លោក សម រង្ស៊ី ថា របប​ភ្នំពេញ​មិន​ផ្ដល់​អាទិភាព​ដល់​ការ​អប់រំ ទើប​មិន​គិតគូរ​រក​វិធី​បើក​សាលារៀន​ដូច​ប្រទេស​ជិតខាង

ដោយ សុជីវី
2020.07.26
សម រង្ស៊ី ហ៊ុន សែន លោក ហ៊ុន សែន នាយករដ្ឋមន្ត្រី និង​លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
រូប៖ ហ្វេសប៊ុក​លោក ហ៊ុន សែន និង​លោក សម រង្ស៊ី

លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ​ចោទ​ប្រកាន់​ការ​ដឹកនាំ​របស់​លោក នាយករដ្ឋមន្ត្រី ហ៊ុន សែន ថា មិនបាន​ផ្ដល់​អាទិភាព​ដល់​ការ​អប់រំ​ទេ ផ្ទុយ​ទៅវិញ​របប​នេះ​យកចិត្តទុកដាក់​តែ​ទៅលើ​វិស័យ​ណា ដែល​ផ្ដល់​សំណូក​សូកប៉ាន់​ដល់​ក្រុម​អ្នកដឹកនាំ ដែល​ពុក​រលួយ។

លោក សម រង្ស៊ី បាន​សរសេរ​បែបនេះ​នៅលើ​ទំព័រ​ហ្វេសប៊ុក (Facebook)​របស់លោក នៅ​ថ្ងៃទី​២៥ ខែ​កក្កដា ហើយ​ថែមទាំង​បាន​លើក​ឧទាហរណ៍​ពី​ការប្រឹងប្រែង​បើក​សាលារៀន​របស់​ប្រទេស​ជិតខាង​មាន​៖ ប្រទេស​វៀតណាម និង​ថៃ​ជាដើម។

ប្រធានស្ដីទី​គណបក្ស​ស​ង្គ្រោះ​ជាតិ​រូបនេះ ចោទ​សួរថា តើ​ចាំ​អី​ទៀត បើក​សាលារៀន​ជាទូទៅ​ឡើងវិញ នៅ​កម្ពុជា​? លោក​ថា នៅ​ប្រទេស​វៀតណាម សាលារៀន បាន​បើក​ឡើងវិញ​ជាទូទៅ តាំង​ពី​ដើម​ខែឧសភា ម្ល៉េះ​។ នៅ​ប្រទេស​ថៃ សាលារៀន​បាន​បើក​ឡើងវិញ​ជាទូទៅ ចាប់ពី​ដើមខែ​កក្កដា​នេះ​។ លោក​បន្ត​ទៀត​ថា ប្រព័ន្ធ​អប់រំ​មិនមែន​ជា​អាទិភាព នៃ​របប ហ៊ុន សែន ទេផ្ទុយទៅវិញ​របប​នេះ បន្ត​ឱ្យ​បើក​តែ​រោងចក្រ និង​បន​ល្បែងស៊ីសង​កាស៊ីណូ​ដែល​ផ្តល់​សំណូក​សូកប៉ាន់ ឱ្យ​ថ្នាក់ដឹកនាំ​ពុករលួយ​។ លើសពីនេះ​លោក​ថា របប​បច្ចុប្បន្ននេះ​មិន​ចង់​ឱ្យ​ប្រជាពលរដ្ឋ មានការ​យល់ដឹង​ខ្ពស់​ទេ ដើម្បី​ពួក​ជន​ផ្តាច់ការ អាច​ងាយ​គ្រប់គ្រង​ប្រទេស​មួយ ដែល​ប្រជាពលរដ្ឋ មិន​មានការ​យល់ដឹង​ច្រើន​។ លោក​ថា នៅ​កម្ពុជា អ្នកដឹកនាំ​កំពុង​ប្រើ​ធម៌​ក្តៅ​៣​យ៉ាង ៖ ខ្លាច ឃ្លាន ខ្លៅ។

អាស៊ីសេរី​នៅ​មិនទាន់​អាច​សុំ​ការឆ្លើយតប​រឿងនេះ​ពី​អ្នកនាំពាក្យ រដ្ឋាភិបាល លោក ផៃ ស៊ី​ផាន បាន​នៅ​ឡើយ​ទេ។

អ្នកនាំពាក្យ​គណបក្ស​កាន់អំណាច លោក សុខ ឥសាន លើកឡើង​ថា រដ្ឋាភិបាល​ដែល​ដឹកនាំ​ដោយ​គណបក្ស​ប្រជាជន​កម្ពុជា​តែង​តែង​ផ្ដល់​អាទិភាព​ដល់​ការអប់រំ​មិន​ដូច​ការលើកឡើង​របស់​លោក សម រង្ស៊ី ឡើយ​។ ផ្ទុយ​ទៅវិញ រដ្ឋាភិបាល​កំពុង​គិតគូ​សុវត្ថិភាព​ពលរដ្ឋ និង​សិស្សសាលា​ជា​អាទិភាព«បើ​សិស្សៗ​ស្លាប់​អស់ ឬ​ឆ្លង​កូវីដ​ច្រើន សួរថា​តើ​វិស័យ​អប់រំ​វា​រីកចម្រើន​ទេ​? អាហ្នឹង​ហើយ​វា​គ្រាន់តែ​ជា​ល្បិចកល​ដាក់​អន្ទាក់​រាជរដ្ឋាភិបាល ថា ទៅ​ក្រែង​រដ្ឋាភិបាល​ធ្វើតាម​ខ្លួន ដល់ពេល​ចម្លង​សិស្ស​ទៅ​គេ​ថា​ទៀត​ថា ហ្នឹង​ពី​យើង​អត់​ស្រឡាញ់ អត់​យកចិត្តទុកដាក់​លើក​កម្ពស់​វិស័យ​អប់រំ​សិក្សាធិការ​ហ្នឹង ហើយ​បានជា​ឱ្យ​សិស្ស​ឆ្លង​អ៊ីចឹង​ហើយ​បានជា​រាជរដ្ឋាភិបាល​ផ្អែក​ទៅ​លើ​សភាពការណ៍​ជាក់ស្ដែង​ឱ្យ​ជា​ជំហានៗ​។ ក្នុងពេល​ឆាប់ៗ​ខាងមុខនេះ នឹង​ឱ្យ​២០​សាលា​ឯកជន​ដែល​គេ​មាន​លក្ខណៈ​អនាម័យ​ប្រសើរ​ខ្ពស់​ជាងគេ​។ អ៊ីចឹង​ឱ្យ​អា​ប្រសើរ​ខ្ពស់​ជាងគេ​ខាង​អនាម័យ​ចូល​មុន ហើយ​ដក​ពិសោធន៍​មួយ​រយៈពេលមើល​ថា តើ​២០​សាលា ដែល​បាន​ចូលទៅ វា​មាន​ផលប៉ះពាល់​អី​ខ្លះ​?​វា​ជួប​បញ្ហា​អី​ខ្លះ អ៊ីចឹង​បាន​ជំហាន​ទី​២ និង​ទី​៣​នឹង​មាន​តទៅទៀត»

ក្រសួង​អប់រំ យុវជន និង​កីឡា បាន​ប្រកាស កាលពី​ថ្ងៃទី​២១ ខែកក្កដា នឹង​ឱ្យ​គ្រឹះស្ថានសិក្សា​ឯកជន​ចំនួន​២០ សាកល្បង​ដំណើរការ​ដំណាក់កាល​ទី​១ នៅ​ខែសីហា​ខាងមុខនេះ នៅ​ខេត្ត​បាត់ដំបង សៀមរាប និង​ក្រុងភ្នំពេញ ដោយសារតែ​សាលា​ទាំងអស់នោះ អាច​គោរព​តាម​ការណែនាំ​របស់ ក្រសួង​សុខាភិបាល​ចំពោះ​ការ​បង្ការ​ជំងឺ covid-19 បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។