សកម្មជន​បក្ស​ប្រឆាំង​ខេត្ត​ស្វាយរៀង ៤​នាក់ ត្រូវ​បាន​ដោះលែង ក្រោយ​បង្ខំ​ឱ្យ​ឈប់​គាំទ្រ​បក្ស​ខ្លួន

ដោយ​ សុជីវី
2020-10-09
Share
ជុំ សារ៉ាត់ លោក ជុំ សារ៉ាត់ សកម្មជន​គណបក្ស​សង្គ្រោះ​ជាតិ ជំទប់​ទី២ ឃុំ​អន្លង់​រាប ស្រុក​វាលវែង ខេត្ត​ពោធិ៍សាត់។
រូប៖ ហ្វេសប៊ុក ក្រញូង ព្រៃឡង់

អាជ្ញាធរ​ខេត្ត​ស្វាយរៀង​បាន​ដោះលែង​សកម្មជន​គណបក្ស​សង្គ្រោះ​ជាតិ ៤​នាក់​វិញ​ហើយ នៅ​រសៀល​ថ្ងៃ​ទី​៨ តុលា បន្ទាប់​ពី​បាន​បង្ខំ​ពួកគេ​ឱ្យ​សារភាព​ឈប់​គាំទ្រ​ប្រធាន​ស្ដីទី​គណបក្ស​សង្គ្រោះ​ជាតិ លោក សម រង្ស៊ី។ មន្ត្រី​សង្គម​ស៊ីវិល ចាត់​ទុក​រឿង​នេះ ថា ជា​ការ​បង្ខិតបង្ខំ​ប្រជាពលរដ្ឋ​ដោយ​ខុសច្បាប់។

សកម្មជន​គណបក្សប្រឆាំង​ទាំង ៤​នាក់ ដែល​អាជ្ញាធរ​ដោះលែង​វិញ​នោះ រួមមាន ទីប្រឹក្សា​គណបក្ស​សង្គ្រោះ​ជាតិ​ខេត្ត​ស្វាយរៀង លោក ព្រុំ សាមាន និង​លោក កង ថាន ជំទប់​ទី​២ ឃុំ​អង្គប្រស្រែ ស្រុក​រមាសហែក ចាប់ខ្លួន​កាលពី​ល្ងាច​ថ្ងៃ​ទី​៧​តុលា​។ លោក ពេជ ឃន សមាជិក​គណៈកម្មការ​បក្ស​សង្គ្រោះ​ជាតិ​ស្រុក​រមាសហែក និង​លោក ម៉ៅ សោម ជា​សមាជិក​ក្រុមប្រឹក្សាឃុំ​អង្គ​ប្រស្រែ​ជាប់ឆ្នោត​គណបក្ស​សង្គ្រោះជាតិ ចាប់ខ្លួន​នៅ​ព្រឹក​ថ្ងៃ​ទី​៨ តុលា។

ប្រពន្ធ​របស់​លោក ព្រុំ សាមាន គឺ លោកស្រី អ៊ុំ សាមាន ប្រាប់​អាស៊ីសេរី​នៅ​រសៀល​ថ្ងៃ​ទី៨ តុលា ថា ប៉ូលិស​ចាប់​ប្ដី​របស់​លោកស្រី​នៅ​ក្នុង​ផ្ទះ​ដោយ​ពុំ​មាន​ដីកា​ពី​តុលាការ​ឡើយ។ លោកស្រី​ឱ្យ​ដឹង​ទៀត​ថា ប៉ូលិស​បាន​បញ្ជូន​ប្ដី​របស់​លោក​ស្រី​ទៅ​ឃុំខ្លួន​នៅ​ស្នងការដ្ឋាន​នគរបាល​ខេត្ត​ស្វាយរៀង និង​បាន​បង្ខំ​ឱ្យ​គាត់​សារភាព​ពី​ទោសកំហុស​និង​ឱ្យ​ឈប់​ធ្វើ​នយោបាយ​ជាមួយ​គណបក្ស​ប្រឆាំង ដើម្បី​ជា​ថ្នូរ​បាន​ដោះលែង​ឱ្យ​មាន​សេរីភាព​វិញ៖ «គាត់​ថា ឱ្យ​នាំ​កូន​ទៅផ្ទះ​វិញ​ទៅ​ល្ងាច​បន្តិច​គាត់​មក​វិញ​ហើយ ថា មិនបាច់​ភ័យ​ទេ ហើយ​ពូ​ប៉ូលិសៗ​ហ្នឹង​ក៏​មក​និយាយ​មួយ​ខ្ញុំ​ដែរ សុទ្ធតែ​អ្នក​ស្គាល់​គ្នា​។ គាត់​ថា ភ័យ​អី​សួរ​តែ​បន្តិច​ហ្នឹង​បាន​ទៅ​ហើយ អញ្ជើញ​ទៅផ្ទះ​មុន​ទៅ ខ្ញុំ​យក​បាយ​យក​ទឹក​ឱ្យ​គាត់​ហូប​ហ្នឹង ហើយ​មិញ​គាត់​ទូរស័ព្ទ​មក​ខ្ញុំ​ថា មិនបាច់​ព្រួយបារម្ភ​អី​ទេ​បន្តិចទៀត​ទៅដល់​ផ្ទះ​ហើយ»

សកម្មជន​គណបក្សប្រឆាំង​ទាំង ៤​នាក់​នេះ បាន​ត្រឡប់​ទៅដល់​ផ្ទះ​វិញ​ហើយ នៅ​ម៉ោង​៤​រសៀល​ថ្ងៃ​ទី​៨​តុលា ក៏ប៉ុន្តែ​ពួកគេ​សុំ​មិន​អត្ថាធិប្បាយ​ជុំវិញ​ការ​ដោះលែង​នេះ​ទេ ដោយ​ព្រួយបារម្ភ​ពី​សុវត្ថិភាព​ផ្ទាល់ខ្លួន។

ប៉ុន្តែ​សកម្មជន​គណបក្ស​សង្គ្រោះជាតិ ខេត្ត​ស្វាយរៀង លោក គង់ ម៉ាស់ ដែល​បាន​ចុះ​តាមដាន​រឿង​នេះ​ផ្ទាល់​ប្រាប់​ថា សកម្មជន​គណបក្សប្រឆាំង​ទាំង​៤​នាក់​នោះ​ត្រូវ​បាន​ចាប់ខ្លួន បន្ទាប់ពី​ពួកគេ​បាន​ថត​វីដេអូ​ជុំ​គ្នា​អំពី​គម្រោង​ចូលរួម​គាំទ្រ​ប្រធាន​ស្ដីទី​គណបក្ស​សង្គ្រោះជាតិ លោក សម រង្ស៊ី ចូល​ស្រុក​វិញ លើក​ទី​២ នៅ​ពេល​ខាងមុខ៖ «វីដេអូ​ហ្នឹង​គាត់​ធ្វើ​គ្នា​គាត់ ហើយ​គាត់​ឆាត​ចូល​នៅ​ក្នុង​ក្រុម ប៉ុន្តែ​មិន​ដឹង​ថា នៅ​ក្នុង​ក្រុម​នោះ​វា​មាន​អ្នកណា​នៅ​ខ្លះ​ទេ ។ ប៉ុន្តែ​យើង​អត់​ដឹង​ទេ គ្រាន់តែ​ធ្វើ​វីដេអូ​រួចហើយ​គាត់​ឆាត​តៗ​គ្នា​ទៅ វីដេអូ​ហ្នឹង​ក៏​បែក​ធ្លាយ​ថា គាត់​ចាំ​ទទួល​លោក​ប្រធាន​សម រង្ស៊ី មានតែ​រឿង​ហ្នឹងឯង»

អាស៊ីសេរី​មិនអាច​ទាក់ទង​ស្នងការ​នគរបាល​ខេត្ត​ស្វាយរៀង លោក កឹង ឃន ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បានទេ នៅ​ថ្ងៃទី​៨​តុលា ដោយ​ទូរស័ព្ទ​ចូល​ជា​ច្រើនដង​ពុំ​មាន​អ្នក​ទទួល។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (Licadho) លោក អំ សំអាត យល់​ថា ការ​ចាប់ខ្លួន​សកម្មជន​គណបក្សប្រឆាំង​នេះ​ជា​រឿង​នយោបាយ​ច្រើនជាង​ការ​អនុវត្ត​ច្បាប់ ។​លោក​បន្ថែម​ថា សំណុំរឿង​ព្រហ្មទណ្ឌ​មិន​អាច​បញ្ចប់​ដោយ​ការ​ធ្វើ​កិច្ចសន្យា ឬ​បង្ខំ​ឱ្យ​ជនណា​ម្នាក់​សារភាព​ពី​ទោសកំហុស​ហើយ​ដោះលែង​បាន​ឡើយ។ លោក​បញ្ជាក់​ថា សកម្មភាព​ទាំងឡាយ​ណា​ដែល​បង្ខិតបង្ខំ​ពលរដ្ឋ​ឱ្យ​សារភាព​ពី​ទោសកំហុស ឬ​ឱ្យ​បោះបង់​ការ​គាំទ្រ​គណបក្ស​នយោបាយ ដើម្បី​ជាំ​ថ្នូរ​ដោះលែង​ឱ្យ​មាន​សេរីភាព​គឺជា​ទង្វើ​ខុសច្បាប់៖ «ប៉ុន្តែ​បើសិនជា​ការ​ចាប់​ទៅ​បង្ខំ​ឱ្យ សារភាព​ទាក់ទង​ថា​ឱ្យ​ឈប់​ធ្វើ​នយោបាយ ឬក៏​អី​ពីព្រោះ​រដ្ឋធម្មនុញ្ញ​គឺ បាន​ចែងថា​ពលរដ្ឋ​គ្រប់រូប​មាន​សិទ្ធិ​ចូលរួម​យ៉ាងសកម្ម​នៅ​ក្នុង​ជីវភាព​នយោបាយ ហើយ​ប្រជាពលរដ្ឋ​ទាំងអស់​មាន​សិទ្ធិ​ក្នុង​ការ​ជ្រើសរើស​គណបក្ស​ដែល​ខ្លួន​ស្រលាញ់​ដោយ​ស្របច្បាប់​។ នេះ​ជា​សិទ្ធិ​ជា​មូលដ្ឋាន​របស់​ប្រជាពលរដ្ឋ​តាម​គោលការណ៍​លទ្ធិប្រជាធិបតេយ្យ គ្មាន​អ្នកណា​អាច​ចាប់​បង្ខំ​បាន​ទេ»

កាលពី​ថ្ងៃ​ទី​៧ តុលា លោកនាយក​រដ្ឋមន្ត្រី ហ៊ុន សែន បាន​ប្រកាស​ជាថ្មី​ថា សកម្មជន​គណបក្សប្រឆាំង​ទាំងឡាយ​ណា​ដែល​ធ្វើ​សកម្មភាព​នយោបាយ​គាំទ្រ​ថ្នាក់ដឹកនាំ​គណបក្ស​សង្គ្រោះ​ជាតិ ជាពិសេស​លោក សម រង្ស៊ី នឹង​ត្រូវ​ចាប់ខ្លួន​ដោយ​មិន​លើកលែង​ឡើយ​។ ការ​ព្រមាន​របស់​លោក ហ៊ុន សែន នេះ បន្ទាប់ពី លោក សម រង្ស៊ី បាន​ប្រកាស​ថា លោក​នឹង​ធ្វើ​មាតុភូមិ​និវត្ត​លើក​ទី​២ ដើម្បី​ចូល​ទៅ​ស្ដារ​ប្រជាធិបតេយ្យ​នៅ​កម្ពុជា​ឱ្យ​រស់​ឡើងវិញ​នៅ​ពេល​ខាងមុខ។

ចំណែក​នៅ​ខេត្ត​ពោធិ៍សាត់​វិញ ជំទប់​ទី​២ ឃុំ​អន្លង់​រាប ស្រុក​វាលវែង ជាប់ឆ្នោត​គណបក្ស​សង្គ្រោះ​ជាតិ គឺ​លោក​ជុំ សារ៉េត ហៅ​ក្រៅ ជុំ សារ៉ាត់ ដែល​អាជ្ញាធរ​បាន​ចាប់ខ្លួន កាលពី​ថ្ងៃ​ទី​៦ តុលា នោះ ត្រូវ​បាន​បញ្ជូន​ទៅ​ឃុំខ្លួន​នៅ​ពន្ធនាគារ​ខេត្ត​ពោធិ៍សាត់​ហើយ កាលពី​រសៀល​ថ្ងៃ​ទី​៧ តុលា។ អយ្យការ​អម​សាលាដំបូង​ខេត្ត​ពោធិ៍សាត់ អ្នកស្រី ថាន់ សុគន្ឋថង បាន​ចោទប្រកាន់​លោក ជុំ សារ៉េត ចំនួន​២​បទល្មើស គឺ បទ​ធ្វើ​ឱ្យ​ប៉ះពាល់​កម្ម​សិទ្ធិ​ឯកជន និង​បទ​ហិង្សា​ដោយ​ចេតនា។

កូនប្រសា​រលោក ជុំ សារ៉េត គឺ លោក ក្រឹម ឆាយ ថ្លែង​ថា ការ​ចាប់ខ្លួន​នេះ​ជា​រឿង​អយុត្តិធម៌​មិន​អាច​ទទួល​យក​បានទេ ពីព្រោះ​លោក​ថា ឪពុកក្មេក​របស់​លោក​មិន​បាន​ប្រព្រឹត្តិ​ខុសច្បាប់​ដូច​ការ​ចោទ​ប្រកាន់​នោះ​ឡើយ៖ «អត់​មាន​ទេ​បង ព្រោះ​ខ្ញុំ​កូនចៅ​គាត់​អត់​មាន​ចម្ការ​មានអី​ធ្វើ​ទេ ហើយ ណាមួយ​គេ​អស់​តាំង​បី​ឆ្នាំ​២០១៤​ណោះ ហើយ​គេ​ប្ដឹង​គាត់​តាំងពី​ឆ្នាំ​២០១៤ គេ​សើរើ​តាំងពី​ឆ្នាំ​២០១៤​មក​យូរហើយ»

ចាប់​តាំង​ពី​ខែ​មករា ឆ្នាំ​២០២០​មក មាន​សកម្មជន​គណបក្ស​ប្រឆាំង​ជាង ២០​នាក់​ហើយ​ត្រូវ​បាន​អាជ្ញាធរ​ចាប់ខ្លួន និង​ដាក់​ឃុំ​នៅ​ពន្ធនាគារ។ តុលាការ​បាន​ចោទប្រកាន់​ពី​បទ រួមគំនិត​ក្បត់ ញុះញង់​ឲ្យ​យោធិន​មិន​ស្ដាប់បង្គាប់ ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍ ញុះញង់​បង្ក​ឱ្យ​មាន​ភាព​វឹកវរ​នៅ​ក្នុង​សង្គម ប្រមាថ​ថ្នាក់ដឹកនាំ​រដ្ឋាភិបាល ប៉ះពាល់​កម្ម​សិទ្ធិ​ឯកជន និង​បទ​ហិង្សា​ដោយ​ចេតនា ជាដើម​។ ក្រៅ​ពី​នេះ ក្រុម​សកម្មជន​សង្គម អ្នកនយោបាយ និង​យុវជន​ជាង​១០ នាក់​ផ្សេង​ទៀត ក៏​ត្រូវ​បាន​របប​លោក ហ៊ុន សែន ចាប់​ដាក់​ពន្ធនាគារ​ដែរ ក្រោម​បទ​ចោទ ញុះញង់​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។