តំណាងសហគមន៍ជ្រោយចង្វា ៧នាក់ ទៅសាលាក្រុងភ្នំពេញជាថ្មីទៀត ដើម្បីតាមដានញត្តិពួកគាត់ដែលបានដាក់ជិតមួយខែកន្លងទៅនេះ នៅមិនទាន់មានការកោះហៅ ដើម្បីជួបពិភាក្សាអំពីដោះស្រាយរឿងដីធ្លីជាមួយក្រុមហ៊ុន អូ.ស៊ី.អាយ.ស៊ី (OCIC)។ អ្នកជ្រោយចង្វា យល់ថា អាជ្ញាធរក្រុងភ្នំពេញ ហាក់គ្មានឆន្ទៈពិតប្រាកដដោះស្រាយបញ្ចប់បញ្ហាជូនពលរដ្ឋឡើយ ដោយបន្តអូសបន្លាយពីមួយពេលទៅមួយពេល។
តំណាងសហគមន៍ជ្រោយចង្វា លោក ជា សុផាត ឲ្យដឹងថា មន្ត្រីសាលាក្រុងប្រាប់គាត់ថា ការខនខានមិនដោះស្រាយបញ្ហាឲ្យអ្នកជ្រោយចង្វា ដោយសារលោក ឃួង ស្រេង មានភារៈកិច្ចជាប់រវល់ខ្លាំង។ ទោះបីជាយ៉ាងនេះក្ដី លោក ជា សុផាត ទទូចស្នើសុំអភិបាលក្រុង ជួយពន្លឿនដំណោះស្រាយបញ្ចប់បញ្ហាឲ្យពួកគាត់ ដែលភាគច្រើនជាមន្ត្រីរាជការចូលនិវត្តន៍៖ «បើសិនជាសាលារាជធានីភ្នំពេញ មានគោលការណ៍ដោះស្រាយ គឺមិនជាការពិបាកទេ ព្រោះបើគិតពីផលប្រយោជន៍បុគ្គលឬក៏ក្រុម។ បើគិតពីភាពយុត្តិធម៌សម្រាប់ពលរដ្ឋវិញ គឺអាចយកបញ្ហាអស់ហ្នឹង យកមកដាក់លើតុ ដើម្បីជជែកវែកញែករកដំណោះស្រាយឲ្យពួកខ្ញុំ កុំឲ្យពួកខ្ញុំនៅរង់ចាំដំណោះស្រាយដូចជាកាត់បំពង់រង់ចាំទឹកភ្លៀង ពីមួយថ្ងៃទីមួយថ្ងៃដែលគ្មានគោលការណ៍អ្វីថ្មីសម្រាប់ពួកខ្ញុំសោះ»។
កាលពីថ្ងៃទី១៧ ខែមករា សហគមន៍ជ្រោយចង្វា បានដាក់ញត្តិស្នើសុំអភិបាលក្រុងភ្នំពេញលោក ឃួង ស្រេង ជួយផ្ដល់ដំណោះស្រាយឲ្យពួកគាត់ក្នុងជម្លោះដីធ្លីជាមួយក្រុមហ៊ុន អូស៊ីអាយស៊ី របស់លោកឧកញ៉ា ពុង ខៀវស៊ែ។ ក្នុងសំណើនោះ ពួកគាត់ស្នើឲ្យសាលាក្រុងភ្នំពេញ ផ្អាករាល់សកម្មភាពរបស់ក្រុមហ៊ុន OCIC នៅលើដីដែលមិនទាន់ដោះស្រាយ កាត់ឆ្វៀលដីលំនៅឋានទាំងអស់ចេញពីគម្រោងអភិវឌ្ឍ និងចេញប័ណ្ណកម្មសិទ្ធិ (ប្លង់រឹង) ដោយមិនគិតប្រវែងគម្លាត ១០០ម៉ែត្រ ឬក្រៅ ១០០ម៉ែត្រពីផ្លូចជាតិលេខ 6A និងពីច្រាំងទន្លេសាប។ ក្រៅពីនេះ ដីអាស្រ័យផលសម្រាប់ធ្វើស្រែចម្ការរបស់ពលរដ្ឋដែលជាម្ចាស់ដី ចូលរួមអភិវឌ្ឍន៍ ដោយប្រគល់ដី ៥០% ជូនសាលាក្រុងភ្នំពេញនិងក្រុមហ៊ុន ហើយដី ៥០%ដែលនៅសល់ ស្នើសុំចេញប័ណ្ណកម្មសិទ្ធិឲ្យម្ចាស់ដី ឬក្រុមហ៊ុនអាចទិញតាមតម្លៃទីផ្សារសម្រាប់ដីទាំងមូល។ ហើយនឹងដោះស្រាយផលប៉ះពាល់ដីលំនៅឋាន នៅភូមិដើមគរ សង្កាត់ជ្រោយចង្វា ៨គ្រួសារ ដែលក្រុមហ៊ុនឈូសកម្ទេចចោលកាលពីខែមេសា ឆ្នាំ២០១៧។
បច្ចុប្បន្ននេះ លោក ជា សុផាត ឲ្យដឹងថា ខាងភាគីក្រុមហ៊ុននៅតែបន្តការឈូសឆាយដីធ្លីពលរដ្ឋ និងសាងសង់ ផ្ទះល្វែង ភោជនីយដ្ឋាន រហូតមកដល់ពេលនេះ ដោយគ្មានការផ្អាកមួយថ្ងៃណាឡើយ។ ប្រជាពលរដ្ឋរស់នៅតំបន់ជ្រោយចង្វា ស្នើសុំលោក ហ៊ុន សែន ជួយអន្តរាគមន៍ដោះស្រាយបញ្ចប់បញ្ហាឲ្យពួកគាត់ ដែលភាគច្រើនជាមន្ត្រីរាជការធ្វើការ មាននគរបាល ទាហាន និងគ្រូបង្រៀនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។