ជម្លោះ​ដីធ្លី​រវាង​ក្រុមហ៊ុន​ចិន​និង​ពលរដ្ឋ​ឃុំ​កោះស្ដេច​មិន​ទាន់​មាន​ដំណោះស្រាយ

ដោយ ដែន អយុធ្យា
2015-01-10
Share
ជម្លោះ​ដីធ្លី កោះកុង ៦២០ សកម្មភាព​ជម្លោះ​រវាង​ក្រុមហ៊ុន​ចិន យូញៀន ឌីវីឡុបមែន គ្រុប (Union Development Group Co., Ltd) និង​ប្រជាពលរដ្ឋ​នា​ភូមិ​ព្រែកស្មាច់ ឃុំ​កោះស្ដេច ស្រុក​គីរីសាគរ ខេត្ត​កោះកុង កាល​ពី​ថ្ងៃ​ទី​៧ ខែ​មករា ឆ្នាំ​២០១៥។
Photo Licadho

បញ្ហា​ប្រឈម​មុខ​ដាក់​គ្នា​រវាង​ក្រុមហ៊ុន​ចិន យូញៀន ឌីវីឡុបមែន គ្រុប (Union Development Group Co., Ltd) ជាមួយ​ប្រជាពលរដ្ឋ​ចំនួន ៣០​គ្រួសារ នៅ​តំបន់​ពយ​ជប៉ុន នា​ភូមិ​ព្រែកស្មាច់ ឃុំ​កោះស្ដេច ស្រុក​គីរីសាគរ ខេត្ត​កោះកុង មិន​ទាន់​មាន​អាជ្ញាធរ​ចុះ​ដោះស្រាយ​ទេ។

ប្រជាពលរដ្ឋ​អះអាង​ថា វិវាទ​នេះ​កើត​ឡើង​ដោយសារ​តែ​ក្រុមហ៊ុន​ចិន បាន​ដឹក​ដី​ជិត ២០​ឡាន ចាក់​បិទ​ផ្លូវ​ចេញ​ចូល​ភូមិ​អ្នក​ស្រុក ហើយ​ប្រជាពលរដ្ឋ​ក៏​បាន​បិទ​ផ្លូវ​ចេញ​ចូល​ទៅ​ស្រុក​គីរីសាគរ ឆ្លើយ​តប​ក្រុមហ៊ុន​ចិន យូញៀន វិញ ដើម្បី​ទាមទារ​ឲ្យ​អាជ្ញាធរ​ជួយ​រក​ដំណោះស្រាយ។

មន្ត្រី​សង្គម​ស៊ីវិល ដែល​ឃ្លាំ​មើល​វិវាទ​នេះ​ព្រួយ​បារម្ភ​ថា ខ្លាច​ទំនាស់​នេះ​ឈាន​ដល់​កើត​មាន​អំពើ​ហិង្សា​ធ្ងន់ធ្ងរ និង​ស្នើ​ដល់​អាជ្ញាធរ​មាន​សមត្ថកិច្ច​ពាក់ព័ន្ធ ចុះ​ជួយ​ដោះស្រាយ​ដើម្បី​បញ្ចប់​ជម្លោះ​បិទ​ផ្លូវ​រវាង​ក្រុមហ៊ុន​ចិន យូញៀន និង​ប្រជាពលរដ្ឋ​ឃុំ​កោះស្ដេច ឲ្យ​បាន​ឆាប់​បំផុត។

តំណាង​ប្រជាពលរដ្ឋ​ប្រមាណ ៣០​គ្រួសារ រស់នៅ​ឃុំ​កោះស្ដេច ស្រុក​គីរីសាគរ ខេត្ត​កោះកុង បន្ត​ស្វែងរក​កិច្ច​អន្តរាគមន៍​ពី​អាជ្ញាធរ ពិសេស​លោក​នាយក​រដ្ឋមន្ត្រី ហ៊ុន សែន ឲ្យ​ជួយ​ដោះស្រាយ​កង្វល់​ដែល​ក្រុមហ៊ុន​ចិន យូញៀន ឌីវីឡុបមែន ដែល​បាន​ដឹក​ដី​ចាក់​បិទ​ផ្លូវ​មិន​ឲ្យ​ពលរដ្ឋ​ធ្វើ​ដំណើរ​ចេញ​ចូល​លំនៅឋាន​ជាង ២​សប្ដាហ៍​មក​ហើយ។

តំណាង​ប្រជាពលរដ្ឋ លោក ប្រាក់ ថន បាន​ឲ្យ​ដឹង​នៅ​ថ្ងៃ​សៅរ៍ ទី​១០ ខែ​មករា ថា ផ្លូវ​ដែល​ក្រុមហ៊ុន​ចិន ចាក់​ដី​បិទ​នៅ​ចំណុច​ពយ​ជប៉ុន នេះ គឺ​ពួក​គាត់​ធ្លាប់​ប្រើប្រាស់​ផ្លូវ​នេះ​តាំង​ពី​ដូនតា ឬ​តាំង​ពី​ជំនាន់​សង្គម​រាស្ត្រ​និយម​មក​ម្ល៉េះ។ លោក​បន្ត​ថា រហូត​មក​ដល់​ពេល​នេះ ប្រជាពលរដ្ឋ​នៅ​បន្ត​ប្រមូល​ផ្តុំ​គ្នា​តវ៉ា និង​បិទ​ផ្លូវ​មួយ​កន្លែង​ចូល​ទៅ​ស្រុក​គីរីសាគរ ដើម្បី​ឆ្លើយ​តប​ចំពោះ​ការ​ចាក់​ដី​បិទ​ផ្លូវ​ចូល​ភូមិ​អ្នក​ស្រុក​របស់​ក្រុមហ៊ុន​ចិន និង​ដើម្បី​រង់ចាំ​ឲ្យ​អាជ្ញាធរ​ចុះ​មក​ដោះស្រាយ៖ «មាន​ការ​ប្តឹងផ្តល់​ប្រជាពលរដ្ឋ បន្ទាប់​ពី​បាន​ប៉ះ​ទង្គិច​គ្នា​ជាមួយ​កង​សន្តិសុខ​ក្រុមហ៊ុន​ជាមួយ​ពលរដ្ឋ ហើយ​គេ​ចោទ​ពលរដ្ឋ​គប់​បែក​កញ្ចក់​ឡាន​គេ។ ក្រុមហ៊ុន​ចិន បាន​ប្ដឹង​ទៅ​អាជ្ញាធរ​ស្រុក ហើយ​ស្រុក​កោះ​ពលរដ្ឋ​ឲ្យ​ចូល​ខ្លួន​ទៅ​បំភ្លឺ តែ​ពលរដ្ឋ​មិន​ទៅ​ទេ​នៅ​ថ្ងៃ​សៅរ៍ ទី​១០ ខែ​មករា»

លោក ប្រាក់ ថន ឲ្យ​ដឹង​ថា ទំនាស់​ឈាន​ដល់​ការ​បិទ​ផ្លូវ​ធ្វើ​ដំណើរ ដែល​អូស​បន្លាយ​ពេល ២​សប្តាហ៍​មក​នេះ បាន​ឈាន​ដល់​ផ្ទុះ​អំពើ​ហិង្សា​រវាង​កង​សន្តិសុខ​ក្រុមហ៊ុន​ចិន យូញៀន និង​ប្រជាពលរដ្ឋ​មួយ​ប្រាវ កាល​ពី​ថ្ងៃ​ទី​៧ ខែ​មករា នៅ​គ្រា​ក្រុមហ៊ុន​ចិន ប៉ុនប៉ង​ដឹក​ដី​ចាក់​បិទ​ផ្លូវ​ចូល​ភូមិ​អ្នក​ស្រុក​បន្ថែម​ទៀត។ លោក ប្រាក់ ថន បន្ត​ថា អំពើ​ហិង្សា​នេះ ក្រុមហ៊ុន​ចិន ក៏​បាន​ដាក់​ពាក្យ​ប្ដឹង​តំណាង​ពលរដ្ឋ ៣​នាក់ ទៅ​កាន់​ប៉ុស្តិ៍​នគរបាល​ឃុំ​កោះស្ដេច ដោយ​ចោទ​ថា​បាន​គប់​បែក​កញ្ចក់​រថយន្ត​ដឹក​ដី​របស់​ក្រុមហ៊ុន ប៉ុន្តែ​ពលរដ្ឋ​មិន​ចូល​ខ្លួន​ទៅ​បំភ្លឺ​ទេ នៅ​ថ្ងៃ​សៅរ៍ ទី​១០ ខែ​មករា។

តំណាង​ពលរដ្ឋ លោក ប្រាក់ ថន បញ្ជាក់​ថា គិត​ចាប់​តាំង​ពី​ថ្ងៃ​ទី​២៦ ខែ​ធ្នូ ឆ្នាំ​២០១៤ រហូត​មក​ដល់​ថ្ងៃ​ទី​១០ ខែ​មករា ឆ្នាំ​២០១៥ គឺ​រយៈពេល ២​សប្ដាហ៍​ហើយ​ដែល​ក្រុមហ៊ុន​ចិន យូញៀន បាន​ដឹក​ដី​ចាក់​បិទ​ផ្លូវ​ចេញ​ចូល​ទៅ​ភូមិ​អ្នក​ស្រុក​នៅ​តំបន់​ពយ​ជប៉ុន ក្នុង​បំណង​បង្ខំ​បណ្ដេញ​ពលរដ្ឋ​ឲ្យ​រុះរើ​លំនៅឋាន​ចេញ​ពី​ទីតាំង​ចាស់​ទៅ​កាន់​ទីតាំង​ថ្មី តាម​មហិច្ឆតា​របស់​ក្រុមហ៊ុន​ចិន។

បុរស​វ័យ​ចាស់​រូប​នេះ​ឲ្យ​ដឹង​ថា ពលរដ្ឋ​ចំនួន ៣០​គ្រួសារ រស់នៅ​ចំណុច​ពយ​ជប៉ុន គឺ​ជា​គ្រួសារ​ចុង​ក្រោយ​ដែល​នៅ​ក្រាញ​ននៀល​តវ៉ា​ពី​ការ​គំរាម​បណ្ដេញ​របស់​អាជ្ញាធរ និង​ក្រុមហ៊ុន​ចិន យូញៀន ឲ្យ​ចាក​ចេញ​ពី​លំនៅឋាន​ធ្លាប់​រស់នៅ​ច្រើន​ជំនាន់ និង​ជា​កេរ​ដំណែល​តាំង​ពី​ដូនតា។ ប្រជាពលរដ្ឋ​បង្ហាញ​កង្វល់​ថា ចាប់​តាំង​ពី​ឆ្នាំ​២០១២ មក​ដល់​ពេល​នេះ ពលរដ្ឋ​ក្នុង​មូលដ្ឋាន​នេះ​បាន​រង​ការ​រំលោភ​បំពាន​ដីធ្លី​ពី​សំណាក់​ក្រុមហ៊ុន​ចិន យូញៀន បាន​ប្រើ​កម្លាំង​សន្តិសុខ​រាប់​សិប​នាក់ ឆ្មក់​លួច​ដុត​បំផ្លាញ​ផ្ទះ និង​ប្រើ​គ្រឿងចក្រ​ឈូស​ឆាយ​ដំណាំ​កសិកម្ម មាន​ខ្នុរ ដូង និង​ស្វាយ ជាដើម ពេល​ពលរដ្ឋ​ចេញ​ទៅ​នេសាទ​សមុទ្រ​ក្នុង​បំណង​ប្លន់​យក​ដី​ក្រោម​រូបភាព ទទួល​បាន​ដី​សម្បទាន​សេដ្ឋកិច្ច​ពី​រដ្ឋាភិបាល។

ប្រជាពលរដ្ឋ​បាន​ឲ្យ​ដឹង​ថា កង្វល់​នេះ​ពួក​គាត់​ធ្លាប់​រាយការណ៍​ជូន​អាជ្ញាធរ​មូលដ្ឋាន​ចាប់​ពី​ថ្នាក់​ឃុំ​ស្រុក​ខេត្ត និង​រហូត​ដល់​អាជ្ញាធរ​ដោះស្រាយ​ទំនាស់​ដីធ្លី​ថ្នាក់​ជាតិ ប៉ុន្តែ​មន្ត្រី​ស្ថាប័ន​ទាំង​នោះ​មិន​បាន​រវល់​អើពើ​ទេ ហើយ​ទំនាស់​បាន​បន្ត​អូស​បន្លាយ​មក​ដល់​ពេល​នេះ។

ផ្ដើម​ពី​បញ្ហា​នេះ ក្រុម​ប្រជាពលរដ្ឋ ៣០​គ្រួសារ នៅ​ឃុំ​កោះស្ដេច បាន​អំពាវនាវ​ដល់​លោក​នាយក​រដ្ឋមន្ត្រី ហ៊ុន សែន ជួយ​ទប់ស្កាត់​សកម្មភាព​របស់​ក្រុមហ៊ុន យូញៀន ដែល​បាន​ចាក់​ដី​បិទ​ផ្លូវ​ចេញ​ចូល​ទៅ​ក្នុង​ភូមិ​ពលរដ្ឋ​នៅ​តំបន់​ពយ​ជប៉ុន ឲ្យ​ពលរដ្ឋ​បាន​ឆ្លង​កាត់​ដូច​ដើម​វិញ។

សកម្មភាព​ក្រុមហ៊ុន​ចិន យូញៀន ឌីវីឡុបមែន គ្រុប (Union Development Group Co., Ltd) ចាក់​ដី​បិទ​ផ្លូវ​ចេញ​ចូល​ភូមិ​របស់​ពលរដ្ឋ​នៅ​ភូមិ​ព្រែកស្មាច់ ឃុំ​កោះស្ដេច ស្រុក​គីរីសាគរ ខេត្ត​កោះកុង កាល​ពី​ថ្ងៃ​ទី​៧ ខែ​មករា ឆ្នាំ​២០១៥។
សកម្មភាព​ក្រុមហ៊ុន​ចិន យូញៀន ឌីវីឡុបមែន គ្រុប (Union Development Group Co., Ltd) ចាក់​ដី​បិទ​ផ្លូវ​ចេញ​ចូល​ភូមិ​របស់​ពលរដ្ឋ​នៅ​ភូមិ​ព្រែកស្មាច់ ឃុំ​កោះស្ដេច ស្រុក​គីរីសាគរ ខេត្ត​កោះកុង កាល​ពី​ថ្ងៃ​ទី​៧ ខែ​មករា ឆ្នាំ​២០១៥។
Photo Licadho

អភិបាល​ស្រុក​គីរីសាគរ លោក ឃឹម ច័ន្ទឌី មិន​គាំទ្រ​សកម្មភាព​បិទ​ផ្លូវ​ប្រឆាំង​នឹង​ក្រុមហ៊ុន​ចិន យូញៀន ទេ ហើយ​បាន​ចោទ​សកម្មភាព​ពលរដ្ឋ ថា​បាន​ប្រឆាំង​នឹង​ផែនការ​អភិវឌ្ឍន៍​របស់​ក្រុមហ៊ុន យូញៀន ដែល​ទទួល​បាន​សិទ្ធិ​វិនិយោគ​ដី​តំបន់​នោះ​ពី​រដ្ឋាភិបាល។

ទាក់ទិន​បញ្ហា​នេះ មន្ត្រី​ការពារ​សិទ្ធិ​មនុស្ស​មួយ​ចំនួន​ប្រចាំ​ខេត្ត​កោះកុង បាន​រិះគន់​សកម្មភាព​របស់​មន្ត្រី​ក្រសួង ឬ​ស្ថាប័ន​ពាក់ព័ន្ធ​មូលដ្ឋាន​របស់​រដ្ឋាភិបាល​ចាប់​ពី​ថ្នាក់​មូលដ្ឋាន​ដល់​ថ្នាក់​ជាតិ ដែល​មិន​បាន​ចុះ​ដោះស្រាយ​វិវាទ​រវាង​ក្រុមហ៊ុន​ចិន យូញៀន ជាមួយ​ប្រជាពលរដ្ឋ​នៅ​ឃុំ​កោះស្ដេច និង​ទុក​ឲ្យ​ទំនាស់​រីក​រាល​ដាល​មក​ដល់​ពេល​នេះ។

លោក អ៊ិន គង់ជិត មន្ត្រី​សម្រប​សម្រួល​អង្គការ​លីកាដូ (Licadho) ខេត្ត​កោះកុង ដែល​បាន​ចុះ​អង្កេត​ផ្ទាល់​ដល់​មូលដ្ឋាន​កើត​មាន​ទំនាស់ ក៏​បាន​ទទូច​ដល់​អាជ្ញាធរ​ពាក់ព័ន្ធ​ចេញ​មុខ​ជួយ​ដោះស្រាយ​ជម្លោះ​រវាង​ប្រជាពលរដ្ឋ​ឃុំ​កោះស្ដេច ជាមួយ​ក្រុមហ៊ុន​ចិន យូញៀន ឲ្យ​បាន​ឆាប់។ លោក​រិះគន់​ថា ស្ថាប័ន​ថ្នាក់​ជាតិ​ដោះស្រាយ​ទំនាស់​ដីធ្លី​របស់​រដ្ឋាភិបាល ដែល​បង្កើត​ឡើង​មក​នេះ គឺ​បង្កើត​ឲ្យ​មាន​តែ​ល្អ​មើល​ទេ ប៉ុន្តែ​ហាក់​មិន​សូវ​មាន​សកម្មភាព​ចុះ​ដោះស្រាយ​ទំនាស់​ដីធ្លី​ជូន​ប្រជាពលរដ្ឋ នៅ​តាម​មូលដ្ឋាន​ឲ្យ​បាន​ទូលំទូលាយ​ទេ៖ «ក្រុមហ៊ុន​ចិន បាន​ដឹក​ដី​មក​ចាក់​បន្ថែម​ទៀត ដែល​ជា​ហេតុ​ធ្វើ​ឲ្យ​បង្កើន​នូវ​ភាព​តានតឹង ហើយ​ពលរដ្ឋ​ក៏​បាន​ប្រមូល​ផ្តុំ​គ្នា​បណ្ដេញ​អ្នក​បើក​រថយន្ត និង​សន្តិសុខ​ក្រុមហ៊ុន​ចិន ឲ្យ​ចេញ​ពី​បរិវេណ​ភូមិដ្ឋាន​របស់​ពួក​គាត់ និង​មាន​ការ​ប៉ះ​ទង្គិច​គ្នា​បន្តិចបន្តួច។ បន្ទាប់​មក​ទៀត ខាង​ភាគី​ក្រុមហ៊ុន​ចិន ក៏​ខឹង​សម្បា រួច​ក៏​ដាក់​ពាក្យ​បណ្ដឹង​ប្ដឹង​ពលរដ្ឋ ៣​នាក់ ទៅ​កាន់​ប៉ុស្តិ៍​ប៉ូលិស​ឃុំ​កោះស្ដេច។ ហើយ​ប៉ូលិស​ក៏​បាន​កោះ​ហៅ​ពលរដ្ឋ​ទៅ​សាកសួរ ប៉ុន្តែ​ពលរដ្ឋ​មិន​ចូល​ខ្លួន​ទៅ​បំភ្លឺ​ទេ​នៅ​ថ្ងៃ​ទី​១០ ខែ​មករា»

យ៉ាង​ណា​ក៏ដោយ មន្ត្រី​អង្គការ​លីកាដូ រូប​នេះ បាន​ស្នើ​ដល់​លោក​នាយក​រដ្ឋមន្ត្រី ហ៊ុន សែន និង​ថ្នាក់​ដឹក​នាំ​ក្រសួង​ពាក់ព័ន្ធ ត្រូវ​ចុះ​ដោះស្រាយ​បញ្ឈប់​សកម្មភាព​ក្រុមហ៊ុន​ចិន យូញៀន ដែល​បាន​ដឹក​ដី​ចាក់​បិទ​ផ្លូវ​ចេញ​ចូល​ទៅ​លំនៅឋាន​ពលរដ្ឋ​នៅ​តំបន់​ពយ​ជប៉ុន ឲ្យ​ពលរដ្ឋ​ប្រើប្រាស់​ផ្លូវ​នេះ​ដូច​ដើម​វិញ។

លោក អ៊ិន គង់ជិត បាន​កត់​សម្គាល់​ថា សកម្មភាព​របស់​ក្រុមហ៊ុន​ចិន យូញៀន ដែល​ធ្វើ​សកម្មភាព​ដុត​ផ្ទះ​ឈូស​ឆាយ​ផល​ដំណាំ​ពលរដ្ឋ និង​ចាក់​ដី​បិទ​ផ្លូវ​ចេញ​ចូល​ភូមិ​នៅ​ឃុំ​កោះស្ដេច ស្រុក​គីរីសាគរ មិន​ខុស​គ្នា​ស្រុក​ទេស​គ្មាន​ច្បាប់​នោះ​ទេ។ ហើយ​ថា ទំនាស់​នេះ​អាច​នឹង​រីក​រាល​ដាល និង​ឈាន​ដល់​មាន​អំពើ​ហិង្សា​ធ្ងន់ធ្ងរ បើ​អាជ្ញាធរ​មិន​ចុះ​សម្រប​សម្រួល​បញ្ចប់​វិវាទ​នេះ​ទេ។

ទាក់ទិន​បញ្ហា​នេះ លោក ប៊ុន លឺត អភិបាល​ខេត្ត​កោះកុង បាន​ឲ្យ​វិទ្យុ​អាស៊ីសេរី ដឹង​នៅ​ថ្ងៃ​សៅរ៍ ទី​១០ ខែ​មករា ថា អាជ្ញាធរ​កំពុង​ផ្សះផ្សា និង​សម្រប​សម្រួល​វិវាទ​រវាង​ក្រុមហ៊ុន​ចិន យូញៀន និង​ប្រជាពលរដ្ឋ​ឃុំ​កោះស្ដេច នេះ​ហើយ។ ប៉ុន្តែ​លោក​ថា ការ​ផ្សះផ្សា​នេះ​នៅ​មិន​ទាន់​ឯកភាព​គ្នា​ទេ ហើយ​កំពុង​បន្ត​រក​ដំណោះស្រាយ​ទៀត៖ «អាជ្ញាធរ​កំពុង​ដោះស្រាយ និង​សម្រប​សម្រួល​គ្នា ដើម្បី​ឈាន​ដល់​បញ្ចប់​ជម្លោះ»

មន្ត្រី​សិទ្ធិ​មនុស្ស​អង្គការ​លីកាដូ ខេត្ត​កោះកុង ឲ្យ​ដឹង​ថា ប្រជាពលរដ្ឋ ៣០​គ្រួសារ​រស់នៅ​ភូមិ​ព្រែកស្មាច់ ឃុំ​កោះស្ដេច ស្រុក​គីរីសាគរ ខេត្ត​កោះកុង ដែល​ក្រាញ​ននៀល​តវ៉ា​ជាមួយ​ក្រុមហ៊ុន​ចិន និង​អាជ្ញាធរ​ពេល​នេះ គឺ​ជា​គ្រួសារ​នៅ​សេសសល់​ចុង​ក្រោយ ដែល​មិន​ព្រម​ចាក​ចេញ​ពី​ភូមិ​កំណើត​ជា​កេរ​ដំណែល​ដូនតា​ធ្លាប់​រស់នៅ​ច្រើន​ជំនាន់ ទៅ​តាម​ការ​គំរាម​កំហែង​របស់​ក្រុមហ៊ុន​ចិន យូញៀន ឌីវីឡុបមែន ដែល​ទទួល​បាន​សិទ្ធិ​វិនិយោគ​តំបន់​នោះ​ពី​រដ្ឋាភិបាល​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល