សកម្មជនដីធ្លីខេត្តកោះកុង ទាមទារឲ្យអាជ្ញាធរ ឈប់ឃ្លាំមើលសកម្មភាពនៅមុខផ្ទះ
2019.03.05
តំណាងអ្នកភូមិមានបញ្ហាទំនាស់ដីធ្លីមកពីស្រុកស្រែអំបិល ខេត្តកោះកុង អ្នកស្រី ផាវ ញ៉ឺង ផ្ដល់បទសម្ភាសន៍ក្នុងពេលតវ៉ារកដំណោះស្រាយនៅខុទ្ទកាល័យលោកនាយករដ្ឋមន្ត្រី ហ៊ុន សែន នៅព្រឹកថ្ងៃទី១៨ សីហា ឆ្នាំ២០១៧។
RFA/Sorn Chanratha
សកម្មជនដីធ្លី នៅឃុំជីខក្រោម ស្រុកស្រែអំបិល ខេត្តកោះកុង អ្នកស្រី ផាវ ញ៉ឺង ទទូចឲ្យសមត្ថកិច្ចបញ្ឈប់សកម្មភាពឃ្លាំមើលនៅមុខផ្ទះអ្នកស្រី។ អង្គការផ្នែកសិទ្ធិមនុស្សថា ការឃ្លាំមើលបែបនេះ ជាការរំលោភសិទ្ធិពលរដ្ឋធ្ងន់ធ្ងរ។
សកម្មជនដីធ្លី លោកស្រី ផាវ ញ៉ឺង ប្រាប់ថា លោក ស្រី នៅតែបារម្ភពីសុវត្ថិភាពផ្ទាល់ខ្លួន ព្រោះសមត្ថកិច្ចមិនព្រមបញ្ឈប់សកម្មភាពឃ្លាំមើលអ្នកស្រីសោះ ដោយគាត់អះអាងថា សមត្ថកិច្ចបានដកប៉ុស្តិ៍យាមចេញពីមុខផ្ទះអ្នកស្រីហើយ ប៉ុន្តែរាល់ពេលអ្នកស្រី ធ្វើដំណើរចេញពីផ្ទះទៅណាម្ដងៗ តែងមានសមត្ថកិច្ច ចុះទៅសង្កេត និងរាយការណ៍ទៅថ្នាក់លើ ជាហេតុធ្វើឲ្យមានការបារម្ភពីសុវត្ថិភាព៖ «គេដកចេញតែមួយភ្លែតទេ។ ថ្ងៃនេះ បងមកខេត្តកែប ដើម្បីប្រជុំបណ្ដាញសហគមន៍គ្នា ក៏ឃើញប៉ូលិសនៅឃុំជីខក្រោម ឈ្មោះពូអឿនហ្នឹង ទៅផ្ទះខ្ញុំដែរ។ អ្នកភូមិខលប្រាប់។ អ៊ីចឹង វានៅតែមានការអង្កេតឃ្លាំមើល អ៊ីចឹង»។
អ្នកស្រី ផាវ ញ៉ឺង គឺជាអតីតអ្នកតំណាងរបស់ពលរដ្ឋមានជម្លោះដីធ្លី នៅឃុំជីខក្រោម ដែលមានវិវាទច្រើនឆ្នាំ ជាមួយក្រុមហ៊ុនស្ករអំពៅរបស់ លោក ឧកញ៉ា លី យ៉ុងផាត់ មហាសេដ្ឋី និងជាសមាជិកព្រឹទ្ធិសភាឯកបក្សនៃរបបក្រុងភ្នំពេញ។
អ្នកស្រី ផាវ ញ៉ឺង អះអាងថា ការឃ្លាំមើលសកម្មភាពអ្នកស្រីនៅមុខផ្ទះកើតឡើងតាំងពីកំឡុងខែមិថុនា ឆ្នាំ២០១៧ គឺក្រោយពេល រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា សម្រេចដោះស្រាយបញ្ចប់វិវាទដីធ្លីឲ្យពលរដ្ឋនៅឃុំជីខក្រោម។ អ្នកស្រី ផាវ ញ៉ឺង អះអាងទៀតថា តាំងពីនោះមក អាជ្ញាធរមូលដ្ឋាន និងសមត្ថកិច្ចស្រុកស្រែអំបិល បានចុះតាមដានដាក់ប៉ុស្តិ៍ប៉ូលិសឈរជើងប្រចាំការមុខផ្ទះអ្នកស្រីតែម្ដង។ ក្រោយព្រឹត្តិការណ៍បោះឆ្នោត រៀបចំដោយគណបក្ស ប្រជាជនកម្ពុជា ឆ្នាំ២០១៨ រួច សមត្ថកិច្ចបានដកប៉ុស្តិ៍ប្រចាំការចេញ តែនាំបន្តឃ្លាំមើលអ្នកស្រី ផាវ ញ៉ឺង ដដែល។
អាស៊ីសេរី មិនទាន់អាចរកប្រភពសុំការបំភ្លឺពី ប៉ូលិសប៉ុស្តិ៍រដ្ឋបាលឃុំជីខក្រោមបានទេ នៅថ្ងៃទី៤ មីនា ចំណែកមន្ត្រីកងរាជអាវុធហត្ថស្រុកស្រែអំបិល ក៏មិនទាន់អាចទាក់ទងសុំការបញ្ជាក់លើករណីបានដែរ។ ក៏ប៉ុន្តែកន្លងមកមន្ត្រីកងរាជអាវុធហត្ថស្រុកស្រែអំបិលម្នាក់ ឈ្មោះ ស៊ីថា ធ្លាប់ប្រាប់អាស៊ីសេរី កាលពីខែធ្នូ ឆ្នាំ២០១៨ ថា គ្មានការឃ្លាំមើលនៅមុខផ្ទះសកម្មជនដីធ្លី អ្នកស្រី ផាវ ញ៉ឺង ទេ គឺគ្រាន់តែ មានមន្ត្រីធ្លាប់ទៅសួរនាំតាមបញ្ជាថ្នាក់លើប៉ុណ្ណោះ។
អ្នកសម្របសម្រួលសមាគមការពារសិទ្ធិមនុស្ស អាដហុក ប្រចាំខេត្តកោះកុង លោក មាន ព្រហ្មមុនី អះអាងថា កាលពីកំឡុងព្រឹត្តិការណ៍បោះឆ្នោតខែកក្កដា ឆ្នាំ២០១៨ លោកបានចុះទៅអង្កេតផ្ទាល់ និងពិតជាបានឃើញ មានប៉ុស្តិ៍ប៉ូលិសនៅលើផ្លូវមុខផ្ទះ អ្នកស្រី ផាវ ញ៉ឺង នៅភូមិព្រែកជីក ឃុំជីខក្រោមមែន។ ប៉ុន្តែ មួយរយៈចុងក្រោយនេះ លោកមិនទាន់បានចុះទៅឃ្លាំមើលទេ តែលោក ទទួលបានព័ត៌មានពីសាមីខ្លួនថា មានសមត្ថកិច្ចនៅតែឃ្លាំមើល ។ សង្គមស៊ីវិល ស្នើឲ្យបញ្ឈប់សកម្មភាពបែបនេះ ព្រោះនេះជារូបភាពគំរាម និងរំលោភសិទ្ធិរបស់ពលរដ្ឋធ្ងន់ធ្ងរ៖ «បើសិនមានការឃ្លាំមើល សូមបញ្ឈប់ទៅ ព្រោះជាសេរីភាពរបស់គាត់។ គាត់អាចទៅប្រកបមុខរបរ ធ្វើដំណើរទៅទីជិត ទីឆ្ងាយអ្វី ការងាររបស់គាត់។ មនុស្សម្នាក់ៗ គាត់មានសេចក្ដីថ្លៃថ្នូររបស់គាត់ លើកលែងតែគាត់ល្មើសច្បាប់ទេ»។
អ្នកស្រី ផាវ ញ៉ឺង ប្រាប់ថា ទោះទទួលបានសំណងដីធ្លីពីក្រុមហ៊ុនស្ករអំពៅរួចរាល់ ប៉ុន្តែជម្លោះដីភូមិ នៅភូមិព្រែកជីក ជាមួយឧកញ៉ា ឈ្មោះ ហេង ហ៊ុយ ដែលចង់បានដីអ្នកស្រីយកទៅលក់បន្តឲ្យក្រុមហ៊ុនស្ករអំពៅកោះកុង មិនទាន់បញ្ចប់ទាំងស្រុងទេ ព្រោះអាជ្ញាធរមិនទាន់ចេញប័ណ្ណកម្មសិទ្ធិករត្រឹមត្រូវឲ្យអ្នកស្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត