អាជ្ញាធរសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ប្រគល់ក្រដាសស្នាមមេដៃឲ្យអ្នកភូមិវិញហើយ នៅវេលាម៉ោង ៥ ថ្ងៃទី១៥ ខែកុម្ភៈ។ ក្រដាសស្នាមមេដៃនេះ ត្រូវបានអាជ្ញាធរដកហូតពីប្រជាពលរដ្ឋកាលពីសប្ដាហ៍មុន។
ប្រធានភូមិព្រែកតាគង់១ នៃសង្កាត់ចាក់អង្រែលើ ខណ្ឌមានជ័យ លោក ឡុង ហឿន បានយកក្រដាសស្នាមមេដៃរបស់អ្នកភូមិប្រគល់ឲ្យអ្នកភូមិព្រែកតាគង់១ វិញ ក្រោយកិច្ចប្រជុំមួយសម្រេចនៅសង្កាត់នៅថ្ងៃទី១៥ ខែកុម្ភៈ៖ «អ៊ីចឹងអ្នកណាទទួលយក? ហើយយកទៅមើលសិន គ្រប់ចំនួនហើយ ឬនៅ? ប្រយ័ត្នទៅដល់នោះថាបាត់»។
អ្នកភូមិព្រែកតាគង់១ ជិត ១០០នាក់ បានប្រមូលផ្ដុំគ្នានៅផ្ទះលោកមេភូមិ ចាប់តាំងពីម៉ោង ២រសៀល រហូតដល់ម៉ោង ៥ល្ងាចថ្ងៃដដែល ដើម្បីទាមទារយកក្រដាសស្នាមមេដៃរបស់ពួកគាត់ដែលធ្វើបញ្ជាក់អំពីកម្មសិទ្ធិដីធ្លីរបស់ពួកគាត់កាន់កាប់សព្វថ្ងៃ សម្រាប់បញ្ជូនទៅក្រសួងដែនដី នគរូបនីយកម្ម និងសំណង់។
តំណាងអ្នកភូមិ គឺលោក អ៊ុំ ណារី មានប្រសាសន៍ថា ក្រដាសដែលប្រមូលស្នាមផ្ដិតមេដៃរបស់ពលរដ្ឋសហគមន៍ព្រែកតាគង់១ គឺធ្វើតាមក្រសួងដែនដី នគរូបនីយកម្ម និងសំណង់ ដើម្បីពន្លឿនការស្នើសុំកាត់ដីរបស់អ្នកសហគមន៍ចេញពីគម្រោងអភិវឌ្ឍន៍របស់ក្រុមហ៊ុន អាយ.អិន.ជី ហូលឌីង (ING Holding) និងលុបអនុក្រឹត្យអាងស្តុកទឹករបស់រាជរដ្ឋាភិបាល លើដីពួកគាត់ ហើយផ្ដល់ប្លង់កម្មសិទ្ធិដីធ្លីដល់ប្រជាពលរដ្ឋ។
លោក អ៊ុំ ណារី៖ «ក្រសួងដែនដីគាត់ឲ្យខ្ញុំដើរផ្ដិត (មេដៃ) ដើម្បីយកឯកសារនេះយកទៅដាក់នៅសាលារាជធានីភ្នំពេញ និងស្នើដល់រាជរដ្ឋាភិបាល ហើយឯកសារដែលខ្ញុំផ្ដិតនេះ ដាក់ថា បញ្ជីឈ្មោះរបស់ប្រជាពលរដ្ឋសហគមន៍ព្រែកតាគង់១ ស្នើសុំកាត់ដីប្រជាពលរដ្ឋចេញគម្រោងអភិវឌ្ឍន៍ អាយ.អិន.ជី និងលុបអនុក្រឹត្យអាងស្តុកទឹករបស់រាជរដ្ឋាភិបាល ព្រមទាំងស្នើប្លង់កម្មសិទ្ធិដល់ប្រជាពលរដ្ឋ។ អាហ្នឹងពួកខ្ញុំដើរធ្វើ ហើយក្រសួងនឹងបង្កើតគណៈកម្មការមួយ ដើម្បីដោះស្រាយជូនប្រជាពលរដ្ឋ ហើយដោយសារតែពួកខ្ញុំរស់នៅទីនេះយូរហើយ ពួកខ្ញុំចង់អភិវឌ្ឍន៍នៅនឹងកន្លែង»។
ក្រដាសស្នាមផ្ដិតមេដៃ ត្រូវបានអាជ្ញាធរសង្កាត់ចាក់អង្រែលើ ដកហូត កាលពីយប់ថ្ងៃទី៩ ខែកុម្ភៈ ហើយឃាត់ខ្លួនបុគ្គលិកអង្គការម្នាក់ និងប្រជាពលរដ្ឋម្នាក់ យកទៅសាកសួរជិត ៣ម៉ោង ពេលដើរប្រមូលស្នាមមេដៃពីអ្នកភូមិ។ អាជ្ញាធរថា ធ្វើខុសម៉ោងរដ្ឋបាល ដែលមិនបានឲ្យអាជ្ញាធរដឹង ប៉ុន្តែលោក អ៊ុំ ណារី ថា ការធ្វើពេលយប់ ព្រោះអ្នកភូមិវិលមកពីធ្វើការងារវិញ។
ទោះយ៉ាងនេះក្ដី មេភូមិព្រែកតាគង់១ លោក ឡុង ហឿន ចង់ឲ្យពលរដ្ឋប្រាប់អាជ្ញាធរដឹងមុន។ ប៉ុន្តែករណីនេះ លោកឲ្យអ្នកភូមិទាក់ទងទៅក្រសួងដែនដី នគរូបនីយកម្ម និងសំណង់។ ពេលទទួលបានក្រដាសស្នាមមេដៃនេះវិញ អ្នកភូមិគ្រោងដាក់ស្នាមមេដៃនេះទៅក្រសួងដែនដី នគរូបនីយកម្ម និងសំណង់ នៅថ្ងៃច័ន្ទ ទី២០ កុម្ភៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។