មន្ត្រី​ជាន់​ខ្ពស់​គណបក្ស​ប្រឆាំង​មិន​ចាប់​អារម្មណ៍​នឹង​ក្រសួង​យុត្តិធម៌​ចង់​ប្ដឹង​លោក សម រង្ស៊ី មួយ​ករណី​ថ្មី​ទៀត​ឡើយ

ដោយ ទីន ហ្សាការីយ៉ា
2020-10-30
Share
សម រង្ស៊ី អេង ឆៃអ៊ាង ជិន ម៉ាលីន (ឆ្វេង) លោក សម រង្ស៊ី ប្រធាន និង​លោក អេង ឆៃអ៊ាង អនុ​ប្រធាន​គណបក្ស​សង្រ្គោះ​ជាតិ (ស្ដាំ) លោក ជិន ម៉ាលីន អ្នក​នាំ​ពាក្យ​ក្រសួង​យុត្តិធម៌។
រូប៖ RFA និង​ហ្វេសប៊ុក

មន្រ្តីជាន់ខ្ពស់​គណបក្ស​ប្រឆាំង​មិន​ចាប់​អារម្មណ៍​លើ​ការ​ក្រសួង​យុត្តិធម៌ ដែល​ចង់​ប្ដឹង​លោក សម រង្ស៊ី មួយ​ករណី​ថ្មី​ទៀត​នោះ​ទេ។

លោក អេង ឆៃអ៊ាង​ អនុប្រធាន​គណបក្ស​សង្គ្រោះ​ជាតិ មាន​ប្រសាសន៍​កាល​ពី​ថ្ងៃ​ទី២៩ តុលា​ថា គ្មាន​រឿង​អ្វី​ប្លែក​ទេ របប​ក្រុង​ភ្នំពេញ​ប្ដឹង​ផ្ដល់​មេ​ដឹក​នាំ​គណបក្ស​ប្រឆាំង​នោះ។ លោក​បញ្ជាក់​ថា ស្ថាប័ន​តុលាការ​មិន​មែន​ជា​ស្ថាប័ន​ឯករាជ្យ​សម្រាប់​ពលរដ្ឋ​ទូទៅ​ដូច​នៅ​ប្រទេស គោរព​នីតិរដ្ឋ និង​ប្រជាធិបតេយ្យ៖ «

ការ​លើក​ឡើង​របស់មន្រ្តី​ជាន់​ខ្ពស់​គណបក្ស​ប្រឆាំង​នេះ នៅ​បន្ទាប់​ពី​អ្នក​នាំ​ពាក្យ​ក្រសួង​យុត្តិធម៌ លោក ជិន ម៉ាលីន បាន​ប្រាប់​វិទ្យុ​បារាំង​ថា  តុលាការ​នឹង​សិក្សា​ផ្លូវ​ច្បាប់​លើ​ពាក្យ​សំដី​របស់​លោក សម រង្ស៊ី ដែល​រិះគន់​នៅ​ក្នុង​វិឌីអូ​ឃ្លីប​មួយ ដែល​បង្ហោះ​នៅ​លើ​បណ្ដាញ​សង្គម​ហ្វេសប៊ុក​របស់​លោក កាល​ពី​ថ្ងៃ​ទី២៥ តុលា ដែល​ចោទ​ប្រកាន់​តុលាការ​ថា ជា​ស្ថាប័ន​មិន​ឯករាជ្យ ហើយ​ចង់​រុះរើ​ប្រព័ន្ធ​តុលាការ​សព្វ​ថ្ងៃ។ លោក ជិន ម៉ាលីន អះអាង​ថា លោក សម រង្ស៊ី កំពុង​តែ​ប្រមាថ​ព្រះមហាក្សត្រ ដែល​លោក​ថា ព្រះមហាក្សត្រ ធ្វើ​ជា​ប្រធាន​ក្រុម​ប្រឹក្សា​នៃ​អង្គ​ចៅក្រម​ទីងមោង​ជា​ដើម។ លោក ជិន ម៉ាលីន បញ្ជាក់​ថា បើសិនជា តុលាការ​រក​ឃើញ​ធាតុ​ផ្សំ​នៃ​បទ​ល្មើស​ប្រមាថ​ដល់​អង្គ​ព្រះមហាក្សត្រ គឺ​តុលាការ​នឹង​ដំណើរ​ការ​នីតិវិធី​ចាត់​ការ​លើ​លោក សម រង្ស៊ី តាម​ផ្លូវ​ច្បាប់។

លោក សម រង្ស៊ី បាន​ថ្លែង​ក្នុង​បទ​សម្ភាសន៍​មួយ​នៅ​លើ​បណ្ដាញ​សង្គម​ហ្វេសប៊ុក​របស់​លោក កាលពីថ្ងៃទី២៥តុលាថា តុលាការ​ជា​ឧបករណ៍​សម្រាប់​អ្នក​មាន​លុយ និង​អ្នក​មាន​អំណាច​ធ្វើ​បាប​អ្នក​ក្រីក្រ។ លោក​បន្ថែម​ថា ប្រធាន​ក្រុម​ប្រឹក្សា​នៃ​អង្គ​ចៅក្រម​មាន​ព្រះរាជ​តួនាទី​សំខាន់​ក្នុង​ការ​ពិនិត្យ​មើល​ចៅក្រម​ឲ្យ​អនុវត្ត​ច្បាប់​ត្រឹមត្រូវ ប៉ុន្តែ​ចៅក្រម និង​តុលាការ​សព្វថ្ងៃ​នេះ មិនបាន​កាត់​សេចក្ដី​ត្រឹមត្រូវ​ឡើយ៖ «

ការថ្លែង​របស់​លោក សម រង្ស៊ី​នេះ ធ្វើឡើង​ក្រោយ​ពី តុលាការ​ក្រុង​ភ្នំពេញ​ ចេញ​ដីកា​បង្គាប់​ឲ្យ​ក្រុម​មេ​ដឹក​នាំ​គណបក្ស​សង្គ្រោះ​​ជាតិ កំពុង​និទ្ទេស​ខ្លួន នៅ​ក្រៅ​ប្រទេស​ចំនួន ៩នាក់ ចូល​បំភ្លឺ​ នៅ​ថ្ងៃ​ទី១១ វិច្ឆិកា​ ខាង​មុខ។ មេដឹកនាំគណបក្សប្រឆាំងទាំង៩នាក់ រួម​មាន​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ លោក អេង ឆៃអ៊ាង អនុ​ប្រធាន​គណបក្ស អ្នកស្រី មូរ សុខហួរ អនុ​ប្រធាន​គណ​បក្ស និង​សមាជិក​គណបក្ស ៦រូប គឺ​មាន​លោក អ៊ូ ចន្ទ័ប្ញទិ្ធ លោក ហូ វ៉ាន់ លោក ឡុង រី លោក ម៉ែន សុថាវរិន្ទ្រ លោក នុត រំដួល និង​អ្នកស្រី ជូឡុង ស៊ូមូរ៉ា។

ក្រុម​ចៅក្រម​សាលា​ដំបូង​រាជធានី​ភ្នំពេញ តម្រូវ​ឲ្យ​ក្រុម​មេដឹកនាំ​គណបក្ស​ប្រឆាំង​ទាំង ៩នាក់ ចូល​ឆ្លើយ​បំភ្លឺ​អំពី​បទ​ចោទ "ឧបឃាតដែល​ពាក់ព័ន្ធ​នឹង​អង្គហេតុ «ការ​ប៉ុនប៉ង​ធ្វើ​រដ្ឋប្រហារ» ផ្ដួល​រំលំ​រដ្ឋាភិបាល ក្រោម​ឧបាយកល ផែនការ​វិល​ត្រលប់​ចូល​ប្រទេស​កម្ពុជា​វិញ របស់​លោក សម រង្ស៊ី នៅ​ឆ្នាំ២០១៩ ដោយ​អំពាវនាវ និង​ប្រើប្រាស់​ថវិកា​ប៉ុនប៉ង​បង្កើត​កង​កម្លាំង​ប្រដាប់​អាវុធ​ខុស​ច្បាប់ ដើម្បី​អនុវត្ត​ផែនការ។ បទ​ចោទ​នេះ ចែង​នៅ​មាត្រា ៤៥១ នៃ​ក្រម​ព្រហ្មទណ្ឌ ដែល​ត្រូវ​ផ្ដន្ទាទោស​ពន្ធនាគារ ពី ១៥ឆ្នាំ ទៅ ៣០ឆ្នាំ។

រីឯ​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ មក​ទល់​ពេល​នេះ មាន​បណ្ដឹង​ជា​ច្រើន​នៅ​តុលាការ ក្នុង​សំណុំ​រឿង​ខ្លះ​តុលាការ​បាន​ផ្ដន្ទាទោស​លោក​រួច​ហើយ រីឯ​សំណុំ​រឿង​ខ្លះ​ទៀត តុលាការ​មិន​ទាន់​កាត់​សេចក្ដី​នៅ​ឡើយ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។