ប្រជាពលរដ្ឋ ៣០គ្រួសារនៅខេត្តកំពង់ចាម ដែលរងផលប៉ះពាល់ដោយសារការបោះបង្គោលអគ្គិសនីលើដីស្រែ និងដីលំនៅឋាន របស់ពួកគាត់ បន្តស្នើសុំឲ្យអាជ្ញាធរ ជួយដោះស្រាយនៅមុនការបោះឆ្នោតមកដល់ បើពុំនោះទេ ពួកគាត់ជាមួយសាច់ញាតិទាំងអស់ មិនចេញទៅបោះឆ្នោតឡើយ។ រីឯអាជ្ញាធរខេត្ត មិនបានសន្យាថា ដោះស្រាយបញ្ចប់ពេលណាឡើយ ហើយថា ការមិនទៅបោះឆ្នោតគឺមិនពាក់ព័ន្ធនឹងរឿងដោះស្រាយដីធ្លីនោះទេ។
ប្រជាពលរដ្ឋរស់នៅខេត្តកំពង់ចាម ដែលមានទំនាស់ដីជាមួយអគ្គិសនីកម្ពុជាគំរាមថា នឹងមិនទៅបោះឆ្នោតតាមការអំពាវនាវរបស់គណបក្សកាន់អំណាចនោះទេ ប្រសិនបើ អាជ្ញាធរគ្រប់ជាន់ថ្នាក់មិនជួយពន្លឿនដំណោះស្រាយរកយុត្តិធម៌ជូនពួកគាត់នោះ។
តំណាងពលរដ្ឋរងគ្រោះដីធ្លី និងជាមេក្រុមគណបក្សប្រជាជនកម្ពុជានៅភូមិបឹងស្នាយ សង្កាត់សំបូរមាស ក្រុងកំពង់ចាម អ្នកស្រី មិត្ត គីមថា រៀបរាប់ថា កន្លងមកអាជ្ញាធរចេះតែគំរាមកំហែង និងភូតភរ ប្រជាពលរដ្ឋរហូតក្នុងរឿងជម្លោះដីធ្លីនេះ។ អ្នកស្រីទទូចឲ្យអាជ្ញាធរគ្រប់ជាន់ថ្នាក់ ជួយដោះស្រាយទំនាស់ដីធ្លីជូនពួកគាត់ អោយបានមុនការបោះឆ្នោតជាតិ បើពុំនោះទេ ប្រជាពលរដ្ឋ នឹងមិនទៅបោះឆ្នោតឡើយ។ «»
ទំនាស់ដីធ្លីរវាងពលរដ្ឋ៣០គ្រួសារជាមួយនឹងអាជ្ញាធរអគ្គិសនីកម្ពុជានេះ គឺបានកើតឡើងតាំងពីឆ្នាំ ២០១៥ ស្ថិតនៅក្នុងក្រុងកំពង់ចាម និងស្រុកកំពង់សៀម ខេត្តកំពង់ចាម បន្ទាប់ពីអគ្គិសនីកម្ពុជា បោះបង្គោលធំៗខ្លះចំដីស្រែ និងខ្លះចំដីលំផ្ទះតែម្ដង។ ប្រជាពលរដ្ឋនាំគ្នាសុំកិច្ចអន្តរាគមន៍ពីអាជ្ញាធរមូលដ្ឋាន រហូតដល់អាជ្ញាធរខេត្តតាំងពីឆ្នាំ២០១៦ ប៉ុន្តែបានត្រឹមសន្យាខ្យល់ និងផ្ដល់សំណងផលប៉ះពាល់ជូនពួកគាត់ក្នុងកម្រិតដែលមិនអាចរស់បាន គឺ១ម៉ែត្រការ៉េ តម្លៃជិត២ដុល្លារប៉ុណ្ណោះ។ ពួក គាត់ទាមទារការដោះស្រាយដី ឱ្យបានសមស្របតាមតម្លៃទីផ្សារដី គឺ ១ម៉ែត្រការ៉េ តម្លៃ ៤៥ដុល្លារ។ អ្នកស្រី មិត្ត គីមថា ឲ្យដឹងថា កន្លងមកអាជ្ញាធរអគ្គិសនីកម្ពុជា តែងតែបង្ខិតបង្ខំឲ្យពួកគាត់ទទួលយកសំណងដីជិត ២ដុល្លារក្នុង១ម៉ែត្រការ៉េនោះ ហើយគំរាមថា បើមិនទទួលយកទេ ទោះបីប្ដឹងដល់ណា ក៏មិនបានលទ្ធផលដែរ ព្រោះអគ្គិសនីកម្ពុជានេះ គឺជាប់ពាក់ព័ន្ធជាមួយនឹងកូនលោកនាយករដ្ឋមន្ត្រី ហ៊ុន សែន។
អភិបាលខេត្តកំពង់ចាមលោក គួច ចំរើន មានប្រសាសន៍ថា ទំនាស់ដីធ្លីនេះ កើតឡើងយូរណាស់មកហើយ ហើយគ្រួសារដែលប៉ះពាល់ដោយសារកន្លងអគ្គិសនីនេះ គឺខាងអគ្គិសនីកម្ពុជា បានព្យាយាម ដោះស្រាយជូនប្រជាពលរដ្ឋជាង ១ពាន់គ្រួសារហើយ ពោលគឺនៅសល់តែប្រជាពលរដ្ឋ១១គ្រួសារទៀតប៉ុណ្ណោះ ដែលមិនព្រមទទូលដំណោះស្រាយ តាមគោលនយោបាយដែលកំណត់ដោយអគ្គិសនីកម្ពុជា។ លោកបដិសេធថា មិនមានប្រជាពលរដ្ឋដល់ ៣០គ្រួសារនោះទេ។ លោកគួច ចំរើន បន្ថែមថា ដំណោះស្រាយគោលនយោបាយរបស់អគ្គិសនីកម្ពុជានេះ គឺមានការចូលរួមវាយតម្លៃ ត្រឹមត្រូវពីស្ថាប័នឯករាជ្យ ហើយការដោះស្រាយនេះ គឺមិនអាចដោះស្រាយជូនប្រជាពលរដ្ឋខុសៗ គ្នានោះទេ។ ទន្ទឹមគ្នានេះ លោក គួច ចំរើន ក៏មិនសន្យាថា នឹងដោះស្រាយបញ្ចប់ពេលណានោះទេ ព្រោះអាជ្ញាធរខេត្តគ្រាន់តែមានតួនាទីជួយសម្របសម្រួលប៉ុណ្ណោះ ហើយការព្រមានមិនទៅបោះ ឆ្នោតគឺជារឿងដោយឡែករបស់ប្រជាពលរដ្ឋមិនពាក់ព័ន្ធនឹងរឿងដីធ្លីនោះទេ។ «»
ផ្ទុយពីការលើកឡើងរបស់អភិបាលខេត្តកំពង់ចាមនេះ តំណាងពលរដ្ឋរងគ្រោះដីធ្លី លើកឡើងថា ប្រជាពលរដ្ឋដែលទទួលយកដំណោះស្រាយកន្លងមក គឺដោយសារតែមានការគំរាមកំហែង និងបង្ខិតបង្ខំ។ អ្នកស្រី មិត្ត គីមថា បន្តថា លោក គួច ចំរើន កំពុងតែនិយាយបោកប្រាស់ និងកាន់ជើងអគ្គិសនីកម្ពុជា ដែលប្រហែលជាបក្ខពួកតែមួយ។ «»
មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក (Adhoc) ប្រចាំខេត្តកំពង់ចាម និងខេត្តត្បូងឃ្មុំ លោក ឡេង សេងហាន មានប្រសាសន៍ថា ប្រជាពលរដ្ឋមានសិទ្ធិតវ៉ាទាមទារតាមច្បាប់ ប្រសិនបើការដោះស្រាយណាមួយ មិនសមរម្យ និងយុត្តិធម៌។ លោកក៏សំណូមពរឲ្យអាជ្ញាធរជួយពន្លឿនដោះស្រាយជូនប្រជាពលរដ្ឋដែរ ព្រោះរឿងនេះ មិនគួរក្លាយជារឿងធំដុំ និងរ៉ាំរ៉ៃដែលដោះស្រាយមិនបាននោះទេ។ «»
ក្រុមប្រជាពលរដ្ឋរងគ្រោះដីធ្លី ឲ្យដឹងថា ពួកគាត់នឹងឡើងមករាជធានីភ្នំពេញ នៅថ្ងៃចន្ទ ទី១១ ខែមិថុនា ដើម្បីសួរនាំក្រសួងដែនដីអំពីដំណោះស្រាយ ហើយនឹងយកញត្តិទៅខុទ្ទកាល័យលោក នាយករដ្ឋមន្ត្រី ហ៊ុន សែន ផង។ ពួកគាត់ អះអាងថា ប្រសិនបើនៅតែមិនទាន់ទទួលព័ត៌មានជាក់លាក់នៃការដោះស្រាយទេ គឺពួកគាត់នឹងវេចខោអាវ ចាន ឆ្នាំង ភួយ កន្ទេលទៅដេកតវ៉ា នៅមុខក្រសួង ដែនដី និងស្ថាប័នជាតិដទៃទៀត ជាប់ជាប្រចាំ រហូតទាល់តែមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។