សារព័ត៌មាន​អន្តរជាតិ លាតត្រដាង​មហិច្ឆតា​ចិន​ចង់​បង្កើត​មូលដ្ឋាន​ទ័ព​​ក្នុង​ប្រទេស​ចំនួន១២ លើ​ពិភពលោក ក្រៅពី ជីបូទី (Djibouti) និង​កម្ពុជា

ដោយ មាន ឫទ្ធិ
2020-09-16
អ៊ីម៉ែល
មតិ
Share
បោះពុម្ព
នាវិកកម្ពុជាធ្វើវន្ទនកិច្ចលើនាវាល្បាតចិនក្នុងអំឡុងពិធីប្រគល់ និងផ្ទេរនាវាល្បាតចិន៩គ្រឿងដល់កម្ពុជា នៅឯមូលដ្ឋានកងទ័ពជើងទឹករាម ខេត្តព្រះសីហនុ ថ្ងៃទី០៧ វិច្ឆិកា ឆ្នាំ២០០៧។
នាវិកកម្ពុជាធ្វើវន្ទនកិច្ចលើនាវាល្បាតចិនក្នុងអំឡុងពិធីប្រគល់ និងផ្ទេរនាវាល្បាតចិន៩គ្រឿងដល់កម្ពុជា នៅឯមូលដ្ឋានកងទ័ពជើងទឹករាម ខេត្តព្រះសីហនុ ថ្ងៃទី០៧ វិច្ឆិកា ឆ្នាំ២០០៧។
Reuters

ទណ្ឌកម្ម​របស់​អាមេរិក​ទៅលើ​ក្រុមហ៊ុន​គ្រប់គ្រង​ដោយ​រដ្ឋ​អំណាច​ចិន ឈ្មោះ UDG ដែល​ពាក់ព័ន្ធ​នឹង​ការរំលោភ​សិទ្ធិ​មនុស្ស​ក្នុង​គម្រោង​វិនិយោគ​នៅ​កម្ពុជា ទទួល​បាន​នូវ​ការចាប់អារម្មណ៍​ខ្លាំង​ពី​សារព័ត៌មាន​អន្តរជាតិ។ តើ​សារព័ត៌មាន​អន្តរជាតិ​ទាំងនោះ បាន​រាយការណ៍ និង​ចុះផ្សាយ​យ៉ាង​ដូចម្ដេច​ខ្លះ​ជុំវិញ​រឿង​នេះ?

សារព័ត៌មាន​របស់​អាមេរិក​ឈ្មោះ ឌឹ វ៉លស្រ៊ីត ជឺរណល (The Wall Street Journal) ដែល​ជា​អ្នក​ទម្លាយ​ព័ត៌មាន​ឲ្យ​ពិភពលោក​ដឹង​មុនគេ​រឿង​រដ្ឋាភិបាល​លោក​នាយករដ្ឋមន្ត្រី ហ៊ុន សែន លួច​ចុះ​កិច្ចសន្យា​យោធា​សម្ងាត់​អនុញ្ញាត​ឲ្យ​ចិន​ប្រើប្រាស់​មូលដ្ឋាន​កងទ័ព​ជើងទឹក​រាម​រយៈពេល​៣០ឆ្នាំ​នោះ ផ្សាយ​ពាក់ព័ន្ធ​នឹង​រឿង​អាមេរិក​ដាក់​ទណ្ឌកម្ម​ក្រុមហ៊ុន​ចិន UDG ដែល​ជា​អ្នក​អនុវត្ត​ផែនការ​សម្ងាត់​នេះ​ថា ជា​ដំណាក់កាល​ថ្មី​មួយ​នៅ​ក្នុង​កិច្ច​ខិតខំ​ប្រឹងប្រែង​របស់​សហរដ្ឋអាមេរិក​ដាក់​សម្ពាធ​ទៅលើ​ក្រុមហ៊ុន​ចិន ដែល​ជួយ​ពង្រីក​មហិច្ឆតា​យោធា​ឲ្យ​ប្រទេស​ចិន​នៅ​លើ​ពិភពលោក។ សារព័ត៌មាន​នេះ បាន​ដកស្រង់​របាយការណ៍​ប្រចាំ​ឆ្នាំ​របស់​មន្ទីរ​បញ្ចកោណ ឬ​ក្រសួង​ការពារ​ជាតិ​អាមេរិក ដាក់​ជូន​ទៅ​រដ្ឋសភា​អាមេរិក កាលពី​ដើម​ខែកញ្ញា ថា ផ្នែក​មួយ​នៃ​យុទ្ធសាស្ត្រ​របស់​ចិន​ដើម្បី​ប្រជែង​អំណាច​ជាមួយ​សហរដ្ឋអាមេរិក​ឲ្យ​បាន​សម្រេច​ត្រឹម​ពាក់​កណ្ដាល​សតវត្ស​ទី២១​នេះ គឺ​ផែនការ​នៃ​ការបង្កើត​មូលដ្ឋាន​ទ័ព​របស់​ខ្លួន​នៅ​ក្រៅ​ប្រទេស​សម្រាប់​ជួយ​ដល់​កងទ័ព​ជើងគោក និង​ជើង​អាកាស​របស់​ខ្លួន។ របាយការណ៍​របស់​ក្រសួង​ការពារ​ជាតិ​អាមេរិក​ថា ក្រៅតែ​ពី​មាន​មូលដ្ឋាន​ទ័ព​នៅ​ប្រទេស​ជីបូទី(Djibouti) នៅ​ទ្វីប​អាព្រិក និង​ផែនការ​ដាក់​មូលដ្ឋាន​ទ័ព​របស់​ចិន​នៅ​កម្ពុជា​នោះ ចិន​ក៏​ទំនងជា​ពិចារណា​ដាក់​មូលដ្ឋាន​ទ័ព​នៅ​ក្នុង​ប្រទេស​ចំនួន១២ ផ្សេងទៀត នៅ​ទ្វីប​អាស៊ី អាព្រិក និង​នៅ​តំបន់​មជ្ឈិមបូព៌ា ស្រប​ពេល​ដែល​ប្រទេស​ចិន​មាន​រួច​ជាស្រេច​នូវ​គម្រោង​ហេដ្ឋារចនាសម្ព័ន្ធ​នៅ​ក្នុង​ប្រទេស​ជាច្រើន​នោះ។

សារព័ត៌មាន​ដដែល​នេះ បាន​ស្រង់​ប្រសាសន៍​របស់​មន្ត្រី​ជាន់ខ្ពស់​អាមេរិក​មួយ​រូប​ដែល​ថា ឥឡូវ​មហិច្ឆតា​យោធា​របស់​ចិន​នេះ លែង​ជា​មហិច្ឆតា​ប្រចាំ​តំបន់​ទៀតហើយ ក៏ប៉ុន្តែ ក្លាយ​ជា​មហិច្ឆតា​ប្រចាំ​សាកលលោក​តែម្តង។ សារព័ត៌មាន​ដដែល​នេះ​រាយការណ៍​ថា ក្រុមហ៊ុន​គ្រប់គ្រង​ដោយ​រដ្ឋ​អំណាច​ចិន UDG នេះឯង គឺ​ជា​អ្នក​អនុវត្ត​គម្រោង​ដ៏​សកម្ម​ឲ្យ​ប្រទេស​ចិន ក្នុង​ការ​បង្កើត​មូលដ្ឋាន​កងទ័ព​របស់​ចិន​នៅ​លើ​ទឹកដី​កម្ពុជា​នេះ។ សារព័ត៌មាន​នេះ ឲ្យ​ដឹង​ដែរ​ថា កាលពី​ខែសីហា ក្រសួង​ពាណិជ្ជកម្ម​អាមេរិក​បាន​ចាត់​វិធានការ​ប្រឆាំង​ក្រុមហ៊ុន​ចិន​សរុប​ជាង២០​ក្រុមហ៊ុន ដែល​ភាគច្រើន​សុទ្ធ​តែ​ជា​ក្រុមហ៊ុន​បុត្រ​សម្ព័ន្ធ ឬ​ក្រុមហ៊ុន​តូចៗ​បង្កើត​ឡើង​ដោយ​ក្រុមហ៊ុន​មេ​គ្រប់គ្រង​ដោយ​រដ្ឋអំណាច​ចិន ឈ្មោះ China Communications Construction Co. (ឬ CCCC) ដែល​ក្រុមហ៊ុន CCCC នេះ ក៏​កំពុង​ប្រតិបត្តិការ​យ៉ាង​សកម្ម​នៅ​ក្នុង​ប្រទេស​កម្ពុជា​ផងដែរ។

ដោយឡែក សារព័ត៌មាន សោដ៏ ឆាយណា មរនីង ផុស (South China Morning Post) របស់​មហាសេដ្ឋី​ចិន​លោក ចេក ម៉ា (Jack Ma) ដែល​ជា​ម្ចាស់​ក្រុមហ៊ុន​អាលីបាបា (Alibaba) បាន​ស្រង់​ប្រសាសន៍​អ្នកវិភាគ​ប្រចាំ​ក្រុមហ៊ុន RWR Advisory Group អ្នកស្រី ខតនីយ៍ ហាល់ស៍ (Courtney Hulse) ដែល​តាមដាន​ការវិនិយោគ​របស់​ចិន​នៅ​ជុំវិញ​ពិភពលោក​ថា តាម​ការប៉ាន់ស្មាន ប្រទេសចិន បាន​វិនិយោគ​ទឹកប្រាក់​សរុប​ចំនួន​ជាង ៣៤ (៣៤,១) ពាន់លាន​ដុល្លារ​អាមេរិក​នៅ​ក្នុង​ប្រទេស​កម្ពុជា ចាប់​តាំង​ពី​ឆ្នាំ២០១៣​មក។ សារព័តមាន​ដដែល​នេះ ក៏​បាន​ដកស្រង់​ខ្លឹមសារ​នៃ​របាយការណ៍​មួយ​ទើប​នឹង​ចេញ​ផ្សាយ​កាលពី​សប្ដាហ៍​មុន​ដោយ​វិទ្យាស្ថាន​ស្រាវជ្រាវ​គោលនយោបាយ​មួយ​ឈ្មោះAsia Society Policy Institute ដែល​បាន​សរសេរ​ថា វត្តមាន​របស់​យោធា​ចិន​នៅ​តំបន់​តារាសាគរ​នៃ​ប្រទេស​កម្ពុជា អាច​រួម​គ្នា​ជាមួយ​ទីតាំង​យោធា​របស់​ចិន​ដ៏ទៃ​ទៀត​ក្នុង​តំបន់​សមុទ្រ​ចិន​ខាងត្បូង ​ដើម្បី​បង្កើត​ឲ្យ​បាន​ជា​បរិវេណ​យោធា​ដ៏​សំខាន់​ជុំវិញ​តំបន់​សមុទ្រ​ចិន​ខាងត្បូង។ របាយការណ៍​សរសេរ​បន្តថា ក្នុង​កម្រិត​ទាប​បំផុត ទីតាំង​ប្រើប្រាស់​បាន​គោលដៅ​ទ្វេ​នៅ​កម្ពុជា​នេះ អាច​ពង្រីក​សមត្ថភាព​របស់​កងទ័ព​ជើងអាកាស និង​កងទ័ព​ជើងគោក​ចិន ដើម្បី​ធ្វើ​ឲ្យ​អន្តរាយ​ដល់​យោធា​របស់​អាមេរិក ឬ​ប្រទេសជិតខាង​បាន។ កាសែត​​នេះ​​បាន​ស្រង់​សម្តី​អ្នក​វិភាគ​ដដែល​ថា ចំណាត់ការ​របស់​រដ្ឋាភិបាល​អាមេរិក​ប្រឆាំង​នឹង​ក្រុមហ៊ុន​ចិន​ដែល​ជាប់​ពាក់ព័ន្ធ​នឹង​គម្រោង​ខ្សែក្រវ៉ាត់ និង​ផ្លូវ ឬ BRI របស់​ចិន​នេះ ទំនង​ជា​អាច​នឹង​មាន​ច្រើន​តទៅទៀត​នៅ​រយៈពេល​ប៉ុន្មាន​ខែ​ខាងមុខនេះ។ អ្នកស្រីថា គម្រោង​អភិវឌ្ឍន៍​របស់​ក្រុមហ៊ុន​ចិនUDG នេះ​បាន​នាំ​ឲ្យ​មាន​កង្វល់​អំពី​ការបម្លែង​សម្រាប់​យក​ទៅ​បម្រើ​ឲ្យ​គោលដៅ​យោធា ជាពិសេស​នៅ​កំពង់ផែ​កោះកុង ដែល​មាន​សេចក្តីរាយការណ៍​នានា​មកថា មាន​ការយាមកាម​ពី​សំណាក់​ក្រុម​យោធា ​និង​ទាហ៊ាន​នៅ​ទីតាំង​នោះ។ អ្នកស្រីថា ជា​រួម គោលដៅ​នៃ​គម្រោង​កំពង់ផែ និង​គម្រោង​នៅ​ជុំវិញ​ទីតាំង​នោះ បាន​នាំ​ឲ្យ​មាន​អាថ៌កំបាំង​ច្រើន។

រីឯ ភ្នាក់ងារ​ព័ត៌មាន អេ.ភី (AP) របស់​អាមេរិក បាន​ស្រង់​សម្ដី​មន្ត្រី​អាមេរិកាំង​មួយ​រូប ជា​ឧបការី​ក្រសួង​ការបរទេស​អាមេរិក គឺ​លោក ដេវីធ ស្ទីលវែល (David Stilwell) ដែល​បាន​ចោទ​ប្រទេស​ចិន​ថា កំពុង​ប្រើប្រាស់​វិធីសាស្ត្រ​បែប​បងធំ និង​មិន​ស្មោះត្រង់​ក្នុងការ​ដោះស្រាយ​បញ្ហា​នានា​ជាមួយ​ក្រុម​ប្រទេស​នៅ​តំបន់​អាស៊ីអាគ្នេយ៍។ ភ្នាក់ងារ​ព័ត៌មាន​ដដែល​នេះ ក៏​បាន​ស្រង់​ប្រសាសន៍​សកម្មជន​បរិស្ថាន​កម្ពុជា លោក អ៊ូច ឡេង ដែល​លោក​ថា វិធានការ​របស់​សហរដ្ឋអាមេរិក​នា​ពេល​នេះ កើតមាន​ឡើង​រាង​ដូច​ជា​យឺត​ពេល​ទៅ​ហើយ ក្រោយ​ពី​មាន​ករណី​អំពើ​ឃាតកម្ម​មកលើ​មេដឹកនាំ​ការតវ៉ា​សិទ្ធិ​ដីធ្លី សកម្មជន​ព្រៃឈើ ស្របពេល​ដែល​ធនធាន​ធម្មជាតិ និង​ជីវភាព​រស់​នៅ​ប្រចាំ​ថ្ងៃ​របស់​ពលរដ្ឋ​កម្ពុជា ក៏​កាន់តែ​ហិនហោច និង​ទទួល​រង​នូវ​ការលំបាក​ខ្លាំង។

ក្រសួង​រតនាគារ​អាមេរិក ប្រកាស​ដាក់​ទណ្ឌកម្ម​លើ​ក្រុមហ៊ុន​គ្រប់គ្រង​ដោយ​រដ្ឋអំណាច​ចិន ឈ្មោះ Union Development Group ឬ​ UDG កាលពីថ្ងៃទី១៥ ខែ​កញ្ញា ឆ្នាំ​២០២០។
ក្រសួង​រតនាគារ​អាមេរិក ប្រកាស​ដាក់​ទណ្ឌកម្ម​លើ​ក្រុមហ៊ុន​គ្រប់គ្រង​ដោយ​រដ្ឋអំណាច​ចិន ឈ្មោះ Union Development Group ឬ​ UDG កាលពីថ្ងៃទី១៥ ខែ​កញ្ញា ឆ្នាំ​២០២០។ Screenshot

ជុំវិញ​ករណី​ក្រសួង​រតនាគារ​អាមេរិក បាន​លើកឡើង​ពី​កង្វល់​ដោយសារ​តែ​ប្រសាសន៍​របស់​លោក ផៃ ស៊ីផាន ដែល​ធ្លាប់​និយាយ​ទៅ​កាន់​ប្រព័ន្ធ​ផ្សព្វផ្សាយ​ថា តំបន់​តារាសាគរ​នេះ អាច​បម្លែង​ទៅជា​មូលដ្ឋាន​យោធា​នោះ ភ្នាក់ងារ​សារព័ត៌មាន រ៉យទ័រ (Reuters) របស់​អង់គ្លេស បាន​ដកស្រង់​អត្ថបទ​មួយ​ចុះ​ផ្សាយ​ដោយ​ព័ត៌មាន ប្លូមប៊ឺក ញ៉ូវស៍ (Bloomberg News) របស់​អាមេរិក​ ដែល​លោក ផៃ ស៊ីផាន បាន​និយាយ​ថា តំបន់​តារាសាគរ​គឺ​សម្រាប់​បម្រើ​ឲ្យ​គោលដៅ​ស៊ីវិល គ្មាន​មូលដ្ឋាន​យោធា​នោះទេ។ ក៏ប៉ុន្តែ លោក​បន្ត​ថា ជា​ការត្រឹមត្រូវ​ហើយ ដែល​តំបន់​នេះ​អាច​ត្រូវ​បាន​បម្លែង​ទៅ​ធ្វើជា​អ្វីផ្សេង​ទៀត​ក៏បាន​ដែរ។

ភ្លាមៗ​ក្រោយ​ពី​ក្រសួង​រតនាគារ​អាមេរិក​ប្រកាស​ដាក់​ទណ្ឌកម្ម​លើ​ក្រុមហ៊ុន​ចិន UDG នេះ​មក រដ្ឋមន្ត្រី​ការបរទេស​អាមេរិក លោក ម៉ៃខល ផមផេអូ (Michael Pompeo) សរសេរ​នៅ​លើ​ទំព័រ​ទ្វីតធ័រ​ផ្លូវការ​របស់​លោក​ថា សហរដ្ឋ​អាមេរិក​នឹង​មិន​អត់​អោន​ដល់​សកម្មភាព​ទាំងឡាយ​ណា​ដែល​ប្រឆាំង​នឹង​ពលរដ្ឋ​ស្លូតត្រង់ ហើយ​ថា សហរដ្ឋ​អាមេរិក​នឹង​តែងតែ​ឈរ​នៅ​ជាមួយ​ប្រជាពលរដ្ឋ​កម្ពុជា​ជានិច្ច។ ទន្ទឹម​នឹង​នោះ ក្រសួង​ការបរទេស​អាមេរិក ក៏​បាន​ចេញ​ផ្សាយ​សេចក្ដីថ្លែងការណ៍​ គូសបញ្ជាក់​ថា ចំណាត់ការ​របស់​អាមេរិក​នា​ពេល​នេះ បង្ហាញ​ឲ្យ​ឃើញ​ពី​របៀប​ដែល​បក្ស​កុម្មុយនិស្ត​ចិន ប្រើប្រាស់​ក្រុមហ៊ុន​ឯកជន​ដើម្បី​ពង្រីក​ឥទ្ធិពល​របស់​ខ្លួន ដោយ​រួម​មាន​ទាំង​តាមរយៈ​ការធ្វើការ​ជាមួយ​មន្ត្រី​ពុករលួយ ក្នុងការ​ប្រើប្រាស់​កងកម្លាំង​យោធា​ប្រឆាំង​ទៅលើ​ពលរដ្ឋ​ស្លូតត្រង់​ក្នុងគោល​ដៅ​ច្បាស់​ក្រឡែត​ដើម្បី​ទទួល​បាន​នូវ​ផល​ចំណេញ​ហិរញ្ញវត្ថុ​ដោយ​ខុសច្បាប់។ រដ្ឋមន្ត្រី​ការបរទេស​អាមេរិក ថ្លែង​ក្នុង​សេចក្តីប្រកាស​ព័ត៌មាន​នោះ​ថា មាន​សេចក្តីរាយការណ៍​គួរ​ឲ្យ​ទុកចិត្ត​បាន​ថា គម្រោង​អភិវឌ្ឍន៍​នៅ​តំបន់​តារាសាគរ​នេះ អាច​ត្រូវ​យក​ទៅ​ប្រើប្រាស់​ជា​ទីតាំង​មូលដ្ឋាន​យោធា​របស់​សាធារណរដ្ឋ​ប្រជាមានិត​ចិន។ លោក​សង្កត់​ធ្ងន់​ថា បើ​មាន​រឿងរ៉ាវ​ដូច្នេះ​មែន នោះ​ការធ្វើ​ដូច្នេះ​នឹង​ផ្ទុយ​ពី​រដ្ឋធម្មនុញ្ញ​របស់​កម្ពុជា ហើយ​អាច​គំរាម​កំហែង​ដល់​ស្ថិរភាព​ក្នុង​តំបន់​ឥណ្ឌូ-ប៉ាស៊ីហ្វិក អាច​ប៉ះពាល់​ដល់​អធិបតេយ្យ​កម្ពុជា និង​សន្តិសុខ​របស់​សម្ព័ន្ធមិត្ត​អាមេរិក​ផងដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល