តុលាការ​ក្រុង​កោះហៅ​តំណាង​សហគមន៍​ឡ​ពាង១០​នាក់ ឲ្យ​ចូល​បំភ្លឺ​ជា​លើក​ទី​២ រឿង​ដីធ្លី​​ជាមួយ​ក្រុមហ៊ុន​ ខេ.ឌី.ស៊ី (KDC)

ដោយ សុ ជីវី
2019-02-15
អ៊ីម៉ែល
មតិ
Share
បោះពុម្ព
អ្នក​ភូមិ​ឡពាង ប្រមូល​ផ្ដុំ​គ្នា​ដាក់​បណ្ដឹង​ទៅ​សាលា​ខេត្ត​កំពង់ឆ្នាំង ប្រឆាំង​នឹង​ក្រុមហ៊ុន ខេ.ឌី.ស៊ី (KDC) នៅ​ថ្ងៃ​ទី​២៨ ខែ​មេសា ឆ្នាំ​២០១៦។ Photo LICADHO
អ្នក​ភូមិ​ឡពាង ប្រមូល​ផ្ដុំ​គ្នា​ដាក់​បណ្ដឹង​ទៅ​សាលា​ខេត្ត​កំពង់ឆ្នាំង ប្រឆាំង​នឹង​ក្រុមហ៊ុន ខេ.ឌី.ស៊ី (KDC) នៅ​ថ្ងៃ​ទី​២៨ ខែ​មេសា ឆ្នាំ​២០១៦។ Photo LICADHO
Photo LICADHO

តុលាការ​ក្រុងភ្នំពេញ​ ចេញ​ដីកា​កោះហៅ​តំណាង​ពលរដ្ឋ​១០​នាក់​នៃ​សហគមន៍​ឡ​ពាង​ដែល​មាន​ជម្លោះ​ដីធ្លី​រ៉ាំរ៉ៃ​ជាមួយ​ក្រុមហ៊ុន ខេ.ឌី.ស៊ី (KDC)។ ការ​បង្គាប់​ឲ្យ​អ្នក​ឡ​ពាង​ចូល​ខ្លួន​បំភ្លឺ​ជា​លើក​ទី​២នេះ គឺ​ដើម្បី​ចូល​រួម​នីតិវិធី​ត្រៀម​សម្រាប់​ការ​ទាញ​ហេតុផល​ លើ​បណ្ដឹង​របស់​ពួក​គេ​ប្ដឹង​មោឃភាព​កិច្ច​ព្រមព្រៀង​ កាល​ពី​ឆ្នាំ​២០១៤ ជាមួយ​ក្រុមហ៊ុន​របស់​អ្នកស្រី ជា ខេង ភរិយា លោក ស៊ុយ សែម រដ្ឋមន្ត្រី​ក្រសួង​រ៉ែ​និង​ថាមពល។

ចៅក្រម​នៃ​តុលាការ​ក្រុង​ភ្នំពេញ លោក សំ ប៊ុន​ពៅ​ នៅ​ថ្ងៃ​ទី​១៥​ កុម្ភៈ បង្គាប់​ឲ្យ​ពលរដ្ឋ​១០​នាក់​តំណាង​ឲ្យ​ពលរដ្ឋ​ជាង​៤០០​គ្រួសារ រស់​នៅ​ឃុំ​តាជេស ស្រុក​កំពង់​ត្រឡាច ខេត្ត​កំពង់​ឆ្នាំង ត្រូវ​ចូល​ខ្លួន​បំភ្លឺ​ម្ដង​ទៀត នៅ​ថ្ងៃ​ទី ២៨ មិនា​ ក្នុង​នាម​ជា​សហ​ដើម​ចោទ។

តំណាង​ពលរដ្ឋ លោកស្រី អ៊ុំ សុភី យល់ថា តុលាការ​ហាក់​មិន​មាន​ឆន្ទៈ​ដោះស្រាយ​បណ្ដឹង​ឲ្យ​ពួកគាត់​ ដែល​ជា​ពលរដ្ឋ​ក្រីក្រ ហើយ​មិន​ចេះ​អក្សរ​នោះ​ឡើយ ដោយ​តម្រូវ​ឲ្យ​រក​ឯកសារ​ពិត​ប្រាកដ​នៃ​កិច្ច​ព្រមព្រៀង​ដាក់​ជូន​តុលាការ។ ពួកគាត់​មិន​ដឹង​ថា ​ទៅ​រក​សំណៅ​ឯកសារ​ពិត​ទាំង​នោះ​នៅ​ទីណា​ទេ។ តំណាង​ពលរដ្ឋ​នេះ ស្នើសុំ​ឲ្យ​តុលាការ​ក្រុងភ្នំពេញ​ប្រើ​សិទ្ធិ​អំណាច​របស់​ខ្លួន បង្គាប់​ឲ្យ​ភាគី​​ក្រុមហ៊ុន​បង្ហាញ​កិច្ច​ព្រមព្រៀង​នោះ ព្រោះ​ថា មាន​តែ​ក្រុមហ៊ុន​របស់​អ្នក​ស្រី ជា ខេង ទេ ដែល​មាន​ឯកសារ​ពិត​ប្រាកដ​ទាំង​អស់​នោះ។

ចំពោះ​ឯកសារ​ដែល​ជូន​តុលាការ​កាល​ពី​លើក​មុន ក្រឡា​បញ្ជី​ប្រាប់​ពួក​គាត់​ថា គឺ​ពុំ​ត្រឹម​ត្រូវ​តាម​ការ​ចង់​បាន​របស់​ចៅក្រម​ទេ៖ «ចង់​ក្រោយ​ហ្នឹង ខ្ញុំ​ចង់​ឲ្យ​តុលាការ​កោះ​ហៅ​ក្រុម​ហ៊ុន ហើយ​យក​កិច្ច​ព្រមព្រៀង ឲ្យ​លោក ផាក់ ពៅស៊ាង បង្ហាញ​កិច្ច​ព្រមព្រៀង​របស់​ប្រជាពលរដ្ឋ​ធ្វើ​ឡើង​ថ្ងៃ​ទី​៤ ខែ​៤​ឆ្នាំ​២០១៤ យក​មក​ឲ្យ​ប្រជាពលរដ្ឋ​មើល​មើល៍។ ឲ្យ​អ្នក​ដែល​ចេះ​អក្សរ​អាន​មើល ថា​គាត់​ធ្វើ​ហ្នឹង​វា​ត្រឹមត្រូវ​ឬ​អត់។ ដោយសារ​តែ​កិច្ច​ព្រមព្រៀង​ហ្នឹង ធ្វើ​ឡើង​ដោយ​គ្មាន​អ្នក​ចេះ​អក្សរ​ចូល​រួម។ ហើយ​សូម្បី​តែ​ជា​ចៅហ្វាយ​ស្រុក​ដែល​ជា​គណៈកម្មការ អត់​ដឹង​រឿង​ហ្នឹង​ផង ឲ្យ​ខ្ញុំ​ទទួល​យ៉ាង​មិច។ អញ្ចឹង​បាន​ក្រុមហ៊ុន មាន​ចេតនា​ធ្វើ​បាប​អ្នក​ឡពាង​ខ្ញុំ ធ្វើ​ឲ្យ​ពួក​ខ្ញុំ​ទទួល​រង​អយុត្តិធម៌។ ហើយ​យើង​ឃើញ​ថា​រឿង​ហ្នឹង ដោយ​សារ​តែ​មាន​អ្នក​ធំ​នៅ​ពី​ក្រោយ​ខ្នង​ហើយ បាន​ជា​គេ​មិន​ព្រម​ដោះស្រាយ​ឲ្យ​ពួក​ខ្ញុំ​សោះ»

អាស៊ី​សេរី មិន​អាច​ទាក់ទង​ តំណាង​ក្រុមហ៊ុន ខេ.ឌី.ស៊ី លោក ថៃ ហ៊ី ដើម្បី​ឆ្លើយ​តប​នឹង​ការ​ទាមទារ​ពី​ខាង​ពលរដ្ឋ​ឲ្យ​ភាគី​ក្រុមហ៊ុន បង្ហាញ​កិច្ច​ព្រមព្រៀង​នោះ​ ជូន​តុលាការ បាន​នោះ​ទេ។

ប្រធាន​ប្រធាន​គ្រប់គ្រង​ការិយាល័យ​ឃ្លាំ​មើល​សិទ្ធិ​មនុស្ស​នៃ​អង្គការ​ លីកាដូ (LICADHO) លោក អំ សំអាត ពន្យល់​ថា តាម​នីតិវិធី កិច្ចព្រមព្រៀង​អ្វី​ក៏​ដោយ​ គឺ​ត្រូវ​តែ​មាន​នៅ​គ្រប់​ភាគី​ដែល​ពាក់ព័ន្ធ​ទាំងអស់ មិន​អាច​មាន​នៅ​ម្ខាង ហើយ​ម្ខាង​ទៀត​គ្មាន​នោះ​ទេ នោះ​គេ​មិន​ហៅ​ថា​ជា​កិច្ច​ព្រមព្រៀង​ឡើយ។ លោក អំ សំអាត សង្កេត​ឃើញ​ថា ពលរដ្ឋ​ក្រីក្រ​ឬក៏​អ្នក​រង​គ្រោះ មាន​លទ្ធភាព​តិច​ណាស់​ដែល​ទទួល​បាន​យុត្តិធម៌​ពេញ​លេញ​ពី​ប្រព័ន្ធ​តុលាការ ជា​ពិសេស​នៅ​ក្នុង​រឿង​ក្ដី​រវាង​ពលរដ្ឋ​ជាមួយ​ក្រុមហ៊ុន ឬ​ក៏​មាន​អ្នកមាន​អំណាច៖ «បើ​និយាយ​ពី​សំណុំ​រឿង​។ រឿង​នេះ​ជា​រឿង​រដ្ឋប្បវេណី។ ដល់​សំណុំ​រឿង​រដ្ឋប្បវេណី តុលាការ​សំអាង​លើ​ភស្តុតាង។ ដល់​អ៊ីចឹង! ពួកគាត់​ពិបាក​រក​ភស្តុតាង ដល់​អ៊ីចឹង​យើង​មើល​លទ្ធភាព​នៃ​ការ​ឈ្នះ​ក្ដី​របស់​គាត់​ដូច​ជា​ពិបាក​ដែរ។ ទោះបី​យ៉ាង​ណា យើង​នៅ​តែ​សង្ឃឹម​ថា ចំពោះ​អ្នក​ឡពាង​ដែល​រងគ្រោះ​រ៉ាំរ៉ៃ​នេះ តុលាការ​នឹង​ផ្ដល់​យុត្តិធម៌​សម្រាប់​គាត់»

កាល​ពី​ថ្ងៃ​ទី​៧ ខែ​កុម្ភៈ សហគមន៍​ឡ​ពាង​ដែល​មក​ពី​កំពង់​ឆ្នាំង បាន​ដាក់​ភស្តុតាង​ជូន​តុលាការ​ក្រុងភ្នំពេញ ដែល​ពួកគាត់​រក​បាន​ពី​កាសែត​កោះសន្តិភាព ចុះ​ផ្សាយ​កាល​ពី​ថ្ងៃ​ទី​១៨ ​ខែ​កញ្ញា ឆ្នាំ​២០១៤។ កិច្ច​ព្រមព្រៀង​ឬ​សំណង​គោល​នយោបាយ ដែល​ចុះផ្សាយ​ក្នុង​កាសែត​ក្នុង​ស្រុក សរសេរ​ថា ក្រុមហ៊ុន​ខេ.ឌី.ស៊ី (KDC) បាន​ផ្ដល់​ថវិកា​ឲ្យ​តំណាង​ពលរដ្ឋ​ម្នាក់​ឈ្មោះ រាជ សីម៉ា ៧​ពាន់​ដុល្លារ​ សម្រាប់​សំណង​ការ​ឈូស​ឆាយ​ផ្ទះ​សម្បែង​និង​ផល​ដំណាំ ហើយ​ថវិកា​១ម៉ឺន​ដុល្លារ​ផ្សេង​ទៀត ជា​ថ្នូរ​នឹង​ការ​បញ្ឈប់​សកម្មភាព​ចេញ​ដើរ​តវ៉ា​រឿង​ដីធ្លី ប្រឆាំង​នឹង​ក្រុមហ៊ុន ខេ.ឌី.ស៊ី (KDC) របស់​អ្នកស្រី ជា ខេង ភរិយា​លោក ស៊ុយ ស៊ែម រដ្ឋមន្ត្រី​ក្រសួង​រ៉ែ​និង​ថាមពល។ ប៉ុន្តែ​ខាង​ប្រជាពលរដ្ឋ ថា​ពួក​គាត់​មិន​ដែល​ទទួល​បាន​ទឹក​ប្រាក់​ដូច​ការ​ចុះ​ផ្សាយ​នោះ​ម្ដង​ណា​ឡើយ។

ជម្លោះដីធ្លី​រវាង​ក្រុមហ៊ុន ខេ.ឌី.ស៊ី របស់​អ្នកស្រី ជា ខេង ជាមួយ​ពលរដ្ឋ​នៅ​ឃុំ​តាជេស ស្រុក​កំពង់ត្រឡាច ខេត្ត​កំពង់ឆ្នាំង បាន​អូស​បន្លាយ​អស់​រយៈពេល​ជាង​១៣​ឆ្នាំ​មក​ហើយ។ ភាគី​ក្រុមហ៊ុន បាន​ប្រើ​គ្រប់​វិធីសាស្ត្រ​ក្នុង​ការ​ដោះស្រាយ​បញ្ហា គឺ​ប្រើ​ទាំង​ទិដ្ឋភាព​ច្បាប់ ការ​សម្របសម្រួល​ក្រៅ​ប្រព័ន្ធ​តុលាការ និង​ពេលខ្លះ​មាន​ប្រើ​អំពើ​ហិង្សា​ផង​ក៏​មាន។ កាលពី​ឆ្នាំ​២០១៣ របប​លោក ហ៊ុន សែន បាន​ផ្ដល់​ដី​សម្បទាន​នៅ​តំបន់​មាន​ជម្លោះ​នេះ ទៅ​ឲ្យ​ក្រុមហ៊ុន​ចិន​ថែមទៀត ខណៈ​ពលរដ្ឋ​នៃ​ឃុំ​តាជេស នៅ​មិន​ទាន់​ទទួល​បាន​ដោះស្រាយ​នៅឡើយ។

សហគមន៍​ឡ​ពាង ស្នើ​សុំ​មេដឹកនាំ​របប​ក្រុង​ភ្នំពេញ​​ លោក ហ៊ុន សែន ក្រសួង​រៀបចំ​ដែន​ដី និង​ក្រសួង​យុត្តិធម៌ ជួយ​អន្តរាគមន៍​ដោះស្រាយ​វិវាទ​ដីធ្លី​ឲ្យ​ពួក​គាត់​ នូវ​ដំណោះស្រាយ​ឬ​សំណង​ដែល​អាច​ទទួល​យក​បាន គឺ​ទាមទារ​ឲ្យ​ភាគី​ក្រុមហ៊ុន​ទទួលស្គាល់​ដីធ្លី​របស់​ពួកគាត់ ហើយ​ប្រសិនបើ​ ក្រុមហ៊ុន​ចង់​បាន​ដី​ពលរដ្ឋ​យក​ទៅ​អភិវឌ្ឍន៍ ត្រូវ​ទិញ​ពី​ពលរដ្ឋ​ទៅតាម​តម្លៃ​ទីផ្សារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល