រដ្ឋមន្ត្រីក្រសួងមហាផ្ទៃ លោក ស ខេង ប្រកាសឱ្យអាជ្ញាធរគ្រប់ខេត្តចាត់វិធានការជាបន្ទាន់ ចំពោះជនទាំងឡាយណាដែលមានសកម្មភាពញុះញង់ឱ្យប្រជាពលរដ្ឋធ្វើបដិវត្តទម្លាក់រដ្ឋាភិបាលក្រុងភ្នំពេញ។ សកម្មជនបក្សប្រឆាំង ចាត់ទុកការលើកឡើងរបស់លោក ស ខេង នេះ ថា ជាការបំភិតបំភ័យដល់ប្រជាពលរដ្ឋ ដើម្បីកុំឱ្យចូលរួមធ្វើនយោបាយជាមួយគណបក្សសង្គ្រោះជាតិ។
ក្នុងពិធីប្រកាសបិទសន្និបាតបូកសរុបលទ្ធផលការងារប្រចាំឆ្នាំ២០១៩ និងទិសដៅការងារឆ្នាំ២០២០នៅរាជធានីភ្នំពេញ នៅរសៀលថ្ងៃទី២៧ កុម្ភៈ លោក ស ខេង ដែលកាន់តំណែងរដ្ឋមន្ត្រីក្រសួងមហាផ្ទៃជិត៣០ឆ្នាំហើយនោះ បន្តចោទគណបក្សប្រឆាំងថា នៅតែមានគម្រោងធ្វើបដិវត្តពណ៌ផ្ដួលរំលំរដ្ឋាភិបាលរបស់លោកនៅឡើយទេ។ លោក ស ខេង ដែលក្រុមសង្គមស៊ីវិលជាតិ និងអន្តរជាតិធ្លាប់សរសើរថា ប្រកាន់នយោបាយកណ្ដាល មិនតឹងតែងនិយមពេកនោះ បានប្រកាសឱ្យអាជ្ញាធរក្រោមឱវាទគ្រប់ខេត្តរាជធានី ត្រូវចាត់វិធានភ្លាមៗ ចំពោះក្រុមជនទាំងឡាយ ដែលមានសកម្មជនញុះញង់ឱ្យចូលរួមធ្វើបដិវត្តពណ៌ បង្កអសន្តិសុខនៅក្នុងសង្គម៖ «ខ្ញុំគិតថា យើងក៏មិនត្រូវភ្លេចខ្លួន ព្រោះថាសកម្មភាពបដិវត្តន៍ពណ៌នេះគឺគេតែងធ្វើអាជីវកម្មលើចំណុចខ្សោយរបស់យើង បើគេរកចំណុចខ្សោយរបស់យើងមិនឃើញជាដុំកំភួនទេ គេក៏គ្មានលេស ដើម្បីនឹងចលនាកៀរគរ កម្លាំងប្រជាជនដើម្បីចូលរួមក្នុងការធ្វើបដិវត្តន៍ពណ៌នេះដែរ»។
មន្ត្រីគណបក្សប្រឆាំងបានប្រតិកម្មនឹងការលើកឡើងរបស់ថ្នាក់ដឹកនាំរដ្ឋាភិបាលរូបនេះថា ជាការព្រួយបារម្ភហួសហេតុ និងគ្មានមូលដ្ឋាន។
សមាជិកក្រុមការងារខេត្តកណ្ដាលរបស់គណបក្សសង្គ្រោះជាតិ ដែលកំពុងភៀសខ្លួននៅក្រៅប្រទេសលោក សឹម សុភា ថ្លែងថា ពួកលោកនៅតែបន្តបង្ហោះសារតាមហ្វេសប៊ុកជំរុញឱ្យប្រជាពលរដ្ឋក្នុងស្រុកចូលរួមជាមួយគណបក្សសង្គ្រោះជាតិទាមទារឱ្យរដ្ឋាភិបាលឯកបក្សស្ដារប្រជាធិបតេយ្យឡើងវិញដដែល។ លោកបញ្ជាក់ថា កន្លងទៅគណបក្សប្រឆាំងតែងគោរពច្បាប់ និងគោលការណ៍ប្រជាធិបតេយ្យជានិច្ច ប៉ុន្តែរដ្ឋាភិបាលទៅវិញទេដែលបំផ្លាញប្រជាធិបតេយ្យនោះ ហើយបែរលាបពណ៌គណបក្សប្រឆាំង និងអ្នករិះគន់ទៅវិញ៖ «ពីព្រោះយើងមិនទាន់បានការផ្លាស់ប្ដូរទេ ហើយឥឡូវហ្នឹងជិតដល់បោះឆ្នោតឃុំសង្កាត់ទៀតហើយ ហើយមិនទាន់បានគណបក្សយើងមកវិញផងហ្នឹង ។ ជាក់ស្ដែងតុលាការដែលកាត់ក្ដីលោកប្រធាន កឹម សុខា ក៏ជាតុលាការសម្ដែងឆាកល្ខោន ដែលចេះតែអូសបន្លាយពេលវេលា។ ព្រោះជាគោលដៅរបស់គណបក្សប្រជាជនគាត់ចង់អូសដល់ពេលបោះឆ្នោតជ្រើសតំណាងរាស្ត្រ តែក្នុងនាមយើងជាអ្នកនយោបាយអត់ចង់ឱ្យពន្យារពេលទៅមុខទៀតទេ»។
អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល (COMFREL) លោក កន សាវាង្ស លើកឡើងថា សកម្មភាពរបស់ក្រុមអ្នកគាំទ្របក្សប្រឆាំងកន្លងទៅ ពុំមែនជាសកម្មភាពធ្វើបដិវត្តន៍ពណ៌អ្វីនោះទេ ពីព្រោះជាការសម្ដែងមតិ ផ្នែកនយោបាយដោយស្របច្បាប់ ដែលមានកំណត់នៅក្នុងរដ្ឋធម្មនុញ្ញ៖ «ពីព្រោះកាលណាការតស៊ូផ្នែកនយោបាយរបស់គេដែលគេគិតថា មានភាពអយុត្តិធម៌គេ អាចមានសិទ្ធិក្នុងការទាមទារទៅផ្លូវច្បាប់ និងការតវ៉ា ដើម្បីរកហេតុរកផលរបស់គេ វាជារឿងធម្មតាក្នុងផ្នែកនៃនយោបាយប្រទេសប្រជាធិបតេយ្យ»។
លោកបន្ថែមថា បញ្ហាសកម្មជនបក្សប្រឆាំងបន្តភៀសខ្លួននយោបាយទៅក្រៅប្រទេសនោះ ទំនងដោយសារពួកគេមិនពេញចិត្តនឹងរដ្ឋាភិបាលដែលរំលាយគណបក្សសង្គ្រោះជាតិ ហើយប្រមូលយកតំណែងសមាជិកក្រុមប្រឹក្សាឃុំសង្កាត់របស់គណបក្សនេះជាង ៥ពាន់អាសនៈដែលប្រជាពលរដ្ឋបោះឆ្នោតជូន កាលពីឆ្នាំ២០១៧ ទៅចែកគ្នាដែលខុសពីឆន្ទៈរបស់ម្ចាស់ឆ្នោត។ ម្យ៉ាងវិញទៀត ការធ្វើទុក្ខបុកម្នេញ តាមយាយី និងតាមចាប់ខ្លួនអ្នករិៈគន់នោះហើយ ទើបបង្ខំឱ្យពួកគេរត់ទៅសម្ងំនៅក្រៅប្រទេស។
ថ្មីៗនេះប្រធានស្ដីទីគណបក្សសង្គ្រោះជាតិលោក សម រង្ស៊ី បានប្រកាសវិលចូលស្រុកជាថ្មីទៀតនៅក្នុងឆ្នាំ២០២០នេះ ដើម្បីដឹកនាំប្រជាពលរដ្ឋទាមទារឱ្យលោកនាយករដ្ឋមន្ត្រី ហ៊ុន សែន ដើរតាមគន្លងប្រជាធិបតេយ្យឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។