ផលវិបាក​នៃ​អវត្តមាន​សំឡេង​ប្រឆាំង ក្នុង​សង្គម​ប្រជាធិបតេយ្យ

ដោយ មួង ណារ៉េត
2020-06-30
អ៊ីម៉ែល
មតិ
Share
បោះពុម្ព
កិច្ចប្រជុំ​រដ្ឋសភា​ឯក​បក្ស​នៃ​របប​លោក ហ៊ុន សែន អនុម័ត​សេចក្ដី​ព្រាង​ច្បាប់​ចំនួន​ពីរ ប្រឆាំង​នឹង​អំពើ​សម្អាត​ប្រាក់ ឬ​លាង​លុយ​កខ្វក់ នៅ​ថ្ងៃ​ទី៤ ខែ​មិថុនា ឆ្នាំ២០២០។
កិច្ចប្រជុំ​រដ្ឋសភា​ឯក​បក្ស​នៃ​របប​លោក ហ៊ុន សែន អនុម័ត​សេចក្ដី​ព្រាង​ច្បាប់​ចំនួន​ពីរ ប្រឆាំង​នឹង​អំពើ​សម្អាត​ប្រាក់ ឬ​លាង​លុយ​កខ្វក់ នៅ​ថ្ងៃ​ទី៤ ខែ​មិថុនា ឆ្នាំ២០២០។
រូប៖ រដ្ឋសភា

តាំង​ពី​គណបក្ស​កាន់​អំណាច​រម្លាយ​គណបក្ស​ប្រឆាំង ប្រជាពលរដ្ឋ​ម្ចាស់​ឆ្នោត​ពាក់​កណ្ដាល​ប្រទេស បាត់​តំណាង​ស្រប​ច្បាប់​របស់​ខ្លួន។ ទុក្ខ​កង្វល់​ទាំង​ឡាយ​របស់​ពួក​គាត់ ដែល​កន្លង​មក ធ្លាប់​បាន​ដោះ​ស្រាយ តាមរយៈ​តំណាង​ទាំង​នោះ ត្រូវ​បាន​កប់​ចោល។

តើ​អ្វី​ខ្លះ​ជា​ផលវិបាក​នៃ​អវត្តមាន​សំឡេង​ប្រឆាំង ក្នុង​សង្គម​ប្រជាធិបតេយ្យ?

ក្នុង​សង្គម​ប្រជាធិបតេយ្យ​ពិត​ប្រាកដ គណបក្ស​ប្រឆាំង​ដើរ​តួនាទី​យ៉ាង​សំខាន់ ក្នុង​ការ​លើក​ស្ទួយ​ឲ្យ​មាន​អភិបាលកិច្ច​ល្អ នីតិរដ្ឋ និង​ការ​គោរព​សិទ្ធិមនុស្ស។ តួនាទី​នេះ បើ​នៅ​ក្នុង​ប្រទេស​​​ប្រជាធិបតេយ្យ ដូច​ជា ប្រទេស​អូស្រ្តាលី និង​សហរដ្ឋអាមេរិក គឺ​ជា​តួនាទី​ចែង​ច្បាស់ គ្មាន​នរណា​ហ៊ាន​រំលោភ​បាន​នោះ​ឡើយ។

នៅ​ក្នុង​រដ្ឋធម្ម​នុញ្ញកម្ពុជា ទាំង​ក្នុង​បុព្វកថា និង​មាត្រា ១ និង ៥១ សុទ្ធតែ​ចែង​ច្បាស់​អំពី​គោល​ការណ៍​ប្រជាធិបតេយ្យ​នេះ ដោយ​កំណត់​ថា ប្រទេស​កម្ពុជា​អនុវត្ត​តាម​លទ្ធិ​ប្រជាធិបតេយ្យ​សេរី​ពហុ​បក្ស។

ប៉ុន្តែ អ្វីដែលមាន​ចែង​នោះ គឺ​មាន​តែ​នៅ​លើ​ក្រដាស​ប៉ុណ្ណោះ។ ការអនុវត្ត​ជាក់​ស្តែង គណបក្ស​ប្រឆាំង​ជា​ផ្លូវ​ការ និង​ស្របច្បាប់​តែមួយគត់​ ដែល​មាន​អសនៈ​ក្នុង​រដ្ឋ​សភា ត្រូវ​បាន​គណបក្ស​កាន់​អំណាច​រម្លាយ​ចោល ជាង​ពីរ​ឆ្នាំ​កន្លះ​ហើយ (រម្លាយ​ខែវិច្ឆិកា ឆ្នាំ២០១៧)

អវត្តមាន​គណបក្ស​ប្រឆាំង ដែល​មាន​ពលរដ្ឋ​បោះ​ឆ្នោត​គាំទ្រ ជាង ៣លាន​នាក់ (ក្នុង​ការ​បោះឆ្នោត​ក្រុមប្រឹក្សា​ឃុំ​សង្កាត់ កាល​ពី​ខែមិថុនា ឆ្នាំ ២០១៧) ធ្វើ​ឲ្យ​រាស្ត្រ​ម្ចាស់​ឆ្នោត រងា​គ្មាន​អ្នក​តំណាង​ព្រោះ​តំណាង​រាស្ត្រ​ទាំង ៥៥រូប ត្រូវ​ជាប់​បម្រាម​នយោបាយ​រយៈ​ពេល ៥ឆ្នាំ។ រីឯ​មន្ត្រី​ជាន់​ខ្ពស់​ជា​ច្រើន​រូប​ផ្សេងទៀត ក្នុង​ជួរ​ក្បាល​ម៉ាស៊ីន​ដឹក​នាំ​របស់​បក្ស​ប្រឆាំង ក៏​ជាប់​បម្រាម​នេះ​ដែរ។ ជាង​នេះ​ទៅ​ទៀត តំណាង​ពលរដ្ឋ​នៅ​មូលដ្ឋាន ៥០០៧ នាក់​ ដែល​ជាប់​ជា​ក្រុមប្រឹក្សា​ឃុំ​សង្កាត់​នៅ​ជិត ៥០០ (៤៨៩) ឃុំ​សង្កាត់ ក៏​បាត់បង់​ឱកាស​បម្រើ​រាស្ត្រ​ម្ចាស់​ឆ្នោត​ដែរ ដោយសារ​តែ​គេ​ដក​ហូត​មុខ​តំណែង​ពួក​គាត់។

តាំង​ពី​ពេល​គណបក្ស​សង្គ្រោះ​ជាតិ ត្រូវ​បាន​គេ​រម្លាយ​រួចមក រាល់​បញ្ហា​ទុក្ខ​កង្វល់ និង​សេចក្ដី​ត្រូវការ​របស់​ប្រជា​ពលរដ្ឋ​មូលដ្ឋាន ត្រូវ​បាន​គេ​មើល​រំលង។ រាល់​ការ​តវ៉ា​ ការ​ជួបជុំ ការ​ប្រមូល​ផ្តុំ​គ្នា ដើម្បី​លើក​ពី​កង្វល់​ផ្សេងៗ ត្រូវ​រង​ការ​បង្ក្រាប និង​ចោទ​លាប​ពណ៌​ថា បង្កើត​ចលនា​បដិវត្ត​ពណ៌ ឬ​ចលនា​ឧទ្ទាម​ជាដើម។ តំណាង​នៅ​មូលដ្ឋាន ជា​ច្រើន​ជាប់​ពន្ធនាគារ និង​អ្នកខ្លះ​ទៀត រត់​ភៀសខ្លួន​ទៅ​ក្រៅ​ប្រទេស ដើម្បី​គេច​ផុត​ពី​ការ​តាម​ធ្វើ​ទុក្ខ​បុក​ម្នេញ។

ប្រធាន​គណបក្ស​នេះ គឺ​លោក កឹម សុខា ដែល​ប្ដេជ្ញា​មិន​រត់​ចោល​ស្រុក ក៏​ត្រូវ​ចំណាយ​ពេល​នៅ​ក្នុង​គុក និង​ការ​ឃុំឃាំ​ក្នុង​ផ្ទះ។ ឥឡូវនេះ រឿង​ក្តីក្តាំ​នៅ​តុលាការ ក៏​មិន​ទាន់​ដឹង​ពេល​ណា​បិទ​បញ្ចប់​ដែរ។

មន្រ្តីជាន់ខ្ពស់គណបក្សសង្គ្រោះជាតិ ដែល​បានភៀស​ខ្លួន​ទៅ​ក្រៅ​ប្រទេស ដើម្បី​បន្ត​សកម្មភាព​នយោបាយ​ ប្រាប់​អាស៊ីសេរី អំពី​ផលវិបាក ដែល​ប្រជា​ពលរដ្ឋ​ម្ចាស់​ឆ្នោត ត្រូវ​រង​អំពើ​អយុត្តិធម៌​សង្គម និង​បញ្ហា​ជាច្រើន ដែលមិនអាចរកអ្នកជួយ​ជាតំណាង​​ ក្នុង​ការ​ដោះស្រាយ​បាន ដោយសារ​តែ​អវត្តមាន​គណបក្ស​ប្រឆាំង។

អនុប្រធានគណបក្សសង្គ្រោះជាតិ អ្នកស្រី មូរ សុខ ហួរ សោក​ស្តាយ​យ៉ាង​ខ្លាំង​ ដែល​គណបក្ស​កាន់​អំណាច ប្រព្រឹត្ត​បំពាន​រដ្ឋធម្មនុញ្ញ ហ៊ាន​រម្លាយ​គណបក្ស​សង្គ្រោះ​ជាតិ​ទាំង​កម្រោល និង​ធ្វើ​ឲ្យ​ពលរដ្ឋ​ជា​ច្រើន​បាត់​ភាព​កក់ក្តៅ និង​បាត់​ផលប្រយោជន៍ ដែល​ពួក​គាត់​ធ្លាប់​មាន និង​ធ្លាប់​ទទួល​បាន កាល​នៅ​មាន​តំណាង​ពួកគាត់៖ «មេឃុំ និង​ចៅ​សង្កាត់​របស់​​គណបក្ស​សង្គ្រោះ​ជាតិ បាន​បំពេញ​តួនាទី​ដ៏​សំខាន់ នៅ​មូលដ្ឋាន។ នេះ​បង្ហាញ​ឲ្យ​ឃើញ​ថា នៅ​ពេល​ដែល​មាន​វត្ត​មាន​នៃ​គណបក្ស​សង្គ្រោះ​ជាតិ ដែល​ជា​គណបក្ស​ប្រឆាំង​ដ៏​សំខាន់​នោះ ប្រជាពលរដ្ឋ​ហ៊ាន​មាន​មតិ ព្រោះ​មាន​តំណាង ដែល​ហ៊ាន​តវ៉ា​ យក​ផលប្រយោជន៍​ប្រជាពលរដ្ឋ​នៅ​មូលដ្ឋាន​ជា​ធំ»

អ្នកស្រី​បន្ថែម​ថា ក្នុងស្ថានភាព​នៃវិបត្តិដោយសារ​ជំងឺកូវីដ-១៩ នេះទៀតសោត ប្រជាពលរដ្ឋរឹតតែ​ត្រូវ​ការ​​តំណាង​របស់​ពួក​គាត់ ក្នុងការទាមទារ និង​តវ៉ាឲ្យ​រដ្ឋផ្តល់ជំនួយផ្សេងៗ និង​រកវិធីដោះស្រាយ​បញ្ហាជីវភាព​ខ្វះខាត​របស់ពួកគាត់ ឲ្យទាន់ពេលវេលា​ មានប្រសិទ្ធភាព និង​មិនរើស​អើង​នយោបាយ។

ប៉ុន្តែ អ្នកស្រីបន្តថា ដំណោះស្រាយ​របស់​របបក្រុងភ្នំពេញ មានភាពយឺតយ៉ាវ និង​គ្មានតម្លាភាព ដែលធ្វើឲ្យពលរដ្ឋជាច្រើន មិន​ទទួលបានជំនួយពីរដ្ឋនោះឡើយ។ ជាងនេះទៅទៀត ភាព​ខ្វះ​តំណាង​ពីបក្សប្រឆាំងនេះ ប្រជាពលរដ្ឋមូលដ្ឋាន ពិបាកតវ៉ារកយុត្តិធម៌ណាស់។

ជុំវិញភាពខ្វះការចូលរួមនេះ មន្រ្តីអង្គការ​សង្គម​ស៊ីវិល ដែល​ឃ្លាំមើល​កិច្ចការ​សង្គម ក៏​មើល​ឃើញ​ពី​បញ្ហា​ជា​ច្រើន​ដែរ។ នាយក​ប្រតិបត្តិ​នៃ​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា លោក សន ជ័យ ថាដើម្បី​លុប​បំបាត់​ភាព​មិន​ប្រក្រតី អំពើពុករលួយ ពង្រឹង​យុត្តិធម៌​សង្គម និង​កាត់បន្ថយ​ការ​រើសអើង​នយោបាយ និង​អំពើ​បក្ស​ពួក​និយម​ជា​ដើម ជាពិសេស ក្នុង​ពេល​ចែក​លុយ​គ្រួសារ​អ្នក​ក្រ រដ្ឋ​ត្រូវ​យកចិត្ត​ទុកដាក់ ក្នុង​ការ​អនុញ្ញាត​ឲ្យ​តួ​អង្គ​ពាក់ព័ន្ធ​ចូលរួម ក្នុង​ដំណើរ​ការ​នេះ៖ « តួអង្គ​ពាក់ព័ន្ធ​មាន​តំណាង​សហគមន៍ មាន​អង្គការ​សង្គម​ស៊ីវិល​នៅ​មូលដ្ឋាន និង​មាន​តួអង្គ​នៅ​ថ្នាក់​ជាតិ ជា​ក្រុម​​គណៈកម្មការ​ចម្រុះ​ជា​ដើម ដើម្បី​ពិនិត្យ​មើល​ទៅលើ​នីតិវិធី​។ បើ​គ្រាន់​តែ​បណ្ដែត​បណ្ដោយ​ឲ្យ​មាន​ការ​សម្រេច​ចិត្ត​ មិន​ឆ្លង​កាត់​ការ​ឃ្លាំមើល​ ការ​ស្ដាប់​សំឡេង​ពី​គ្រប់​ភាគី ជាពិសេស​ក្រុម​ងាយ​រង​គ្រោះ​នោះ​ទេ នឹង​ខាត​ប្រយោជន៍​ពលរដ្ឋ»

ភាពខ្វះតំណាង និង​ការ​ចូលរួម​នេះ បាន​ធ្វើ​ឲ្យ​រាស្ត្រ​ម្ចាស់​ឆ្នោត​រងា​មួយ​ជាន់​ហើយ ឥឡូវ​ពួកគាត់​ត្រូវ​រង​ការ​គំរាម និង​លាប​ពណ៌​ថា ជា​មនុស្ស​ក្រុម​ប្រឆាំង​ទៅទៀត បើ​គាត់​ហ៊ាន​ត​វ៉ា។ ថ្មីៗ នេះ លោក​នាយក​រដ្ឋមន្រ្តី ហ៊ុន សែន បាន​គំរាម​រឹបអូស​ទ្រព្យ​សម្បត្តិ​ពលរដ្ឋ​ទាំង​ឡាយ​ណា ដែល​គ្មាន​លទ្ធភាព​សង​លុយ​ធនាគារ ដោយ​លោក​អះអាង​ថា ធ្វើ​តាម​ការ​អូសទាញ​របស់​ប្រធាន​ស្ដីទី​គណបក្ស​សង្គ្រោះ​ជាតិ៖ «ខ្ញុំ​នឹង​គាំទ្រ​​ឲ្យ​ធនាគារ​ប្ដឹង​ទៅ​តុលាការ​ដើម្បី​រឹបអូស​។ អ៊‍ីចឹង​សាក​មើល៍! គ្រួសារ​ណា​ដែល​ញុះញង់​ធ្វើ​អា​ហ្នឹង​ ហើយ​ជំពាក់​ធនាគារ​ យើង​គាំទ្រ​ឲ្យ​មានការ​រឹបអូស​តែ​ម្ដង»

ប្រធាន​ស្តី​គណបក្ស​សង្គ្រោះ​ជាតិ​លោក សម រង្ស៊ី រួម​ទាំង​តំណាង​រាស្ត្រ និង​មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​ជាច្រើន បាន​និរទេស​ខ្លួន​ទៅ​ក្រៅ​ប្រទេស ដើម្បី​គេច​ផុត​ពី​ការ​ធ្វើទុក្ខ​បុក​ម្នេញ​របស់​របប​ក្រុង​ភ្នំពេញ។

លោក សម រង្ស៊ី តែង​ផ្ញើ​សារ​ពី​ក្រៅ​ប្រទេស ដើម្បី​លើកទឹកចិត្ត​ឲ្យ​ប្រជាពលរដ្ឋ​ខ្មែរ​នៅ​ក្នុង​ស្រុក ក្រោក​តវ៉ា ទាមទារ​រក​យុត្តិធម៌។ ដូច​ជា​ពេល​ថ្មីៗ នេះ លោក​បាន​អំពាវនាវ​ឲ្យ​ពលរដ្ឋ ផ្អាក​សង​ប្រាក់​ជំពាក់​ធនាគារ មួយ​រយៈ​ពេល​មាន​បញ្ហា​ជំងឺ​កូវីដ-១៩ នេះ។

មន្រ្តី​គណបក្ស​សង្គ្រោះ​ជាតិស្ទើរ​តែ​ទាំង​អស់ អាច​បន្ត​សកម្មភាព​នយោបាយ​របស់​ខ្លួន​បាន តែ​ក្នុង​ករណី​ពួក​គាត់​រត់​ភៀស​ខ្លួន​ទៅ​ក្រៅ​ប្រទេស​ប៉ុណ្ណោះ។

អវត្តមាន​របស់​គណបក្ស​ប្រឆាំង​នៅ​កម្ពុជា ដោយសារ​បក្ស​កាន់​អំណាច​រម្លាយ និង​ធ្វើ​ទុក្ខ​បុក​ម្នេញ​នេះ ធ្វើឲ្យ​សហគមន៍​អន្តរជាតិ ជា​ពិសេស​សហរដ្ឋអាមេរិក និង​សហភាព​អឺរ៉ុប ​ថ្កោលទោស​របប​ក្រុង​ភ្នំពេញ​យ៉ាង​ដំណំ។ សហភាព​អឺរ៉ុប នឹង​ដក​ការ​អនុគ្រោះ​ពន្ធ EBA 20% នៅ​ថ្ងៃ​ទី១២ ខែ​សីហា​ខាង​មុខ​នេះ។ ទណ្ឌកម្ម​នេះ កើត​ឡើង​ដោយសារ​ការ​រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​នេះ​ឯង។

ជា​លទ្ធផល ការ​រម្លាយ​គណបក្ស​ប្រឆាំង គឺ​ជា​ការ​បំពាន​ឆន្ទៈ​រាស្ត្រ​ម្ចាស់​ឆ្នោត បំពាន​រដ្ឋធម្មនុញ្ញ និង​ធ្វើ​​ឲ្យ​ពលរដ្ឋ​ប្រមាណ​ពាក់​កណ្ដាល​ប្រទេស ដែល​មាន​សិទ្ធិ​បោះ​ឆ្នោត ខ្វះ​អ្នក​តំណាង​ស្រប​ច្បាប់ ហើយ​កម្ពុជា​ឯកោ​ពី​សហគមន៍​អន្តរជាតិ​ទាំង​នយោបាយ និង​សេដ្ឋកិច្ច។ ឯ​ជន​រង​គ្រោះ​ពិត​ប្រាកដ គឺ​រាស្ត្រ​ម្ចាស់​ឆ្នោត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល