ពលរដ្ឋក្រុម ១៧៥គ្រួសារ ដែលមានទំនាស់ដីធ្លីជាមួយក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ នៅខេត្តកោះកុង ទទូចឲ្យអាជ្ញាធរខេត្តដោះស្រាយបញ្ចប់ទំនាស់រ៉ាំរ៉ៃរបស់ពួកគេនៅមុនពេលបោះឆ្នោត។ សង្គមស៊ីវិលយល់ថា ប្រសិនបើអាជ្ញាធរខិតខំដោះស្រាយបញ្ចប់ទំនាស់នៅមុនពេលបោះឆ្នោត របបក្រុងភ្នំពេញនឹងចំណេញសន្លឹកឆ្នោត ឬទទួលបានការគាំទ្រពីពលរដ្ឋវិញ។
ពលរដ្ឋមានទំនាស់ដីធ្លីចំនួន ១៧៥គ្រួសារឲ្យដឹងថា ពួកគាត់ភាគច្រើនបានបង្ខំចិត្តទទួលយកដីសំណង ដែលអាជ្ញាធរខេត្តវាស់វែងឲ្យបានជាច្រើនគ្រួសារហើយ នៅសល់តិចតួចប៉ុណ្ណោះ។ ពួកគេទាមទារឲ្យអាជ្ញាធរខេត្តកោះកុង ផ្ដល់ដីសំណងសមរម្យ ជាជាងផ្ដល់ដីព្រៃលិចទឹកក្នុងបឹងភក់ សំបូរសត្វឈ្លើង ឬគ្មានផ្លូវចូល។
ពលរដ្ឋដែលមិនទាន់ទទួលយកសំណងម្នាក់ គឺអ្នកស្រី ទូច លឹមហៀង ប្រាប់ថា អាជ្ញាធរខេត្តកោះកុងផ្ដល់ដីមិនសមរម្យឲ្យគ្រួសារអ្នកស្រី គឺជាដីលិចទឹក មិនអាចធ្វើកសិកម្មបាន។ ដូច្នេះ ទើបគ្រួសារអ្នកស្រីសម្រេចចិត្តមិនទទួលយកដីនោះដាច់ខាត។ អ្នកស្រី ទូច លឹមហៀង ចង់បានដីសំណងណា ដែលសមរម្យ អាចធ្វើកសិកម្មចិញ្ចឹមគ្រួសារ មានហេដ្ឋារចនាសម្ព័ន្ធផ្លូវដូចគេ។ អ្នកស្រី បញ្ជាក់ថា ប្រសិនបើគ្រួសារអ្នកស្រី មិនទទួលបានដីសំណងសមរម្យ នៅមុនថ្ងៃបោះឆ្នោតទេ ក្រុមគ្រួសារអ្នកស្រី នឹងមិនទៅបោះឆ្នោតឡើយ៖ «»
ក្រសួងរៀបចំដែនដី នគរូបនីយកម្ម និងសំណង កាលពីដើមខែមិថុនា បានចេញសេចក្តីប្រកាសព័ត៌មានថា ក្រុមការងារជំនាញ នឹងដោះស្រាយបញ្ចប់ទំនាស់ ដីធ្លីជូនប្រជាពលរដ្ឋដែលមានជម្លោះជាមួយក្រុមហ៊ុនស្ករអំពៅនៅស្រុកស្រែអំបិល និងស្រុកបុទុមសាគរ ខេត្តកោះកុង ឲ្យបានរួចរាល់ទាំងស្រុងនៅបំណាច់ខែមិថុនា ឆ្នាំ២០១៨។ ប៉ុន្ដែ ពលរដ្ឋមានជម្លោះដីធ្លី អះអាងថា រហូតដល់ចុងខែកក្កដាហើយ នៅមិនទាន់ទទួលបានដំណោះស្រាយចប់សព្វគ្រប់ទេ ដោយសារតែអាជ្ញាធរបានវាស់វែងដីលិចទឹក ដែលធ្វើកសិកម្មមិនកើត ឲ្យទៅអ្នកភូមិរងគ្រោះដីធ្លី។ ពលរដ្ឋអះអាងថា ដីដែលលិចទឹក សំបូរសត្វឈ្លើង គ្មានផ្លូវចេញចូល ដែលអាជ្ញាធរវាស់ឲ្យនោះ សូម្បីតែក្រុមហ៊ុនក៏មិនអាចដាំអំពៅកើតដែរ។
កាលពីថ្ងៃទី២៨ មិថុនា ពលរដ្ឋជាង ២០០នាក់ មកពីភូមិចំនួន៩ នៃឃុំដងពែង ឃុំជីខលើ ឃុំជីខក្រោម ឃុំកណ្ដោល ស្រុកបទុមសាគរ និងស្រុកស្រែអំបិល ខេត្តកោះកុង បានលើកគ្នាឡើងទៅតវ៉ានៅមុខក្រសួងរៀបចំដែនដី ដើម្បីតវ៉ានឹងការវាស់ដីព្រៃលិចទឹក សងឲ្យពលរដ្ឋ។
តំណាងពលរដ្ឋមានជម្លោះដីធ្លីជាមួយក្រុមហ៊ុនស្ករអំពៅរបស់លោក ឧកញ្ញ៉ា លី យ៉ុងផាត់ គឺអ្នកស្រី ផាវ ញ៉ឹង ឲ្យដឹងថា មកដល់ពេលនេះ ពលរដ្ឋក្រុម ១៧៥គ្រួសារភាគច្រើនត្រូវបង្ខំចិត្តទទួលយកដី ដែលគ្មានហេដ្ឋារចនាសម្ព័ន្ធត្រឹមត្រូវ ដោយសារតែបារម្ភខ្លាចជម្លោះអូសបន្លាយបន្ដទៀត ធ្វើឲ្យអ្នកភូមិខកខានមិនបានចេញទៅប្រកបរបរចិញ្ចឹមជីវិត។ ប៉ុន្ដែនៅសល់គ្រួសារមួយចំនួន មិនទាន់ទទួលយកដីសំណងទេ ដោយសារតែដីសំណងនោះ មិនអាចឲ្យពួកគាត់ប្រកបកសិកម្មចិញ្ចឹមជីវិតបាន៖ «»
អាស៊ីសេរី មិនអាចសុំការបញ្ជាក់ពីអភិបាលរងខេត្តកោះកុង ទទួលបន្ទុកដោះស្រាយទំនាស់ដីធ្លី លោក អន ភារៈ បានទេ នៅថ្ងៃទី២៦ កក្កដា។ ប៉ុន្ដែកន្លងមក លោក អន ភារៈ ប្រាប់ឲ្យអ្នកយកព័ត៌មានអាស៊ីសេរី ទៅជួបលោកនៅសាលាខេត្តកោះកុង ទើបលោកព្រមផ្ដល់បទសម្ភាសន៍ឲ្យ។ ទោះយ៉ាងណា តំណាងពលរដ្ឋមានជម្លោះដីធ្លី ក្រុម ១៧៥គ្រួសារ គឺអ្នកស្រី ផាវ ញ៉ឹង ឲ្យដឹងថា អភិបាលរងខេត្តកោះកុង លោក អន ភារៈ បានសន្យាថា នឹងដាក់គ្រឿងចក្រធ្វើផ្លូវឲ្យពលរដ្ឋ នៅរដូវប្រាំងឆ្នាំក្រោយ។
អ្នកសម្របសម្រួលសមាគមសិទ្ធិមនុស្ស អាដហុក ប្រចាំខេត្តកោះកុង លោក មាន ព្រហ្មមុនី សង្កេតឃើញថា អាជ្ញាធរខេត្តកោះកុង បានខិតខំដោះស្រាយបញ្ហាទំនាស់ក្រុម ១៧៥គ្រួសារនេះ បានជោគជ័យច្រើនហើយ នៅសល់ភាគតិចទៀត គួរតែដោះស្រាយបញ្ចប់ដោយសំណងសមរម្យ ដែលគ្រប់ភាគីទទួលយកបាន៖ «»
តំណាងពលរដ្ឋមានជម្លោះដីធ្លី អ្នកស្រី ផាវ ញ៉ឹង ថា អាជ្ញាធរបានប្រាប់ឲ្យពលរដ្ឋក្រុម ១៧៥គ្រួសារ ធ្វើកិច្ចសន្យាទទួលយកដី និងបញ្ចប់ការតវ៉ាតទៅទៀត។ ទោះយ៉ាងណា អ្នកស្រីថា មកដល់ពេលនេះ ពលរដ្ឋមិនទាន់យល់ព្រមធ្វើកិច្ចសន្យាជាមួយអាជ្ញាធរទេ ដោយត្រូវរង់ចាំ អាជ្ញាធរដោះស្រាយឲ្យចប់សព្វគ្រប់ទាំងអស់គ្នាសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។