សហគមន៍ជនជាតិដើមភាគតិចព្នង (ពូនង) ខេត្តមណ្ឌលគិរីសាទរការសម្រេចរបស់លោក ហ៊ុន សែន ដែលបញ្ជាឲ្យអភិបាលខេត្តមណ្ឌលគិរី លោក ស្វាយ សំអ៊ាង ទប់ស្កាត់មិនឲ្យទន្ទ្រានដីនៅតំបន់ភ្នំដោះក្រមុំដែលជាមជ្ឈមណ្ឌលវប្បធម៌ជនជាតិដើមភាគតិច ខណៈបច្ចុប្បន្នអាជ្ញាធរមូលដ្ឋាន និងអាជ្ញាធរជាតិនៅមិនទាន់ដោះស្រាយវិបត្តិដីធ្លីនៅទីនោះ ឲ្យដាក់ស្រឡះនៅឡើយទេ។
អគ្គលេខាធិការឧត្ដមក្រុមប្រឹក្សាពិគ្រោះយោបល់ លោក ឈឹម ផលវរុណ បានថ្លែងប្រាប់កាសែតក្នុងស្រុក ក្នុងកិច្ចប្រជុំឧត្ដមក្រុមប្រឹក្សាពិគ្រោះយោបល់កាលពីពេលថ្ងៃទី២៨ កុម្ភៈថា លោក ហ៊ុន សែន បានបញ្ជាឲ្យគណៈបញ្ជាការឯកភាពខេត្តមណ្ឌលគិរី និងស្ថាប័នពាក់ព័ន្ធទប់ស្កាត់ការទន្ទ្រានដីនៅតំបន់ភ្នំដោះក្រមុំ និងត្រូវរឹបអូសមកវិញ ហើយត្រូវផ្ដល់លទ្ធភាព ឲ្យអាជ្ញាធររដ្ឋប្រើប្រាស់ថវិកាធ្វើរបងហ៊ុមព័ទ្ធ។
លេខាធិការគណៈកម្មការ គ្រប់គ្រងភ្នំដោះក្រមុំ លោក ក្រើង តុលា លើកឡើងថា ជនជាតិដើមភាគតិចទាំងអស់នឹងថ្លែងអំណរគុណ ដល់លោក ហ៊ុន សែន ប្រសិនបើលោក ពិតជាមានឆន្ទៈដោះស្រាយរឿងនេះដោយយុត្តិធម៌មែន។ លោកសង្កេតឃើញថា កន្លងទៅ ផ្ទៃដីនៅតំបន់ភ្នំដោះក្រមុំមានទំហំ ១០២ហិកតារ ទទួលរងការរំលោភបំពានជាបន្តបន្ទាប់ពីសំណាក់អ្នកមានអំណាច និងមន្ត្រីនគរបាលខ្លះ បានសាងសង់ភូមិគ្រឹះ ផ្ទះ និង ហ៊ុមព័ទ្ធរបងយកដីនៅតំបន់នោះមួយផ្នែក ធ្វើជាសម្បត្តិបុគ្គល៖ «»
លោក ក្រើង តុលា បារម្ភថា អាជ្ញាធរមូលដ្ឋាន អាចនឹងមិនស្ដាប់បញ្ជាថ្នាក់ដឹកនាំរដ្ឋ ប្រសិនបើលោក ហ៊ុន សែន ពុំមានប្រព័ន្ធតាមដានប្រសិទ្ធភាពការងារអាជ្ញាធរពាក់ព័ន្ធឲ្យច្បាស់លាស់នោះទេ។
ភ្នំដោះក្រមុំ មានទីតាំងនៅកណ្ដាលក្រុងសែនមនោរម្យ ឋិតក្នុងភូមិស្វាយចេក សង្កាត់សុខដុម ខេត្តមណ្ឌលគិរី។ កាលពីឆ្នាំ ២០០៤ ទីស្ដីការគណៈរដ្ឋមន្ត្រីបានសម្រេចចាត់ទុកតំបន់ភ្នំនេះជាមជ្ឈមណ្ឌលវប្បធម៌ជនជាតិដើមភាគតិចមានទំហំដីជាង ១០២ហិកតារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។