អ្នកវិភាគថា របបលោក ហ៊ុន សែន កំពុងអស់ពាក្យដោះសារឿងកោះហៅមន្ត្រីទូតម៉ាឡេស៊ីមកបំភ្លឺ តែគ្មានចម្លើយ ព្រោះប្រទេសម៉ាឡេស៊ី មិនបានបង្ហាញការប្ដូរជំហរណាមួយ ជុំវិញលទ្ធផល ដែលរកឃើញស្ត្រីជនជាតិអាមេរិក វ័យ ៨៣ឆ្នាំ ពីកប៉ាល់ទេសចរ វ៉េស្ទើដាម (Westerdam) ថា ពិតជាកើតជំងឺកូវីដ-១៩ (COVID-19) នោះទេ។
អ្នកវិភាគនយោបាយ និងសង្គមលោក គឹម សុខ ថា ការយកហេតុផលថា ប្រទេសម៉ាឡេស៊ីកំពុងមានបញ្ហាផ្ទៃក្នុង ទើបកម្ពុជាមិនដាក់កំហិតឲ្យម៉ាឡេស៊ី ឲ្យផ្ដល់ការបំភ្លឺនៅពេលជាក់លាក់ណាមួយនោះ គឺជាលេសបែបពាំត្រណោត ឬជាន់កែងខ្លួនឯង ព្រោះម៉ាឡេស៊ីមានបញ្ហាវិបត្តិផ្ទៃក្នុង រហូតដល់នាយករដ្ឋមន្ត្រីនៃប្រទេសនេះ គឺលោក មហាធារ មហាម៉ាត់ (Mahathir Mohamad) សុំចុះចេញពីតំណែង នៅចំថ្ងៃដែលលោក ហ៊ុន សែន ថ្លែងសារឲ្យកោះហៅមន្ត្រីទូតម៉ាឡេស៊ី ឲ្យចូលទៅបំភ្លឺនោះថែមទៀតផង។
លោក គឹម សុខ ដែលហ៊ាននិយាយរិះគន់របបក្រុងភ្នំពេញឥតសំចៃមាត់ និងកំពុងរស់នៅនិរទេសខ្លួន នៅប្រទេសហ្វាំងឡង់នោះថា ពេលដែលរដ្ឋាភិបាលម៉ាឡេស៊ី កំពុងមានបញ្ហាផ្ទៃក្នុងនោះ គួរណាស់តែលោក ហ៊ុន សែន បញ្ឈប់ការប៉ុនប៉ងឲ្យរដ្ឋាភិបាលប្រទេសនេះ មកបំភ្លឺរឿងលទ្ធផលតេស្ត ព្រោះអាជ្ញាធរម៉ាឡេស៊ី បានបញ្ជាក់ជំហរនេះ ៣ សារទៅហើយដែរ លើករណីរកឃើញជំងឺនេះ។ ប៉ុន្តែ ជាអកុសល លោក ហ៊ុន សែន បែរជាមើលឃើញថា នោះជាឱកាសដែលខ្លួនអាចឆ្លៀត កេងចំណេញនយោបាយទៅវិញ៖ «ពេលដែលប្រទេសម៉ាឡេស៊ី មានបញ្ហារៀបចំផ្ទៃក្នុងរដ្ឋាភិបាល ដែលជាមូលហេតុល្អបំផុត និងសមពេលទៅហើយ សម្រាប់ការដកខ្លួន។ ក៏ប៉ុន្តែបែរជាលោក ហ៊ុន សែន នៅតែប្រឹងបន្ត ដោយហៅទូតម៉ាឡេស៊ីនៅភ្នំពេញទៅសួរនាំ»។
លោក គឹម សុខ បន្តថា តាមពិតលោក ហ៊ុន សែន សង្ឃឹមថា បានពាក្យការទូតអនុគ្រោះមួយប្រយោគណា ពីមន្ត្រីការទូតម៉ាឡេស៊ី យកទៅផ្សាយលាងមុខ។ ប៉ុន្តែ របបក្រុងភ្នំពេញ ត្រូវខកចិត្តយ៉ាងខ្លាំង ដោយសារតែមន្ត្រីទូតម៉ាឡេស៊ី គ្មានពាក្យពេចន៍អ្វី ឲ្យលោក ហ៊ុន សែន លុបលាងភាពអាម៉ាស់បាន ព្រោះម៉ាឡេស៊ីមិនអាចដូរជំហររបស់ខ្លួនបានទេ ដោយសារតែការធ្វើតេស្តរកជំងឺកូវីដ-១៩ នេះ គឺខាងសុខាភិបាលម៉ាឡេស៊ី ធ្វើដោយផ្អែកលើបច្ចេកទេសសុទ្ធសាធ គ្មានពាក់ព័ន្ធនឹងការយកមុខយកមាត់ ផ្នែកនយោបាយអ្វីទាំងអស់៖ «ដល់ទៅពេលមន្ត្រីការទូត នៃប្រទេសម៉ាឡេស៊ី គ្មានពាក្យពេចន៍ទាំងឡាយណា ជួយបំពេញមុខគាត់បានក្រុមអ្នកការទូតនៃលោក ហ៊ុន សែន ក៏យកហេតុផលនៃបញ្ហាផ្ទៃក្នុងម៉ាឡេស៊ីដដែល ទៅបិទបាំង។ នេះបញ្ជាក់ថាក្រុមលោក ហ៊ុន សែន កំពុងតែជួបឧបសគ្គ នៅក្នុងការរកហេតុផលមិនសម ដើម្បីដកខ្លួនចេញពីភាពអាម៉ាស់នេះ » ។
ប្រតិកម្មរបស់លោក គឹម សុខ ធ្វើឡើងក្រោយពីមន្ត្រីនាំពាក្យក្រសួងការបរទេសកម្ពុជាលោក កុយ គួង កាលពីថ្ងៃទី៤ ខែមីនា លើកឡើងថា បញ្ហាផ្ទៃក្នុងរបស់ប្រទេសម៉ាឡេស៊ី គឺជាហេតុផល ដែលរដ្ឋាភិបាលកម្ពុជា មិនបានកំណត់ពេលឲ្យប្រទេសម៉ាឡេស៊ីធ្វើការបំភ្លឺ។
គិតមកដល់ពេលនេះ រយៈពេល ១០ ថ្ងៃ បានកន្លងផុតទៅហើយ នៅឡើយតែលទ្ធផល នៃជំនួបវាងរដ្ឋមន្ត្រីការបរទេសកម្ពុជាលោក ប្រាក់ សុខុន និងឯកអគ្គរាជទូតប្រទេសម៉ាឡេស៊ីប្រចាំនៅកម្ពុជាលោក អែលឌីន ហ៊ូសៃនី មហាម៉ាត់ ហាស់ហ្ស៊ីម (Eldeen Husaini Mohd Hashim) ដែលលោកនាយករដ្ឋមន្ត្រី ហ៊ុន សែន បង្គាប់ឲ្យកោះហៅមកចូលបំភ្លឺភ្លាមៗ កាលពីថ្ងៃទី២៥ ខែកុម្ភៈ ជុំវិញការណ៍ដែលលោក ហ៊ុន សែន នៅតែកើតទុក្ខមិនសុខចិត្ត រឿងដែលអាជ្ញាធរម៉ាឡេស៊ី រកឃើញមេរោគកូរ៉ូណាថ្មី លើស្ត្រីជនជាតិអាមេរិក វ័យ ៨៣ ឆ្នាំ ដែលជាអ្នកដំណើរលើកប៉ាល់ទេសចរ វ៉េស្ទើដាម (Westerdam) ស្របពេលដែលខាងអាជ្ញាធរកម្ពុជា រកមិនឃើញមេរោគនេះ។
លោក កុយ គួង កាលពីថ្ងៃទី២៧ ខែកុម្ភៈ ពោលគឺ ២ថ្ងៃក្រោយជំនួបនោះថា ការមិនទាន់មានចម្លើយនេះ គឺដោយសារលោកអះអាងថា ខាងតំណាងទូតម៉ាឡេស៊ី បានទទួលចម្ងល់ពីខាងកម្ពុជារួចហើយ ហើយគាត់នឹងពាំនាំយកចម្ងល់នោះ ទៅជូនថ្នាក់របស់គាត់។
អាស៊ីសេរី នៅតែមិនទាន់អាចសុំការឆ្លើយតប ពីមន្ត្រីស្ថានទូតប្រទេសម៉ាឡេស៊ី ជុំវិញរឿងនេះបាននៅឡើយទេ គិតត្រឹមម៉ោងផ្សាយនេះ។
អ្នកឃ្លាំមើលសង្គម និង អ្នកវិភាគគោលនយោបាយ សុទ្ធតែយល់ស្របគ្នាថា ការដាក់មន្ទិលទៅលើប្រព័ន្ធសុខាភិបាលម៉ាឡេស៊ី ថាខ្វះស្តង់ដារ និងធ្វើការខ្ជីខ្ជា ខ្វះការទទួលខុសត្រូវ គឺគ្រាន់តែលេសរបស់របបក្រុងភ្នំពេញ ក្នុងការបំភាន់មតិសាធារណជន ដើម្បីលុបលាងភាពបាក់មុខរបស់របបក្រុងភ្នំពេញ ជុំវិញការថ្លោះធ្លោយរឿងទទួលអ្នកដំណើរលើកប៉ាល់ទេសចរ វ៉េស្ទើដាម ដែលមានអ្នកដំណើរផ្ទុកជំងឺកូរ៉ូណាថ្មីនេះប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។