ជនជាតិដើមភាគតិចកួយឃុំប្រមេរខេត្តព្រះវិហារស្នើឱ្យអាជ្ញាធរបញ្ឈប់ការធ្វើទុក្ខបុកម្នេញលើពួកគាត់
2018.11.29
ប្រជាពលរដ្ឋជនជាតិដើមភាគតិចកួយឃុំប្រមេរ ខេត្តព្រះវិហារ ស្នើឱ្យអាជ្ញាធរបញ្ឈប់ការចោទប្រកាន់ និងការធ្វើទុក្ខបុកម្នេញលើពួកគាត់ ជុំវិញរឿងវិវាទដីធ្លីជាមួយក្រុមហ៊ុនចិន។ ពួកគាត់អះអាងថា ជាច្រើនឆ្នាំកន្លងទៅនេះ អាជ្ញាធរមានការរើសអើង និងមានទំនោរទៅរកក្រុមហ៊ុន ដោយមិនបានយកចិត្តទុកដាក់ដោះស្រាយបញ្ហាដីធ្លីជូនពលរដ្ឋឡើយ។ អាជ្ញាធរមូលដ្ឋានទទួលស្គាល់ថា ពលរដ្ឋនៅក្នុងឃុំពិតជាធ្លាប់រងការរើសអើង និងចោទប្រកាន់ពីអាជ្ញាធរមែន ព្រោះពួកគាត់មិនសូវស្ដាប់តាមការណែនាំរបស់អាជ្ញាធរ ក៏ប៉ុន្តែរឿងនេះលែងមានកើតមានតទៅទៀតហើយ។
ពលរដ្ឋអះអាងថា ពួកគាត់បានរងការចោទប្រកាន់ ការគំរាមកំហែង និងការធ្វើទុកបុកម្នេញជាហូរហែពីសំណាក់អាជ្ញាធរតាំងពីថ្នាក់មូលដ្ឋាន រហូតដល់ថ្នាក់ខេត្ត ជុំវិញរឿងទំនាស់ដីធ្លីជាមួយក្រុមហ៊ុនបុត្រសម្ពន្ធរបស់ក្រុមហ៊ុនហេងហ្វូ (Hengfu) របស់ចិន។ ការចោទប្រកាន់ទាំងនោះ មានជាអាទិ៍ ជាអ្នកប្រឆាំងនឹងការអភិវឌ្ឍ ជាអ្នកគាំទ្រគណបក្សប្រឆាំង ជាអ្នកគាំទ្របដិវត្តន៍ពណ៌ និងជាអ្នកចង់បង្កើតតំបន់អបគមន៍ ឬបំបែករដ្ឋជាដើម។
ទីប្រឹក្សាសហគមន៍ជនជាតិដើមភាគតិចកួយឃុំប្រមេរ លោកស្រី ទេព ទឹម ប្រាប់អាស៊ីសេរីថា ពលរដ្ឋក្នុងឃុំមិនមានបំណង ឬបានប្រព្រឹត្តដូចការចោទប្រកាន់របស់អាជ្ញាធរនោះឡើយ។ លោកស្រីបញ្ជាក់ថា សកម្មភាពរបស់ពលរដ្ឋកន្លងមក សុទ្ធតែដើម្បីការពារដីធ្លី ព្រៃឈើ និងធនធានធម្មជាតិ ដែលពួកគាត់ធ្លាប់បានប្រើប្រាស់ និងអាស្រ័យផល តាំងពីដូនតារៀងមក និងកំពុងបាតបង់ជាគំហុកដោយសារគម្រោងវិនិយោគរបស់ចិន។ លោកស្រីបន្ថែមថា ជាច្រើនឆ្នាំមកនេះ អាជ្ញាធរមិនបានយកចិត្តទុកដាក់ដោះស្រាយវិវាទដីធ្លីរបស់ពួកគាត់ជាមួយក្រុមហ៊ុនចិននេះឡើយ ទោះបីជាពួកគាត់ខំតវ៉ា ដាក់បណ្ដឹង ឬស្វះស្វែងរកអន្តរាគមន៍ពីស្ថាប័នពាក់ព័ន្ធយ៉ាងណាក៏ដោយ។ លោកស្រីជឿជាក់ថា ទាំងអាជ្ញាធរថ្នាក់ខេត្ត រហូតដល់ថ្នាក់ជាតិ សុទ្ធតែដឹងលឺពីទុក្ខកង្វល់របស់ពលរដ្ឋនៅឃុំប្រមេរ និងពលរដ្ឋជាច្រើនឃុំផ្សេងទៀត ដែលរងផលប៉ះពាល់ពីការវិនិយោគរបស់ក្រុមហ៊ុនចិន ប៉ុន្តែបែរជានាំមិនអើពើដោះស្រាយ ឬដោះស្រាយបានត្រឹមតែមាត់ គ្មានលទ្ធផលជាក់ស្ដែង៖ «ការពិតការប្រឆាំងហ្នឹង មិនមែនចង់បង្កើតអបគមន៍ បំបែករដ្ឋលើរដ្ឋអ្វីនោះទេ។ យើងគ្រាន់តែចង់ទាមទារដើម្បីការរស់នៅរបស់ពួកយើង ដើម្បីមានដី មានស្រែចម្ការប្រកបមុខរបរចិញ្ចឹមជីវិត។ យើងអត់មានទៅប្រឆាំងបង្កើតអបគមន៍ ប្រឆាំងជាមួយរដ្ឋនោះទេ។ យើងប្រឆាំងដើម្បីរស់ ដើម្បីជីវភាព។ យើងអត់ទាំង ដឹងថា អបគមន៍ហ្នឹងយ៉ាងម៉េច បង្កើតរដ្ឋលើរដ្ឋយ៉ាងម៉េចផងទេពូកខ្ញុំនេះ»។
បុត្រសម្ពន្ធនៃក្រុមហ៊ុនហេងហ្វូ (Hengfu Sugar Industry) របស់ចិន ទទួលបានដីសម្បទានសេដ្ឋកិច្ចពីរបបក្រុងភ្នំពេញ ចំនួនជាង ៤ម៉ឺនហិកតារ ប៉ុន្តែក្រោយការកាត់ឆ្វៀលរួច នៅសល់ជាង ៣ម៉ឺនហិកតារ។ ដីសម្បទាននេះ បានគ្របដណ្តប់លើដីព្រៃ និងដីស្រែចម្ការ ព្រមទាំងភូមិកររបស់ប្រជាពលរដ្ឋចំនួន ៣ស្រុក គឺស្រុកត្បែងមានជ័យ ស្រុកឆែប និងស្រុកជ័យសែន។ ការវិនិយោគនេះបានបង្កផលប៉ះពាល់ដល់ប្រជាពលរដ្ឋចំនួន ១០ឃុំ ស្មើនឹង ២៥ភូមិ ដែលមានពលរដ្ឋរស់នៅលើសពី ២ម៉ឺន ៣ពាន់នាក់។
ក្រុមអង្គការសង្គមស៊ីវិលជាតិ និងអន្តរជាតិរកឃើញថា ការវិនិយោគរបស់ក្រុមហ៊ុនចិននេះបានបង្កផលប៉ះពាល់យ៉ាងធំធេងដល់បរិស្ថាន និងជីវភាពរបស់ពលរដ្ឋ ហើយក៏មានអំពើរំលោភសិទ្ធិមនុស្សធ្ងន់ធ្ងរប្រព្រឹត្តដោយអាជ្ញាធរ និងភាគីក្រុមហ៊ុនផងដែរ។ ក្រុមអង្គការសង្គមស៊ីវិលរកឃើញថា អាជ្ញាធរមូលដ្ឋានបានតាមដានសកម្មភាពរបស់ពលរដ្ឋ និងតំណាងរបស់ពួកគាត់ដែលចេញមុខប្រឆាំងនឹងក្រុមហ៊ុនហេងហ្វូ ដោយលាបពណ៌ពួកគាត់ថាអ្នកប្រឆាំងនឹងការអភិវឌ្ឍរបស់រដ្ឋាភិបាល។ អាជ្ញាធរក៏បានភ្ជាប់ពួកគាត់ទៅនឹងគណបក្សប្រឆាំង ហើយថែមទាំងបានចោទប្រកាន់ពួកគាត់ថា ចូលរួមក្នុងបដិវត្តន៍ពណ៌ និងចង់ធ្វើអបគមន៍ ឬបំបែករដ្ឋទៀតផង។ ក្រៅពីនេះ ការរំលោភបំពាន ការគំរាមកំហែង ការចោទប្រកាន់ និងការប្តឹងពលរដ្ឋទៅតុលាការ កើតមានជាច្រើនករណី តាំងពីឆ្នាំ២០១២ រហូតមក ហើយកាលពីពេលថ្មីៗនេះ តុលាការខេត្តព្រះវិហារក៏បានកោះហៅមន្ត្រីអង្គការសង្គមស៊ីវិល និងប្រជាពលរដ្ឋជិត ១០នាក់ ឱ្យចូលទៅបំភ្លឺរឿងឃាត់ និងបង្ខាំងទុកគ្រឿងចក្ររបស់ក្រុមហ៊ុនកាលពីឆ្នាំ២០១៥ កន្លងទៅ នោះផងដែរ។
អាស៊ីសេរីមិនទាន់អាចទាក់ទងតំណាងក្រុមហ៊ុនមេហេងហ្វូដើម្បីបកស្រាយការចោទប្រកាន់របស់អ្នកភូមិបានទេ ប៉ុន្តែមេឃុំប្រមេរ លោក ធាន ហេង ទទួលស្គាល់ថា កាលពីមុនពិតជាមានករណីចោទប្រកាន់ពលរដ្ឋថា ជាក្រុមប្រឆាំងនឹងការអភិវឌ្ឍរបស់រដ្ឋាភិបាលពិតមែន ដោយសារពលរដ្ឋមិនស្តាប់តាមការណែនាំរបស់អាជ្ញាធរ។ ក៏ប៉ុន្តែលោកថា សព្វថ្ងៃលែងមានករណីនេះទៀតហើយ បន្ទាប់ពីអាជ្ញាធរបានដោះស្រាយបញ្ចប់ទំនាស់រវាងពលរដ្ឋ និងក្រុមហ៊ុន និងបានកសាងទំនាក់ទំនងល្អជាមួយពលរដ្ឋឡើងវិញ៖ «ឧទាហរណ៍ថា ទៅតវ៉ាអ៊ីចឹង (អាជ្ញាធរ) ថាកុំអាល ចាំអាជ្ញាធរដោះស្រាយជូន ប៉ុន្តែបងប្អូនយើងចេះតែមិនព្រម អ៊ីចឹងទើបបានជាមិនសូវមានទំនាក់ទំនងគ្នាល្អហ្នឹងណា។ ពេលមុនវាអាចមានអ៊ីចឹងខ្លះដែរប៉ុន្តែមិនធ្ងន់ធ្ងរនោះទេ។ ដោយសារតែបងប្អូននិយាយគ្នាដូចថាស្ដាប់មិនសូវបាន បើថាទៅហើយ គឺទៅទាំងអស់គ្នា ៤-១០ គោយន្តអ៊ីចឹង នាំគ្នាទៅតវ៉ា។ ប៉ុន្តែអាជ្ញាធរក៏ចេះតែដោះស្រាយបណ្ដើរៗជូន (និង) ពន្យល់ពួកគាត់អំពីរបៀបដោះស្រាយតាមផ្លូវច្បាប់ថា តើវាយ៉ាងម៉េច យើងកុំទៅប្រើអំពើហិង្សា»។
ថ្វីដ្បិតតែអាជ្ញាធរមូលដ្ឋានរូបនេះ អះអាងថា លែងមានករណីចោទប្រកាន់ពលរដ្ឋបែបនេះក្តី ក៏មន្ត្រីជាន់ខ្ពស់នៃរបបលោក ហ៊ុន សែន នៅបន្តចាត់ទុកពលរដ្ឋដែលតវ៉ារឿងដីធ្លីជាមួយក្រុមហ៊ុនចិននៅខេត្តព្រះវិហារនេះ ថាជាក្រុមប្រឆាំងដដែល។ ជាក់ស្ដែង មន្ត្រីនាំពាក្យរបបនេះ គឺលោក ផៃ ស៊ីផាន បានថ្លែងកាលពីចុងខែតុលាកន្លងទៅថា អ្នកដែលទាមទារចង់ឱ្យមានការពិនិត្យមើល ឬលុបចោលកិច្ចគម្រោងវិនិយោគនេះ គឺជាក្រុមមនុស្សដែលមាននិន្នាការប្រឆាំងនឹងចិន ឬក៏អាចបង្កប់នូវចេតនានយោបាយចង់ប្រឆាំងនឹងរបបរបស់លោក៖ «រឿងចិននៅព្រះវិហារហ្នឹង គេដោះស្រាយរួចហើយ អត់មានរឿងអ្វីពាក់ព័ន្ធតទៅទៀតទេ។ ទីមួយលក្ខខណ្ឌក្រុមហ៊ុនចិនហ្នឹងអត់ទទួលបានផ្ទៃដីដែលរាជរដ្ឋាភិបាលសន្យាឱ្យ គេទទួលបានតែពាក់កណ្ដាលទេ តាមខ្ញុំដឹង។ ហើយពាក់កណ្ដាលទៀតបែងចែកឱ្យប្រជាពលរដ្ឋនៅក្នុងកន្លែងហ្នឹង លើកលែងតែពួកមាននិន្នាការនយោបាយប្រឆាំងទេ ដែលនៅតែទាមទារនេះទាមទារនោះ។ ឬមួយក៏ការទាមទារគ្រាន់តែជារឿងនយោបាយដើម្បីឱ្យមានគំនិតមួយប្រឆាំងនឹងចិន ឬប្រឆាំងជាមួយនឹងរាជរដ្ឋាភិបាល?»។
លោកស្រី ទេព ទឹម ច្រានចោលការលើកឡើងបែបនេះ ដោយបញ្ជាក់ថា ទំនាស់ដីធ្លីនេះមានការដោះស្រាយតិចតួចប៉ុណ្ណោះ ហើយដោះស្រាយតាំងពីជំនាន់និស្សិតចុះវាស់វែងដីធ្លីមកម្ល៉េះ ចំណែកពេលបច្ចុប្បន្ន មិនឃើញមានដំណោះស្រាយអ្វីឡើយ។ លោកស្រីស្នើសុំឱ្យអាជ្ញាធរបញ្ឈប់ទង្វើចោទប្រកាន់ពលរដ្ឋបែបនេះតទៅទៀត និងស្នើឱ្យមន្ត្រីជំនាញចុះជួយដោះស្រាយបញ្ចប់ទំនាស់ដីធ្លីនេះជូនពួកគាត់៖ «យើងសំណូមពរបញ្ឈប់ការធ្វើទុក្ខបុកម្នេញ បញ្ឈប់ការចោទប្រកាន់លើប្រជាពលរដ្ឋ កុំឱ្យមានបណ្ដឹងដល់តុលាការ អំពីរឿងប្រជាពលរដ្ឋប្រឆាំងអីហ្នឹង។ សូមឱ្យបញ្ឈប់ការចោទប្រកាន់ទៅ ជួយដោះស្រាយបញ្ហាដីធ្លី ដើម្បីឱ្យប្រជាពលរដ្ឋបង្កើតមុខរបរសម្រាប់ចឹញ្ចឹមជីវិត»។
នាយកប្រតិបត្តិអង្គការពន្លកខ្មែរ (PKH) លោក អាង ជាតិឡោម អះអាងថា មិនត្រឹមតែប្រជាពលរដ្ឋឃុំប្រមេរនោះទេ ដែលរងការរើសអើង និងចោទប្រកាន់ថា ជាក្រុមប្រឆាំងនោះ សូម្បីតែអង្គការរបស់លោកក៏ជួបប្រទះបញ្ហានេះដូចគ្នា។ លោកបន្តថា អាជ្ញាធរខេត្តព្រះវិហារតែងចុះឃ្លាំមើលសកម្មភាពរបស់អង្គការលោកជាប់ជាប្រចាំ ហើយក៏មានការចោទប្រកាន់ក្រៅផ្លូវការថា អង្គការរបស់លោកជាអ្នកញុះញង់ពលរដ្ឋឱ្យងើបតវ៉ាប្រឆាំងនឹងក្រុមហ៊ុនចិនទៀតផង។ ហើយនៅពេលថ្មីៗនេះ បុគ្គលិករបស់លោកពីរនាក់ក៏ត្រូវជាប់បណ្ដឹងរបស់ក្រុមហ៊ុនផងដែរ ដែលលោកចាត់ទុកថា នេះជាការគំរាមកំហែងថ្មីមួយទៀតលើសកម្មភាពរបស់អង្គការលោក៖ «គេកត់សម្គាល់យើងថា ជាអង្គការមួយដែលធ្វើការប៉ះពាល់ដល់ផលប្រយោជន៍របស់គេ អ៊ីចឹងគេតាមដាន គេត្រួតពិនិត្យមើល។ គ្រប់សកម្មភាពរបស់យើង គឺគេប្រុងប្រយ័ត្នបំផុត។ យើងពិបាកក្នុងការធ្វើការទំនាក់ទំនងទៅនឹងអាជ្ញាធរ ទៅអ្នកពាក់ព័ន្ធ ជាពិសេសនៅថ្នាក់ខេត្ត ដល់ពេលអ៊ីចឹងទៅថ្នាក់ស្រុក ថ្នាក់ឃុំ ក៏ដូចតែគ្នា។ គេអត់បានចាត់ទុកយើងជាដៃគូអភិវឌ្ឍន៍មួយ ដែលត្រូវធ្វើការរួមគ្នានោះទេ។ ប៉ុន្តែជាទូទៅជំហររបស់យើង គឺយើងនៅតែធ្វើការ បើទោះបីគេចាត់ទុកយើងជាអ្វីក៏ដោយ។ យើងនៅតែធ្វើការជាមួយនឹងប្រជាជននៅតាមមូលដ្ឋាន ជាពិសេស អ្នកដែលប៉ះពាល់ដីធ្លីពីគម្រោងអភិវឌ្ឍធំៗហ្នឹងដដែល»។
មន្ត្រីសិទ្ធិមនុស្សរូបនេះ ជំរុញឱ្យអាជ្ញាធរពាក់ព័ន្ធក្នុងខេត្តព្រះវិហារ បញ្ឈប់សកម្មភាពរឹតត្បិត និងធ្វើទុកបុកម្នេញលើពលរដ្ឋ និងអង្គការសង្គមស៊ីវិលតទៅទៀត ដោយត្រូវអនុវត្តតាមសេចក្ដីណែនាំរបស់ក្រសួងមហាផ្ទៃ ដែលតម្រូវឱ្យអាជ្ញាធរទាំងអស់ត្រូវបើកសិទ្ធិឱ្យសមាគម អង្គការមិនមែនរដ្ឋាភិបាលដែលបានចុះបញ្ជីតាមច្បាប់ ព្រមទាំងសហគមន៍មូលដ្ឋានអាចធ្វើសកម្មភាពបានដោយពេញលេញ និងដោយគ្មានការរារាំង៕