គណបក្សសង្គ្រោះជាតិគាំទ្រសហភាពអឺរ៉ុបដាក់ទណ្ឌកម្មមេដឹកនាំកម្ពុជាដូចមេដឹកនាំប្រទេសបែឡារុស្ស៊ី (Belarus) ដែលជាមេដឹកនាំផ្ដាច់ការ។
អ្នកឃ្លាំមើលសង្គមគាំទ្រសំណើរបស់គណបក្សប្រឆាំង និងស្នើមានឱ្យការរួបរួម ដើម្បីដាក់បន្ទុកទៅលោកនាយករដ្ឋមន្ត្រី ហ៊ុន សែន ប៉ុន្តែអ្នកនាំពាក្យគណបក្សកាន់អំណាចថា ការដាក់ទណ្ឌកម្មលើលោក ហ៊ុន សែន មិនអាចទៅរួចទេ ព្រោះស្ថានភាពប្រទេសកម្ពុជា ខុសពីប្រទេសបែឡារុស្ស៊ី។
គណបក្សសង្គ្រោះជាតិលើកឡើងក្នុងសេចក្ដីថ្លែងការណ៍ផ្សាយនៅថ្ងៃទី១៩ សីហាថា ពលរដ្ឋប្រទេសបែឡារុស្ស៊ី ក៏ដូចជាប្រទេសកម្ពុជាដែរ កំពុងរស់នៅក្រោមការគាបសង្កត់ដោយជនផ្ដាច់ការ ដែលបានយកប្រទេសជាតិធ្វើជាកម្មសិទ្ធិផ្ទាល់ខ្លួន និងបំផ្លាញសេរីភាពរបស់ពលរដ្ឋ ដែលជាទង្វើរំលោភបំពានរដ្ឋធម្មនុញ្ញជាច្បាប់កំពូលរបស់ជាតិ។ ការប្រកាសរបស់គណបក្សសង្គ្រោះជាតិនេះ ធ្វើឡើង ខណៈក្រុមប្រឹក្សាអឺរ៉ុបបានរៀបចំបញ្ជីឈ្មោះមន្ត្រីបែឡារុស្ស៊ី ដែលត្រូវទទួលរងទណ្ឌកម្មបន្ទាប់ពីមានការបង្ក្រាបដោយហិង្សាដ៏ឃោរឃៅលើកម្មករបាតុករ។ គណបក្សសង្គ្រោះជាតិឱ្យដឹងទៀតថា មេដឹកនាំនៃប្រទេសបែឡារុស្ស៊ីបានប្រើហិង្សា ចាប់ខ្លួន លើបាតុករក្រោយការបោះឆ្នោតមួយដែលមានការលួចបន្លំ។ គណបក្សនេះបន្តថា ទណ្ឌកម្មដែលត្រូវបានអនុវត្តលើមន្ត្រីប្រទេសបែឡារុស្ស៊ីត្រូវតែអនុវត្តលើលោក ហ៊ុន សែន និងបក្សពួកនៃរបបក្រុងភ្នំពេញដែរ។
អនុប្រធានគណបក្សសង្រ្គោះជាតិ អ្នកស្រី មូ សុខហួរ ឱ្យអាស៊ីសេរីដឹងបន្ថែមថា អ្នកស្រីជឿជាក់ថា បើលោក ហ៊ុន សែន នៅតែបន្តប្រើអំណាចផ្ដាច់ការមិនយកចិត្តទុកលើសំណើរបស់សហភាពអឺរ៉ុបទេ នោះសហភាពអឺរ៉ុបនឹងដាក់ទណ្ឌកម្មលើលោក ហ៊ុន សែន និងបក្សពួកដែលនឹងការដាក់ទណ្ឌកម្មលើមេដឹកនាំប្រទេសបែឡារុស្ស៊ី។ អ្នកស្រីឱ្យដឹងទៀតថា តាមដែលអ្នកស្រីបានដឹងពេលនេះសហភាពអឺរ៉ុបបានស្រង់បញ្ជីឈ្មោះនៃមេដឹកនាំកម្ពុជាមួយចំនួនដាក់ក្នុងបញ្ជីខ្មៅរបស់ខ្លួនរូចហើយ ហើយពួកគេក៏កំពុងធ្វើច្បាប់សម្រាប់ដាក់ទណ្ឌកម្មលើមេដឹកនាំដែលរំលោភសិទ្ធិមនុស្ស និងប្រជាធិបតេយ្យនេះខ្លះហើយដែរ៖ «ខ្ញុំយល់ឃើញថា ទណ្ឌកម្មនោះដូចជាដាក់ទណ្ឌកម្មមិនឱ្យលោក ហ៊ុន សែន និងមន្ត្រីជាន់ខ្ពស់របបលោក ហ៊ុន សែន ទៅសហភាពអឺរ៉ុប នោះនឹងមានកើតឡើងរួមទាំងការបង្កកទ្រព្យសម្បត្តិ ដូច្នេះទណ្ឌកម្មនេះមិនប៉ះពាល់ប្រជាពលរដ្ឋទេ គឺឆ្ពោះទៅបុគ្គលជាន់ខ្ពស់»។
ប៉ុន្តែ អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា សំណើរបស់គណបក្សប្រឆាំងនេះមិនអាចទៅរួចទេ ព្រោះស្ថានភាពប្រទេសកម្ពុជាខុសពីប្រទេសបែឡារុស្ស៊ី។ អ្នកនាំពាក្យគណបក្សកាន់អំណាចរូបនេះ ចាត់ទុកទង្វើរបស់គណបក្សសង្រ្គោះជាតិជាចរិតពិសពុលឈ្នានីសរបស់ក្រុមឧទ្ទាមក្រៅច្បាប់ ព្រោះក្រុមនេះមិនចង់ឱ្យកម្ពុជាមានការរីកចម្រើន និងមានសុខសន្តិភាពនោះទេ៖ « គេ ( គណបក្សសង្គ្រោះជាតិ ) ច្រណែនដោយគេមិនបានកាន់អំណាចគេរត់ទៅក្រៅហើយគេឈ្នានីស។ ដូច្នេះហើយបានជាមានការអំពាវនាវដល់ទៅសហភាពអឺរ៉ុបដាក់ទណ្ឌកម្ម EBA ២០ភាគរយមកលើកម្ពុជាហើយពេលនេះគំរូបែឡារុសមកធ្វើគំរូទៀត » ។
ទោះបីលោក សុខ ឥសាន អះអាងថា ប្រទេសកម្ពុជាខុសពីប្រទេសបែឡារុស្ស៊ីក្ដី ប៉ុន្តែកាលពីថ្ងៃទី១២ ខែសីហាកន្លងទៅនេះ សហភាពអឺរ៉ុបបានសម្រេចជាផ្លូវការចាប់ផ្ដើមគិតពន្ធលើទំនិញកម្ពុជា២០% ដែលធ្វើឱ្យផលិតផលនាំចេញរបស់កម្ពុជាទៅសហភាពអឺរ៉ុបដែលតម្លៃជាង ១ពាន់លានអឺរ៉ូ ត្រូវជាប់ពន្ធ ឬកម្ពុជាអាចនឹងត្រូវខាតបង់ទឹកប្រាក់រវាងពី ១២០ ទៅ ២០០ លានដុល្លារក្នុងមួយឆ្នាំ ការដាក់ទណ្ឌកម្មនេះដោយអឺរ៉ុបចោទប្រកាន់ថា របបក្រុងភ្នំពេញបានរំលោភសិទ្ធិមនុស្ស និងប្រជាធិបតេយ្យ។
អ្នកវិភាគនយោបាយលោក គឹម សុខ យល់ថា ស្ថានភាពប្រទេសកម្ពុជាបើមិនសង្កត់កលោក ហ៊ុន សែន ឱ្យកាន់តែធ្ងន់ទេ គឺលោក ហ៊ុន សែន មិនត្រឡប់ក្រោយបែរមករកការគោរពសិទ្ធិមនុស្ស និងប្រជាធិបតេយ្យនោះទេ។ លោក គឹម សុខ បន្តថា ដើម្បីឱ្យសហភាពអឺរ៉ុបអាចចាប់កំហុសរបបលោក ហ៊ុន សែន បន្ថែមទៀតបានលុះត្រាអ្នកប្រជាធិបតេយ្យហ៊ានលះបង់សិទ្ធិសេរីភាពរហូតដល់ជីវិតថែមទៀតផង គឺធ្វើពលិកម្មរួមគ្នាបាតុកម្មអហិង្សានៅប្រទេសកម្ពុជា៖ «ដើម្បីឱ្យគេ ( សហភាពអឺរ៉ុប ) ជួយយើងបានគេមានហេតុផលគ្រប់គ្រាន់នឹងលូកដៃជួយយើងទាល់តែយើងខ្លួនឯងប្រឹងប្រែងលះបង់ដោយធ្វើពលិកម្មគ្រប់ភាគីទាំងអស់ទាំងអ្នកនយោបាយ អ្នកក្រៅនយោបាយ ទាំងយុវជន ក្នុងការបង្កើតសម្ពាធឱ្យកាន់តែធំលើអំណាចផ្ដាច់ការ»។
រីឯគណបក្សសង្គ្រោះជាតិវិញលើកឡើងថា ដំណោះស្រាយល្អ គឺការចរចាតាមរយៈការសន្ទនាគ្នាដោយបើកចំហ និងទូលំទូលាយដោយមានការចូលរួមពីគ្រប់ភាគីពាក់ព័ន្ធ និងកងកម្លាំងនយោបាយទាំងអស់ក្នុងស្មារតីប្រជាធិបតេយ្យ សិទ្ធិសេរីភាព និងការផ្សះផ្សាជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។