អ្នកវិភាគនយោបាយ និងសង្គម ថា ការគ្មានលទ្ធផល អំពីជំនួបជាមួយមន្ត្រីទូតម៉ាឡាស៊ី ករណី ដែលលោក ហ៊ុន សែន ឱ្យកោះហៅ ដើម្បីចូលបំភ្លឺរឿងមេរោគកូរ៉ូណា ឬកូវីដ-១៩ (COVID-19) នោះ គឺជាបរាជ័យលើកទី ៤ របស់លោក ហ៊ុន សែន ក្នុងការប៉ុនប៉ងបង្វែរការចាប់អារម្មណ៍ លើរឿងអាម៉ាស់ផ្ទួនៗគ្នា របស់របបក្រុងភ្នំពេញ ករណីអាជ្ញាធរម៉ាឡេស៊ី រកឃើញស្ត្រីអ្នកដំណើរលើកប៉ាល់ទេសចរ វ៉េស្ទើដាម (Westerdam) មានផ្ទុកមេរោគកូរ៉ូណាថ្មីនេះ។ តែកម្ពុជារកមិនឃើញ។
អ្នកវិភាគនយោបាយ និងសង្គមលោក គឹម សុខ ដែលហ៊ាននិយាយរិះគន់របបលោក ហ៊ុន សែន ឥតសំចៃមាត់ និងដែលកំពុងរស់នៅនិទ្ទេសខ្លួននៅប្រទេសហ្វាំងឡង់ ថា ការមិនប្រកាសលទ្ធផល អំពីជំនួបកម្រិតការទូត ករណីដែលរបបនេះ អះអាងថា ឱ្យចូលបំភ្លឺរឿងចោទប្រកាន់អាជ្ញាធរសុខាភិបាលប្រទេសម៉ាឡេស៊ី ពីភាពមិនប្រក្រតី ក្នុងការរកឃើញមេរោគកូរ៉ូណា ឬកូវីដ-១៩ បែបនោះ គឺជាបរាជ័យផ្ទួនៗ របស់លោក ហ៊ុន សែន ក្នុងការព្យាយាមបំភាន់មតិសាធារណជន អំពីការថ្លោះធ្លោយរបស់លោក ក្នុងការទទួលយកកប៉ាល់ទេសចរ វ៉េស្ទើដាម (Westerdam) ដែលអ្នកដំណើរម្នាក់មានផ្ទុកជំងឺរលាកផ្លូវដង្ហើម ដ៏កាចសាហាវនេះ៖ «នេះគឺជាបរាជ័យលើកទីបួនរបស់លោក ហ៊ុន សែន ក្នុងការសង្គ្រោះមុខមាត់របស់ខ្លួន ឬជាភាពអាម៉ាស់លើកទី៤»។
លោក គឹម សុខ ថា ការធ្វើជាកោះហៅឱ្យតំណាងទូតរបស់ប្រទេសម៉ាឡេស៊ី ទៅជួបនេះ គឺធ្វើគ្រាន់តែបង្គ្រប់កិច្ចប៉ុណ្ណោះ។ គ្មានបានលទ្ធផលអ្វី ទៅតាមការចង់បានរបស់លោក ហ៊ុន សែន នោះទេ ព្រោះអាជ្ញាធរប្រទេសម៉ាឡេស៊ី បានបញ្ជាក់ជំហរជាក់លាក់ចំនួនបីដងរួចទៅហើយ ថា ស្ត្រីជនជាតិអាមេរិក ពិតជាមានមេរោគនេះមែន និងឥឡូវនេះបានជាសះស្បើយពីជំងឺនេះ៖ «ម្ល៉ោះហើយ ជំនួបរវាងឯកអគ្គរាជទូតម៉ាឡេស៊ីនៅភ្នំពេញ និងតំណាងក្រសួងការបរទេសកម្ពុជា គ្រាន់តែជាការជួបគ្នា ដែលខាងក្រុមលោក ហ៊ុន សែន ទាមទារឱ្យមានឡើងតាមបបូរមាត់នៃការនិយាយជ្រុលហួសរបស់លោក ហ៊ុន សែន តែប៉ុណ្ណោះ។ វាគ្រាន់តែជារូបភាព ដែលជួបនិយាយពាក្យគួរសម បែបការទូត ហើយគ្មានខ្លឹមសារអ្វី ដែលក្រុមលោក ហ៊ុន សែន អាចស្រង់យកទៅធ្វើជាសេចក្ដីថ្លែងការណ៍អួតកើតនោះទេ។ បែបហ្នឹងហើយ ទើបគ្មានសេចក្ដីថ្លែងការណ៍រួម បន្ទាប់ពីជំនួបនោះ»។
លោក គឹម សុខ ថា បរាជ័យផ្ទួនៗនោះ គឺសរុបទៅ មានចំនួនបួនលើកទៅហើយ ដែលលោក ហ៊ុន សែន និងរបបក្រុងភ្នំពេញ គឺចាប់តាំងពីកើតព្រឹត្តិការណ៍នៃការផ្ទុះការរីករាលដាលនៃជំងឺឆ្លងកូវីដ-១៩ ដែលប្រទេសជាច្រើននៅលើសាកលលោក រិះរកគ្រប់វិធានការ ដើម្បីទប់ស្កាត់។ ប៉ុន្តែលោក ហ៊ុន សែន បែរជាអនុញ្ញាតឱ្យកប៉ាល់ទេសចរ វ៉េស្ទើដាម ដែលមានអ្នកដំណើរផ្ទុកមេរោគនេះ ចូលចតនៅកំពង់ផៃក្រុងព្រះសីហនុ ស្របពេលដែលប្រទេស ៥ មានជប៉ុន ថៃ ហ្វីលីពីន តៃវ៉ាន់ និងដែនដីរបស់អាមេរិកផង គឺកោះហ្គាំ (Guam) បដិសេធមិនឱ្យចូលចត ព្រោះចម្លងមេរោគនេះ ដល់ពលរដ្ឋខ្លួន៖ «ការអាម៉ាស់ធំទីមួយ លោក ហ៊ុន សែន គាត់ផ្សព្វផ្សាយខុសអំពីការមិនខ្លាចវីរុសកូរ៉ូណា។ នេះគឺជាភាពអវិជ្ជាច្បាស់ពេក នៅពេលដែលពិភពលោកទាំងមូល គេនាំគ្នាខ្លាច និងខំបង្ការ។ ភាពអាម៉ាស់ទីពីររបស់លោក ហ៊ុន សែន គឺការណ៍ដែលគាត់ទទួលយកកប៉ាល់ វ៉េស្ទើដាម ដោយអត់ប្រើក្បួនវេជ្ជសាស្ត្រសាកល ដើម្បីពិនិត្យតាមដានភ្ញៀវនៅលើកប៉ាល់នោះទេ ដែលធ្វើឱ្យពិភពលោកចាត់ទុកថា គាត់ជាមេដឹកនាំដែលនាំគ្រោះនៃលទ្ធភាពពង្រីកការឆ្លងរីករាលដាលនៃមេរោគកូរ៉ូណា។ ហើយភាពអាម៉ាស់លើកទីបី ដែលលោក ហ៊ុន សែន បានជួបរួចទៅហើយ គឺការណ៍ដែលគាត់ព្យាយាមបង្កើតវិវាទការទូតជាមួយប្រទេសម៉ាឡេស៊ី នៅពេលដែលម៉ាឡេស៊ី គេគ្រាន់តែធ្វើការងារបច្ចេកទេស និងមិនរុកកួនអ្វីសោះដល់កម្ពុជា។ ហើយកាន់តែអាម៉ាស់ទៅទៀត នៅពេលដែលក្រសួងសុខាភិបាលម៉ាឡេស៊ី គេបានពន្យល់យ៉ាងក្បោះក្បាយអំពីប្រព័ន្ធការងារសុខាភិបាលរបស់គេ ក្នុងការតាមដានជំងឺ»។
ការលើកឡើងរបស់លោក គឹម សុខ នេះ ធ្វើឡើងក្រោយក្រសួងការបរទេសកម្ពុជា នៅតែមិនបញ្ចេញព័ត៌មានអំពីជំនួប កាលពីថ្ងៃទី២៥ ខែកុម្ភៈ រវាងឯកអគ្គរាជទូតប្រទេសម៉ាឡេស៊ីប្រចាំកម្ពុជា ដែលបានទៅជួបរដ្ឋមន្ត្រីការបរទេសកម្ពុជាលោក ប្រាក់ សុខុន ក្រោយលោក ហ៊ុន សែន បង្គាប់ឱ្យកោះហៅ ដើម្បីចូលទៅបំភ្លឺរឿងលទ្ធផលរកឃើញថា ស្ត្រីអ្នកដំណើរលើកប៉ាល់ វ៉េស្ទើដាមនោះ មានផ្ទុកមេរោគនៃជំងឺកូវីដ-១៩ នេះ។
រាល់ដង តាមទម្លាប់ ក្រសួងការបរទេសកម្ពុជា តែងតែចេញសេចក្ដីប្រកាសព័ត៌មាន ឬសេចក្តីថ្លែងការណ៍ភ្លាមៗ ក្រោយជំនួបការទូតបែបនេះ។ ប៉ុន្តែ នៅក្នុងជំនួបនោះ រហូតមកដល់ពេលនេះ ទាំងក្រសួងការបរទេសកម្ពុជា និងក្រសួងការបរទេសម៉ាឡេស៊ី មិនមានចេញសេចក្តីថ្លែងការណ៍អ្វីមួយ ជុំវិញរឿងនេះ នោះទេ។
ទោះជាយ៉ាងនេះក្តី មន្រ្តីនាំពាក្យក្រសួងការបរទេសកម្ពុជាលោក កុយ គួង ដែលត្រូវបានប្រព័ន្ធឃោសនារបស់លោក ហ៊ុន សែន ដកស្រង់សម្តីនៅថ្ងៃជំនួបនោះ ថាតំណាងទូតម៉ាឡេស៊ី ត្រូវបានកោះហៅឲ្យចូលទៅបំភ្លឺរឿងនេះយ៉ាងណាក្តី ក៏លោកបញ្ជាក់ប្រាប់អាស៊ីសេរី កាលពីថ្ងៃទី ២៧ ខែ កុម្ភៈ ពោលគឺពីរថ្ងៃក្រោយជំនួបនោះ លោកថា មិនទាន់បានចម្លើយបែបណានៅឡើយទេ ក្នុងរឿងនេះ ព្រោះខាងតំណាងស្ថានទូតម៉ាឡេស៊ី ត្រូវការសុំយោបល់ពីថ្នាក់បន្តទៀត <<ទូត [ម៉ាឡេស៊ី] ក៏បានទទួលចម្ងល់ពីខាងកម្ពុជា ហើយគាត់ហ្នឹង ថានឹងពាំនាំយកចម្ងល់ហ្នឹង ជូនទៅថ្នាក់លើរបស់គាត់>>។
អាស៊ីសេរី មិនទាន់អាចសុំការឆ្លើយតបពីមន្ត្រីស្ថានទូតម៉ាឡេស៊ីបាននៅឡើយទេ។
ការណ៍ដែលលោក ហ៊ុន សែន សម្រេចទទួលកប៉ាល់ទេសចរ ដែលផ្ទុកអ្នកដំណើរ និងបុគ្គលិកនាវាលើកប៉ាល់ជាង ២ពាន់នាក់ កាលពីថ្ងៃទី១៣ ខែ កុម្ភៈ នោះ រងការរិះគន់ជុំទិស ថាកម្ពុជា បាននាំទុក្ខដល់ប្រជាពលរដ្ឋខ្មែរ និងពិភពលោក ស្របពេលដែលការព្រួយបារម្ភអំពីការឆ្លងរាលដាលនៃជំងឺនេះ កាន់តែកើនឡើងពេញបន្ទុក។ ប៉ុន្តែ លោក ហ៊ុន សែន អះអាងថា នោះជាអំពើមនុស្សធម៌សុទ្ធសាធ និងអះអាងថា បើលោកមិនធ្វើដូច្នេះទេ នឹងមានវិបត្តិមនុស្សធម៌ថែមទៀតផង។
ម្តងហើយម្តងទៀត ក្រោយរងការរិះគន់នេះ លោក ហ៊ុន សែន និងរបបក្រុងភ្នំពេញ ព្យាយាមបន្សាបព័ត៌មាននេះ ដោយទាញការចាប់អារម្មណ៍ទៅលើមន្ត្រីសុខាភិបាលនៃប្រទេសម៉ាឡេស៊ី ដែលលោក ហ៊ុន សែន ចោទថា ធ្វើការខ្ជីខ្ជា ខ្វះការទទួលខុសត្រូវ ដែលរកឃើញស្ត្រីអាមេរិកវ័យ ៨៣ ឆ្នាំនោះ មានផ្ទុកមេរោគនេះ នៅពេលខាងកម្ពុជារកមិនឃើញ។ លោក ហ៊ុន សែន ថែមទាំង ស្នើឱ្យនាយករដ្ឋមន្ត្រីម៉ាឡេស៊ី ដកដំណែងរដ្ឋមន្ត្រីក្រសួងសុខាភិបាលប្រទេសនេះចោល ថែមទៀតផង។
ថ្មីៗនេះទៀតសោត ប្រព័ន្ធឃោសនារបស់លោក ហ៊ុន សែន បានព្យាយាមភ្ជាប់បញ្ហានយោបាយផ្ទៃក្នុងរបស់ប្រទេសម៉ាឡេស៊ី នៃការលាលែងពីតំណែងរបស់រដ្ឋមន្ត្រីក្រសួងសុខាភិបាលនៃប្រទេសនេះ ដែលមិនពាក់ព័ន្ធគ្នាទាល់តែសោះ ទៅនឹងការធ្វើតេស្តរកឃើញមេរោគលើស្ត្រីអ្នកដំណើរលើកប៉ាល់នោះ ទៅនឹងសាររបស់លោក ហ៊ុន សែន ដែលចោទរដ្ឋមន្ត្រីនោះធ្វើការខ្ជីខ្ជា ខ្វះការទទួលខុសត្រូវ ដែលគួរដកចេញពីតំណែងនោះ។
លោក គឹម សុខ ថាបើលោក ហ៊ុន សែន នៅតែមិនបញ្ឈប់ការប៉ុនប៉ង យកប្រទេសម៉ាឡេស៊ី ជាចំណុចស៊ីប ដើម្បីលុបលាងភាពអាម៉ាស់របស់ខ្លួនទេ នោះលោក ហ៊ុន សែន នឹងរងភាពអាម៉ាស់ជាលើកទី៥ ជុំវិញរឿងជំងឺរលាកផ្លូវដង្ហើម COVID-19 នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។