តំណាងរាស្រ្ត របស់ប្រទេសអូស្រ្តាលីអះអាងថា សកម្មភាព ដោះលែងអ្នកនយោបាយរបស់លោក ហ៊ុន សែន ថ្មីៗ នេះ មិនអាចយកជាលេស ក្នុងការលាងជម្រះអំពើអាក្រក់របស់លោក ដែលបានសម្លាប់លទ្ធិប្រជាធិបតេយ្យ ហើយក៏មិនអាចជៀសផុតពីការដាក់សម្ពាធរបស់សហគមន៍អន្តរជាតិជុំវិញ ការបោះឆ្នោតដ៏អាម៉ាស់នៅកម្ពុជានោះដែរ។
សួស្តីលោក ម៉ាក បាត់លើរ! សុខសប្បាយទេ?
បាទសួរស្តី ខ្ញុំសុខសប្បាយជាធម្មតាទេ អគុណដែលបានទូរស័ព្ទមក!
សារ៉ាដា៖ របបលោក ហ៊ុន សែន ក្នុងរយៈពេលប៉ុន្មានសប្តាហ៍មកនេះ បានដោះលែងអ្នកទោសនយោបាយមួយចំនួនធំ រួមទាំងសកម្មជនគណបក្សសង្គ្រោះជាតិចំនួន ១៤នាក់ផងដែរ។ តើហេតុអ្វីបានជារបបមួយនេះធ្វើដូច្នេះ?
ម៉ាក៖ ធ្វើដូច្នេះគឺដើម្បីចៀសវាងការរិះគន់ចំពោះការបោះឆ្នោតដ៏ អាម៉ាស់របស់លោក។ លោក ហ៊ុន សែន ធ្វើយ៉ាងហ្នឹង គឺដើម្បីចៀសវាង កុំឲ្យមានអ្នកប្រឆាំង។ គាត់ដឹងយ៉ាងច្បាស់ថា គណបក្សរបស់គាត់អាចចាញ់ឆ្នោត។ ហេតុដូច្នេះហើយ បានជាលោក ហ៊ុន សែន ដោះលែងពួកគេឲ្យនៅក្រៅឃុំវិញ នៅក្រោយការបោះឆ្នោតបញ្ចប់ទៅ។ ប៉ុន្តែការដោះលែងនេះ មិនអាចផ្លាស់ប្តូរការពិតអំពីការបោះឆ្នោតក្លែងក្លាយ ឬរដ្ឋាភិបាលខុសច្បាប់របស់លោក ហ៊ុន សែន បាននោះឡើយព្រោះ តុលាការកំពូលមិនព្រមដោះលែងលោក កឹម សុខា ហើយគណបក្សសង្គ្រោះជាតិ នៅតែមិនព្រមផ្តល់នីតិសម្បទាឡើងវិញ។ ស្ថានភាពបែបនេះ ប្រទេសនេះ នៅតែគ្មានប្រជាធិបតេយ្យ។
សារ៉ាដា៖ តើប្រទេសអូស្រ្តាលីបានរួមចំណែកដាក់សម្ពាធអ្វីខ្លះ ដល់របបលោក ហ៊ុន សែន ដែលឈានទៅដល់ការដោះលែងអ្នកទោសនយោបាយមួយចំនួនកន្លងមកនេះ?
ម៉ាក៖ បញ្ហានេះខ្ញុំមិនច្បាស់ដែរ ថាតើរដ្ឋាភិបាលរបស់យើងបាន និយាយអ្វីខ្លះជាមួយរបបលោក ហ៊ុន សែន ប៉ុន្តែយើងមានការពិភាក្សា វែកញែកគ្នាមួយចំនួននៅក្នុងរដ្ឋសភា កាលពីប៉ុន្មានសប្តាហ៍កន្លងទៅនេះ អំពីស្ថានភាពនយោបាយនៅក្នុងប្រទេសកម្ពុជា។ យើងបានធ្វើសេចក្តីសំរេចចិត្តមួយក្នុងការទាមទារឲ្យមានការដោះលែង លោក កឹម សុខា និងទាមទារឲ្យមានការបញ្ឈប់ការធ្វើទុកបុកម្នេញ ដល់បណ្តាញសាព័ត៌មានឯករាជ្យ និងអង្គការសង្គមស៊ីវិល។ សេចក្តីសំរេចនោះត្រូវបាន អនុម័តថែមទៀតផង។
សារ៉ាដា៖ ពាក់ព័ន្ធឹការដោះលែងអ្នកទោសនយោបាយទាំងនេះ តើលោកយល់ថា រដ្ឋាភិបាលអូស្រ្តាលី និងសហគមន៍អន្តរជាតិដទៃទៀតនឹងផ្លាស់ប្តូរគោលជំហររបស់ពួកគេពីការដកសម្ពាធលើរបបលោក ហ៊ុន សែន ដែលបានធ្វើការបោះឆ្នោតក្លែងក្លាយនោះដែរទេ?
ម៉ាក៖ ខ្ញុំមិនគិតដូច្នោះទេ ហើយខ្ញុំសង្ឃឹមថា រដ្ឋាភិបាលអូស្រ្តាលី និងសហគមន៍អន្តរជាតិដទៃទៀត មិនធ្វើអ៊ីចឹងនោះដែរ។ ខ្ញុំនិងសហសេវឹក របស់ខ្ញុំ សាទរចំពោះការដោះលែងអ្នកទោសនយោបាយ ទាំងនេះឲ្យមាន សេរីភាពឡើងវិញ ប៉ុន្តែការដោះលែងនេះមិនមែនមានន័យថា អាចលាងជម្រះទង្វើដ៏អាក្រក់របស់លោក ហ៊ុន សែន ដែលបំផ្លាញលទ្ធិប្រជាធិបតេយ្យនៅកម្ពុជា ក្នុងរយៈពេល ២ឆ្នាំកន្លងមកនោះឡើយ។ លោក កឹម សុខា នៅបន្តជាប់ឃុំឃាំងនៅឡើយ។ ឯលោក ហ៊ុន សែន កំពុងប្រកាសអំពីជ័យជម្នះ នៃការបោះឆ្នោតក្លែងក្លាយរបស់លោក។ ដូច្នេះការដាក់សម្ពាធលើរបបលោក ហ៊ុន សែន ត្រូវតែបន្ត ហើយបណ្តាប្រទេសដទៃ នៅលើពិភពលោក ក៏ត្រូវតែបន្តដាក់សម្ពាធ ចំពោះរបបមួយ ដែលកើតចេញពីការបោះឆ្នោតបែបនេះដែរ។
សារ៉ាដា៖ លោក ហ៊ុន សែន អះអាងថានឹងមកចូលរួមមហាសន្និបាត របស់អង្គការសហប្រជាជាតិក្នុងបុរីញូយ៉ក សហរដ្ឋអាមេរិក ហើយលោកក៏នឹងធ្វើដំណើរទៅកាន់បណ្តាប្រទេសជាច្រើន ដើម្បីបញ្ចុះបញ្ចូលអន្តរជាតិ ឲ្យទទួលស្គាល់លទ្ធផលនៃការបោះឆ្នោតនេះ។ តើលោកយល់ថា គាត់អាចនឹងទទួលជោគជ័យក្នុងបេសកកម្មនេះទេ?
ម៉ាក៖ ខ្ញុំគិតថាសហគមន៍អន្តរជាតិ គេបានដឹងឮអស់ហើយ នូវទង្វើ របស់លោក ហ៊ុន សែន ដែលបានធ្វើទុក្ខបុកម្នេញ ដូចជាការរឹតត្បិត សេរីភាពសាព័ត៌មាន អង្គការសង្គមស៊ីវិលឯករាជ្យ ការធ្វើឃាតបណ្ឌិត កែម ឡី អ្នកវិភាគនយោបាយ ការរំលាយគណបក្សសង្គ្រោះជាតិ ការឃុំខ្លួនលោក កឹម សុខា ការបង្ខំឲ្យក្រុមមន្រ្តីបក្សប្រឆាំងដូចជាអ្នកស្រី មូរ សុខហួរ និងមនុស្សជាច្រើននិរទ្ទេសខ្លួនទៅក្រៅប្រទេស។ សហគមន៍អន្តរជាតិ យល់ច្បាស់ណាស់ថា របបលោក ហ៊ុន សែន ពិតជាបានប្រឆាំងរាល់ទម្រង់ នៃសេរីភាពក្នុងការធ្វើនយោបាយនៅកម្ពុជា។ ដូច្នេះសកម្មភាពនៃរបបលោក ហ៊ុន សែន ក្នុងរយៈពេលប៉ុន្មានថ្ងៃមកនេះ មិនអាចផ្លាស់ប្តូរឥរិយាបទរបស់សហគមន៍អន្តរជាតិ ពីការបន្តដាក់សម្ពាធ ដល់របបរបស់លោក ហ៊ុន សែន នោះទេ។ ម្យ៉ាងទៀត សហគមន៍អន្តរជាតិ មិនអាចទទួលយកបាន ការណ៍ដែលរបបនេះ មិនគោរពកិច្ចព្រមព្រៀង សន្តិភាពទីក្រុងប៉ារីស ដែលផ្តល់អំណាចឲ្យពលរដ្ឋអាចជ្រើសរើសមេដឹកនាំតាមឆន្ទៈពិតប្រាកដរបស់ខ្លួន តាមរយៈការបោះឆ្នោតមួយដោយសេរី ត្រឹមត្រូវ និងយុត្តិធម៌។
សារ៉ាដា៖ ចុះឧបមាថា លោក ហ៊ុន សែន ទទួលជ័យជំនះក្នុងការបញ្ចុះ បញ្ចូលសហគមន៍អន្តរជាតិទាំងនោះមែន តើអ្វីដែលជាឧបសគ្គ សម្រាប់ដោះស្រាយស្ថានការណ៍នយោបាយបច្ចុប្បន្ននេះ?
ម៉ាក៖ នៅចុងបញ្ចប់សហគមន៍អន្តរជាតិ នឹងនៅតែធ្វើការទាក់ទងជាមួយរបបលោក ហ៊ុន សែន ដដែលហ្នឹង ប៉ុន្តែមិនមែនមានន័យថា ពួកគេលែងខ្វល់ខ្វាយអំពីបញ្ហាលទ្ធិប្រជាធិបតេយ្យនោះឡើយ។
សារ៉ាដា៖ ចុះប្រសិនបើលោក ហ៊ុន សែន ដោះលែងលោក កឹម សុខា ក្នុងរយៈពេលប៉ុន្មានថ្ងៃខាងមុខទៀតនេះ តើសម្ពាធសហគមន៍អន្តរជាតិ អាចនឹងថមថយដែរទេ?
ម៉ាក៖ បញ្ហានេះខ្ញុំនៅមិនទាន់អាចនិយាយបានទេ ហើយខ្ញុំក៏មិនទាន់ អាចទាយត្រូវថាគាត់នឹងធ្វើអ្វីទៀតនោះដែរ។ ប៉ុន្តែខ្ញុំសង្ឃឹមថា លោក ហ៊ុន សែន ដោះលែងលោក កឹម សុខា ឆាប់ៗ នេះឯង ពីព្រោះលោក កឹម សុខា មិនត្រូវឃុំខ្លួន សូម្បីតែមួយថ្ងៃនោះឡើយ។ ឧបមាថា គេដោះលែង លោក កឹម សុខា ហើយគណបក្សសង្គ្រោះជាតិ ត្រូវបានទទួលស្គាល់ឡើងវិញ ហើយក្រុមមន្រ្តីរបស់គណបក្សនេះ អាចវិលត្រឡប់ចូលស្រុកកំណើត របស់ពួកគេវិញដោយគ្មានការចាប់ខ្លួន ក៏ដោយចុះ ក៏ទាំងអស់នេះ មិនអាចឲ្យគេទទួលស្គាល់ថា ការបោះឆ្នោតកាលពីថ្ងៃទី២៩ ខែកក្កដា ជាបោះឆ្នោតមិនក្លែងក្លាយបាននោះដែរ។
សារ៉ាដា៖ អគុណណាស់លោក ម៉ាក បាត់លើរ ចំពោះពេលវេលារបស់លោកជាមួយអាស៊ីសេរី!
ម៉ាក៖ បាទសូមអគុណដែលបានផ្តល់បទសំភាសន៍ដល់លោក ម្តងទៀត !
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។