អាជ្ញាធរខេត្តកោះកុង កាលពីម៉ោងប្រហែល ១កន្លះ ថ្ងៃទី១៨ មិថុនា បានចុះទៅឃាត់រថយន្ដមិនឲ្យដឹកពលរដ្ឋមានជម្លោះដីធ្លី ដែលធ្វើដំណើរឡើងមកតវ៉ានៅភ្នំពេញ។ តំណាងសហគមន៍មានជម្លោះដីធ្លីថា ពេលប្រជុំជាមួយអភិបាលរងខេត្តកោះកុង ខាងមន្ត្រីប្រាប់ថា ខាងសាលាខេត្ត ជាអ្នកបញ្ជាឲ្យឃាត់រថយន្ដពួកគាត់ និងបានយករថយន្ដផ្សេង ទៅទទួលពលរដ្ឋទាំងនោះ ដើម្បីមកពិភាក្សាគ្នា នៅសាលាខេត្ត។
ពលរដ្ឋមានជម្លោះដីធ្លី ជាមួយក្រុមហ៊ុនចិន យូញៀន ឌីវីឡុបមែន និងក្រុមហ៊ុនស្ករអំពៅឧកញ្ញ៉ា លីយ៉ុងផាត់ ចំនួន ៤ឃុំ នៅស្រុកគិរីសាគរ និងស្រុកបុទុមសាគរ មានបំណងនាំគ្នាមកដាក់ញ្ញត្តិស្វែងរកកិច្ចអន្ដរាគមន៍ ពីរដ្ឋមន្ត្រីក្រសួងរៀបចំដែនដី ខុទ្ធកាល័យលោកនាយករដ្ឋមន្ត្រីហ៊ុន សែន និងក្រសួងបរិស្ថាន នៅរាជធានីភ្នំពេញ។
ពលរដ្ឋមានជម្លោះដីធ្លីម្នាក់ រស់នៅឃុំព្រែខ្សាច់ ស្រុកគិរីសាគរ លោក វេង ហួត ឲ្យដឹងថា ក្រោយពីឃាត់រថយន្ដពលរដ្ឋឡើងមកភ្នំពេញ សមត្ថកិច្ចបានយករថយន្ដផ្សេងទៀត ទៅដឹកពលរដ្ឋមកចរចារគ្នានៅសាលាខេត្តកោះកុង។ លោក វេង ហួត ថា ពេលប្រជុំគ្នាក្នុងសាលាខេត្ត អភិបាលរងខេត្ត ២នាក់ និងអភិបាលស្រុកគិរីសាគរ បានសន្យាជាមួយពលរដ្ឋថា នឹងចុះទៅដោះស្រាយដល់ទីតាំងផ្ទាល់ នៅថ្ងៃទី២២ មិថុនា និងសំណូមពរឲ្យពលរដ្ឋត្រឡប់ទៅផ្ទះវិញ ដោយកុំព្យាយាមទៅរាជធានីភ្នំពេញ៖ «ធ្លាប់តែជជែកតែរឿងដោះស្រាយទំនាស់ដីធ្លីជាមួយខាង លី យ៉ុងផាត់ និងក្រុមហ៊ុន យូរញៀនអីគេនឹង ខាង លី យ៉ុងផាត់ គាត់បានប្រាប់ពួកខ្ញុំថា ឲ្យពួកខ្ញុំនឹងចុះស្រង់បញ្ជីអីត្រឹមត្រូវអ៊ីចឹងទៅ គាត់នឹងយកបញ្ជីទាំងនោះទៅផ្ទៀងផ្ទាត់ ព្រោះគាត់ខ្លាចមានឈ្មោះខ្លះជាន់គ្នាដោះស្រាយមិនទាន់អស់ពីមុនមក គាត់ខ្លាចយើងដាក់ឈ្មោះឲ្យគាត់ជាន់គ្នា។ អ៊ីចឹងគាត់ក៏សូមឈ្មោះសាថ្មី បន្ទាប់មកក្រុមហ៊ុន យូញៀន គាត់សន្យាថា នឹងដោះស្រាយឲ្យពួកខ្ញុំ នៅថ្ងៃសុក្រខាងមុខនេះដែរ។ ប៉ុន្តែមិនដឹងថាយ៉ាងម៉េចនោះទេ គាត់កុហកពួកខ្ញុំទៀត ឬមួយម៉េចមិនដឹងទេ។ កុហកទៀតហើយមើលទៅ!»។
ពលរដ្ឋមានជម្លោះដីធ្លី ដែលនាំគ្នាឡើងមករាជធានីភ្នំពេញ នៅថ្ងៃទី១៨ មិថុនា មានចំនួន ៣៧នាក់ រស់នៅឃុំចំនួន៤ គឺឃុំកោះស្ដេច ឃុំព្រែកខ្សាច់ ឃុំភ្ញីមាស ស្រុកគិរីសាគរ និងឃុំតានូន នៃស្រុកបទុមសាគរ។
ក្រុមហ៊ុនចិនឈ្មោះ យូញៀន ឌីវីឡុបមិន គ្រុប (Union Development Group) ឬ យូឌីជី (UDG) និងក្រុមហ៊ុនស្ករអំពៅរបស់ឧកញ្ញ៉ា លី យ៉ុងផាត់ សមាជិកព្រឹទ្ធិសភាបក្សកាន់អំណាច តែងរងការចោទពីពលរដ្ឋមានជម្លោះដីធ្លីនៅខេត្តកោះកុងថា តែងបានធ្វើសកម្មភាពជាច្រើន ដើម្បីបណ្ដេញប្រជាពលរដ្ឋចេញពីលំនៅឋាន ដោយឲ្យសំណងមិនសមរម្យទៅពួកគាត់។
ពលរដ្ឋអះអាងថា ជាង១០ឆ្នាំ ដែលមានជម្លោះដីធ្លីនេះ ពួកគាត់ដើរទាមទារតវ៉ាគ្រប់ស្ថាប័នរដ្ឋ រស់ប្រឈមជីវភាពទីទ័ល យ៉ាងវេទនា ហើយម្ដងម្កាលពួកគាត់រងការបង្ក្រាបពីសមត្ថកិច្ច នៅពេលតវ៉ា ទាំងពួកគាត់ជាជនរងគ្រោះដីធ្លី ខណៈម្ចាស់ក្រុមហ៊ុន បានចំណេញប្រាក់យ៉ាងច្រើនពីការវិនិយោគលើដីរបស់ពួកគាត់។
ជាក់ស្ដែង កាលពីថ្ងៃទី៥ ខែកុម្ភៈ ក្រុមហ៊ុនចិនយូឌីជី បានដុតកម្ទេចផ្ទះ និងកាប់បំផ្លាញផលដំណាំនៅតំបន់ថ្មពាន ក្នុងឃុំព្រែកខ្សាច់ ស្រុកគិរីសាគរ។ ក្នុងព្រឹត្តិការណ៍ដុតផ្ទះកាលណោះ ពលរដ្ឋរងគ្រោះអះអាងថា ពួកគាត់គ្មានលទ្ធភាពក្នុងការតតាំងនឹងក្រុមហ៊ុនទេ។ ក្រោយមកពួកគេបានប្ដឹងទៅសាលាដំបូងខេត្តកោះកុង ពីការដុតកម្ទេចផ្ទះរបស់ពួកគេ ប៉ុន្តែ រហូតមកដល់ថ្ងៃនេះ ពលរដ្ឋអះអាងថា នៅមិនទាន់ទទួលបានដំណោះស្រាយបែបណានៅឡើយ។
ក្រុមកិច្ចការពិសេសសិទ្ធិមនុស្ស កាលពីថ្ងៃទី៣០ ខែវិច្ឆិកា ឆ្នាំ២០១៣ បានចេញសេចក្ដីថ្លែងការណ៍ ថា ជម្លោះដីធ្លីនៅខេត្តកោះកុង គឺមានកងកម្លាំងប្រដាប់អាវុធជាអ្នកនៅពីក្រោយ នៃការរំលោភសិទ្ធិមនុស្ស។ អង្គការមិនមែនរដ្ឋាភិបាលដែលឃ្លាំមើលគម្រោងវិនិយោគ និងធុរកិច្ចនៅកម្ពុជា រកឃើញថា កងកម្លាំងដែលត្រូវបានក្រុមហ៊ុនឯកជនជួល ជាពិសេសក្រុមហ៊ុនចិន ផ្ដល់កម្រៃពលកម្មក្នុងមួយខែៗ ចន្លោះចាប់ពី ៣០០ ទៅ ៥០០ដុល្លារអាមេរិក។ លើសពីនេះទៀត កត្តាដែលជំរុញឲ្យក្រុមហ៊ុនចិន យូឌីជី នេះមានឥទ្ធិពល ដោយសារតែមានយោធា ជាសម្ព័ន្ធមិត្តដ៏ជិតស្និទ្ធ។ សេចក្ដីថ្លែងការណ៍កាលណោះ ឲ្យដឹងថា មេទាហានម្នាក់ គឺឧត្ដមសេនីយ៍ គន់ គីម និងគូកន បានប្រើអំណាចមកដោះស្រាយទំនាស់ដីធ្លីជាមួយពលរដ្ឋដោយកម្រោល។
អាស៊ីសេរី មិនអាចសុំការបញ្ជាក់បន្ថែមពីមន្ត្រីសាលាខេត្តកោះកុងបានទេ នៅថ្ងៃទី១៨ មិថុនា។ ប៉ុន្ដែកន្លងមក អភិបាលរងខេត្តកោះកុងទទួលបន្ទុកដោះស្រាយជម្លោះដីធ្លី លោក អន ភារៈ ប្រាប់ឲ្យអ្នកយកព័ត៌មានអាស៊ីសេរី ទៅជួបលោកនៅសាលាខេត្ត ទើបព្រមផ្ដល់បទសម្ភាសន៍ឲ្យ។
អ្នកសម្របសម្រួលសមាគមសិទ្ធិមនុស្ស អាដហុក (Adhoc) ប្រចាំខេត្តកោះកុង លោក ព្រហ្ម មុនី យល់ថា ប្រសិនបើអាជ្ញាធរខេត្តកោះកុង ឃាត់ឡានពលរដ្ឋដើម្បីដោះស្រាយជារឿងប្រសើរ ប៉ុន្ដែប្រសិនបើការឃាត់ឡាននេះហើយ ដើម្បីសន្យាយករួចខ្លួន ឬដើម្បីបង្អាក់ដំណើរពលរដ្ឋរងគ្រោះដីធ្លី ជារឿងមិនសមគួរ និងធ្វើឲ្យធ្លាក់ចុះតម្លៃរបស់អាជ្ញាធរខេត្តកោះកុង៖ «បើគាត់សន្យាជាមួយប្រជាពលរដ្ឋហើយមិនដោះ ស្រាយអាហ្នឹងបានជាការមិនឲ្យតម្លៃខ្លួនគាត់ប៉ុន្តែបើគាត់ដោះស្រាយឲ្យពលរដ្ឋអាហ្នឹងបានហៅថា ជាអាជ្ញាធរដែលគិតគូរដល់ពលរដ្ឋ គាត់ជាអ្នកបម្រើប្រជាពលរដ្ឋ យើងមានតែការជំរុញឲ្យគាត់ មានការដោះស្រាយជូនប្រជាពលរដ្ឋ ដោះស្រាយឲ្យពលរដ្ឋឲ្យបានចប់ៗ ទៅកុំឲ្យពួកគាត់មានបញ្ហាបន្តទៅទៀត ចុះបញ្ចីឲ្យពួកគាត់ទៅនេះបានជាលទ្ធិផល»។
ពលរដ្ឋមានជម្លោះដីធ្លីឲ្យដឹងថា គ្នារបស់គាត់ខ្លះ បានធ្វើដំណើរមកដល់រាជធានីភ្នំពេញហើយ និងត្រៀមយកញត្តិដាក់ជូនមន្ត្រីនៅតាមស្ថាប័នថ្នាក់ជាតិ។ តំណាងពលរដ្ឋមានជម្លោះដីធ្លី លោក វេង ហួត ថា ពលរដ្ឋមិនជឿលើការសន្យារបស់អភិបាលរងខេត្តកោះកុង និងអភិបាលស្រុកគិរីសាគរទេ ព្រោះពួកគាត់បានសន្យាជាមួយពលរដ្ឋជាង ១០ឆ្នាំមកនេះ មិនក្រោម ២០ដងទេ។ ប៉ុន្ដែមិនដែលមានដំណោះស្រាយសោះ។ ពលរដ្ឋថា ពួកគាត់នឹងបំបែកគ្នា ដើម្បីឡើងមកដាក់ញត្តិនៅភ្នំពេញឲ្យទាល់តែបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។