្ឋបានបដិសេធជាមួយអាជ្ញាធរថា ការប្រកាសចែកដីធ្លីនេះគឺសម្រាប់តែពលរដ្ឋដែលគ្មានដីរស់នៅ និងអាស្រ័យផលប៉ុណ្ណោះ ចំណែកពលរដ្ឋនៅឃុំតាឡាត់មានដីសម្រាប់រស់នៅ និងអាស្រ័យផលរួចហើយ ដោយគ្រាន់តែក្រុមហ៊ុនចិនរំលោភយករបស់ពួកគាត់។ លោកទាមទារឲ្យអាជ្ញាធរខេត្តស្ទឹងត្រែង ស្វែងរកដំណោះស្រាយ ដោយកាត់ឆ្វៀលដីស្រែចម្ការ របស់ពលរដ្ឋចេញពីគម្រោងធ្វើអាជីវកម្មរ៉ែធ្យូង ពីព្រោះពលរដ្ឋនៅតំបន់នោះមិនចង់ចាកចេញពីភូមិកំណើតរបស់ពួកគាត់ឡើយ។
តំណាងឲ្យពលរដ្ឋនៅឃុំតាឡាត់ សុំមិនបញ្ចេញឈ្មោះ៖ «មិនចង់បានទេដីចែកនោះ ទោះបីបានស្មើគ្នា៣ហិកតារ ដីភូមិផ្សេង ចង់បានស្របច្បាប់នៅទីនេះហើយមិនទៅទេកន្លែងនោះ ចង់ឲ្យដោះស្រាយនៅកន្លែងនេះឲ្យត្រឹមត្រូវ ឲ្យស្របច្បាប់ទោះបីបាន៣ហិកតារ ដីភូមិផ្សេងក៏ពួកខ្ញុំយកដែរ នេះបើសិនអស់ជម្រើស ៣ហិកតារ ដីភូមិក្បាល២៥ម៉ែត្របណ្ដោយ៥០ម៉ែត្រ ក៏ពួកខ្ញុំសុខចិត្តដូចគ្នា បើថាឲ្យទៅខុសពីកន្លែងនេះពួកខ្ញុំមិនទៅទេ ពីព្រោះឆ្ងាយពីស្រុកភូមិកំណើត»។
តំណាងពលរដ្ឋអះអាងទៀតថា អាជ្ញាធរថ្នាក់ជាតិបានសន្យាជាមួយពលរដ្ឋរងគ្រោះដីធ្លីរួចហើយ ថានឹងរកដំណោះស្រាយឲ្យប្រជាពលរដ្ឋ និងមិនឲ្យប្រជាពលរដ្ឋផ្លាស់ទីលំនៅទៅរស់នៅកន្លែងផ្សេងនោះទេ។ លោកថា ប្រសិនបើអាជ្ញាធរចង់ឲ្យពលរដ្ឋមានដីធ្លីមែននោះ អាជ្ញាធរគួរតែចុះបញ្ជីប័ណ្ណកម្មសិទ្ធិស្របច្បាប់ និងដោះស្រាយវិវាទដីធ្លីជាការស្រេច ហើយមិនពិបាកដល់អាជ្ញាធរថែមទៀត។
វិទ្យុអាស៊ីសេរី មិនអាចទាក់ទងអ្នកនាំពាក្យសាលាខេត្តស្ទឹងត្រែង លោក ម៉ែន គង់ ដើម្បីសុំការបកស្រាយជុំវិញរឿងនេះបានទេ នៅថ្ងៃទី០៨ ខែកុម្ភៈ ដោយទូរស័ព្ទចូលច្រើនដងតែគ្មានអ្នកទទួល។ ចំណែក អភិបាលស្រុកសេសាន លោក សុវណ្ណ ពិសេដ្ឋ និង មេឃុំតាឡាត លោក មូន ខិប ក៏វិទ្យុអាស៊ីសេរី មិនអាចទាក់ទងបានដែរ នៅថ្ងៃដដែល។
ទាក់ទិនបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី យល់ឃើញថា អាជ្ញាធរត្រូវតែស្វែងរកដំណោះស្រាយ ឲ្យពលរដ្ឋ ដែលមានទំនាស់ដីធ្លីជាមួយក្រុមហ៊ុនឯកជន ទៅតាមច្បាប់ និងគោលនយោបាយរបស់រដ្ឋាភិបាល ដើម្បីបញ្ចប់ជម្លោះកុំទុកឲ្យវិវាទដីធ្លីមួយនេះ អូសបន្លាយធ្វើឲ្យប៉ះពាល់ដល់ការអភិវឌ្ឍរបស់រដ្ឋាភិបាល។
លោក យិន ម៉េងលី៖ «ដីក្រុមហ៊ុនមិនមែនជាកម្មសិទ្ធិដីក្រុមហ៊ុនផ្ដាច់មុខទេ ដីក្រុមហ៊ុនស្ថិតនៅក្នុងកិច្ចសន្យាជួលរបស់រដ្ឋាភិបាលមានរយៈពេលកំណត់ ហើយបើមានបញ្ហារដ្ឋអាចដកយកមកវិញបាន ពីព្រោះជាប្រភេទដីឯកជនរបស់ប្រជាពលរដ្ឋ ហើយកាត់ឆ្វៀលឲ្យប្រជាពលរដ្ឋទៅ វាចប់បញ្ហាហើយ វាលែងឮស្រែកទ្រហោយំ ឈប់មានការតវ៉ាឥតឈប់ឈរពីប្រជាពលរដ្ឋ ហើយក៏ជាមុខមាត់មួយដែរ ដែលរដ្ឋាភិបាលយកចិត្តទុកដាក់ចំពោះប្រជាពលរដ្ឋរបស់ខ្លួនស្របតាមច្បាប់»។
កាលពីថ្ងៃទី២០ ខែតុលា ឆ្នាំ២០២១ អតីតរដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានចុះហត្ថលេខា ឲ្យក្រុមហ៊ុន ហ្គ្រីន វូត ឌីវេឡុបមេន(Green Wood Development Company) ធ្វើអាជីវកម្មរ៉ែធ្យូងលើផ្ទៃដី ជិត១ពាន់ (៨៨១) ហិកតារ នៅក្នុងភូមិសាស្ត្រតំបន់តាឡាត់ ស្រុកសេសាន ខេត្តស្ទឹងត្រែង។ ប៉ុន្តែអាជីវកម្មមួយនេះបានធ្វើឲ្យប៉ះពាល់ដល់ដីស្រែចម្ការ របស់ប្រជាពលរដ្ឋជាង១០០គ្រួសារ និងបានឈូសឆាយបំផ្លិចបំផ្លាញចោលផលដំណាំរបស់ពលរដ្ឋនៅជុំវិញតំបន់នោះអស់ជាច្រើនហិកតារផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។