មន្ត្រីយោធិនពិការនៅស្រុកម៉ាឡៃ ខេត្តបន្ទាយមានជ័យ ចំនួន ៧៤គ្រួសារដែលមានទំនាស់ដីធ្លីជាមួយក្រុមហ៊ុន ហៃ សួគ៍ ព្រួយបារម្ភខ្លាចអាជ្ញាធរសន្យាខ្យល់ជាមួយពួកគាត់ តែមិនបានដោះស្រាយ។ ការលើកឡើងនេះដោយសារតែមន្ត្រីយោធិនពិការទន្ទឹងរង់ចាំឲ្យអាជ្ញាធរដោះស្រាយដីជូនពួកគាត់អស់ជាច្រើនខែ ហើយមិនមានដំណោះស្រាយ។ រីឯអាជ្ញាធរខេត្តអះអាងថា កំពុងពន្លឿនដោះស្រាយលើរឿងនេះ។
មន្ត្រីយោធិនពិការនៅស្រុកម៉ាឡៃ ទទូចឲ្យអាជ្ញាធរខេត្តបន្ទាយមានជ័យ ជួយដោះស្រាយទំនាស់ដីជូនពួកគាត់ឲ្យបានឆាប់ ហើយកុំសន្យាខ្យល់ដូចពេលមុនៗទៀត ព្រោះការអូសបន្លាយពេលដោះស្រាយបានប៉ះពាល់ដល់ការរកប្រាក់ចំណូលរបស់ពួកគាត់។
តំណាងមន្ត្រីយោធិនពិការនៅឃុំទួលពង្រ ស្រុកម៉ាឡៃ ម្នាក់លោក គង់ សំអាត ប្រាប់អាស៊ីសេរីឲ្យដឹងនៅថ្ងៃទី១៨ ធ្នូ ថា ពួកគាត់ទន្ទឹងរង់ចាំឲ្យអាជ្ញាធរដោះស្រាយ និងបែងចែកដីទំនាស់ដែលព្រមព្រៀងគ្នាជាមួយក្រុមហ៊ុន ហៃ សួគ៍ ដើម្បីយកទៅដាំដុះកុំឲ្យមានបញ្ហាដូចសព្វថ្ងៃទៀត ប៉ុន្តែតាំងពីខែកញ្ញាមក អាជ្ញាធរពាក់ព័ន្ធបានត្រឹមសន្យាសម្របសម្រួលជាមួយពួកគាត់ជាច្រើនដង ដោយមិនមានដំណោះស្រាយឲ្យចេញជារូបរាងនៅឡើយ។ មន្ត្រីយោធិនពិការរូបនេះ អះអាងទៀតថា ពួកគាត់ទាំង៧៤គ្រួសារគ្មានរំពឹងអ្វីក្រៅអំពីដីទំនាស់នេះ ដើម្បីយកដាំដុះដោះស្រាយជីវភាពគ្រួសារនៅជីវិតចុងក្រោយនោះទេ៖ «បាទវាប៉ះពាល់សតិអារម្មណ៍ខាងមន្ត្រីយោធិនដែរ ព្រោះគាត់ថាដោះស្រាយឲ្យតែមិនឃើញដោះសោះ ដូច្នេះវិបត្តិផ្លូវចិត្តខ្លាចខាងលើកុហកពួកខ្ញុំទៀតក៏មិន ព្រោះតាំងពី ៥ហិកតារមួយគ្រួសារ មិនព្រមធ្លាក់មកនៅមួយហិកតារកន្លះហើយនៅមិនឃើញធ្វើផ្លូវធ្វើសាលារៀនដើម្បីរៀបចំមានចរន្តអគ្គិសនីត្រឹមត្រូវ មិនទាន់បាននៅឡើយទេ»។
ឆ្លើយតបនឹងបញ្ហានេះអភិបាលរងខេត្តបន្ទាយមានជ័យលោក លី សារី មានប្រសាសន៍ប្រាប់អាស៊ីសេរីថា អាជ្ញាធរកំពុងតែពន្លឿននីតិវិធីដើម្បីដោះស្រាយបញ្ចប់រឿងនេះជូនពួកគាត់ហើយ។លោកបន្ថែមទៀតថា មូលហេតុដែលយឺតយ៉ាវដោយសារមន្ត្រីជំនាញជាប់រវល់ចុះស្រង់ស្ថិតិមន្ត្រីយោធិនពិការដែលមានទំនាស់ដីធ្លីពិតប្រាកដមិនទាន់ចាប់នៅឡើយ៖ «ចុះបញ្ជីឲ្យបានត្រឹមត្រូវខ្លាច៧៤ហើយ ឡើង៧៤ទៀត ដូច្នេះធ្វើឲ្យត្រឹមត្រូវដើម្បីកុំឲ្យមានជនដទៃ ឬមានអ្នកក្លែងបន្លំអ្នកតំណាងនោះ។ ហើយការងារនេះជិតចប់ហើយ យើងក៏កំពុងតែឲ្យខាងសុរិយោដីរៀបចំប្លង់ដើម្បីយើងរៀបចំគូសឲ្យចាប់ដីឡូត៍ឲ្យពួកគាត់។ ហើយក្នុងនោះឲ្យធ្វើកិច្ចនោះហើយយើងធ្វើផ្លូវក្រាលគ្រួសក្រហមនិងគិតគូរទីតាំងសម្រាប់ធ្វើសាលារៀនទៀត»។
តំណាងយោធិនពិការ លោក គង់ សំអាត អះអាងថា ដីទំនាស់នោះជាដីរបបរបស់ពួកគាត់ ដែលរដ្ឋាភិបាលបានចែកជូនឲ្យអតីតខ្មែរក្រហមផ្ដាច់ខ្លួនកាលពីឆ្នាំ១៩៩៧ ដើម្បីយកទៅបង្កបង្កើនផលដោះស្រាយជីវភាពប្រចាំថ្ងៃ។ លោកថា មន្ត្រីយោធិនពិការចំនួន៧៤គ្រួសារ ត្រូវបានមេបញ្ជាការរបស់ពួកគាត់ជួលយកទៅធ្វើកសិកម្មមួយរយៈកាលពីសម័យនោះ ដោយសារកាលណោះផ្លូវលំបាកហើយពួកគាត់គ្មានលទ្ធភាពឈូសឆាយដោយខ្លួនឯង លុះដល់ឆ្នាំ២០១៣ ពួកគាត់ក៏បានចូលទៅដាំនៅលើដីនោះឡើងវិញ រហូតមកទល់សព្វថ្ងៃ។ លោកថា ផ្ទៃទំនាស់សរុប៦០០ហិកតារ មេៗរបស់ពួកគាត់បានយកដីនោះទៅលក់ឲ្យក្រុមហ៊ុន ហៃ សួគ៍ និងលក់ឲ្យប្រជាពលរដ្ឋចំនួន ១៤គ្រួសារ ប៉ុន្តែពួកគាត់បានប្ដឹងតវ៉ាតាំងពីថ្នាក់ខេត្តរហូតដល់ថ្នាក់ជាតិ ដើម្បីទាមទារយកនោះមកវិញ តែអាជ្ញាធរមិនបានដោះស្រាយជូនពួកគាត់។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា លើកឡើងថា មន្ត្រីយោធិនទាំងនោះរងគ្រោះដោយសារតែដីរបស់ខ្លួន។ លោកបន្ថែមទៀតថា រឿងនេះប្រសិនបើអាជ្ញាធរខេត្តចង់ដោះស្រាយគឺអាចដោះស្រាយបញ្ចប់តាំងពីយូរណាស់ហើយ មិនអូសបន្លាយមកទល់សព្វថ្ងៃដូច្នេះទេ ប៉ុន្តែដោយសារអាជ្ញាធរពាក់ព័ន្ធមិនមានចេតនាដោះស្រាយ៖ «ហើយយើងឃើញការសន្យារបស់មន្ត្រីមួយចំនួននឹងមកលើពួកគាត់សន្យាពេកហើយ រហូតដល់ធ្វើឲ្យពួកគាត់ក្រអស់លុយកាក់ ដោយសារតែដីរបស់ពួកគាត់នឹងដែរ អាជ្ញាធរបើចង់ដោះស្រាយមិនបានទេគ្រាន់តែចុះគិតទៅមិនស្អីទេ ប៉ុន្តែអាជ្ញាធរយកអាភាពស្មុគនិងស្មាញមក ហើយទីនឹងមិនដោះស្រាយ បែរជាលាបពណ៌ថាបក្សនេះបក្សនោះទៅ ដើម្បីឲ្យផុតពីការទទួលខុសត្រូវ ប៉ុន្តែទីបំផុតនៅតែទទួលខុសត្រូវដដែលនឹង»។
កន្លងមកមន្ត្រីយោធិនពិការបានព្រមព្រៀងជាមួយក្រុមហ៊ុន ហៃ សួគ៌ ដោយមានអាជ្ញាធរខេត្តធ្វើជាអាជ្ញាកណ្ដាលក្នុងជួបដោះស្រាយនៅសាលាឃុំទួលពង្រ កាលពីព្រឹកថ្ងៃទី១៧ កញ្ញា ឆ្នាំ២០១៨ នេះ ។ មន្ត្រីយោធិនអះអាងថា កាលណោះអាជ្ញាធរបានបង្ខំឲ្យពួកគាត់យកដីស្រែមួយហិកតារកន្លះ និងដីលំនៅឋាន ៣០ម៉ែត្រ គុណនឹង៥០ម៉ែត្រក្នុងមួយគ្រួសារ ដើម្បីបញ្ចប់សំណុំរឿងនេះ។ ពួកគាត់ព្រមទទួលដោយសារគ្មានជម្រើស ព្រោះអាជ្ញាធរបានគំរាមថា នឹងរុះរើផ្ទះរបស់ពួកគាត់ចេញពីដីជម្លោះ បើសិនជាពួកគាត់មិនព្រមទទួលយកការដោះស្រាយនោះ។ តំណាងយោធិនពិការ លោក គង់ សំអាត អះអាងថា ប្រសិនបើអាជ្ញាធរមិនដោះស្រាយទេ ពួកគាត់ក៏មិនព្រមចុះចេញពីដីនោះដែរ ហើយនឹងប្រមូលគ្នាតស៊ូមតិដើម្បីរកដំណោះស្រាយបន្តទៀត៕