លោក ហ៊ុន សែន ជំរុញ​ឱ្យ​ព្រះសង្ឃ​ជួយ​ផ្សព្វផ្សាយ​សារ​សន្តិភាព​ដល់​ពុទ្ធ​បរិស័ទ

ដោយ ខែ សុណង
2020-02-29
អ៊ីម៉ែល
មតិ
Share
បោះពុម្ព
​លោក​នាយករដ្ឋមន្ត្រី ហ៊ុន សែន ​ក្នុង​ពិធី​ស្រោច​ទឹក ឬ​ស្រោច​ព្រះ​សុគន្ធវារី ប្រគេន សម្តេច​ព្រះ​សង្ឃ​នាយក​រង​៣​ព្រះអង្គ ដែល​ទើប​តែងតាំង​ថ្មី នៅ​វត្ត​ចំពុះ​ក្អែក ក្រុងភ្នំពេញ នៅ​ថ្ងៃ​ទី ២៨ ខែ​កុម្ភៈ ឆ្នាំ​២០២០​។
​លោក​នាយករដ្ឋមន្ត្រី ហ៊ុន សែន ​ក្នុង​ពិធី​ស្រោច​ទឹក ឬ​ស្រោច​ព្រះ​សុគន្ធវារី ប្រគេន សម្តេច​ព្រះ​សង្ឃ​នាយក​រង​៣​ព្រះអង្គ ដែល​ទើប​តែងតាំង​ថ្មី នៅ​វត្ត​ចំពុះ​ក្អែក ក្រុងភ្នំពេញ នៅ​ថ្ងៃ​ទី ២៨ ខែ​កុម្ភៈ ឆ្នាំ​២០២០​។
រូប​ហ្វេសប៊ុក​ លោក ហ៊ុន សែន

ប្រមុខ​រដ្ឋាភិបាល​កម្ពុជា លើកទឹកចិត្ត​ឱ្យ​ព្រះសង្ឃ ជួយ​ទេសនា​ពន្យល់​ពលរដ្ឋ​ឱ្យ​ចូលរួម​ថែរក្សា​សុខ​សន្តិភាព ដែល​មាន​ក្នុង​ពេល​បច្ចុប្បន្ន​។ រីឯ​ព្រះសង្ឃ យល់ថា អ្វី​ដែល​លោក ហ៊ុន សែន លើកឡើង គឺ​មាន​ចេតនា​ចង់​ឱ្យ​ព្រះសង្ឃ​ទេសនា​បម្រើ​ផលប្រយោជន៍​គណបក្ស​របស់​ខ្លួន ហើយ​ខ្លឹមសារ​សន្តិភាព​របស់​លោក ហ៊ុន សែន និង​ព្រះពុទ្ធសាសនា មាន​លក្ខណៈ​ផ្ទុយគ្នា។

លោកនាយក​រដ្ឋមន្ត្រី ហ៊ុន សែន ថ្លែង​សរសើរ​គណបក្ស​ប្រជាជន​កម្ពុជា ក្រោម​ការដឹកនាំ​របស់ លោក​ជាង​៤០​ឆ្នាំ​មក​នេះ​ថា បាន​ធ្វើ​ប្រទេស​កម្ពុជា​មាន​សុខ​សន្តិភាព ហើយ​ផ្តល់​ឱកាស​ឱ្យ​គ្រប់​សាសនា​ទាំងអស់​មាន​ការ​រីកចម្រើន ស្រប​ពេល ដែល​ជីវភាព​ពលរដ្ឋ​កាន់តែ​ល្អ​ប្រសើរ និង​មាន​សេរីភាព​ពេញលេញ​ក្នុង​ជំនឿ​សាសនា​។ ទន្ទឹម​គ្នា​នេះ លោក ហ៊ុន សែន បាន​ថ្លែង​ក្នុង​ន័យ​បង្គាប់​បញ្ជា​ទៅ​ព្រះសង្ឃ​ឱ្យ​ជួយ​ទេសនា ពន្យល់​ប្រជាពលរដ្ឋ​ឱ្យ ចូលរួម​ថែរក្សា​សុខ​សន្តិភាព​ក្នុង​ពេល បច្ចុប្បន្ន ខណៈ​លោក​ក៏​ទើបតែ​បាន​ចេញ​បញ្ជា​ឱ្យ​ក្រសួង និង​មន្ទីរ​រដ្ឋ​គ្រប់​ស្ថាប័ន ធ្វើ​យុទ្ធនា​ការ​បិទ​ពាក្យស្លោក "​អរគុណ​សន្តិភាព​" នៅ​ទូទាំង​ប្រទេស​រួច​មក​ហើយ​ដែរ៖ «ព្រះពុទ្ធសាសនា​ក៏​ត្រូវ​មាន​ចំណែក​ដើម្បី​អប់រំ​ឱ្យ​ពុទ្ធ​បរិស័ទ ចូលរួម​ចំណែក​ការពារ​សន្តិភាព ការពារ​នូវ​អ្វី​ដែល​បាន​នឹង​កំពុង​មាន​ហើយ​ខិតខំ​អភិវឌ្ឍន៍​ជា បន្ត​ទៀត។ ដូច្នេះ​នេះ​គឺជា​ការ​បំពេញ​ឱ្យ​គ្នា​ទៅវិញទៅមក​រវាង​ពុទ្ធចក្រ និង​អាណាចក្រ។ អាណាចក្រ​ទទួល​បាន​ផលប្រយោជន៍​ពី​សាសនា​រួមមាន​ពុទ្ធចក្រ​និង​សាសនា​ដទៃ​ទៀត»

ការ​លើក​ឡើង​របស់​លោក​នាយករដ្ឋមន្ត្រី ហ៊ុន សែន នេះ​ធ្វើឡើង​ក្នុង​ពិធី​ស្រោច​ទឹក ឬ​ស្រោច​ព្រះ​សុគន្ធវារី ប្រគេន សម្តេច​ព្រះ​សង្ឃ​នាយក​រង​៣​ព្រះអង្គ ដែល​ទើប​តែងតាំង​ថ្មី នៅ​វត្ត​ចំពុះ​ក្អែក ក្រុងភ្នំពេញ នៅ​ថ្ងៃ​ទី ២៨ ខែ​កុម្ភៈ​។ លោក ហ៊ុន សែន ក៏​ឆ្លៀតឱកាស​បញ្ចេញ​សារ​នយោបាយ​ដែរ ថា ប្រសិនបើ​គណបក្ស​ថ្មី​ឡើង​ដឹកនាំ​ប្រទេស មិន​ប្រាកដ​ថា មាន​គោលនយោបាយ​បើកទូលាយ​សិទ្ធិ​សេរីភាព​ជំនឿ​សាសនា ដូច​គណបក្ស​ប្រជាជន​កម្ពុជា​នោះ​ទេ។

ព្រះតេជព្រះគុណ លួន សុវ៉ាត ដែល​តែង​ចូលរួម​តវ៉ា​យ៉ាងសកម្ម​ជាមួយ​សកម្មជន​ដីធ្លី និង​ផ្ទះសម្បែង និង​ធ្លាប់​ទទួល​ពានរង្វាន់​ផ្នែក​សិទ្ធិមនុស្ស​ផង​នោះ មាន​ថេរ​ដីកា​ថា ការ​លើកឡើង របស់​លោក ហ៊ុន សែន បែបនេះ គឺ​មាន​បំណង​ចង់​យក​ស្ថាប័ន​ព្រះពុទ្ធសាសនា ជួយ​ផ្សព្វផ្សាយ​សារ​នយោបាយ ដើម្បី​បម្រើ​ផលប្រយោជន៍​គណបក្ស​របស់​ខ្លួន ហើយ​ទង្វើ​បែបនេះ​គឺ​ខុស​នឹង​ច្បាប់​ព្រះពុទ្ធសាសនា​ទាំងស្រុង​។ ព្រះសង្ឃ​អង្គ​នេះ បន្ត​ថា តាមពិត​ព្រះសង្ឃ​ខ្មែរ បាន​ដើរ​តួនាទី​ត្រឹមត្រូវ​រួចហើយ​ក្នុង​ការ​អប់រំ​មនុស្ស​គ្រប់​ស្រទាប់​វណ្ណៈ​ទាំងអស់ កុំ​ឱ្យ​ធ្វើអំពើ​បាប ត្រូវ​ធ្វើ​អំពើ​ជា​កុសល និង​ធ្វើ​ចិត្ត​ឱ្យ​ស្អាត​ផូរផង់ ដែល​ជា​ទស្សនវិជ្ជា​របស់​ព្រះពុទ្ធសាសនា ដែល​បង្កប់​ដោយ​អត្ថន័យ សន្តិភាព អហិង្សា និង​ការ​គោរព​សិទ្ធិមនុស្ស​ដែល​ពិភពលោក​កំពុង​ប្រតិបត្តិ​តាម។ ព្រះតេជព្រះគុណ មាន​ថេរដីកា​ទៀត​ថា ប្រសិនបើ​លោក ហ៊ុន សែន ចង់​ឱ្យ​ប្រទេស​កម្ពុជា មាន​សុខ​សន្តិភាព​ពេញ​លេញ​ពិតប្រាកដ គួរតែ​ធ្វើជា​មេដឹកនាំ​ដែល​ប្រកាន់​នូវ​ទសពិធរាជធម៌ ដែល​ជា​គុណធម៌ និង​សីល ធម៌​ទាំង ១០ រួមមាន ភាព​ស្មោះត្រង់ មិន​លោភលន់ ចេះ​ចែករំលែក មិន​ប្រើ​អំពើ​ហិង្សា មិន​បំពាន​ច្បាប់ មិន​បៀតបៀន​អ្នកដទៃ ចេះ​អត់ធ្មត់ ត្រូវ​មាន​សីលធម៌​ក្នុង​ខ្លួន ត្រូវ​ចេះ​សមាទាន​សីល​រក​ផ្លូវ​ល្អ និង​ត្រូវ​ប្រកាន់​នូវ​ចរិត​សុភាព​រាបសា​ជាដើម៖ «ទោះបីជា​ឱ្យ​ព្រះសង្ឃ​ទេសនា​អរគុណ​នូវ​សន្តិភាព​ក្តី ទោះបីជា​សរសេរ​នូវ​ពាក្យ​អរគុណ​សន្តិភាព​មួយ​លាន​ដង​ក្តី តែ​បើ​ការអនុវត្ត ការ​ធ្វើ​នូវ​អំពើ​ប្រាសចាក​ពី​ផ្លូវ​សន្តិភាព​ហើយ គឺ​អត់​មាន​សន្តិភាព​ទេ ។ សន្តិភាព​មិន​មែនមាន​ន័យ​ថា សន្តិភាព​តែ​ផ្លូវ​វាចា ផ្លូវកាយ​ទេ គឺ​សំដៅ​លើ​ផ្លូវចិត្ត​ផង​ដែរ​។ សន្តិភាព​របស់​ព្រះ​សម្មាសម្ពុទ្ធ គឺ​ទាល់តែ​ចិត្ត​មាន​សន្តិភាព ទើប​ធ្វើ​ឱ្យ​កាយ​និង​វាចា​មាន​សន្តិភាព​ដែរ»

ព្រះតេជព្រះគុណ លួន សុវ៉ាត កត់សម្គាល់​ឃើញ​ថា ប្រទេស​កម្ពុជា ថ្វីត្បិតតែ​គ្មាន​សង្គ្រាម​ប្រដាប់​អាវុធ​ក្ដី ក៏ប៉ុន្តែ​ពោរពេញ​ដោយ​អសន្តិសុខ​មនុស្សជាតិ មាន​អំពើ​ហិង្សា ការរំលោភ​ដីធ្លី អយុត្តិធម៌​សង្គម អំពើពុករលួយ ការ​រំលោភបំពាន​សិទ្ធិ​នយោបាយ សិទ្ធិ​ពលរដ្ឋ និង​សិទ្ធិ​កម្មករ​ជាដើម ដូច្នេះ អ្វី​ដែល​កើតឡើង​ទាំងនេះ បាន​ឆ្លុះបញ្ចាំង​យ៉ាង​ច្បាស់​ថា កម្ពុជា​ពុំទាន់​មាន​សុខ​សន្តិភាព​ពេញលេញ​នៅឡើយ​ទេ​។ ព្រះអង្គ​យល់ថា អត្ថន័យ​នៃ​ពាក្យ​សន្តិភាព​របស់​ព្រះពុទ្ធសាសនា និង​អ្នកនយោបាយ​ខ្មែរ​ខុសគ្នា។ ខុសគ្នា​ត្រង់​ថា ពាក្យ​សន្តិភាព​របស់​អ្នកនយោបាយ​ខ្លះ ឱ្យ​តែ​អត់​សង្គ្រាម​ប្រដាប់​អាវុធ​បង្ហូរ​ឈាម​នោះ​ទើប​មាន​សន្តិភាព​ហើយ ប៉ុន្តែ​សម្រាប់​ព្រះពុទ្ធសាសនា គឺ​អប់រំ មនុស្ស​ឱ្យ​ទម្លាក់អាវុធ​ចុះ ចាប់​យក​ធម៌​អហិង្សា កុំ​បៀតបៀន​គ្នា ហើយ​ធ្វើអំពើ​ល្អ​ដាក់គ្នា ទាំង​ផ្លូវចិត្ត​ផ្លូវកាយ ទើប​មាន​សន្តិភាព៖ «សន្តិភាព​របស់​ព្រះពុទ្ធ​គឺ​សន្តិភាព​ទាំងអស់​គ្នា សុខ​ទាំងអស់​គ្នា សុខ​ទាំង​យើង​សុខ​ទាំង​គេ សុខ​ទាំង​មនុស្ស រហូត​ដល់​ដល់​សុខ​ទាំង​ទេវតា​ទៅទៀត តែ​បើ​សារ សន្តិភាព​ក្នុង​ន័យ​អ្នកនយោបាយ​វិញ គឺ​យើង​មើល​រាល់ថ្ងៃ ភាគី​ម្ខាង​ទៀត អត់​មាន​សេចក្ដី​សុខ អត់​មាន​សន្តិភាព​ទេ អ្នកខ្លះ​ជាប់គុក អ្នកខ្លះ​រត់ចោលស្រុក ហើយ​អ្នកខ្លះ​ដេក​ភ័យ​នៅ ផ្ទះ ពេល​ដើរ​ទៅ​ណា​ទៅ​ណី ក៏​មាន​គេ​តាម​ឃ្លាំមើល​ដែរ។ សួរ​ថា​សន្តិភាព​កើត​ដែរ​កន្លែង​នេះ។ អ្នក​ដែល​មាន​អំណាច​គេ​សន្តិភាព​ហើយ ព្រោះ​គេ​ចង់​ទៅ​ណា​ក៏មា​ន​អង្គរក្ស ចង់​ធ្វើ​អី​និយាយ​អី បាន​តាម​អំពើ​ចិត្ត​អត់​មាន​ទាស់​ខុស»

ស្រដៀង​គ្នា​នេះ​ដែរ ព្រះតេជព្រះគុណ យស ហ៊ុតខេមចារោ ដែល​គង់នៅ​ប្រទេស​បារាំង ប្រាប់​អាស៊ីសេរី​ថា តាម​ពិត​ទៅ ព្រះសង្ឃ គួរតែ​ទេសនា​ពន្យល់​លោក ហ៊ុន សែន ទៅវិញ​ទេ ដើម្បី​ឱ្យ​លោក​មាន​សន្តិភាព​ក្នុង​ចិត្ត វាចា​និង​កាយ​ជា​គំរូ ត្រូវ​យក​ធម៌​យក​ច្បាប់​ជាធំ ត្រូវ​គោរព​រដ្ឋធម្មនុញ្ញ ប្រជាធិបតេយ្យ​សេរី ពហុបក្ស ត្រូវ​គោរព​សិទ្ធិមនុស្ស ត្រូវ​គោរព​គោលការណ៍​បែងចែក​អំណាច ត្រូវ​គោរព​ឯករាជ្យ​ភាព នៃ​តុលាការ​ជាដើម​។ លុះណាតែ​មេដឹកនាំ​ប្រទេស មាន​មេត្តាករុណា ការ​គោរព​នូវ​តម្លៃ​និង​សេចក្ដី ថ្លៃថ្នូរ​របស់​មនុស្ស និង​ការ​ផ្ដល់ យុត្តិធម៌​ដ៏​ពេញលេញ​ទើប​អាច​មាន​សន្តិភាព។ ព្រះអង្គ​យល់​ថា សន្តិភាព​ដោយ​គ្មាន​យុត្តិធម៌ គឺជា​សន្តិភាព​ក្លែងក្លាយ ឬ​សន្តិភាព សិប្បនិម្មិត។

លោក ហ៊ុន សែន ត្រូវ​បាន​សហគមន៍​អន្តរជាតិ ចាត់ទុកថា ជា​មេដឹកនាំ​ផ្ដាច់ការ ក្រោម​ការដឹកនាំ​របស់​លោក​ពោរពេញ​ដោយ​អំពើ​ហិង្សា អំពើពុករលួយ ការ​កាប់​សម្លាប់ និង​បិទ​សេរីភាព​ប្រជា ពលរដ្ឋ​របស់​ខ្លួន​។ និយាយ​អំពី​ការ​ធ្វើ​បុណ្យ​ធ្វើ​ទាន​វិញ គេ​មើល​ឃើញ​ថា លោក ហ៊ុន សែន ធ្វើឡើង​ដោយ​មិន​ស្មោះត្រង់​ឡើយ គឺ​ធ្វើបុណ្យ​ដើម្បី​បាន​ចំណេញ​។ កាលពី​ថ្ងៃ​ទី​៥ ខែ​មីនា ឆ្នាំ​២០១៣ កន្លងទៅ លោក ហ៊ុន សែន ធ្លាប់​ព្រមាន​ថា ប្រសិន​គណបក្ស​ប្រជាជន​កម្ពុជា​របស់​លោក​ចាញ់​ឆ្នោត លោក​នឹង​ឈប់​ធ្វើបុណ្យ ឈប់​ហែ​កឋិន​ចូល​វត្ត រាល់​គម្រោង​បុណ្យ​ទាំងអស់ ត្រូវ​ដក​ចោល ហើយ​សូម្បីតែ​ម៉ាស៊ីន​បូម​ទឹក​ដាក់​ស្រែ​កសិករ ក៏​ដកចេញ​ដែរ​ដោយ​ទុក​ឱ្យ​ស្រូវប្រាំង​ក្រៀម​ស្វិត​ទាំងអស់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល