លោកហ៊ុន សែន បានបញ្ជាក់កាលពីថ្ងៃទី២៣ ខែតុលា ក្នុងគំរប់ខួប ២៧ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ថា រូបលោកផ្ទាល់គឺជាអ្នកជំរុញឲ្យមានកិច្ចព្រមព្រៀងនេះឡើង។
ថ្លែងនៅចំពោះមុខអ្នកគាំទ្រនៅទីក្រុងហ្សឺណែវប្រទេសស្វីសកាលពីថ្ងៃអង្គារ ទី២៣ ខែតុលា លោក ហ៊ុន សែន អះអាងថារូបលោកផ្ទាល់គឺជាគន្លឹះសំខាន់ក្នុងការសម្រេចឲ្យបានចេញកិច្ចព្រមព្រៀងនេះ។ លោកបន្តថាប្រសិនបើលោកមិនយល់ព្រមទេក៏កិច្ចព្រមព្រៀងនេះមិនអាចចេញទៅបានឡើយ៖ «មានតែ ហ៊ុន សែន មួយគត់ ដែលមានសិទ្ធិនាពេលនោះ បើហ៊ុន សែន មិនព្រមទេ កិច្ចព្រមព្រៀងមិនអាចចេញបានទេ ។ អ៊ីចឹងសូមកុំឲ្យភាន់ច្រឡំ ពេលចរចា ត្រូវតែមានកុងសង់សឹស អ្នកដើរតួសំខាន់នាពេលនោះ គឺរដ្ឋកម្ពុជា។ អ្នកដែលសំខាន់នាពេលនោះ គឺ ហ៊ុន សែន ហើយអគ្គលេខាធិការ អ.ស.ប តេមកខ្ញុំ ខ្ញុំឆ្លើយប្រាប់ថាខ្ញុំព្រម »។
ក៏ប៉ុន្តែអ្នកវិភាគនយោបាយនិងសង្គម លោក គឹម សុខ បានប្រាប់អាស៊ីសេរីកាលពីយប់មិញថាតាមពិតទៅកិច្ចព្រមព្រៀងសន្តិភាពទីក្រុងប៉ារីសកើតឡើងដោយសារមានការប្រែប្រួលចរន្តនយោបាយ នៃការបញ្ចប់សង្គ្រាមរវាងប្រទេសប៊្លុកប្រទេសសេរី និងកុម្មុយនិស្តកាលពីទសវត្ស ឆ្នាំ៨០។ លោក គឹម សុខ បញ្ជាក់ថា លោក ហ៊ុន សែន មិនអាចនិយាយថា សមិទ្ធិផលនៃកិច្ចព្រមព្រៀងសន្តិភាពនេះ ដោយសារតែរូបលោកតែម្នាក់ឯងប៉ុណ្ណោះទេ៖ «គេដាក់កំហិត ដាក់ទណ្ឌកម្មសេដ្ឋកិច្ច លើរដ្ឋាភិបាលក្រុងភ្នំពេញ ដែលពេលនោះបន្តុបដោយយួន ហើយទណ្ឌកម្មហ្នឹងហើយ ឈានដល់ការជជែកគ្នារវាងភាគីខ្មែរ និងអន្តរជាតិ ប្រមូលផ្តុំគ្នា រហូតដល់មានកិច្ចព្រមព្រៀង សន្តិភាពទីក្រុងប៉ារីស ២៣តុលា។ ប្រសិនបើប្រទេសមហាអំណាចមិនជួយជ្រោមជ្រែងទេ នោះមានន័យថា កម្ពុជាមិនអាចដកដៃរួចពីយួនទេ ហើយលោក ហ៊ុន សែន ថា នេះជាសមិទ្ធិផលតែឯង នេះគ្រាន់តែជាភាសានិយាយនៃអ្នកដឹកនាំការទូតបែបក្មេងទេ »។
នៅក្នុងខួប ២៧ឆ្នាំ កាលពីថ្ងៃម្សិលមិញនោះ លោក ហ៊ុន សែន ក៏បានលើកឡើងដែរថា កិច្ចព្រមព្រៀងក្រុងប៉ារីស មានតម្លៃជាប្រវត្តិសាស្រ្ត និងមរតករបស់លោក ក្នុងចំណោមមរតកជាច្រើនទៀត ក្រោមការដឹកនាំប្រទេសរបស់លោកជាង៣០ឆ្នាំមកនេះ។ លោកថា ស្មារតីកិច្ចព្រមព្រៀងនេះបានបញ្ចូលទៅក្នុងរដ្ឋធម្មនុញ្ញកម្ពុជារួចហើយដែលរបបលោកកំពុងអនុវត្តតាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។