ពលរដ្ឋ ១៧៦គ្រួសារ មកពីស្រុក ស្រែអំបិល ខេត្តកោះកុង ភាគច្រើនជាស្រ្តីវ័យចំណាស់ លើកគ្នាមកតវ៉ានៅមុខក្រសួងដែនដី ក្រុងភ្នំពេញ ស្នើសុំទឹកប្រាក់បន្ថែមលើដីធ្លី ដែលរដ្ឋាភិបាលបានដោះស្រាយឲ្យ កាលពីខែកក្កដា ឆ្នាំ២០១៨។ ក៏ប៉ុន្តែសំណើនេះ ត្រូវបានមន្ត្រីតំណាងក្រសួងដែនដីបដិសេធ ដោយលើកហេតុផលថា ក្រសួងគ្មានថវិកាផ្ដល់ជូនពលរដ្ឋតាមការស្នើសុំនោះទេ បន្ទាប់ពីពលរដ្ឋ ២០នាក់ចូលជួបមន្ត្រីក្រសួងដែនដី នៅថ្ងៃទី២០ កញ្ញា។
ពលរដ្ឋទាំងនោះ បានដាក់លិខិតដែល ជូនរដ្ឋមន្ត្រីក្រសួងដែនដី លោក ជា សុផារ៉ា ស្នើសុំជួយដោះស្រាយនូវសំណងជាទឹកប្រាក់ដល់ពួកគាត់ទាំង ១៧៦គ្រួសារ ដែលមួយគ្រួសារចំនួន ៦ពាន់ដុល្លារសហរដ្ឋអាមេរិក ដើម្បីឲ្យពួកគាត់មានលទ្ធភាពធ្វើស្រែចម្ការ និងចិញ្ចឹមគ្រួសារ។
លោកស្រី ពៅ ង៉ែត លើកឡើងថា ពលរដ្ឋរស់នៅឃុំជីខលើ ស្រុកស្រែអំបិល ខេត្តកោះកុង កំពុងជួបជីវភាពភាពលំបាកទ័លក្រ ដោយត្រូវដាក់ប្លង់ដីខ្ចីលុយពីមីក្រូហិរញ្ញវត្ថុ ហើយអ្នកខ្លះជំពាក់រហូតដល់គ្មានលទ្ធភាពនឹងអាចសងវិញបាន ក្រោយពីទទួលបានដី ១ហិកតារកន្លះពីក្រសួងដោះស្រាយឲ្យ៖ «បើសិនជាគាត់អត់ដោះស្រាយឲ្យខ្ញុំនៅតែមានមកអញ្ចឹង ពីព្រោះអីខាងខ្ញុំ មានណាមួយ។ មកនេះ ចងការគេមក ពេលដែលតវ៉ាដីហ្នឹងចងការអង្គការគ្រប់ស្ថាប័នទាំងអស់ ហើយដល់ឥឡូវគេរឹបអូសយកផ្ទះយកដីអស់ហើយ ឲ្យខ្ញុំទៅណាទៀត យកខ្ញុំទៅដាក់គុកដាក់ទៅ ខ្ញុំមកអត់មានប្រឆាំងអីនឹងគាត់ទេ ខ្ញុំមកសុំគាត់ត្រង់ៗ។ ហើយដល់ខ្ញុំអត់លុយបង់ការគេ ខ្ញុំមកសុំក្រសួង ឃើញថាក្រសួងអាណិតឲ្យខ្ញុំខ្លះអីអញ្ចឹង តែគាត់ឆ្លើយថាអត់តែម្ដង»។
កាលពីខែកក្កដា ឆ្នាំ២០១៨ កន្លងទៅ ពលរដ្ឋជាង ១៧៦គ្រួសារ បានទទួលសំណងជាដីធ្លី ដែលគ្រួសារនីមួយៗ ទទួលបានដីទំហំ ១ហិកតារកន្លះ ប៉ុន្តែមិនទទួលបានសំណងបន្ថែមជាទឹកប្រាក់ពីក្រុមហ៊ុន ក្រោយពីបញ្ចប់ជម្លោះដីធ្លីដ៏រ៉ាំរ៉ៃអស់ជាច្រើនឆ្នាំជាមួយក្រុមហ៊ុនកោះកុង ផ្លេនថេហ្សិន អ៊ិនដាស់ស្រ្ទី (Koh Kong Plantation)ស្ថិតនៅឃុំជីខលើ ស្រុកស្រែអំបិល ខេត្តកោះកុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។