មន្ត្រីរដ្ឋាភិបាលកម្ពុជា អះអាងថា រហូតមកទល់ថ្ងៃទី១៩ ខែកក្កដា រដ្ឋាភិបាលពុំទាន់ទទួលបានលិខិតផ្លូវការណាមួយពីអគ្គលេខាធិការអង្គការសហប្រជាជាតិ លោក បាន គីមូន (Ban Ki Moon) ដែលបញ្ជាក់ថា អង្គការសហប្រជាជាតិ អាចរកឃើញផែនទីដែលកម្ពុជា សុំខ្ចីនោះឡើយ។
ទាំងអ្នកនាំពាក្យក្រសួងការបរទេសកម្ពុជា លោក ជុំ សន្ទរី និងអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បញ្ជាក់ដូចគ្នានៅថ្ងៃទី១៩ កក្កដា ថា ស្ថាប័នទាំងពីរនេះនៅពុំទាន់ឃើញព័ត៌មានឆ្លើយតបផ្លូវការពីអង្គការសហប្រជាជាតិ នោះទេ។
ការអះអាងរបស់មន្ត្រីរដ្ឋាភិបាលដូចនេះ ធ្វើឡើងបន្ទាប់ពីវិទ្យុផ្សាយសំឡេងសហរដ្ឋអាមេរិក វីអូអេ (VOA) ដែលបានផ្សាយកាលពីយប់ថ្ងៃទី១៨ កក្កដា ថា អង្គការសហប្រជាជាតិ បានផ្តល់ជូនកម្ពុជា នូវព័ត៌មានដែលទាក់ទងនឹងការស្នើសុំខ្ចីផែនទីរបស់កម្ពុជា រួចហើយ។ អង្គការសហប្រជាជាតិ បញ្ជាក់បន្ថែមថា ការស្នើសុំរបស់កម្ពុជា នោះ អង្គការសហប្រជាជាតិ អាចរកឃើញហើយ ហើយថាពួកគេនឹងបន្តស្វែងរកឯកសារសំខាន់ៗមួយចំនួនទៀតដែលកម្ពុជា ត្រូវការ។
លោកនាយករដ្ឋមន្ត្រី ហ៊ុន សែន កាលពីថ្ងៃទី៦ កក្កដា បានផ្ញើលិខិតទៅកាន់ លោក បាន គីមូន សុំខ្ចីផែនទីដែលកម្ពុជា យកទៅតម្កល់នៅអង្គការសហប្រជាជាតិ កាលពីឆ្នាំ១៩៦៤ ដើម្បីយកមកផ្ទៀងផ្ទាត់ជាមួយផែនទីដែលរដ្ឋាភិបាលកំពុងប្រើប្រាស់ ក្នុងការបោះបង្គោលខណ្ឌសីមាព្រំដែនជាមួយប្រទេសវៀតណាម បច្ចុប្បន្ន។
ដោយឡែកកាលពីថ្ងៃទី១៥ កក្កដា លោក ហ៊ុន សែន ក៏បានផ្ញើលិខិតបីដាច់ដោយឡែកពីគ្នាទៅកាន់ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) នាយករដ្ឋមន្ត្រីចក្រភពអង់គ្លេស លោក ដេវីដ ខាម៉ឺរូន (David Cameron) និងប្រធានាធិបតីបារាំង លោក ហ្រ្វង់ស្វ័រ ហូឡង់ដ៏ (Francois Hollande) ដើម្បីខ្ចីផែនទីកម្ពុជា ពីប្រទេសទាំងនេះយកមកផ្ទៀងផ្ទាត់ជាមួយផែនទីរដ្ឋាភិបាលផងដែរ។
មន្ត្រីរដ្ឋាភិបាល ឲ្យដឹងថា រហូតមកទល់ពេលនេះ កម្ពុជា ពុំទាន់ទទួលបានការឆ្លើយតបផ្លូវការពីរដ្ឋាភិបាលប្រទេសមហាអំណាចទាំង៣ ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ នេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។