លោក កឹម សុខា ចង់​ជួប ចង់​ស្តាប់ និង​ចង់និយាយ​ឆ្លើយឆ្លង​សួរសុខទុក្ខ​ជាមួយ​ពលរដ្ឋ​បន្ត​ទៀត

ដោយ ទីន ហ្សាការីយ៉ា
2020-07-20
អ៊ីម៉ែល
មតិ
Share
បោះពុម្ព
លោក កឹម សុខា (អង្គុយ​ខាង​ស្ដាំ) ប្រធាន​គណបក្ស​សង្គ្រោះ​ជាតិ ពេល​លោក​អញ្ជើញ​ទៅ​ខេត្ត​បាត់ដំបង កាល​ពី​ថ្ងៃ​ទី១៧ ខែ​កក្កដា ឆ្នាំ២០២០។
លោក កឹម សុខា (អង្គុយ​ខាង​ស្ដាំ) ប្រធាន​គណបក្ស​សង្គ្រោះ​ជាតិ ពេល​លោក​អញ្ជើញ​ទៅ​ខេត្ត​បាត់ដំបង កាល​ពី​ថ្ងៃ​ទី១៧ ខែ​កក្កដា ឆ្នាំ២០២០។
រូប៖ ហ្វេសប៊ុក​លោក កឹម សុខា

ប្រធាន​គណបក្ស​សង្គ្រោះ​ជាតិ លោក កឹម សុខា ដែល​កំពុង​ប្រើប្រាស់​សិទ្ធិ​របស់​ខ្លួន​ក្នុង​ការ​ធ្វើ​ដំណើរ​ក្នុង​ប្រទេស​កម្ពុជា​នោះ លើកឡើង​ថា លោក​នៅតែ​បំណង​ចង់​ជួប ចង់​ស្ដាប់ និង​ចង់​និយាយ​ឆ្លើយឆ្លង​សួរ​សុខ​ទុក្ខ​ជាមួយ​ពលរដ្ឋ​បន្ត​ទៀត ឱ្យ​តែ​លោក​មាន​ឱកាស។ អ្នកវិភាគ​សង្កេត​ឃើញ​ថា លោក កឹម សុខា ហាក់​មាន​ស្ថាន ភាព​ធូរស្បើយ​ជាមួយ​លោក ហ៊ុន សែន ក្រោយ​ប្រធាន​បក្ស​ប្រឆាំង​រូប​នេះ​ទៅ​ចូល​រួម​ពិធីបុណ្យ​សព​ម្ដាយក្មេក​លោក ហ៊ុន សែន។

ប្រធាន​គណបក្ស​សង្គ្រោះ​ជាតិ លោក កឹម សុខា បាន​ផ្ញើ​សារ​ដ៏​កម្រ​របស់​ខ្លួន​អម​ជាមួយ​រូបថត ១២សន្លឹក​ជាមួយ​ប្រជាពលរដ្ឋ​នៅ​លើ​បណ្ដាញ​សង្គម​ហ្វេសប៊ុក​ថ្ងៃ​ទី២០ ខែ​កក្កដា បង្ហាញ​ការ​គោរព ការ​ស្រឡាញ់​រាប់អាន និង​អរគុណ​ចំពោះ​ព្រះសង្ឃ​និង​ពលរដ្ឋ​មក​ពី​រាជធានី​ខេត្ត​មួយ​ចំនួន​ ដែល​បាន​និមន្ត​ និង​ស្កាត់​មក​សួរ​សុខ​ទុក្ខ​លោក​ដល់​ផ្ទះ​នា​ពេល​កន្លង​មក។ ប្រធាន​គណបក្ស​ប្រឆាំង​រូប​នេះ បន្ត​ថា ប្រជាពលរដ្ឋ បាន​សម្ដែង​មនោសញ្ចេតនា​នឹក​រលឹក​ដល់​លោក​ក្រៃលែង នៅ​ពេល​ដែល​លោក​ធ្វើដំណើរ​ទៅតាម​ខេត្ត​មួយ​ចំនួន​នា​ពេល​ថ្មីៗ នេះ បើ​ទោះ​ជា​លោក​បាន​ជូនដំណឹង ឬ​មិន​បាន​ជូន​ដំណឹង​ឱ្យ​ដឹង​ជា​មុន​ក្ដី។ មន្ត្រី​សម្រប​សម្រួល​សមាគម អាដហុក ខេត្ត​កែប និង​ខេត្ត​កំពត លោក យន់ ផល្លី យល់​ថា សកម្មភាព​លោក កឹម សុខា ជួប​ពលរដ្ឋ មិត្តភ័ក្ដិ ឬ​អតីត​ក្រុមការងារ​របស់​លោក​នៅ​ខេត្ត​កំពត និង​បណ្ដា​ខេត្ត​ផ្សេងទៀត​ជា​សិទ្ធិ​របស់​លោក កឹម សុខា ដែល​តុលាការ​បាន​ផ្ដល់​ឱ្យ។ លោក​បន្ត​ថា បើ​ទោះជា​លោក កឹម សុខា ជា​អ្នកនយោបាយ​ជាន់ខ្ពស់ ប៉ុន្តែ​លោក​ក៏​ជា​ពលរដ្ឋ​ដូច​អ្នកដទៃ​ដែរ ដូច្នេះ​លោក​តែងតែ​មាន​ការ​នឹករលឹក​ពលរដ្ឋ ឬ​មិត្តភ័ក្ដិ​របស់​ខ្លួន៖ «ការ​ដែល​គាត់ (លោក កឹម សុខា) សួរ​សុខ​ទុក្ខ​ជា​មិត្ត​ជា​ភ័ក្ត្រ ឬ​ក៏​អតីត​កាល​ជា​ក្រុម​ការងារ​របស់​គាត់ គឺ​ជា​សិទ្ធិ​របស់​គាត់​ក្នុង​ការ​ដើរ​ហើរ​នៅ​តាម​បណ្ដា​ខេត្ត​ស្រុក​នានា បាទ​នេះ​ជា​ការ​ប្រើប្រាស់​សិទ្ធិ​សេរីភាព​របស់​គាត់​គ្មាន​អ្នក​ណា​មួយ​អាច​ហាមឃាត់​បាន​ទេ»។

ប្រធាន​គណបក្ស​សង្គ្រោះ​ជាតិ លោក កឹម សុខា ដែល​ទទួល​បាន​សិទ្ធិ​ដើរហើរ​ក្នុង​ប្រទេស ប៉ុន្តែ​ហាម​ឃាត់​ធ្វើ​សកម្មភាព​នយោបាយ​កាល​ពី​ខែ​វិច្ឆិកា ឆ្នាំ២០១៩ ប៉ុន្តែ​ទើប​នៅ​រយៈ​ពេល​ចុងក្រោយ​នេះ​លោក​បាន​ធ្វើដំណើរ​ទៅ​មើល​ចម្ការ​មួយ​កន្លែងនៅ​ខេត្ត​ត្បូងឃ្មុំ ទៅ​សួរ​សុខ​ទុក្ខ​អតីត​សហការី​របស់​លោក​នៅ​ស្រុក​មង្គលបុរី ខេត្ត​បន្ទាយមានជ័យ​ដែល​កំពុង​មាន​ជំងឺ​ ហើយ​លោក​ក៏​បាន​ទៅ​អុជ​ធូប​បួងសួង​នៅ​រមណីយដ្ឋាន​ឧកញ៉ា​ឃ្លាំងមឿង​ក្នុង​ខេត្ត​ពោធិ​សាត់ ទៅ​ខេត្ត​កំពង់ចាម ​រួច​ក៏​បន្ត​ដំណើរ​ឆៀង​ចូល​មើល​ប្រាសាទ​បុរាណ​ក្នុង​ខេត្ត​សៀមរាប​និង​ដើរ​មើល​ចម្ការ​ស្វាយ​នៅ​ខេត្ត​កំពត​និង​ជជែក​សំណេះសំណាល​ជាមួយ​ពលរដ្ឋ​នៅ​ខេត្ត​បាត់ដំបង​ជា​ដើម។ អ្នកស្រាវជ្រាវ​ការ​អភិវឌ្ឍ​សង្គម បណ្ឌិត សេង សារី យល់ថា ទោះ​លោក កឹម សុខា មិនបាន​ធ្វើ​សកម្មភាព​នយោបាយ​ពេល​ចេញ​មក​ខាងក្រៅ​ក្តី ប៉ុន្តែ​វត្តមាន​របស់​លោក​អាច​ធ្វើ​ឱ្យ​ពលរដ្ឋ ឬ​អ្នក​គាំទ្រ​លោក​បាន​ឃើញ​មុខ​បាន​ដឹង​ពី​សុខ​ទុក្ខ​ដែល​ផ្ដល់​ផល​ល្អ​ដល់​លោក កឹម សុខា។ លោក​យល់​ថា នេះ​ជា​ការ​សម្រេច​ចិត្ត​ត្រឹមត្រូវ​បើ​ទោះជា​ហាក់​យឹត​បន្តិច​ក្ដី។ អ្នកវិភាគ​រូប​នេះ​យល់​ថា ការ​ដែរ​លោក កឹម សុខា ទើប​សម្រេច​ចេញ​ក្រៅ​នៅ​រយៈ​ពេល​ចុង​ក្រោយ​នេះ អាចមក​លោក កឹម សុខា ស្ទាបស្ទង់​ស្ថានភាព​ជាមុន​សិន មុននឹង​សម្រេច​ចិត្ត​ចេញ​ក្រៅ​ផ្ទះ៖ «ស្ថានភាព​ហ្នឹង​អាច​មាន​ការ​ស្ទាបស្ទង់​ច្រើន​ជាង​ហ្នឹង​បើ​ទោះ​ជា​ទូត​មក​ផ្ទះ​គាត់​ក៏​ដោយ​ក៏​កាត់​ធ្វើ​សកម្មភាព​ចុះ​តាម​ខេត្ត​ក៏​មិន​ខុស​ដែរ មិន​មែន​ទូត​មក​រាល់​ថ្ងៃ​ឯ​ណា ប៉ុន្តែ​ប្រហែល​គាត់​អាច​ស្ទាបស្ទង់​បន្ទុក​របស់​តុលាការ ដែល​ដាក់​មក​ណា ហើយ​ណា​មួយ​អាច​ពេល​ហ្នឹង​សិក្សា​លើ​លក្ខខណ្ឌ​របស់​តុលាការ​ផង»

រី​ឯ​មេធាវី​ការពារ​ក្ដី​លោក កឹម សុខា ម្នាក់ អ្នកស្រី ម៉េ​ង សុភារី ឱ្យ​ដឹង​ថា ធ្វើ​ការ​ដំណើរ​របស់​លោក កឹម សុខា នៅ​រយៈ​ពេល​ចុង​ក្រោយ​នេះ​មាន​ការ​ចាប់​អារម្មណ៍​ពី​ពលរដ្ឋ និង​អ្នក​សារព័ត៌មាន​នានា។ ប៉ុន្តែ​អ្នកស្រី​ថា ​នេះ​មិនមែន​ជា​ការ​ចម្លែក​ទេ ត្បិត​នេះ​ជា​សិទ្ធិ​របស់​លោក កឹម សុខា។ អ្នកស្រី​បន្ត​ថា ការ​ចេញ​ក្រៅ​​ផ្ទះ លោក កឹម សុខា ពេល​នេះ គឺ​លោក​ចង់​ឃើញ​ការរស់នៅ​របស់​ពលរដ្ឋ និង​ចង់​ស្រូប​យក​ខ្យល់​អាកាស​ខាង​ក្រៅ៖ «

មិន​ទែន​ទៅ​គាត់ (លោក កឹម សុខា) គាត់​មិន​មែន​ទើប​ចាក​ចេញ​នៅ​ពេល​ថ្មីៗ នេះ​បើ​យើង​គិត​សេចក្ដី​សម្រេច​តុលាការ​ដែល​ធ្វើ​ការ​កែប្រែ​កាតព្វកិច្ច​តាម​ផ្លូវ​តុលាការ​ឯកឧត្តម កឹម សុខា ក៏​ធ្លាប់​ម្ដងម្កាល​យូរៗ ចា គាត់​ធ្លាប់​ចេញ​ខាង​ក្រៅ​ផ្ទះ​ដែរ ដើម្បី​មើល​ទេសភាព​ខាង​ក្រៅ​ធម្មតា ជា​ទេ​មនុស្ស​យើង​នៅ​ក្នុង​ផ្ទះ​យូរ​តប់ប្រមល់»

ទោះ​យ៉ាងណា អ្នកឃ្លាំមើល​សង្កេតឃើញ​ថា លោក កឹម សុខា បាន​ធ្វើ​ដំណើរ​ចេញ​ក្រៅ​ផ្ទះ ឬ​ចុះ​តាម​បណ្ដា​ខេត្ត​នានា នៅ​រយៈ​ពេល​ចុង​ក្រោយ​នេះ គឺ​បន្ទាប់​ពី​ឃើញ​លោក​បាន​ទៅ​ចូលរួម​ពិធី​សព​ម្ដាយ​ក្មេក​លោក ហ៊ុន សែន ហើយ​ពេល​នោះ​ក៏​ឃើញ​លោក កឹម សុខា និង​លោក ហ៊ុន សែន ជជែក​គ្នា​មួយ​សន្ទុះ​ធំ​ដែរ ប៉ុន្តែ​រហូត​មក​ដល់​ពេល​នេះ នៅ​មិន​ទាន់​មាន​ភាគី​ណា​មួយ​ទម្លាយ​ឱ្យ​ដឹង​ពី​ការ​សម្ងាត់​នៃ​ការ​សន្ទនា​នោះ​នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល