ពលរដ្ឋនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត អះអាងថា ទីប្រឹក្សាលោក ហេង សំរិននិងបក្សពួក បានបន្តគំរាមកំហែង និងបំផ្លិចបំផ្លាញដំណាំ និងផ្ទះសម្បែងរបស់ពួកគាត់ ដោយគ្មានការជួយអន្តរាគមន៍ពីសំណាក់អាជ្ញាធរមូលដ្ឋាននៅទីនោះឡើយ។ បញ្ហានេះបានរុញច្រានពួកគាត់ ឱ្យបង្ខំចិត្តគេចខ្លួនចេញពីដីដែលធ្លាប់កាន់កាប់ ដើម្បីរកកន្លែងមានសុវត្ថិភាព។ អង្គការសិទ្ធិមនុស្សទទូចឱ្យអាជ្ញាធរខេត្តកំពត ចាត់វិធានការតាមផ្លូវច្បាប់លើក្រុមឈ្មួញដីនោះ ដើម្បីកុំឱ្យពលរដ្ឋត្រូវរស់នៅក្នុងភាពភ័យខ្លាច និងរងគ្រោះដោយសារការធ្វើបាបពីក្រុមជនទាំងនោះ។
ប្រជាពលរដ្ឋភូមិព្រៃពាយ លោកស្រី រី ស្រី ថ្លែងប្រាប់អាស៊ីសេរី ដោយសំឡេងយំខ្សឹកខ្សួលថា កាលពីថ្ងៃទី២១ មេសា កន្លងទៅ ឈ្មួញដី ក្រុមបក្ខពួករបស់លោក អាំ ផល្លីន និងអ្នកស្រី ហ៊ាង គន្ធី ចំនួនជាង ២០នាក់ បាននាំគ្នាទៅកាប់បំផ្លាញផលដំណាំរបស់គាត់ ដែលរួមមាន ស្វាយ ខ្នុរ និងចេកអស់ជាច្រើនដើម ព្រមទាំងវាយបំផ្លាញឡដុតធ្យូង ដែលគាត់ប្រើសម្រាប់ប្រកបរបរចិញ្ចឹមជីវិតថែមទៀត។ ពលរដ្ឋដដែលបន្តថា ក្រុមជនបង្កក៏បានដុតបំផ្លាញផ្ទះស្បូវរបស់គាត់មួយខ្នងទៀត ដែលធ្វើឱ្យគាត់ត្រូវបាត់បង់ទីលំនៅ និងកំពុងព្រួយបារម្ភពីការខ្វះខាតស្បៀងអាហារទៅថ្ងៃមុខ។ «»
លោកស្រី រី ស្រី បញ្ជាក់ថា ក្រុមគ្រួសារ និងសាច់ញាតិរបស់លោកស្រី មានដីនៅតំបន់នោះជាង ២០ ហិកតារ បានមកដោយសារការកាប់រាន។ ។ លោកស្រីអះអាងថា ក្រុមគ្រួសារលោកស្រីបានកាប់កាប់ និងដាំដំណាំនៅលើដីនោះ តាំងតែពីឆ្នាំ ២០០៤ រហូតមក ដោយមិនមានការហាមឃាត់ពីអាជ្ញាធរឡើយ ក៏ប៉ុន្តែមកដល់ឆ្នាំ ២០១៤ ក៏ស្រាប់តែលេចមុខលោក អាំ ផល្លីន និងអ្នកស្រី ហ៊ាង គន្ធី ដែលជាឈ្មួញទិញដីមានលុយ និងមានអំណាច បានទៅដល់តំបន់នោះ និងបានបង្ខំឱ្យលោកស្រី និងពលរដ្ឋដទៃទៀត ឱ្យលក់ដីរបស់ខ្លួន ទៅឱ្យពួកគេក្នុងតម្លៃថោក។ លោកស្រីបានបដិសេធមិនលក់ដីនោះទៅឱ្យពួកគេឡើយ ហើយទំនាស់ដីធ្លីនោះក៏ចាប់ផ្ដើមកើតឡើង ដោយក្រុមឈ្មួញដីទាំងនោះ បានជំរិតយកដីនោះពីលោកស្រីតែម្ដង ដោយបានកាប់បំផ្លាញដើមស្វាយរបស់លោកស្រីអស់ជាង ២០០ដើម និងផ្ទះមួយខ្នងថែមទៀត។ «»
លោកស្រីបញ្ជាក់ថា លោកស្រីបានប្ដឹងករណីបំផ្លិចបំផ្លាញផលដំណាំ និងផ្ទះស្បូវរបស់គាត់នេះ ទៅខាងអាជ្ញាធរឃុំត្រពាំងភ្លាំងរួចហើយ កាលពីថ្ងៃទី២៤ មេសា ហើយខាងអាជ្ញាធរក៏បានចុះទៅពិនិត្យករណីនេះដែរ ក៏ប៉ុន្តែមិនទាន់ឃើញមានការដោះស្រាយរកយុត្តិធម៌ជូនលោកស្រីនៅឡើយទេ។
អាស៊ីសេរីមិនអាចទាក់ទងអាជ្ញាធរឃុំត្រពាំងភ្លាំង បានទេ នៅថ្ងៃទី២៥ មេសា ដើម្បីសុំការបកស្រាយអំពីបញ្ហានេះ។
ករណីទំនាស់ដីធ្លីរវាងពលរដ្ឋភូមិព្រៃពាយ និងក្រុមលោក អាំ ផល្លីន ដែលជាទីប្រឹក្សាផ្ទាល់របស់លោក ហេង សំរិន ប្រធានរដ្ឋសភាបក្សប្រជាជនកម្ពុជានេះ គឺជាទំនាស់ ដ៏រ៉ាំរ៉ៃដែលអូសបន្លាយពេលជាច្រើនឆ្នាំមកហើយ។ ជាញឹកញាប់ ក្រុមលោក អាំ ផល្លីន តែងតែប្រើអំពើហិង្សា ដុតបំផ្លាញផ្ទះសម្បែង និងកាប់បំផ្លាញផលដំណាំពលរដ្ឋ ដោយគ្មានការចេញមុខធ្វើអន្តរាគមន៍ពីសំណាក់អាជ្ញាធរពាក់ព័ន្ធឡើយ បើទោះបីជាក្រុមពលរដ្ឋបានស្វះស្វែងរកអន្តរាគមន៍ទៅក្រុមអាជ្ញាធរ បូករួមទាំងស្ថាប័នតុលាការខេត្តកំពតយ៉ាងណាក្តី។ ផ្ទុយទៅវិញ ពលរដ្ឋមួយចំនួនបែរជារងការប្ដឹងបកពីក្រុមឈ្មួញដីទាំងនោះទៅវិញ ខណៈពួកគាត់គឺជាជនរងគ្រោះនៃអំពើហិង្សានោះ។
លោក ហេង មិត្ត គឺជាពលរដ្ឋភូមិព្រៃពាយ ដែលត្រូវបានក្រុមឈ្មួញដីទាំងនោះ ព្រួតគ្នាវាយដំ និងចាប់ចងបង្ខាំងទុកអស់រយៈពេលជាច្រើនម៉ោង កាលពីអំឡុងឆ្នាំ ២០១៦ កន្លងទៅ។ លោកបានប្តឹងករណីហិង្សានេះទៅតុលាការខេត្តកំពត ក៏ប៉ុន្តែលោកបែរជាត្រូវបានតុលាការកោះហៅទៅបំភ្លឺក្នុងនាមជាជនសង្ស័យក្នុងសំណុំរឿងបរិហារកេរ្តិ៍ ប្ដឹងដោយក្រុមឈ្មួញដី ដែលបានប្រើអំពើហិង្សាលើរូបលោកនោះទៅវិញ។ «»
ករណីមួយទៀត គឺពលរដ្ឋម្នាក់ឈ្មោះ អ៊ឹង លី ដែលមានដីនៅភូមិព្រៃពាយ ត្រូវបានក្រុមលោក អាំ ផល្លីន ប្ដឹងផ្ដល់ទៅតុលាការ ហើយក៏ត្រូវបានសាលាដំបូងខេត្តកំពត ផ្ដន្ទាទោសដាក់ពន្ធនាគាររយៈពេល ១ឆ្នាំ ពីបទក្លែងបន្លំ ខណៈលោក អ៊ឹង លី នេះ ក៏ជាជនរងគ្រោះម្នាក់ដែរ ក្នុងចំណោមជនរងគ្រោះផ្សេងទៀត ដែលត្រូវបានបក្ខពួករបស់ក្រុមឈ្មួញដីទាំងនោះ ប្រើអំពើហិង្សាវាយដំ និងបង្ខំឱ្យចេញពីដីធ្លីរបស់ខ្លួន កាលពីពេលកន្លងទៅ។
ទីប្រឹក្សាផ្ទាល់របស់លោក ហេង សំរិន គឺលោក អាំ ផល្លីន ដែលមានងារជាឯកឧត្ដមផងនោះ ធ្លាប់បានបដិសេធការចោទប្រកាន់របស់ក្រុមពលរដ្ឋ ដោយលោកចាត់ទុកថា នេះជាការលាបពណ៌ និងបង្ខូចកេរ្តិ៍ឈ្មោះរបស់លោក និងភរិយា គឺលោកស្រី ហ៊ាង គន្ធី។
ទោះបីជាយ៉ាងណា មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុក (ADHOC) លោក ប៉ែន បុណ្ណារ៍ អះអាងថា អំពើហិង្សា និងការបំផ្លិចបំផ្លាញផលដំណាំ និងផ្ទះសម្បែងរបស់ពលរដ្ឋភូមិព្រៃពាយនេះ បានកើតឡើងជាហូរហែ ប៉ុន្តែមិនដែលឃើញអាជ្ញាធរមានសមត្ថកិច្ចចាត់វិធានការលើក្រុមជនបង្កទាំងនោះឡើយ។ លោកថានេះ ជាការមិនទទួលខុសត្រូវរបស់មន្ត្រីអាជ្ញាធរលើការបំពេញមុខងាររបស់ខ្លួន ដែលបានធ្វើឱ្យប៉ះពាល់ដល់ការរស់នៅរបស់ប្រជាពលរដ្ឋ។ «»
មន្ត្រីសិទ្ធិមនុស្សរូបនេះ ជំរុញឱ្យមានការអនុវត្តអនុសាសន៍របស់លោកនាយករដ្ឋមន្ត្រី ហ៊ុន សែន អំពីរឿងវះកាត់មន្ត្រីណាដែលមិនបម្រើពលរដ្ឋនោះ ទៅលើអាជ្ញាធរពាក់ព័ន្ធក្នុងសំណុំរឿងទំនាស់ដីធ្លីនៅភូមិព្រៃពាយនេះ។ លើសពីនេះ លោកអះអាងថា លោកនឹងរៀបចំបណ្ដឹងបរិហារផ្លូវការដាក់ទៅស្ថាប័នតុលាការ ដើម្បីប្ដឹងមន្ត្រីនគរបាលយុត្តិធម៌នៅតំបន់នោះ ដែលបណ្ដែតបណ្ដោយឱ្យមានបទល្មើសឧក្រិដ្ឋហិង្សា និងការបំផ្លិចបំផ្លាញទ្រព្យសម្បត្តិសាធារណៈកើតឡើងក្នុងតំបន់របស់ខ្លួន ហើយមិនចាត់ការលើបទល្មើសទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។