តុលាការ​ខេត្ត​ព្រះសីហនុ សម្រេច​ឲ្យ​ពលរដ្ឋ ១១គ្រួសារ​ចាញ់​ក្ដី​អ្នក​មាន​ទ្រព្យ​ម្នាក់ រឿង​វិវាទ​ដីធ្លី

ដោយ វ៉ែន សុមេធ
2019.05.03
បញ្ហាដីធ្លី អូរត្រេះ ព្រះសីហនុ 042919 ពលរដ្ឋ​ដែល​មាន​បញ្ហា​ដី​ធ្លី​នៅ​សហគមន៍​អូរ​ខ្សាច់​ស្ថិត​ក្នុង​ភូមិ៤ ឃុំ​អូរ​ត្រេះ ស្រុក​ស្ទឹង​ហាវ ខេត្ត​ព្រះសីហនុ ទាមទារ​រក​យុត្តិធម៌ កាល​ពី​ថ្ងៃ​ទី២៩ ខែ​មេសា ឆ្នាំ២០១៩។
រូប៖ ហ្វេសប៊ុក Nhel Pheap

សាលា​ដំបូង​ខេត្ត​ព្រះសីហនុ សម្រេច​ឲ្យ​ពលរដ្ឋ ១១គ្រួសារ​ចាញ់​ក្ដី​អ្នក​មាន​ទ្រព្យ​ម្នាក់​ លើ​វិវាទ​ដីធ្លី​មួយ​កន្លែង​ស្ថិត​ក្នុង​ ភូមិ៤ ឃុំ​អូរត្រេះ ស្រុក​ស្ទឹងហាវ ដោយ​តម្កល់​ទុក​ដីកា​រក្សា​ការ​ពារ​ដែល​តុលាការ​ខេត្ត​នេះ បាន​ចេញ​ឲ្យ​បុគ្គល​នោះ​កាល​ពី​ពេល​កន្លង​មក ទុក​ជា​បាន​ការ​ដដែល។ ​ក្រុម​ប្រជា​ពលរដ្ឋ​ ហៅ​ការ​សម្រេច​នេះ​ថា ជា​រឿង​អយុត្តិធម៌ ​ហើយ​មិន​អាច​ទទួល​យក​បាន​។ ពួក​​គាត់​នឹង​បន្ត​រឿង​ក្ដី​ទៅ​​សាលា​ឧទ្ធរណ៍ ហើយ​រក​កិច្ច​អន្តរាគមន៍​ពី​ក្រសួង​ពាក់ព័ន្ធ​នៅ​រាជធានី​ភ្នំពេញ។

តំណាង​ប្រជា​ពលរដ្ឋ​លោក យូ វាសនា លើកឡើង​ថា ការ​សម្រេច​របស់​លោក​ចៅក្រម ជា​ សុខហៀង គឺ​មាន​ភាព​ខ្វះ​ចន្លោះ​ ដោយ​មិន​បាន​ពិនិត្យ​មើល​ឯកសារ​កាន់កាប់​ដី​របស់​ពលរដ្ឋ​កាល​ពី​ឆ្នាំ​២០០៦ ដែល​ទទួល​ស្គាល់​ដោយ​អាជ្ញាធរ​មូលដ្ឋាន ​នោះ​ទេ។ ផ្ទុយ​ទៅ​វិញ ចៅក្រម ជា សុខហៀង ​បែរ​ជា​ផ្អែក​ត្រឹម​តែ​លិខិត​ផ្ទេរ​សិទ្ធិ​ទិញ​លក់​ដី​របស់​លោកស្រី ជា សុខ​ឡេង កាល​ពី​ឆ្នាំ​២០០៨ ដែល​ទិញ​ពី​ឈ្មោះ​ ជួន នី និង​​ឈ្មោះ​ លី សុខា ទៅ​វិញ។

លោក យូ វាសនា យល់ថា​ ប្រសិន​បើ​តុលាការ ងាក​មក​ពិនិត្យ​មើល​ឯកសារ​ពួកគាត់​ដែល​រស់​នៅ​លើ​ទី​តាំង​ដី​ជិត ​២០​ឆ្នាំ​មក​នេះ ហើយ​ឈរ​លើ​គោលការណ៍​យុត្តិធម៌​ពិតប្រាកដ ការ​សម្រេច​បែប​នេះ ក៏​មិន​មាន​ដែរ។ តំណាង​ពលរដ្ឋ​រូប​នេះ ហៅ​សេចក្ដី​សម្រេច​នេះ​ថា ​ជា​​រឿង​អយុត្តិធម៌​ចំពោះ​ពលរដ្ឋ​ ១១​គ្រួសារ ហើយ​រឹត​តែ​ធ្វើ​ឲ្យ​ពួកគាត់​រក្សា​ជំហរ​បន្ត​ការ​តវ៉ា រក​ដំណោះស្រាយ​លើ​រឿង​នេះ​តទៅ​ទៀត៖ «ជួន​ នី ហើយ​និង លី​ សុខា ពីរ​នាក់​ប្ដី​ប្រពន្ធ​ហ្នឹង គឺ​ជា​កម្មករ​មាន​ឈ្មោះ​នៅ​ក្នុង​បញ្ជី​កម្មករ​របស់​ពួក​យើង​ខ្ញុំ។ ហេតុ​ដូច្នេះ​ មិន​បាន​មើល​ទៅ​លើ​ឯកសារ​យើង​ទេ។ បើ​សិន​ជា​តុលាការ​មាន​យុត្តិធម៌​និង​ឯករាជ​ពិត​មែន ខ្ញុំ​ជឿ​ថា គ្រាន់​តែ​ឯកសារ​របស់​ពួក​ខ្ញុំ​ប៉ុណ្ណឹង ហើយ​ឃើញ​ឯកសារ​ពួក​ខ្ញុំ​ ដោយ​សុចរិត​ប៉ុណ្ណឹង​ គឺ​យើង​ឈ្នះ​រឿង​ក្ដី​ហ្នឹង​បាត់​ទៅ​ហើយ។ នេះ​សំណូមពរ​ដល់​ប្រមុខ​រដ្ឋាភិបាល ដែល​គាត់​ស្រែក​ហើយ​ស្រែក​ទៀត​ថា​ កែ​ប្រព័ន្ធ​តុលាការ​ តែ​បែរ​ជា​មន្ត្រី​នៅ​ថ្នាក់​ក្រោម​ឱវាទ​របស់​លោក បែរ​ជា​ជាន់​ឈ្លី​នូវ​ប្រសាសន៍​របស់​គាត់»

លោក យូ វាសនា បញ្ជាក់​ថា អាជ្ញាធរ​​ឃុំ​អូរត្រេះ ​បាន​ចេញ​ចំណារ​មួយ​មិន​ទទួល​ស្គាល់​ដី​ដែល​លោកស្រី ជា សុខឡេង កាន់​កាប់​នោះ​ទេ ព្រោះ​​​ជា​ដី​ខុស​ទី​តាំង។ អាស៊ី​សេរី​ ព្យាយាម​សុំ​ការ​បញ្ជាក់​បន្ថែម​រឿង​នេះ ពី​មេឃុំ​​អូរត្រេះ លោក ហាក់ ម៉េង តាម​ទូរស័ព្ទ​ជាច្រើន​ដង​តែ​ គ្មាន​អ្នក​ទទួល។

ចំណែក​លោកស្រី ជា សុខឡេង ដែល​មាន​ទំនាស់​ដីធ្លី​ជាមួយ​ពលរដ្ឋ​ អះអាង​ប្រាប់​អាស៊ី​សេរី​ថា ដី​ដែល​គាត់​កាន់​កាប់​នោះ គឺ​មាន​ប្លង់​កម្មសិទ្ធិ​ត្រឹម​ត្រូវ​ ហើយ​ទទួលស្គាល់​ពី​មន្ត្រី​សុរិយោដី​ថ្នាក់​ស្រុក​ និង​ខេត្ត។ លោកស្រី ជា​ សុខឡេង ដែល​ជា​អ្នក​រស់​នៅ​ក្រុង​ភ្នំពេញ បញ្ជាក់​ថា លោក​ស្រី​ទិញ​ដី​នោះ​ពី​ឈ្មោះ ជួន នី និង​ លី សុខា​ កាល​ពី​ឆ្នាំ​២០០៨ ​ក្នុង​​តម្លៃ​​ជាង ​១ម៉ឺន​​ដុល្លារ នូវ​​ទំហំ​​ជាង​ ១ម៉ឺន​​៤​ពាន់​​ម៉ែត្រ​​ការ៉េ។ ក្នុង​ពេល​ជាង ១០ឆ្នាំ​មកនេះ លោកស្រី ជា សុខឡេង ថា គាត់​​បាន​​ធ្វើ​​ចម្ការ​​លើ​​ដី​នោះ មាន​ដាំ​ដើម​ប្រេង​ខ្យល់ រហូត​មក​ដល់​ពាក់​កណ្ដាល​ឆ្នាំ​២០១៨ ​ស្រាប់​តែ​មាន​ពលរដ្ឋ​អះអាង​ថា​ នោះ​ជា​ដី​របស់​ពួក​គេ​ទៅ​វិញ៖ «ព្រោះ​មុន​នឹង​ទិញ​ហ្នឹង​ ខ្ញុំ​ទៅ​សុរិយោដី​សួរ ឥឡូវ​ខ្ញុំ​ចង់​ទិញ​ដី​កន្លែង​ហ្នឹង ប៉ុន្តែ​ជួយ​ឆែក​មើល​មើល៍​ដី​របស់​ ជួន នី​ ហ្នឹង​មាន​ជាន់​ប្លង់​លើ​បុគ្គល​ណា​អត់។ គេ​ថា ​អត់​មាន​ជាន់​ទេ។ គេ​ឆែក​មើល​ឲ្យ​ខ្ញុំ​ដែរ គេ​ថា​ អត់​អី​ទេ​ដី​ហ្នឹង ទិញ​បាន។ អ៊ីចឹង!​ បាន​ខ្ញុំ​ទិញ មិន​ចេះ​តែ​យក​លុយ​ទៅ​ទិញ​ទេ»

មន្ត្រី​ឃ្លាំ​មើល​សិទ្ធិមនុស្ស​នៃ​អង្គការ លីកាដូ ប្រចាំ​ខេត្ត​ព្រះសីហនុ លោក ស្រេង វណ្ណលី យល់​ថា មុន​ពេល​ចៅក្រម​ចេញ​ដីកា​សម្រេច​ណាមួយ តុលាការ​គួរ​កោះហៅ​អាជ្ញាធរ​មូលដ្ឋាន​មក​សួរ​នាំ​អំពី​រឿង​នោះ​ឲ្យ​បាន​ច្បាស់លាស់​ និង​ពិនិត្យ​មើល​ឯកសារ​របស់​ភាគី​ទាំង​សង​ខាង ដោយ​ផ្អែក​ទៅ​តាម​ផ្លូវ​ច្បាប់។ លោក ស្រេង វណ្ណលី បន្ត​ថា បើ​តុលាការ​ផ្អែក​លើ​ចំណុច​ខាង​លើ​នេះ នោះ​ការ​ចេញដីកា​សម្រេច​ នឹង​ធ្វើ​ឲ្យ​ភាគី​ទាំង​សង​ខាង​ទទួល​យក​​បាន​ ហើយ​អាច​ឈាន​ដល់​ការ​បញ្ចប់​ជម្លោះ​បាន​ថែម​ទៀត​ផង៖ «នៅ​ពេល​ដែល​ខ្ញុំ​ចុះ​ទៅ​មើល​ហ្នឹង ឃើញ​មាន​ប្រជា​ពលរដ្ឋ​រស់​នៅ​លើ​ទីតាំង​ហ្នឹង​ពិត​មែន។ ដោយ​ឡែក​មាន​ការ​ចុះ​ទៅ​ពិនិត្យ​របស់​អភិបាល​រង​ស្រុក​កន្លង​មក​ហ្នឹង ក៏​មាន​ការ​បញ្ជាក់​ពី​មេឃុំ​នៅ​ទីតាំង​នោះ ដី​នោះ​មិន​ស្ថិត​នៅ​លើ​ដី​ទំនាស់​ដែល​គាត់​បាន​ប្ដឹង​នោះ​ទេ។ អ៊ីចឹង​ហើយ បាន​ជា​ខ្ញុំ​ស្នើ​សុំ​ឲ្យ​មាន​ការ​កោះ​អញ្ជើញ​អាជ្ញាធរ​ភូមិ​ឃុំ ពី​តុលាការ​ដើម្បី​ឲ្យ​គាត់​បញ្ជាក់​ថា​ដី​ហ្នឹង វា​ពិត​ជា​របស់​ភាគី​ខាង​ណាមួយ​ ហើយ​ឯកសារ​នោះ​ជា​ឯកសារ​ត្រឹម​ត្រូវ​ឬ​យ៉ាង​ណា ដើម្បី​ផ្ដល់​យុត្តិធម៌​ឲ្យ​ភាគី​ទាំង​សង​ខាង»

ទំនាស់​ដីធ្លី​រវាង​ប្រជា​ពលរដ្ឋ​និង​លោកស្រី ជា សុខឡេង កើត​ឡើង កាល​ពី​ចុង​ខែ​ឧសភា ឆ្នាំ២០១៨ បន្ទាប់​ពី​លោកស្រី​បាន​ប្ដឹង​ទៅ​តុលាការ​ខេត្ត​ព្រះសីហនុ ដោយ​ចោទ​ពលរដ្ឋ ១១គ្រួសារ​ថា ចូល​មក​កាន់​កាប់​ដីធ្លី​គាត់​ដោយ​ខុស​ច្បាប់ ហើយ​តម្រូវ​ឲ្យ​ពលរដ្ឋ​រុះ​រើ​ផ្ទះ​សម្បែង​ចេញ។ ចំណែក​ពលរដ្ឋ​អះអាង​ថា ​ពួក​គាត់​បាន​រស់នៅ​លើ​ទី​តាំង​នោះ តាំង​ពី​ឆ្នាំ១៩៩២ ហើយ​មាន​ប្លង់​កម្មសិទ្ធិ​កាប់​កាន់​ដីធ្លី​ត្រឹម​ត្រូវ​ ដែល​ចេញ​ដោយ​អាជ្ញាធរ​មូលដ្ឋាន​នៅ​ឆ្នាំ២០០៦។

ក្រុម​ប្រជា​ពលរដ្ឋ​ដែល​មាន​ទំនាស់​ដីធ្លី បញ្ជាក់​ជំហរ ពួក​គេ​នឹង​ធ្វើ​ដំណើរ​ទៅ​រាជធានី​ភ្នំពេញ ដើម្បី​ដាក់​ពាក្យ​ប្ដឹង​ទាស់​នៅ​សាលា​ឧទ្ធរណ៍ ហើយ​ស្វែង​រក​កិច្ច​អន្តរាគមន៍​ពី​ក្រសួង​យុត្តិធម៌ និង​អង្គភាព​ប្រឆាំង​អំពើ​ពុក​រលួយ ស្នើសុំ​ពិនិត្យ​សើរើ​ឡើង​វិញ នូវ​សេចក្ដី​សម្រេច​របស់​តុលាការ​ខេត្ត​ព្រះសីហនុ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។