លោក ទៀ បាញ់ រដ្ឋមន្ត្រីក្រសួងការពារជាតិអះអាងថា ទំនាក់ទំនងយោធារវាងប្រទេសកម្ពុជា និងប្រទេសចិនកាន់តែមានភាពល្អប្រសើរ នឹងរឹងមាំពីមួយថ្ងៃទៅមួយថ្ងៃ។
ការលើកឡើងរបស់លោក ទៀ បាញ់ បានកើតឡើងក្រោយពីលោក ដឹកនាំមន្ត្រីជាន់ខ្ពស់ក្រសួងការពារជាតិ និងមន្ត្រីជាន់ខ្ពស់កងរាជអាវុធហត្ថ បានចូលរួមពីធីទទួលទានអាហារពេលល្ងាចនៅស្ថានទូតចិន ក្នុងពីធីគម្រប់ខួប៩៣ ឆ្នាំនៃការបង្កើត កងទ័ពរំដោះប្រជាជនចិន។
លោក ទៀ បាញ់ មានប្រសាសន៍ប្រាប់អាស៊ីសេរីថា កម្មវិធីទទួលទានអាហារនេះបានបង្ហាញពីទំនាក់ទំនងរវាងប្រទេសទាំងពីរ កាន់តែមានភាពរឹងមាំថែមទៀត។
លោកបានបញ្ជាក់ថា លោករំពឹងថា កងទ័ពទាំងពីរ និងបន្តកិច្ចសហប្រតិបត្តិការណ៍គ្នាតទៅមុខទៀត ជាពិសេសលើវិស័យកងទ័ព៖ «ធម្មតាគេទៅចូលរួមដើម្បីអបអរសាទរដែលគេតែងតែធ្វើរបៀបហ្នឹងទូទៅ។ ដូច្នេះសារៈសំខាន់មិនសំខាន់គឺវានៅលើការសំដែងនូវការសាទរ របស់ប្រទេសនីមួយៗ គឺគេតែងតែធ្វើរបៀបហ្នឹង»។
ឯកអគ្គរដ្ឋទូតចិនប្រចាំប្រទេសកម្ពុជា លោក វ៉ាងវិនធៀន (Wang Wentian) មានប្រសាសន៍ប្រាប់ថ្នាក់ដឹកនាំជាន់ខ្ពស់ក្រសួងការពារជាតិកម្ពុជាថា ប្រទេសចិននៅតែ ជាមិត្តដ៏ល្អសម្រាប់កម្ពុជាទាំងរដ្ឋាភិបាលនិងវិស័យកងទ័ពនៃប្រទេសទាំងពីរ។
ទំនាក់ទំនងយោធាជិតស្និទ្ធរបស់កម្ពុជា និងប្រទេសចិននេះ ធ្វើឲ្យអ្នកវិភាគលើកឡើងថា កម្ពុជាកំពុងងាកទៅរកចិនខ្លាំងបណ្ដាលឲ្យចិនមានឥទ្ធិពលទាំងយោធា និងសេដ្ឋកិច្ចនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។